Ye-nav hheei hhif
4
1 Siangf-dif teenf huk,
Ye-nav meenf moon ziqf-ziqf,
geef hhif lukf vooi.
2 Geef ziuh hemv Ye-hheev-huav gang,
bov,
"Ye-hheev-huav haf,
hauf yoou gok gav hauf mee gee tif hoouh,
meenf tih ga huh meef dif teenf huk vooi haf?
Guf seeh hauf nah tiat booiv Ta-si teenf meng.
Hauf huh meef dookf lengv-hunf,
timv teeh hhoo,
meenf suif finh yianf hhif,
gi tif duf dookf lengv-hunf gee,
siangf-siangf gaih bianf timv i meenf fatf lengv-hunf.
3 Ye-hheev-huav haf,
hhuf meef en teeif oouv mingh hauf hiuf booiv lo!
Hauf daiv vooi bih yoou enf maif!"
Siangf-dif an faiv bui maqf dun hee
4 Ye-hheev-huav bov,
"Meef hheei hhif teenf hee heekf haf?"
5 Ye-nav ziuh uk heeuv vooi,
ngov yoou ningf heeuv gee dongv fiangf hee.
Geef yoou ninh hooi toof-too dap leekf langf mee langh nguiv,
ngov yoou ninh foou,
dekf heeuv Niv-niv-ui mee dif di leeuf hee.
6 Ye-hheev-huav Siangf-dif an faiv bui maqf dun hee,
biang gooh dun hee teengv nyoo hangv gua Ye-nav vooi,
nguiv gee bangh hau geef,
ha zinf lit ziak hau geef mee,
biang geef liangf suh saih.
Eenv veeih gooh dun hee,
geef meenf huh giauh eengv.
7 Danf tih haih ngeeih veenf zauf-zau,
Siangf-dif an faih mingf huf hee miaf gaq bui maqf neeh dun hee,
gooh dun hee ziuh sov vooi.
8 Da veenf giangf geen,
Siangf-dif yuh an faih van lunf-lun gee siau lokf dongv miaf,
lit gee meenf huh giauh hhokf ziak hau Ye-nav mee,
ziak geef hunf vooi,
geef ziuh hhuf toof-too daiv booiv,
geef bov,
"Hauf daiv vooi bih yoou enf maif!"
9 Siangf-dif ziuh bov Ye-nav,
"Meef veeih bui maqf neeh dun hee hheei hhif teenf hee heekf haf?"
Ye-nav tanv,
"Di leeuf meenf heekf?
Hauf hhif dif daiv vooi!"
10 Ye-hheev-huav bov,
"Bui maqf neeh dun hee meenf tih meef sav gee,
ya meenf tih meef heuf gee,
gooh dun hee goomh hee nyoo uif vooi,
goomh hee yuh daiv vooi,
meef ya took dookf hungh;
11 meef dekf,
heeuv Niv-niv-ui mee teenf nyoo,
danf-danv neef meenf took feenv moof vingv moof maif neeh gee,
duf lai teepf ngeeih vanh lengf,
ya lai teei tuangf neeh gee teenf liauh,
hauf meenf gaiv lai dookf hungh haf?"