3 Mov-si longf tiah, oouv Ye-hheev-huav too lai gee mingf lingf hemv gui dingf zung seengv zee bek ting gee hingf. Bek ting gee zung hemv goonf hongf goonf bov, "Ye-hheev-huav zuk gee, hauf-loh zung itf dingf zun siuh." 4 Mov-si oouv Ye-hheev-huav too lai gee mingf lingf zung tia longf miaf vooi.

Haih ngeeih veenf zauf-zau, Mov-si uif miaf, yoou gok tiah huk gif hanv mee, ziuf Yih-seef-liatf gee teepf ngeeih mooqf zi faif lipf teepf ngeeih mooqf hoouv dinf. 5 Mov-si yuh faif leekf hauh tengv Yih-seef-liatf gee booiv hianf fan gif, ya ga leekf hookf teei hianf zee Ye-hheev-huav huk fingv an gif. 6 Mov-si oouv baq gee feenh hee deengf loouh da funf vooi, feenh hee diaqf geen baiv gif hanv vooi. 7 Geef yuh oouv sek lipf ye neeh bun hee miaf, hookf zee bek ting gee hingf. Geef-loh bov, "Ye-hheev-huav zuk gee, hauf-loh zung itf dingf zun siuh itf dingf hingf sav."

8 Mov-si ziuh oouv baq hia yoou baiv huf bek ting gee, bov, "Noh, neeh gee tih baq lipf ye gee, tih Ye-hheev-huav ziuf neeh itf siatf gee mingf lingf hemv meef-loh lipf ye gee zingf gif."

9 Seeif looif, Mov-si hemv Yav-lunv, Nav-tav, Yav-bih-huf, gangf Yih-seef-liatf gee sit teepf na ziangh lauh zung geen tiah vooi. 10 Geef-loh dekf huh Yih-seef-liatf gee Siangf-dif, yoou dauf gok geef zing goh lai lanv boouh sikf gee feev sunv, bangv bang zing fa teenf hee. 11 Geef meenf nyof moof ga hau Yih-seef-liatf neeh hoouf hee; geef zun geef-loh dekf huh geef, yoou dau na geef ya goonv ya maq.

12 Ye-hheev-huav hemv Mov-si gang bov, "Meef hheem geen tiah miaf ningf hauf miaf, hheem zih yoou nooih, hauf dif oouv dinf hhinh hee, ziuh tih oouv dinf hauf tia lutf fapf hemv gaif mingh neeh hhinh hee zee meef, biang meef hhoo yi maiv bek ting gee."

13 Mov-si ziuh hemv ngih moof geef huf hee Ye-su-yaf uif miaf, Mov-si geen tiah Siangf-dif mee vooi. 14 Mov-si zuk ziangh lauh gee bov, "Meef-loh hheem yoou nooih foou, zi doongv hauf-loh leengv ningf meef-loh. Noh, lai Yav-lunv hemv Huf-eev hemv meef-loh yoou ningf goonf, meef-loh naf nee lai teeh goou goonf, hhoo yi div geef-loh."

15 Mov-si geen baiv tiah vooi, lai bah zaqf tiah mee loouh vooi. 16 Ye-hheev-huav gee yungv yauf hengf yoou Si-naiv-san; bah gee zaqf tiah mee sok veenf, haih sit veenf, Ye-hheev-huav yoou da bah yam Mov-si. 17 Ye-hheev-huav gee yungv yauf yoou baiv deng tiah, yoou dauf dav lengv-hunf Yih-seef-liatf gee, zing goh veeif hokf-hokf teenf hee yoou baiv deng tiah. 18 Mov-si loouh da bah, geen baiv tiah vooi. Mov-si luf yoou ninh tee teepf veenf tee teepf goomh.