3 Yev-so ziuh nyof moof gamf geef, bov, "Hauf hheeng, meef maif bang lo!" Ma fungv geef gee it ziu ziuh luat huf geef, geef ziuh meenf zeq vooi. 4 Yev-so hemv geef gang bov, "Hauf bov meef, meef senv vanh meenf ngah seengv naf nee, meef nah guf booiv ningf gif see vooi, biang geef hooi meef giamh sah, ya hheem ziuf Mov-si gui dingf gee oouv goouh booiv hianf sev Siangf-dif, yoou dau na hemv goonf zingf mingv meef duf ga meenf zeq vooi."

5 Yev-so loouh Zia-baiv-nungv vooi, lai baiv fu ziangh huf hee miaf doongv dau na geef, hhuf geef bov, 6 "Zu haf, leekf nof hauf huf hee han huanf vooi, lap yoou lanf nenh, dookf meenf huh giauh nanf vif."

7 Yev-so bov, "Hauf booiv yiav geef."

8 Baiv fu ziangh neeh huf hee tanv bov, "Zu haf, hauf meenf fui lai meef booiv lanf hauf. Zih iauf meef gang go gee hee, leekf nof hauf huf hee ziuh itf dingf maif vooi. 9 Eenv veeih hauf toof-too ya bif hak guanh, ya lai leekf bingv sev hauf guanh. Hauf zeekf yam neeh huf hee bov, 'Booiv', geef ziuh booiv; yam gakf huf bov, 'Maif', geef ziuh maif; yam leekf nof hauf gee bov, 'Meef huk teeh neeh hinh hee', geef ziuh booiv huk."

10 Yev-so hingf heekf go neeh gee ziuh hit fekf, hemv lengv-hunf hemf moh geef neeh gee gang bov, "Hauf titf-titf seengv meef-loh, ziuh tih yoou Yih-seef-liatf, lokf hau hauf ya meenf am huh teenf nyoo gee sinf sim gua. 11 Hauf seengv meef-loh, doongv nooih dif lai haih liauh lengv-hunf lokf dong lokf tooiv miaf, hemv Yav-bov-la-hanf, Yih-sav, Yav-gookf hongf goonf yoou hian gukf goonv moov. 12 Danf tih lengv-hunf beenh laiv sukf i hian gukf neeh gee fanh dif bif voouf uk ninh lengv yoopf-yoop neeh gee vooi, yoou ninh nge gapf bak loouh ngai oo-oo teenf hee."

13 Yev-so ziuh bov baiv fu ziangh neeh huf hee, bov, "Meef leengv booiv lo, ziuf meef siang sinf gee, hooi meef huk tingf vooi." Ziuh tih yoou neeh mee tif hoouh, leekf nof geef huf hee ziuh maif inv vooi.

14 Yev-so doongv lanf Bih-deekf vooi, dekf huh maih niah Bih-deekf huf hee bik hang lap baiv tangf nenh. 15 Yev-so giangf gamf lokf moof geef loouh, geef ziuh meenf hang vooi. Geef ziuh uif miaf hooi Yev-so zun bif goouh goonv.

16 Veenv zoouf goomh gee tif hoouh, lengv-hunf gee yin haih liauh bif yif hangv geen huf gee lengv-hunf miaf div Yev-so, Yev-so gang go gee hee toof-too ziuh voouf yif hangv gee inf-inv uk booiv vooi, ya yiav too lai lai fingh gee lengv-hunf maif vooi. 17 Neeh tih dif biang sian zi Yih-saif-yav gang gee bin tingf titf, geef bov,

"Doouf-loh gee ngaif tuh geef sin zeef hooi doouf-loh ding,

doouf-loh gee fingh geef hooi doouf-loh hap."

18 Yev-so dekf huh lengv-hunf dunf hee vif geef, ziuh yam meenv huv gee gua hai fiangf ninh vooi. 19 Enf meenf geen luaf yoou, lai Siangf-dif lutf fapf gee lauh see huf hee geen na miaf hemv Yev-so gang, bov, "Lauh see, meenf guan meef booiv leeuf, hauf zung di moh meef booiv."

20 Yev-so bov, "Meuf tiaf lai soongh, baiv fa gee leekf nokf lai lukf, danf tih Yeenv zeeh linf lengv hemh hau hhootf hee duf meenf lai."

21 Yuh lai meenv huv Yev-so gee huf hee miaf hemv geef gang, bov, "Zu haf, foou hauf sian leengv booiv bok bef lai hauf huf hee henv."

22 Yev-so bov, "Meef miaf hemf moh hauf lo! Biang lengv-hunf daiv gee booiv bok lengv-hunf daiv geef-loh gee."

23 Yev-so geen luaf hauv hee vooi, meenv huv gee di moh geef. 24 It ziuh hai mee hhi vanh meenf huh giauh nyoo uif, langh gee meenf huh giauh hangv, hhum luaf hauv hee dif lak vooi, danf tih Yev-so lap suanv vooi. 25 Meenv huv gee miaf yam geef angv vooi, bov, "Zu haf, go hauf-loh, hauf-loh daiv leh."

26 Yev-so bov geef-loh, "Lengv-hunf sinf sim nook gee haf, meef-loh veeih gai mangf nif?" Geef ziuh uif miaf hiak van hemv langh, van hemv langh gee ziuh on inf-inv vooi.

27 Hemv goonf zung hit fekf, bov, "Neeh tih lengv-hunf gai huf hee? Linf van hemv langh gee ya hingf go geef."

28 Yev-so doongv fiangf ninh hhoom doongv bak lengv lengv-hunf Gia-daf-la gee vooi, lai lengv-hunf yif hangv geen huf gee voon huf lokf soongh bok lengv-hunf gee uk miaf doong hau geef. Geef-loh meenf huh giauh ook, linf lengv-hunf duf meenf goom lokf sunv neeh hiuf hee gua. 29 Geef-loh it dekf huh Yev-so ziuh yanh bov, ''Siangf-dif gee Leekf-da-hhiangh, hauf-loh hemv meef lai gai gee ganv ngaih? Tif hoouh hauf-loh gee enf meenf doongv yoou, meef ziuh miaf nooih biang hauf-loh tuh hho haf?"

30 Neeh tif hoouh, lif geef-loh looif-looiv lai lengv-hunf voouf mov hoouf hee meenf huh giauh liauh doongv tif tiangh yoou ninh. 31 Yif hangv gee ziuh iangv Yev-so bov, "Zeekf meef dif voouf hauf-loh lokf baiv huf lengv-hunf neeh voon huf uk miaf, ziuh yam hauf-loh loouh da mov neeh hoouf hee teef!"

32 Yev-so hemv geef-loh gang bov, "Booiv lo!" Yif hangv gee ziuh uk miaf, loouh da mov neeh hoouf hee vooi. Mov neeh hoouf hee it ziu inf-inv ong longf hhoom tiah, dok loouh da hai mutf daiv vooi. 33 Lengv-hunf tiangh mov gee ziuh deuf loouh da heeuv vooi, seengv neeh itf siatf gee teeh hemv bif yif hangv geen huf gee lengv-hunf am heekf gee teeh inf-inv zee hemv goonf. 34 Neeh tif hoouh, suanf heeuv gee lengv-hunf zung uk miaf dif dekf Yev-so, dekf huh geef vooi, ziuh hhuf geef lif hhooiv bak lengv geef-loh gee.