3 Yev-so tanv geef-loh bov, "Meef-loh ya veeih gai veeih meef-loh gee guiv leei, famh Siangf-dif gee gaif mingh nif? 4 Siangf-dif bov, 'Hheem dookf bef maih, tiangh bef maih,' yuh bov, 'Zeeuf bef maih gee, hheem oouv mingh geef hiuf hee booiv'. 5 Danf tih meef-loh bov, 'Meenf guan leeuf na hemv bef maih gang, "Hauf duf ga oouv goouh gaiv lai sev meef-loh neeh gee, hianf sev Siangf-dif vooi," 6 geef ziuh hhoo yi meenf yungh dookf bef maih^a, tiangh bef maih vooi.' Teenf hee ziuh tih meef-loh veeih guiv leei meef-loh gee ziuh suif Siangf-dif gee Go booiv vooi. 7 Gev maif gee lengv-hunf haf, Yih-saif-yav gua na gang guan i meef-loh gee teeh ziqf duf meenf sook. Geef bov,

8 'Bek ting neeh gee bak mee ging hauf,

danf tih timv geef-loh gee meenf huh booiv leeuf vooi.

9 Geef-loh oouv lengv-hunf dingf gee guiv leei, miaf huk hoouh lih hauf gee maiv lengv-hunf,

teenf hee geef-loh bai hauf ya meenf lai yungh.'

10 Yev-so ziuh yam hemv goonf miaf ningf geef vooi, hemv geef-loh gang bov, "Meef-loh hheem hingf loouh, ya hheem took. 11 Goouh lokf bak loouh booiv gee meenf huk lai lengv-hunf zeq, goouh lokf bak uk miaf gee, nah huk lai lengv-hunf zeq."

12 Dang siv, meenv huv gee miaf ningf Yev-so, seengv geef bov, " Lengv-hunf Fatf-lif-saif dangh gee hingf heekf go neeh gee meenf huh giauh hheei hhif nenh. Meef huh meenf?"

13 Yev-so tanv bov, "Too lai goouh sav-sav neeh gee, zeekf meenf tih Fa-bef hauf sav gee, zung dif vookf gangf nyaf uif. 14 Suf saih geef-loh zaix! Geef-loh tih dav lak gee, daf booiv yin sunv vanh; zeekf tih dav lak yin sunv dav lak, voon na zung dif dok longf soongh."

15 Bih-deekf bov, "Gaih sikf bih yif neeh mee zee hauf-loh hingf teef."

16 Yev-so bov, "Vanh meenf took, linf meef-loh ya meenf took yoou haf? 17 Sangf tih meef-loh meenf huh, too lai goouh lokf bak loouh booiv neeh gee, tih loouh da boqf vooi, ya ev uk miaf vooi haf? 18 Danf tih lokf da bak uk miaf gee, ziuh tih lokf da timv uk miaf gee; goouh neeh zuangv hee nah huk lai lengv-hunf zeq. 19 Eenv veeih lokf da timv uk miaf gee, lai gookf zuangv seeu gee see siangh, meeuv satf, lai bef beeng bef vanh lai maih beeng maih vanh, suif finh beeng goonf hemv goonf lap, geep lookf, huk gev gianf zingf, gang go famh Siangf-dif famh lengv-hunf. 20 Neeh gee nah huk lai lengv-hunf zeq; danf tih meenf tuk moof ziuh goonv fiah, meenf huk lai lengv-hunf zeq."

21 Yev-so lokf lengv neeh hhootf hee booiv doongv ningf lengv Tui-lov, Si-dunf gee. 22 Noh, lai maih Gia-noomv huf hee uk miaf, siuh bov, "Zu haf, leekf lanv Daf-vuif huf hee haf, hhoo linf hauf ziu teef! Leemf leekf hauf huf hee bif yif hangv geen huf meenf huh giauh nanf vif."

23 Danf tih Yev-so meenf tanv geef geef gee. Meenv huv geef gee miaf ningf geef, iangv geef bov, "Yam geef booiv lo, maih neeh huf hee ziangf hangh yoou dau looif doouf-loh siuh noh."

24 Yev-so tanv maih neeh huf hee bov, "Hauf bif faif tih danf-danv booiv ningf gav lanf Yih-seef-liatf tuangf sook sunv neeh gee."

25 Danf tih maih leekf neeh huf hee miaf hhuih yoou dau na Yev-so, bai geef bov, "Zu haf, boongv hauf teef!"

26 Yev-so tanv bov, "Oouv goouh leekf goonv gee fengf zee leekf mav gee goonv dif noov lai haf?"

27 Maih neeh huf hee bov, "Zu haf! Meef gang heekf nenh. Danf tih lengf lokf baiv hooif lanf zu dok longf neeh gee leekf mav gee ya goonv."

28 Yev-so ziuh tanv geef bov, "Meef gee sinf sim titf-titf tih nyoo! Ziuf meef timv tiang gee, hooi meef huk tingf vooi." Neeh hheek hee, leemf leekf geef huf hee ziuh maif vooi.

29 Seeif looif, Yev-so lokf lengv neeh hhootf hee miaf doongv ningf hai Gia-lif-lif gee, ziuh geen baiv tiah vooi ngov. 30 Lai lengv-hunf dunf hee miaf ningf geef, yin lengv-hunf gok hhoih gee, dav lak gee, sanv feeif gee, ngop gee gangf lai fingh gee dunf hee miaf, zung yin miaf doongv dau na geef vooi; geef ziuh yiav geef-loh maif vooi. 31 Hemv goonf dekf huh neef ngop gee gang go, sanv feeif gee maif vooi, gok hhoih gee booiv sunv vooi, dav lak gee dekf lai huh vooi, ziuh meenf huh giauh hhiv guaif, geef-loh ziuh ngenv Yih-seef-liatf gee Siangf-dif.

32 Yev-so yam meenv huv geef gee miaf, bov, "Hauf dookf hungh lengv-hunf neeh hoouf hee, eenv veeih geef-loh duf ga hemv hauf yoou nooih tamv veenf vooi, ya meenf lai gai gee goonv. Hauf meenf biang timv geef-loh boqf yiakf-yiak leengv booiv, mangf geef-loh dif yiak hunf yoou da sunv."

33 Meenv huv gee hemv geef gang bov, "Doouf-loh yoou nooih tih da loouh, booiv leeuf lai goouh teenf liauh geeu lengv-hunf neeh dunf hee goonv geemf nooh?"

34 Yev-so tooi geef-loh bov, "Meef-loh lai goouh giau liauh?"

Geef-loh tanv bov, "Bing sit mooqf, ya lai leekf bav gi huf hemv."

35 Yev-so ziuh yam hemv goonf ngov dauf matf vooi, 36 geef zuh nganv bing neeh sit mooqf hemv bav neeh gee uif, gamh siaf Siangf-dif hoouh looif, ziuh loot vooi beu sev meenv huv gee; meenv huv gee yuh feenv zee hemv goonf. 37 Hemv goonf zung goonv, zung goonv geemf-geemf vooi. Geef-loh suv lengf teengh-teengh neeh gee uif, deengf sit hhiangv dikf-dik. 38 Lengv-hunf goonv-goonv neeh gee, seef maih leekf hemv leekf nookf gee vooi, inf-inv lai da hhiangh tee senv na. 39 Seeif looif, Yev-so yam hemv goonf tan vooi, ziuh geen luaf, miaf doongv bak lengv Mah-zia-tan gee vooi.