2 Danf tih Yev-so tanv geef-loh bov, "Veenf dif yoop gee tif hoouh fa mee hongf-hongf, meef-loh bov, 'Bak zeekf fa mee maif.' 3 Zauf-zau gee tif hoouh fa mee yuh hongf yuh lamv, meef-loh bov, 'Veenf nooih dif lai van lai fungv.' Meef-loh took dekf fa mee gee bianf huaf, di leeuf meenf took dekf tooi ganv neeh mee gee seenv zif nif? 4 Tooi ganv neeh mee gee lengv-hunf meenf huh giauh ook, geef-loh meenf siang sinf Siangf-dif danf tih dif tiang dekf seenv zif; seef sian zi Ye-nav gee seenv zif vooi, zaif meenf lai seenv zif sev geef-loh dekf." Yev-so gang inv ziuh lif hhooiv geef-loh booiv vooi.

5 Meenv huv gee gua doongv fiangf ninh hhoom gee tif hoouh, nah huh buh bangh dai bing vooi. 6 Yev-so hemv geef-loh gang bov, "Meef-loh hheem zeeq tooi, zuf if fauf taf lengv-hunf Fatf-lif-saif dangh gee hemv lengv-hunf Sa-du-gai dangh gee."

7 Geef-loh ziuh hemv goonf ngif leenf bov, "Tih meenf tih doouf-loh meenf dai bing, geef nah teenf gang."

8 Yev-so huh geef-loh doongv tif gang gai gee, ziuh bov, "Meef-loh veeih gai meenf siang sinf hauf nif? Veeih gai hemv goonf ngif leenf meenf lai bing neeh hhinh teeh nif? 9 Meef-loh ya meenf mingf fekf yoou haf? Sang tih meef-loh meenf oov bing neeh nga mooqf feenv zee lengv-hunf ngoh senv na goonv, gangf suv lengf gee deengf giau hhiangv vooi haf? 10 Ya meenf oov bing neeh sit mooqf feenv zee lengv-hunf tee senv na goonv, gangf suv lengf gee deengf giau hhiangv vooi haf? 11 Bak feenh hauf bov, 'Meef-loh hheem zuf if fauf taf lengv-hunf Fatf-lif-saif dangh gee hemv lengv-hunf Sa-du-gai dangh gee', Go neeh gee hee meenf tih gang bing gee teeh, meef-loh veeih gai meenf took nif?" 12 Meenv huv gee neeh tif hoouh nah mingf fekf Yev-so gang gee meenf tih yam geef-loh hheem zuf if fauf taf huk bing neeh gee, tih yam geef-loh hheem zuf if lengv-hunf Fatf-lif-saif dangh hemv lengv-hunf Sa-du-gai dangh maiv neeh gee.

13 Yev-so doongv lengv Gai-sav-lif-yav Feei-lif-bih gee vooi, ziuh tooi meenv huv geef gee bov, "Vanh bov Yeenv-zeeh tih naf nee?"

14 Geef-loh tanv bov, "Lai feenh hee bov tih hooi vanh tuk leei gee Ye-hanf, lai feenh hee bov tih Yih-lif-yav, ya lai feenh hee bov tih Ye-lif-miv ha tih sian zi gee huf hee."

15 Yev-so tooi geef-loh bov, "Teenf hee meef-loh nif? Meef-loh bov hauf tih naf nee?"

16 Si-meenv Bih-deekf tanv bov, "Meef tih Gi-dukf, tih Leekf-da-hhiangh yungh seeng Siangf-dif huf hee."

17 Yev-so bov geef, "Si-meenv, leekf da hhiangh Ye-nav huf hee haf, meef tih lai fok gee! Eenv veeih guan i hauf gee teeh tih hauf yoou baiv fa gee bef lai biang meef huh gee, meenf tih lengv-hunf biang meef huh gee. 18 Hauf ya seengv meef, meef tih Bih-deekf^a; hauf dif yoou baiv dinf danv neeh mee gianf lipf giauf huif hauf mee, daiv gee sif likf meenf yingf lai gua geef. 19 Hauf dif oouv yiakf tif hian gukf gee zee meef. Too lai meef yoou dauf matf meenf zun vanh huk gee, tih Siangf-dif yoou baiv fa duf ga meenf zun huk gee; too lai meef yoou dauf matf zun vanh huk gee, tih Siangf-dif yoou baiv fa duf ga zun huk gee." 20 Gang inv, Yev-so ziuh gingh goouf meenv huv gee, meenf zun seengv vanh bov geef tih Gi-dukf.

21 Lokf ninh uif, Yev-so nah daqf-daqf seengv meenv huv gee bov, geef itf dingf hheem geen Ye-luf-sa-leengh vooi, yoou da moof ziangh lauh, gif see ziangh hemv Siangf-dif lutf fapf gee lauh see neeh gee tuh haih liauh hho, ya dif bif ga daiv, haih tamv veenf tingf leengv.

22 Bih-deekf ziuh leeh Yev-so booiv ningf vooi, an geef bov, "Senv vanh meenf ngah teenf hee, Zu haf, meef itf dingf meenf am heekf teeh neeh hhinh hee."

23 Yev-so zuanh huf gua miaf bov Bih-deekf, "Sav-danf, deuf hingv! Meef tih fah sunv hauf gee. Eenv veeih meef meenf gov Siangf-dif gee teeh, deuf booiv gov lengv-hunf gee teeh."

24 Yev-so ziuh hemv meenv huv geef gee gang bov, "Zeekf naf nee dif hemf moh hauf, hheem ziqf duf meenf ngah saf teeh toof-too, iaq sipf zeef giaf geef mee uif miaf hemf moh hauf. 25 Eenv veeih neef tiang go mingh toof-too hiuf hee gee, itf dingf daiv mingh; danf tih neef veeih hauf daiv mingh gee, itf dingf div heekf mingh hiuf hee. 26 Lengv-hunf huf hee zeekf hanf suanv sif gaif vooi, danf tih dap mingh toof-too hiuf hee hemv booiv vooi, lai gai yungh nif? Geef dif oouv lai gai gee miaf toonv mingh toof-too hiuf hee leengv nif? 27 Eenv veeih Yeenv-zeeh dif yoou da bef lai geef gee yungv guang hemv hian seeh gee hongf goonf longf miaf. Neeh tif hoouh, geef dif ziuf di na gee hengf hongh boou leengv di na. 28 Hauf titf-titf seengv meef-loh, lengv-hunf nyunv yoou nooih neeh gee, lai feenh hee yoou meenf daiv zee sianv, itf dingf dif dekf huh Yeenv-zeeh miaf yoou da geef-loh huk voongf ziangh hhinf."