4 Ye-hheev-huav hemv Mov-si gang bov, "Noh, hauf dif lokf baiv fa giangf goouh goonv longf miaf zee meef-loh. Bek ting gee hhoo yi uk booiv, di veenf humv di veenf gee feenh, hauf hau au geef-loh zun meenf zun siuh hauf gee lutf fapf." 5 Doongv haih sok veenf, geef-loh hheem humv bih di veenf gee liauh di fui, humv loouh miaf yif bif maif.

6 Mov-si hemv Yav-lunv hemv too lai gee Yih-seef-liatf lengv-hunf gang bov, "Goomh nooih, meef-loh ziuh huh tih Ye-hheev-huav yin meef-loh lokf lengv Ai-gipf gee uk miaf. 7 Bak zeekf zau, meef-loh itf dingf dif dekf huh Ye-hheev-huav gee yungv yauf, eenv veeih geef hingf heekf meef-loh gang go in geef neeh gee vooi. Hauf-loh tuif gai gee, meef-loh daf in hauf-loh nif?" 8 Mov-si yuh bov, "Veenf yoop, Ye-hheev-huav itf dingf sev nanh zee meef-loh goonv, zauf-zau, itf dingf sev goouh zee meef-loh goonv geemf. Eenv veeih Ye-hheev-huav duf ga hingf heekf go meef-loh in geef neeh gee vooi. Hauf-loh tui gai gee nif? Meef-loh gang go in neeh gee meenf tih in hauf-loh, tih in Ye-hheev-huav."

9 Mov-si hemv Yav-lunv gang bov, "Meef hheem seengv suanv buf gee Yih-seef-liatf lengv-hunf bov, 'Meef-loh hheem doongv dau na Ye-hheev-huav vooi, eenv veeih geef duf ga hingf heekf go meef-loh in geef neeh gee vooi.'"

10 Yav-lunv doongv tif hemv suanv buf gee Yih-seef-liatf lengv-hunf gang go gee tif hoouh, geef-loh zin hau booiv da loouh vooi, dekf huh Ye-hheev-huav gee yungv guang yoou da bah sev geef-loh dekf huh.

11 Ye-hheev-huav zuk Mov-si bov, 12 "Hauf duf ga hingf heekf go lengv-hunf Yih-seef-liatf in-in neeh gee vooi. Meef seengv geef-loh bov, 'Doongv veenf dif yoop gee tif hoouh, meef-loh ziuh itf dingf lai nanh goonv, zauf-zau gee tif hoouh itf dingf lai goouh goonv geemf, teenf hee, meef-loh ziuh huh hauf tih Ye-hheev-huav------meef-loh gee Siangf-dif.'"

13 Doongv veenf dif yoop gee tif hoouh, lai munh gee vinv miaf, ziav lengv geef-loh zap zih-zih neeh gee dik vooi; doongv zauf-zau gee tif hoouh, yoou ningf lengv geef-loh zap zih-zih neeh gee lai namh ngiauh soongf hee. 14 Namh ngiauh neeh soongf hee vau vooi hoouh looif, ziuh lai goouh gee niqf-niq fiakf-fiakf vianf-vianv zing lang teenf hee yoou baiv boongf da loouh gee. 15 Lengv-hunf Yih-seef-liatf gee dekf huh vooi, meenf took geeh gee tih gai gee, ziuh hemv goonf tooi goonf bov, "Neeh gee tih gai gee nooh?" Mov-si seengv geef-loh bov, "Neeh ziuh tih goouh Ye-hheev-huav sev zee meef-loh goonv gee.

16 Ye-hheev-huav teenf hee zuk, 'Meef-loh hheem ziuf di na goonv giau liauh miaf humv, ziuf meef-loh lanf hee giau na hooi gav lanf gee lengv-hunf humv, ziuf yinv hheeuh hhoouf humv di na voon gung seeng.'"

17 Lengv-hunf Yih-seef-liatf gee ziuh ziuf teenf hee huk vooi; lai gee humv liauh, lai gee humv tiu. 18 Seeif looif, oouv goouh miaf liangf gee tif hoouh, humv liauh gee meenf lai teengh, humv tiu gee ya meenf lai hhiat, leeuf na duf tih ziuf toof-too goonv giau liauh miaf humv.

19 Mov-si zuk geef-loh bov, "Naf nee duf meenf zun luf goouh humv-humv neeh gee doongv zauf-zau."

20 Danf tih geef-loh meenf hingf sav Mov-si, lai gee luf feenh hee doongv zauf-zau, geeh gee ziuh fat mingf gooqf vooi. Mov-si ziuh hheei hhif geef-loh.

21 Geef-loh leeuf veenf zauf-zau duf ziuf di na goonv giau liauh miaf humv; da veenf it lun, goouh gee ziuh yungf vooi. 22 Doongv haih sok veenf, geef-loh ziuh humv goouh goonv neeh gee tuangv fuih, di na humv ti gung seeng. Hau bek ting gee zung miaf seengv Mov-si. 23 Mov-si hemv geef-loh gang bov, "Ye-hheev-huav zuk bov, 'Bak zeekf tih An-sikf-veenf, meef-loh hheem gua seengf An-sikf-veenf, gingf baif Ye-hheev-huav. Meef-loh dif ziak gee ziuh ziak, dif hungf gee ziuh hungf, teengh longf gee zung luf doongv zauf-zau.'"

24 Geef-loh ziuh ziuf Mov-si zuk gee, luf teengh longf gee doongv zauf-zau, goouh neeh gee daf meenf gooqf, ya meenf fat mingf. 25 Mov-si bov, "Veenf nooih meef-loh goonv goouh neeh gee lo, eenv veeih veenf nooih gua An-sikf-veenf gingf baif Ye-hheev-huav, meef-loh yoou da loouh itf dingf meenf div lai heekf vooi. 26 Sok veenf meef-loh hhoo yi humv, haih sit veenf tih An-sikf-veenf, yoou neeh veenf hee gai gee duf meenf lai vooi."

27 Haih sit veenf, bek ting gee lai feenh hee uk booiv humv, danf tih gai gee duf meenf div lai heekf. 28 Ye-hheev-huav hemv Mov-si gang bov, "Meef-loh meenf hheeng zun siuh hauf gee gaif mingh hemv lutf fapf, dif doongv gi tif nif? 29 Meef-loh dekf, Ye-hheev-huav sev An-sikf-veenf zee meef-loh, guf seeh haih sok veenf geef sev voon veenf gee goouh goonv zee meef-loh; haih sit veenf meef-loh leeuf na duf hheem zih yoou da lanf, meenf zun lokf lengv toof-too gee uk booiv." 30 Bek ting gee ziuh yoou haih sit veenf hiu sikf vooi.

31 Goouh goonv neeh gee, lanf Yih-seef-liatf mee hhooiv nooiv yam mah naf hee, gooh gee dif di voonf hiang saif, teek mee fiakf-fiakf, hheei vih mee zing bing vianf-vianv sapf liangv gee teenf hee. 32 Mov-si bov, "Ye-hheev-huav teenf hee zuk bov, 'Hheem luf voon gung seeng dikf-dik gee mah naf longf miaf zee leekf lanv meef-loh gee, hau biang geef-loh hhoo yi dekf huh dang siv hauf yin meef-loh lokf lengv Ai-gipf gee uk miaf gee tif hoouh, yoou da loouh sev meef-loh goonv gee goouh.'"

33 Mov-si yam Yav-lunv bov, "Meef oouv eng mee miaf, deengf mah naf voon gung seeng dikf-dik, sunf biang yoou dau na Ye-hheev-huav, luf zee leekf lanv meef-loh gee."

34 Ye-hheev-huav di leeuf zuk Mov-si, Yav-lunv ziuh dif leeuf huk, oouv mah naf gee sunf biang yoou na fapf guif. 35 Lengv-hunf Yih-seef-liatf gee goonv mah naf tee teepf veeif, zi doongv loouh lengv lai lengv-hunf zih gee; ziuh tih zi doongv loouh lengv hemv Gia-noomv giau gaif neeh gee on. 36 Voon gung seeng ziuh tih i eev meeiv eev, i eev meeiv ziuh tih i i fav gee teepf feenv zee it.