2 "Hauf tih Ye-hheev-huav --- meef gee Siangf-dif, hauf gua na yin meef lokf lengv Ai-gipf huk nof neeh hhootf hee uk miaf gua.

3 "Seef hauf vooi, meef meenf zun lai gakf gee tinf.

4 "Meenf zun hooi toof-too hheek gungv, ya meenf zun huk gai gee tiang, zing goh goouh gookf zuangv yoou baiv fa gee, yoou dauf matf gee hemv yoou dooi matf da namh neeh gee teenf hee. 5 Meenf zun hhuih bai tiang neeh gee, ya meenf zun fokf teeh goouh neeh gee, eenv veeih hauf Ye-hheev-huav ---- meef gee Siangf-dif tih zookf tinf hemv hauf duif lipf neeh gee gee. Zookf hauf gee, hauf itf dingf hingv fapf soih geef-loh gee, lokf bef doongv leekf zi doongv tamv ti tooi; 6 dookf hauf, zun siuh gaif mingh hauf gee gee, hauf itf dingf dookf geef-loh, zi doongv senv tooi.

7 "Meenf zun luanf yungh nooiv Ye-hheev-huav --- meef Siangf-dif mee, eenv veeih luanf yungh nooiv Ye-hheev-huav mee gee, Siangf-dif itf dingf dingf soih geef gee.

8 "Meef-loh hheem oov heekf An-sikf-veenf, dekf neeh veenf tih deekf biatf gee veenf hee. 9 Lai sok veenf tif ganv meef hheem hho so huk meef itf siatf gee gongv, 10 danf tih haih sit veenf tih Ye-hheev-huav meef Siangf-dif gee An-sikf-veenf; yoou neeh veenf hee, meef hemv leekf ngif meef gee, leekf nof meef gee hemv suk tengv gee, gangf lengv-hunf nguaif dif zih yoou da heeuv meef neeh gee, gai gee gongv duf meenf zun huk. 11 Eenv veeih Ye-hheev-huav yoou neeh sok veenf neeif soouh fa, matf, hai hemv goouh da ninh gee itf siatf, haih sit veenf ziuh hiu sikf vooi; guf seeh Ye-hheev-huav sev fok zee An-sikf-veenf, dingf neeh veenf hee tih deekf biatf gee veenf hee.

12 "Hheem dookf bef maih, tiangh bef maih, hau biang meef yoou Ye-hheev-huav meef gee Siangf-dif sev meef yoou lengv meef gee goonv lauh.

13 "Meenf zun ga lengv-hunf.

14 "Meenf zun lai bef booiv beeng bef, lai maih booiv beeng maih.

15 "Meenf zun lookf goouh.

16 "Meenf zun huk gev zingf mingv haih vanh.

17 "Meenf zun ham lanf vanh gee; ya meenf zun ham maih vanh gee, leekf nof gee, deei gee luh gee, gangf geef too lai gee itf siatf."

18 Bek ting gee huh sauv loif hoon gee, sauv hooh gee, dianf liap, tiah mee guanf duaih; bek ting gee dekf huh vooi ziuh zung mangf nyan-nyan teenf hee, nyunv yoou looif-looiv nenh. 19 Geef-loh bov Mov-si bov, "Hhuf meef hemv hauf-loh gang go zaix, hauf-loh itf dingf hingf go meef gee; meenf nga biang Siangf-dif hemv hauf-loh gang go, ha zinf hauf-loh daiv mingh."

20 Mov-si bov bek ting gee bov, "Meenf ngah mangf; eenv veeih Siangf-dif longf miaf tih dif au meef-loh, biang meef-loh siangf-siangf gingf vuif geef, meenf famh soih."

21 Neeh tif hoouh, bek ting gee zung nyunv yoou looif-looiv, danf tih Mov-si toof-too booiv ningf lengv yoop hhootf hee vooi, ziuh tih lengv Siangf-dif yoou yoou gee neeh hhootf hee.

22 Ye-hheev-huav bov Mov-si bov, "Meef hheem zuk lengv-hunf Yih-seef-liatf gee bov, 'Meef-loh sin zeef dekf huh hauf lokf baiv fa hemv meef-loh gang go vooi. 23 Meef-loh meenf zun huk gungv gai gee hemv hauf liang goonf, meenf zun hooi toof-too huk gungv gimv gungv ngoonf gee.

24 Meef hheem hooi hauf huk gif hanv bongf mee, yoou baiv ninh oouv teei tuangf gee hianf huk fan gif hemv fingv an gif. Too lai lengv gif nooiv hauf mee longf neeh gee, hauf itf dingf doongv ninh vooi sev fok zee meef. 25 Meef zeekf hooi hauf huk gif hanv dinf mee, meenf zun oouv dinf sakf gua neeh gee miaf huk, eenv veeih meef yoou baiv dinf gee it noov gung gif vooi, ziuh huk gif hanv mee zeq vooi. 26 Meef geen gif hanv hauf mee gee tif hoouh, meenf zun oouv hhapf loiv, ha zinf doh dauf vaf meef gee vooi.'"