2 Neeh teepf ngeeih huf seeh huv nooiv geef-loh gee tih: haih it huf hee yam Si-meenv hee (ya yam Bih-deekf hee), hemv tok geef huf hee An-deekf-liatf; leekf da hhiangh Si-bif-taif huf hee Yav-gookf gangf tok Yav-gookf huf hee Ye-hanf; 3 Feei-lif hemv Ba-to-loh-maiv; To-mah hemv Mah-haif, Mah-haif tih suv suif gee; Yav-gookf hemv Tav-haif, Yav-gookf tih leekf da hhiangh Yav-leekf-feei huf hee; 4 Feenf-yuif dang gee Si-meenv, gangf ing Yev-so gee Yiuh-daf Gia-liatf hemv.

5 Yev-so faif lengv-hunf neeh teepf ngeeih huf uk booiv, zuk geef-loh bov, "Meef-loh meenf ngah booiv lengv lengv-hunf hhiv ha minv zukf gee; ya meenf ngah loouh heeuv lengv-hunf Sa-mah-lif-yaf gee; 6 sinf nginh booiv ningf lengv-hunf Yih-seef-liatf gee vooi, geef-loh zing tuangf sook sunv gee teenf hee. 7 Meef-loh hheem hangh booiv hangh suanf bov, 'Hian gukf dif miaf doongv vooi!' 8 Hheem yiav lengv-hunf fingh gee, biang lengv-hunf daiv gee tingf leengv, biang lengv-hunf tingf ma fungv gee maif ya bang booiv, ya hheem voouf yif hangv uk booiv. Meef-loh leeif-leeiv lokf Siangf-dif neeh hhootf hee deekf doongv gee, ya hheem leeif-leeiv sev uk booiv. 9 Da loou meenf ngah dai gimv, dai ngoonf, dai luif; 10 da sunv meenf ngah dai hooih, meenf ngah dai voon deei hho yua, ya meenf ngah dai haif ha tih heengh zuq. Eenv veeih tiangh lengv-hunf huk gongv gee goonv tih gaiv lai gee.

11 "Meenf guan meef-loh loouh heeuv leeuf mooqf voo leeuf mooqf, hheem tooi dekf yoou ninh lai naf nee hheeng ziapf daif meef-loh, meef-loh ziuh zih yoou ninh, zi doongv meef-loh booiv. 12 Meef-loh loouh lanf geef mee gee tif hoouh, hheem bov hi voongf meef-loh fingf anv. 13 Zeekf neeh lanf hee hheeng ziapf daif meef-loh, neeh lanf hee ziuh deekf doongv meef-loh gee fingf anv; zeekf neeh lanf hee meenf hheeng ziapf daif meef-loh, meef-loh gee fingf anv ziuh ziuf guiv leengv meef-loh. 14 Neef meenf ziapf daif meef-loh, meenf hingf go meef-loh neeh gee, meef-loh uk lanf neeh mee ha tih uk heeuv neeh mee gee tif hoouh, hheem sam bongf baiv gok meef-loh gee booiv biauh sif gingh goouf geef-loh. 15 Hauf titf-titf seengv meef-loh, doongv simh fuanf gee neeh veenf hee, heeuv Soh-to-mah hemv heeuv Eev-mov-la tuh gee seengv fapf bih heeuv neeh mee tuh gee enf yeenh yoou.

16 Hauf bov meef-loh, hauf faif meef-loh uk booiv, zing tuangf loouh da langv hoouf hee teenf hee, too yi meef-loh hheem zingv zing ngiaf teenf hee, tokf zing goop teenf hee.

17 "Meef-loh hheem zuf if lengv-hunf neeh gee, eenv veeih geef-loh dif hoof meef-loh booiv gauv sev gung huif gee lengv-hunf, ya dif yoou huif hangv oouv binv git meef-loh. 18 Meef-loh ya dif eenv veeih hauf, bif dai doongv dau na hak nyoo gee hemv dau na voongf gee vooi, yoou dau na geef-loh hemv yoou dau na lengv-hunf hhiv ha minv zukf gee hooi hauf huk gianf zingf. 19 Meef-loh bif hoof gee tif hoouh, meenf ngah mun dif gang gai gee hemv dif di leeuf gang, eenv veeih neeh tif hoouh dif sev go meef-loh gaiv lai gang gee zee meef-loh; 20 eenv veeih gang go gee meenf tih meef-loh, tih Lingv Fa-bef meef-loh mee hongv gua meef-loh gang gee.

21 "Neeh tif hoouh, engv tok dif ing engv tok hongf hungh, bef lai dif ing leekf ngif, haih zi doongv daiv. Leekf ngif gee dif hemv bef maih gee zookf deeif, haih geef-loh daiv. 22 Meef-loh ya dif veeih hauf bif hemv goonf zookf. Danf tih neef tuh doongv dooi gee, itf dingf deekf giuf. 23 Lai lengv-hunf yoou heeuv neeh mee bik haih meef-loh gee tif hoouh, meef-loh ziuh deuf booiv heeuv gakf mooqf vooi. Hauf titf-titf seengv meef-loh, meef-loh enf meenf booiv heeuv Yih-seef-liatf gee hoou yoou, Yeenv-zeeh ziuh miaf doongv vooi.

24-25 "Zeekf vanh duf yam lanf zu tih Bev-si-fuh^a, vanh ziuh dif an gav lanf geef gee lengv-hunf geengf hiamv. Meenf lai hookf tengv hangv gua tunf tengv gee, ya meenf lai leekf nof hangv gua lanf zu gee. Doi hookf tengv zeekf zing tunf tengv teenf hee, doi leekf nof zeekf zing lanf zu teenf hee, ziuh hheem moonh zukf vooi.

26 "Too yi, meenf ngah mangf geef-loh; eenv veeih oop me gee teeh meenf lai meenf boouf luf gee, meenf lai gai gee lookf me gee teeh tih vanh meenf huh gee. 27 Go hauf lookf-lookf seengv meef-loh neeh gee, meef-loh hheem gung hhai gang uk miaf; meef-loh hingf heekf go lookf-lookf gang gee, hheem yoou baiv deng lanf suanf uk miaf. 28 Neef ga lai bun tinv meenf ga lai honf tinf neeh gee, meenf ngah mangf geef-loh; danf tih hheem mangf oouv lai bun tinv hemv honf tinf zung miatf yoou da dif yukf gee neeh huf hee Siangf-dif. 29 Nokf looi voon huf meenf tih ing luif sinf mooqf hee haf? Danf tih Fa-bef meef-loh zeekf meenf hheeng, huf hee duf meenf dok lai longf dauf matf. 30 Ziuh tih fuiv meef-loh gee ya bif Fa-bef tuan inf-inv gua vooi. 31 Too yi, meef-loh meenf ngah mangf, meef-loh bih nook looi dunf hee gui liauh vooi lo.

32 "Guf see, neef yoou dau na lengv-hunf nginh hauf gee, hauf yoou dau na hauf baiv fa gee bef lai ya itf dingf nginh geef; 33 danf tih, meenf guan tih naf nee yoou dau na lengv-hunf meenf nginh hauf gee, hauf yoou dau na hauf baiv fa gee bef lai ya itf dingf meenf nginh geef.

34 "Meef-loh meenf ngah yih vuiv hauf miaf tih dai huav fingv miaf bak matf; hauf miaf meenf tih dai huav fingv miaf, tih dai mitf dai giamf miaf. 35 Eenv veeih hauf miaf dif tih biang

"'Lengv-hunf hemv bef lai zookf deeif,

leemf leekf hemv maih lai zookf deeif,

tinf fuh hemv maih faf zookf deeif.

36 Lengv-hunf gee dikf yinv ziuh tih gav lanf toof-too gee lengv-hunf.'

37 "Neef dookf bef maih gua dookf hauf gee, meenf fui lai huk meenv huv hauf gee; neef dookf leekf ngif gua dookf hauf gee, meenf fui lai huk meenv huv hauf gee; 38 naf nee meenf iaq sipf-zeekf-giaf geef mee miaf di moh hauf gee, ya meenf fui lai huk meenv huv hauf gee. 39 Naf nee dif deekf doongv mingh toof-too hiuf hee gee, itf dingf daiv mingh hiuf hee booiv; danf tih naf nee veeih hauf daiv mingh toof-too huif hee booiv gee, itf dingf dif deekf doongv mingh hiuf hee.

40 "Ziapf daif meef-loh gee ziuh tih ziapf daif hauf; ziapf daif hauf gee ziuh tih ziapf daif faif hauf miaf gee Neeh-huf-hee. 41 Meenf guan naf nee eenv veeih geef tih sian zi ziuh ziapf daif geef gee, itf dingf deekf doongv hemv sian zi hongf goonf gee ziangf lif; meenf guan naf nee eenv veeih geef tih ngif yinv ziuh ziapf daif geef gee, itf dingf deekf doongv hemv ngif yinv hongf goonf gee ziangf lif. 42 Meenf guan tih naf nee, eenv veeih huh lengv-hunf fuh hungh neeh hoouf hee tih meenv huv hauf gee, ziuh tuif geef sev namh foonf zungv hee toof-too zee hhiv zung gee huf hee goonv gee, hauf titf-titf seengv meef-loh, lengv-hunf neeh huf hee itf dingf deekf doongv ziangf lif."