4 Mov-si ziuh sakf dinf voon hinh, zing gua na neeh voon hinh teenf hee. Geef zauf-zau uif miaf, ziuf Ye-hheev-huav zuk geef gee, nganv dinf voon hinh geen Si-naiv-san vooi. 5 Ye-hheev-huav lokf da bah longf miaf, hemv Mov-si hongf goonf nyunv yoou ninh, suan goouf nooiv Ye-hheev-huav mee. 6 Ye-hheev-huav lokf dau na Mov-si gua, suan goouf bov, "Ye-hheev-huav, Ye-hheev-huav, tih dookf lengv-hunf sev een dianh zee lengv-hunf gee Siangf-dif, meenf suif finh yianf hhif, meenf huh giauh dookf lengv-hunf gee, meenf huh giauh hhooh hhoouf, 7 dookf senv-senv vanh-vanh gee lengv-hunf, min soih, min sook ngoh, min soih seeu gee. Itf dingf meenf oouv lai soih gee huk meenf lai soih gee, itf dingf dif div soih geef gee, lokf bef doongv leekf doongv lanv, zi doongv tamv ti tooi."

8 Mov-si gan hhuangf hhuih hhupf yoou dauf matf gingf baif, 9 bov, "Zu haf, meef zeekf vook hhoonv hauf, hhuf meef hemv hauf-loh hongf goonf booiv. Tuif yianf bek tingf gee daiv doonv i luaq, danf tih hhuf meef min soih hauf-loh gee hemv hauf-loh gee sook ngoh, ziapf siuf hauf-loh huk bek ting meef gee."

10 Ye-hheev-huav bov, "Noh, hauf dif lipf ye, hauf dif yoou dau na bek ting gee huk hhiv miauf gee teeh, teeh neeh gee tih yoou suanf lengv yoou da too lai gee gok gav meenf huk gua gee. Too lai yoou ningf meef gee minv zukf dif dekf huh Ye-hheev-huav hooi meef huk meenf huh giau tee mangf gee teeh. 11 Hauf veenf nooih zuk meef gee, meef hheem zun siuh. Noh, hauf dif oouv lengv-hunf Yaf-mov-lif gee, lengv-hunf Gia-noomv gee, lengv-hunf Hheef gee, lengv-hunf Bih-lif-sih gee, lengv-hunf Si-vuif gee, lengv-hunf Ye-buf-si gee lokf dau na meef voouf uk booiv. 12 Meef hheem nook timv, meenf zun hemv meef booiv gee neeh hhootf lengv gee lengv-hunf lipf ye, mangf teeh neeh gee yoou da meef-loh tingf tuang vooi. 13 Meef hheem sek gif hanv geef-loh gee booiv, git hhoouv tiang geef-loh gee zupf booiv, damh gungv geef-loh gee booiv. 14 Meef-loh meenf zun bai gakf gee tinf, eenv veeih Ye-hheev-huav tih zookf tinf hemv geef duif lipf neeh gee gee, nooiv geef mee tih zookf tinf hemv geef duif lipf neeh gee gee neeh huf hee.

15 Meenf zun hemv dang dif gee lengv-hunf lipf ye, mangf geef-loh bai gungv geef-loh gee hemv hianf goouh zee gungv geef-loh gee gee tif hoouh, yam meef-loh hemv huk, meef ziuh bif ziuv teef booiv goonv goouh geef-loh faif hooif gua neeh gee. 16 Meef hooi leekf meef gee oouv leemf leekf geef-loh gee huk maih, leemf leekf geef-loh gee bai gungv geef-loh gee tif hoouh, biang leekf meef gee ya di moh geef-loh booiv bai gungv geef-loh gee.

17 Meef meenf zun hooi toof-too diaqf tiang gungv gee.

18 Meef hheem gua Seef-hiauf-ziatf, ziuf hauf zuk meef gee, yoou Yaf-biv-yef dingf gee yitf hhiv goonv bing meenf biang fauf taf gee sit veenf, eenv veeih meef tih yoou Yaf-biv-yef uk Ai-gipf gee.

19 Too lai gee leekf da hhiangh hau hoouf zung tih sukf i hauf gee, meef itf siatf gee suk tengv lai gee leekf soof hoong, meenf guan tih hookf nguf ha tih hookf tuangf zung tih hauf gee. 20 Leekf luh soof hoong gee meef hheem oouv tuangf miaf tukf, zeekf meenf tukf, ziuh hheem git gof lingh geef mee dak booiv. Meef too lai gee leekf da hhiangh hau hhoouf, meef zung hheem tukf uk miaf.

Meenf lai lengv-hunf hhoo yi moof leeif-leeiv miaf huh hauf.

21 Sok veenf meef hhoo yi huk gongv, haih sit veenf hheem hiu sikf, ziuh tih sav goouh ha tih oouv ngauh gee tif hoouh ya hheem hiu sikf.

22 Yoou suv mekf ngau haih it neeh fi gee tif hoouh, meef hheem gua Sit-sit-ziatf, yoou tuq veeif meef hheem gua suv goouh biang uif gee ziatf yitf mee. 23 Meef too lai gee da hhiangh hheem di veeif tamv fooif booiv huh Zuh Ye-hheev-huav Yih-seef-liatf gee Siangf-dif. 24 Hauf dif voouf gookf mooqf minv zukf gee lengv-hunf lokf dau na meef uk booiv, biang lengv meef gee hhuatf-hhuat geef. Meef veeif hee tamv fooif geen booiv huh Ye-hheev-huav meef gee Siangf-dif gee tif hoouh, itf dingf meenf lai lengv-hunf ziamf lengv meef gee.

25 Meef meenf zun oouv goouh faif hooif hauf gee gee baq hemv bing meenf lai fauf taf gee hongf goonf hianf, goouh faif hooif Yih-yuatf-ziatf gee ya meenf zun luf doongv zauf-zau.

26 Meef hheem oouv goouh da veen ngau haih it fi maif-maif neeh gee hong doongv Ye-hheev-huav meef gee Siangf-dif gee dianf.

Meenf zun oouv noq maih tuangf gee miaf hungf leekf tuangf geef huf hee."

27 Ye-hheev-huav hemv Mov-si gang bov, "Meef hheem gif lukf go neeh gee longf miaf, eenv veeih hauf tih ziuf go neeh gee hemv meef gangf lengv-hunf Yih-seef-liatf gee lipf ye gee." 28 Mov-si yoou ningf Ye-hheev-huav neeh hhootf hee tee teepf veenf tee teepf goomh, meenf goonv fiah, ya meenf goonv namh. Geef oouv go neeh gee tia yoou baiv fapf banh voon hinh, neeh ziuh tih teepf hiuf gaif mingh.

29 Mov-si lokf Si-naiv-san longf miaf gee tif hoouh, nganv fapf banh voon hinh yoou da moof. Mov-si lokf baiv tiah longf miaf gee tif hoouh, meenf huh na toof-too mee eenv veeih hemv Ye-hheev-huav gang go gua vooi ziuh bangf-bangv teenf hee. 30 Yav-lunv hemv suanf Yih-seef-liatf lengv-hunf dekf huh na Mov-si mee bangf-bangv teenf hee, ziuh mangf loo ningf geef. 31 Mov-si yam geef-loh gua miaf, Yav-lunv hemv lingh doouh bek ting gee nah leengv doongv ningf Mov-si neeh hhootf hee, Mov-si ziuh hemv geef-loh gang go. 32 Seeif looif, suanf Yih-seef-liatf lengv-hunf zung miaf ningf geef neeh hhootf hee, geef ziuh oouv Ye-hheev-huav yoou baiv tiah Si-naiv-san hemv geef gang gee itf siatf go zung seengv zee geef-loh.

33 Mov-si hemv geef-loh gang go inv, ziuh oouv tuk fa miaf lumf na loouh. 34 Leeuf fooif Mov-si loouh booiv doongv dau na Ye-hheev-huav hemv geef gang go gee tif hoouh, ziuh geq tuk fa hiuf hee longf miaf, zi doongv geef uk miaf. Geef uk miaf hoouh looif, ziuh oouv Ye-hheev-huav zuk geef gee seengv zee lengv-hunf Yih-seef-liatf gee. 35 Lengv-hunf Yih-seef-liatf gee dekf huh na Mov-si mee bangf-bangv teenf hee. Mov-si ziuh zaif oouv tuk fa miaf lumf na mee loouh, zi doongv geef loouh booiv hemv Ye-hheev-huav gang go nah geq longf miaf.