2 Bo-a-si yuh sing heeuv neeh mee gee ziangh lauh teepf huf miaf,

ya yam geef-loh ngov yoou ninh.

Geef-loh zung ngov longf vooi,

3 Bo-a-si ziuh hemv gav lanf sinf-sinv neeh huf hee gang,

"Nav-eev-miv lokf lengv Mov-yaf gee leengv miaf vooi,

en teeif geef dif ing niaf engv tok doouf-loh Yih-lif-miv-leeqf neeh hhootf hee.

4 Hauf seengv teeh neeh hhinh hee zee meef,

meef ing gai huh teeh neeh hhinh hee.

Eenv veeih anf lutf fapf,

sian doongv meef tukf nah doongv hauf tukf,

seef doouf voon na meenf lai naf nee vooi.

Meef zeekf hheeng hooi gav lanf doouf neeh huf hee tukf niaf neeh hhootf leengv,

ziuh doi na hemv goonf,

hemv doi na ziangh lauh ngov yoou nooih neeh gee gang sing sov;

meef zeekf meenf tukf,

ziuh hheem seengv hauf."

Lengv-hunf neeh huf hee bov,

"Hauf tukf."

5 Bo-a-si yuh bov,

"Teenf hee,

meef hemv Nav-eev-miv vianv niaf neeh hhootf hee gee neeh veenf hee,

ya hheem oouv maih mai leemf leekf Mov-yaf neeh huf hee Luf-teev hemv.

Teenf hee,

niaf neeh hhootf hee ziuh ziuf luf yoou nooiv neef daiv neeh huf hee."

6 Gav lanf sinf sinv neeh huf hee ziuh bov,

"Teenf hee hauf meenf tukf vooi.

Ziuh tih hauf tukf vooi,

leekf hauf gee ya meenf hiang lai.

Hauf sev hhinf hauf tukf niaf neeh mee zee meef,

meef tukf lo,

hauf meenf tukf vooi."

7 Dang siv lengv-hunf Yih-seef-liatf gee lai guiv leei mee,

meenf guan tih ing ha tih vianv,

ha tih tukf goouh,

geef-loh zeekf gang maif vooi,

neef ing neeh huf hee hheem geq haif geef gee sev neef vianv neeh huf hee,

teenf huk tih lengv-hunf Yih-seef-liatf ing vianv tingf gongv gee zingf gif mee.

8 Gav lanf sinf-sinv neeh huf hee bov Bo-a-si,

"Meef toof-too vianv lo!"

Geef ziuh geq haif geef gee vooi.

9 Bo-a-si ziuh hemv ziangh lauh gee,

gangf lengv-hunf yoou ninh gee inf-inv gang,

"Veenf nooih meef-loh hooi hauf zingf mingv,

too lai goouh sukf i Yih-lif-miv-leeqf gee,

hemv leekf da hhiangh geef voon huf Gi-lianv hemv Mah-lonv gee,

hauf zung hemv Nav-eev-miv vianv inf-inv vooi.

10 Hauf ya oouv maih Mah-lonv huf hee,

ziuh tih leemf leekf Mov-yaf huf hee Luf-teev,

huk maih hauf huf hee,

teenf hee gav teeh neeh gee inf-inv ziuh ziuf luf yoou nooiv neef daiv neeh huf hee,

hau biang nooiv geef mee gif zukf luf yoou gok ziv toof-too gee,

lengv toof-too gee.

Veenf nooih,

meef-loh hemv goonf zung tih zingf yinv."

11 Lengv-hunf vif yoou bak deenh heeuv neeh gee hemv ziangh lauh gee,

zung bov,

"Noov lai,

hauf-loh hooi meef zingf mingv.

Hi voongf Ye-hheev-huav sev fok zee leemf leekf loouh lanf meef neeh huf hee,

biang geef lai leekf liauf-liauh zing gianf lipf gav lanf Yih-seef-liatf mee gee La-zev hemv Lif-yav teenf hee.

Hi voongf meef yoou zukf Yih-fav-ta mee fat voongh nyoo uif,

biang nooiv meef mee look hoou Bokf-lif-heengv.

12 Hi voongf Ye-hheev-huav lokf leemf leekf neeh huf hee sev leekf ngif zee meef,

biang gav lanf meef mee,

voongh zing gav lanf Ta-mah hemv Yiuh-daf lai gee neeh huf Fav-leeqf-si teenf hee."

13 Teenf hee,

Bo-a-si ziuh oouv Luf-teev huk maih vooi.

Ye-hheev-huav sev fok zee Luf-teev,

geef ziuh guaf nungh lai leekf da hhiangh huf hee vooi.

14 Maih da heeuv hoouf hee bov Nav-eev-miv,

"Ye-hheev-huav tih gaiv lai ngenv gee!

Eenv veeih Ye-hheev-huav meenf suif meef,

veenf nooih sev gav lanf sinf-sinv huf hee miaf ziauf guf meef.

Hi voongf nooiv leekf neeh huf hee look hoou Yih-seef-liatf.

15 Geef dif biang meef neeh tooi hee sungf lai hi voongf,

geef dif tiangh meef lauh,

biang meef faif siangf,

eenv veeih geef tih tinf fuh dookf meef neeh huf hee lai gee.

Lai tinf fuh neeh huf hee bih lai sit huf leekf da hhiangh enf maif."

16 Nav-eev-miv ziuh zip leekf neeh huf hee gua miaf,

gut loouh da hong vooi,

tiangh geef zing tiangh leekf toof-too huf hee teenf hee.

17 Maih ningf lanf gee yanh bov,

"Nav-eev-miv lai leekf da hhiangh huf vooi."

Geef-loh hhooiv leekf neeh huf hee yam Eev-beeif-teev.

Eev-beeif-teev tih bef lai Ye-si huf hee,

Ye-si tih bef lai Daf-vuif huf hee.

18 Lokf Fav-leeqf-si doongv Da-vuif gee zukf fu gif yoou dauf ninh:

Fav-leeqf-si lai Si-si-lonv,

19 Si-si-lonv lai Lanv,

Lanv lai Yav-miv-nav-tav,

20 Yav-miv-nav-tav lai Nav-sunf,

Nav-sunf lai Sa-meenv,

21 Sa-meenv lai Bo-a-si,

Bo-a-si lai Eev-beeif-teev,

22 Eev-beeif-teev lai Ye-si,

Ye-si lai Daf-vuif.