33
1 Ye-hheev-huav zuk Mov-si bov, "Meef hemv bek ting meef yin lokf Ai-gipf uk miaf neeh gee en teeif hheem luat lengv neeh hhootf hee, geen lengv gua na hauf eef sev Yav-bov-la-hanf, Yih-sav, Yav-gookf neeh hhootf hee; gua na hauf eef geef-loh bov, 'Hauf dif sev lengv neeh hhootf hee zee heeuf daif meef gee.' 2 Hauf dif faif hian seeh yoou dau na meef, voouf lengv-hunf Gia-noomv gee, lengv-hunf Yaf-mov-lif gee, lengv-hunf Hheef gee, lengv-hunf Bih-lif-sih gee, lengv-hunf Si-vuif gee, lengv-hunf Ye-buf-si gee uk booiv, 3 yin meef loouh lengv hhianf-hhianh luangf-luang neeh hhootf hee. Danf tih hauf meenf hemv meef-loh loouh booiv, eenv veeih meef-loh tih bek ting daiv doonv i luaq gee, ha zinf hauf yoou da sunv miatf meef-loh booiv vooi."4 Bek ting gee it hingf heekf siau sikf seeu neeh mee vooi, geef-loh ziuh tiangv timv ngaif tuh, ya meenf lai naf nee dai goouh zoongv luang gee vooi. 5 Ye-hheev-huav bov Mov-si bov, "Meef seengv lengv-hunf Yih-seef-liatf gee bov, 'Meef-loh tih bek ting daiv doonv i luaq gee, hauf zeekf it ziu doongv ningf meef-loh, ziuh itf dingf miatf meef-loh booiv vooi. En teeif meef-loh hheem geq goouh baiv huf zuangv luang neeh gee longf, hauf hau huh gaiv lai di leeuf sih lih meef-loh.'" 6 Guf seeh, lengv-hunf Yih-seef-liatf gee lif hhooiv Heev-liatf-san hoouh looif, ziuh geq goouh baiv huf zuangv luang neeh gee bangf-bang longf vooi.
Mov-si loouh huif mukf
7 Mov-si siangf-siangf tap ziangf mukf mee yoou iah gee uk ninh, lif iah mee looif-looiv, Mov-si yam ziangf mukf neeh mee yam huif mukf hee. Naf nee dif hhuf tooi Ye-hheev-huav gee, hhoo yi booiv ninh vooi tooi. 8 Leeuf fooif Mov-si uk iah booiv huif mukf gee tif hoouh, bek ting gee ziuh zung uif miaf, leeuf na duf nyunv yoou bak deenh ziangf mukf toof-too mee, vook Mov-si, zi doongv geef loouh huif mukf vooi. 9 Mov-si loouh huif mukf gee tif hoouh, hoouv bah mee ziuh longf miaf, hengf yoou na bak deenh huif mukf, Ye-hheev-huav ziuh hemv Mov-si gang go. 10 Bek ting gee dekf huh hoouv bah mee hengf yoou na bak deenh huif mukf, ziuh zung uif miaf, leeuf na duf yoou bak deenh ziangf mukf toof-too gee gingf baif Ye-hheev-huav. 11 Ye-hheev-huav hemv Mov-si doi na goonf gang go, zing goh lengv-hunf hemv feenf yuh gang go teenf hee. Seeif looif, Mov-si leengv da iah vooi, danf tih Ye-su-yaf enf luf yoou huif mukf yoou, Ye-su-yaf tih ngih moof Mov-si huf hee, tih leekf hauh tengv huf hee, leekf da hhiangh Neenf huf hee.
Ye-hheev-huav eef dif hemv bek ting gee hongf goonf booiv
12 Mov-si bov Ye-hheev-huav bov, "Meef zuk hauf daif lingh bek ting neeh gee geen booiv, danf tih meenf seengv hauf bov meef dif faif naf nee hemv hauf hongf goonf booiv. Meef zih lai teenf hee bov gua, 'Hauf ziuf nooiv meef mee took meef, hauf ya vook hhoonv meef.' 13 En teeif meef zeekf vook hhoonv hauf, hhuf meef maiv sunv meef hiuf hee zee hauf, biang hauf hhoo yi took meef, hau biang meef gif zukf vook hhoonv hauf. Hhuf meef oov heekf bek ting neeh gee tih bek ting meef gee."
14 Ye-hheev-huav bov, "Hauf itf dingf sin zeekf hemv meef hongf goonf booiv, biang meef anv timv."
15 Mov-si bov, "Meef zeekf meenf sin zeekf hemv hauf-loh hongf goonf booiv, ziuh meenf ngah yin hauf-loh lokf nooih geen booiv. 16 Zeekf meef meenf hemv hauf-loh booiv, naf nee dif huh meef vook hhoonv hauf hemv bek ting meef gee nif? Hauf-loh hemv bak matf hhiv ha gee minv zukf yuh lai gai gee hhi biatf nif?"
17 Ye-hheev-huav bov Mov-si bov, "Meef gang gee teeh neeh hhinh hee, hauf ya dif booiv huk, eenv veeih hauf vook hhoonv meef, hauf ya ziuf nooiv meef mee took meef vooi."
18 Mov-si bov, "Hhuf meef sev hauf dekf huh meef gee yungv yauf."
19 Ye-hheev-huav bov, "Hauf dif biang meef huh hauf itf siatf gee maif luang, ya dif yoou dau na meef suan goouf nooiv hauf Ye-hheev-huav mee. Hauf dif doi naf nee maif ziuh doi naf nee maif, dif dookf hungh naf nee ziuh dookf hungh naf nee;
20 danf tih meef meenf huh lai na hauf mee, eenv veeih too lai dekf huh na hauf mee gee, duf meenf lai mingh yoou vooi.
21 Ye-hheev-huav bov, "Noh, yoou ningf hauf neeh hhootf hee lai lengv hhootf hee, meef hheem nyunv geen baiv dinf danv vooi. 22 Yungv yauf hauf gee gua booiv gee tif hoouh, hauf itf dingf biang meef loouh da soongh dinf vooi, oouv moof hauf fiangf hee miaf ziav meef loouh, foou hauf gua booiv. 23 Seeif looif hauf suv moof hauf fiangf hee leengv miaf, meef ziuh hhoo yi dekf huh dau looif hauf mee, danf tih meenf dekf lai huh na hauf mee."