2 Vanh huk seeu, meenf zun hemv vanh hongf goonf huk seeu; yoou fapf hingv ya meenf zun hemf moh liauh na lengv-hunf gee if gianf, huk bev gee gianf zingf; 3 ya meenf zun yoou teeh goou goonf neeh gee hongf neef ngah gee.

4 Meef zeekf am heekf nguf dikf yinv meef huf hee ha tih luh geef huf hee booiv sunv sook vooi, meef hheem diuf leengv miaf gauv zee geef. 5 Meef zeekf dekf huh luh dikf yinv meef huf hee eenv veeih iaq goouh haif hhoonv bif zat ling yoou da sunv, meef meenf zun teenf-teenf booiv meenf saf teeh geef, meef hheem hemv luh gee lanf zu hongf goonf teengf goouh hhoonv gee longf.

6 Yoou teeh goou goonf neeh gee, meenf zun eenv veeih lengv-hunf ngah gee, ziuh meenf anf gung ngif duan li. 7 Hheem deuf hingv teeh zooh tiv goou vanh neeh gee; meenf zun ga lengv-hunf meenf lai soih gee hemv lengv-hunf hauf nginf vuiv maif neeh gee, eenv veeih hauf itf dingf meenf oouv lengv-hunf seeu gee huk lengv-hunf maif gee.

8 Vanh oot sinf oot goouh, meef meenf zun oouv; eenv veeih oot sinf oot goouh biang lai lengv-hunf dav bangv gee bin tingf dav lak, ya len lai go lengv-hunf maif gee.

9 Meenf zun hhiv mangf lengv-hunf nguaif dif gee, eenv veeih meef-loh ya ziamf siv zih yoou Ai-gipf gua, huh ziamf siv zih yoou lengv vanh gee vih mee tih di leeuf hee.

10 Lai sok veeif tif ganv meef hheem huk veen niaf, suv ngoh gok gee uif, 11 danf tih haih sit veeif meef hheem biang matf gee hiu sikf, meenf huk veen niaf, biang neef ngah yoou da bek ting meef neeh gee lai goouh goonv; geef-loh goonv teengh longf neeh gee, goouh sangv da veen da niaf gee hhoo yi goonv. Veen fuh hoouv meef gee hemv veen gamh lamv meef gee ya hheem ziuf teenf hee huk.

12 "Lai sok veenf tif ganv meef hheem huk gongv, danf tih haih sit veenf meef hheem hiu sikf, biang teei gee luh gee hhoo yi hiu sikf, ya biang leekf da hhiangh maih nof meef gee hemv lengv-hunf nguaif dif yoou ningf meef neeh gee ya hhoo yi hiu sikf.

13 "Too lai hauf hemv meef-loh gang gee go, meef-loh hheem ziuf booiv huk. Meenf zun hemv gakf gee tinf doouh goouf, ya meenf zun dem nooiv geef-loh gee.

14 "Veeif hee tamv fooif, meef hheem veeih hauf gua ziatf.

15 "Meef hheem gua Seef-hiauf-ziatf, ziuf hauf zuk meef gee, yoou yav bih yef neeh geuf hee dingf gee yitf hhiv, goonv bing meenf lai fauf taf gee sit veenf.

"Meef-loh naf nee duf meenf zun moof leeif-leeiv miaf gingf baif hauf, eenv veeih meef tih yoou neeh geuf hee lokf Ai-gipf uk miaf gee.

16 "Meef hheem gua oouv ngauh gee ziatf yitf mee, ziuh tih suv goouh meef hho so sav yoou da niaf ngau haih it neeh fi gee tif hoouh.

"Yoou tuq veeif meef suv goouh meef hho so sav yoou da niaf neeh gee leengv miaf gee tif hoouh, meef hheem gua suv goouh biang uif gee ziatf yitf mee.

17 Veeif hee tamv fooif, meef too lai gee da hhiangh duf hheem miaf gingf baif Zuh Ye-hheev-huav.

18 "Meef meenf zun oouv baq dungf veetf hianf gif neeh gee hemv bing lai fauf taf gee hongf goonf hianf sev hauf.

"Yoou ziatf yitf gee tif hoouh, ya meenf zun oouv yuf dungf veetf hianf gif neeh gee luf doongv haih ngeeih veenf zauf-zau.

19 "Goouh da niaf meef zuif maif ngau haih it neeh fi hee, meef hheem dai doongv Ye-hheev-huav meef Siangf-dif gee Seengf-dianf vooi.

"Meenf zun oouv noq maih tuangf gee miaf hungf leekf tuangf geef lai gee.

20 Noh, hauf dif faif hian seeh huf hee booiv yoou dau na meef, yoou da sunv boouh huf meef, yin meef doongv lengv hauf hooi meef zunh bif gee neeh hhootf hee. 21 Geef tih hauf faif miaf gee; meef-loh yoou dau na geef hheem nook timv, hheem hingf go geef gee, meenf zun doou geef, zeekf meenf teenf hee, geef itf dingf meenf min sook ngoh meef-loh gee booiv. 22 Meef zeekf hingf go geef gee, ziuf hauf itf siatf too gang gee booiv huk, hauf ziuh dif huk meef suf yinf gee suf yinf, huk meef dikf yinv gee dikf yinv. 23 Hian seeh hauf huf hee dif booiv yoou dau na meef, yin meef loouh lengv lengv-hunf Yaf-mov-lif gee, lengv-hunf Hheef gee, lengv-hunf Bih-lif-sih gee, lengv-hunf Gia-noomv gee, lengv-hunf Si-vuif gee, lengv-hunf Ye-buf-si gee, hauf dif miatf geef-loh inf-inv booiv. 24 Meef meenf zun hhuih bai tinf geef-loh gee, ya meenf zun fukf teeh geef-loh, meenf zun hookf yiangh geef-loh gee, booiv huk geef-loh huk-huk neeh gee, hheem sek tinf geef-loh gee inf-inv booiv, git tiang gungv geef-loh gee zupf booiv. 25 Meef-loh hheem fokf teeh Ye-hheev-huav ---- meef-loh gee Siangf-dif, geef ziuh itf dingf sev fok zee meef-loh, sev loopf mookf zee meef-loh, sev namh zee meef-loh, ya itf dingf lokf da meef-loh seef fingh gee booiv. 26 Yoou lengv meef gee itf dingf meenf lai faih leekf hemv meenf guaf lai leekf gee. Hauf dif biang meef goonv lauh.

27 Hauf itf dingf yoou dau na meef, biang meef huh hauf gee ui ngiamv; too lai meef doongv gee lengv, hauf dif biang lengv-hunf yoou ninh gee yoou dau na meef mangf luanf vooi, hauf ya biang meef too lai gee dikf yinv zung zuanh huf nyi tuq loouh deuf. 28 Hauf dif faif dauh luk gee booiv yoou dau na meef, voouf lengv-hunf Si-vuif gee, lengv-hunf Gia-noomv gee, lengv-hunf Hheef gee lokf dau na meef uk booiv. 29 Hauf meenf hooi yoou veeif hee zee neeif lokf dau na meef voouf geef-loh uk booiv, ha zinf lengv neeh gee leemf vooi, goouh sangv gee liauh uif haih meef. 30 Hauf dif laif-laih voouf geef-loh lokf dau na meef uk booiv, zi doongv lengv-hunf meef gee gav liauh uif, teengf lai tuh lengv neeh hhootf hee miaf huk goonv.

31 Hauf dif dingf lengv meef gee lokf leeuf doongv leeuf, lokf hongv haih zi doongv Feei-lif-sif hai, lokf da loouh zi doongv Iuf-fa-la-tiv hoof nyoo. Hauf dif oouv too lai lengv-hunf zih yoou ninh neeh gee zung gauv loouh moof meef, meef dif voouf geef-loh inf-inv lokf dau na meef uk booiv. 32 Meef meenf zun hemv geef-loh gangf hemv tinf geef-loh gee lipf ye. 33 Meenf zun biang geef-loh zih yoou lengv meef gee, ha zinf geef-loh biang meef deekf zuif hauf. Meef zeekf fokf teeh tinf geef-loh gee, itf dingf biang meef dok loouh tuang vooi.