6 "Doongv da hheenf gee tif hoouh, lai lengv-hunf yanh bov, 'Noh, sin langv miaf vooi noh! Meef-loh uk booiv doong geef lo.'

7 "Leemf leekf neeh gee ziuh suanv buf angv vooi, nen deei geef-loh gee bangf-bangv uif. 8 Ngeenf-ngeenf neeh gee yam nyaif-nyaif neeh gee, bov, 'Sev yuf meef-loh gee zipf zee hauf-loh, deei hauf-loh gee dif hhooiv gua vooi.'

9 "Danf tih nyaif-nyaif neeh gee tanv bov, 'Mangf yuf hauf-loh gee meenf geeu feenv zee meef-loh, zuif maif meef-loh toof-too booiv ningf ing yuf neeh gee vooi vianv.'

10 "Geef-loh booiv vianv yuf gee tif hoouh, sin langv ziuh miaf vooi; leemf leekf zunh bif maif neeh gee ziuh hemv sin langv hongf goonf loouh booiv goonv moov, deenh mee ziuh hoop loouh vooi.

11 "Seeif looif, hhiv ha gee leemf leekf ya miaf doongv vooi, geef-loh yam bov, 'Zu haf, Zu haf, hooi hauf-loh hheeif deenh teef!'

12 "Danf tih sin langv tanv bov, 'Hauf titf-titf seengv meef-loh, hauf meenf took meef-loh.'

13 Too yi, meef-loh gi tif duf hheem dav zingf-zingv geef, eenv veeih meef-loh meenf huh Yeenv zeeh leeuf veenf, leeuf tif sungf miaf.

14 "Hian gukf yuh zing zuanf neeh mee teenf hee: Lai lengv-hunf huf hee dif booiv lengv looiv, geef ziuh yam leekf nof geef gee miaf, gauv saih sanh geef gee zee geef-loh. 15 Geef ziuf mui na gee neengv likf gauv ngoonf fiakf zee geef-loh: Huf hee sev ngoh senv, huf hee sev voon senv, huf hee sev senv hee. Geef ziuh booiv lengv looiv vooi. 16 Oouv heekf ngoh senv neeh huf hee mah siangf oouv booiv huk tengv li, ya hanf ngoh senv hemv vooi. 17 Hongf yangh, oouv heekf voon senv neeh huf hee ya tih teenf hee hanf voon senv hemv vooi. 18 Danf tih, oouv heekf senv hee gee neeh huf hee daf deuf booiv guf soongv mee, bok ngoonf fiakf lanf zu gee uif.

19 "Gua haih foong vooi, leekf nof neeh gee gee lanf zu leengv miaf vooi, dif hemv geef-loh hhoouf to. 20 Oouv heekf ngoh senv gee neeh huf hee ya dai gakf gee ngoh senv hemv miaf, bov, 'Zu haf, meef gauv ngoonf fiakf ngoh senv zee hauf, meef dekf, hauf yuh hanf ngoh senv hemv vooi.'

21 "Lanf zu hemv geef gang bov, 'Maif nenh, meef tih leekf nof yuh maif yuh zung sim huf hee. Teeh nook gee meef zung sim booiv huk, too yi hauf dif yam meef guanh geengf nyoo gee teeh. Loouh miaf hemv hauf hongf goonf hiangh siuf hau lakf lo!'

22 "Oouv heekf voon senv gee neeh huf hee ya miaf vooi, geef bov, 'Zu haf, meef gauv voon senv zee hauf, meef dekf, hauf ya hanf voon senv hemv vooi.'

23 "Lanf zu hemv geef gang bov, ''Maif nenh, meef tih leekf nof yuh maif yuh zung sim huf hee. Teeh nook gee meef zung sim booiv huk, too yi hauf dif yam meef guanh geengf nyoo gee teeh. Loouh miaf hemv hauf hongf hoonf hiangh siuf hau lakf lo!'

24 "Oouv heekf senv hee gee neeh huf hee ya miaf vooi, geef bov, 'Zu haf, hauf lokf hau huh meef tih lengv-hunf ngiamf huf hee. Meef meenf sav, ya dif booiv buiv; meef meenf fiqf, ya dif booiv suv.' 25 Too yi, hauf mangf meef, ziuh oouv ngoonf fiakf meef gauv zee hauf neeh senv hee booiv bok uif vooi. Meef dekf, neeh gee ziuh tih ngoonf fiakf meef gauv zee hauf neeh senv hee.'

26 "Danf tih lanf zu tanv geef bov, 'Nof saif meef neeh huf hee, yuh seeu yuh lanh tiv, meef meenf tih lokf hau huh hauf meenf sav, ya dif booiv buiv, meenf fiqf, ya dif booiv suv haf? 27 Teenf hee, meef ziuh hheem oouv ngoonf fiakf hauf gee booiv sunf loouh ngenh hangh vooi, foou hauf leengv miaf tif hoouh, hauf hau suv ngoonf hauf gee gangf bun gangf leeih leengv.'"

28 "Lanf zu yuh yam hhiv ha gee leekf nof bov, 'Meef-loh geep ngoonf fiakf neeh senv hee lokf ningf geef leengv miaf, gauv zee neef lai ngoonf fiakf vanh hee gee neeh huf hee. 29 Eenv veeih neef zung sim fokf teeh hauf gee, hauf ya dif gav hemv zee geef, biang geef lai liauh yeef teeng; neef meenf zung sim fokf teeh hauf gee, linf geef lai gee neeh ziaqf hee, hauf ya dif geep lokf da moof geef booiv. 30 Gengf leekf nof vuf yongh neeh huf hee uk ninh lengv yoop gee vooi, yoou ninh geef dif gapf bak gapf loongv loouh ngai deengh seeq.'"

31 "Yeenv-zeeh yoou da yungv yauf geef gee yin too lai gee hian seeh longf miaf gee tif hoouh, geef dif ngov yoou baiv henh yungv yauf mee. 32 Too lai gee minh zukf zung dif zipf zung yoou dau na geef. Geef dif oouv geef-loh feenv voon hoouf vooi, zing lengv-hunf tiangh tuangf gee oouv mianv yiangv feenv lokf san yiangv gee uk miaf teenf hee. 33 Geef biang mianv yiangv gee yoou ningf moof maif geef, biang san yiangv gee yoou ningf moof vingv geef.

34 "Neeh tif hoouh, voongf huf hee dif hemv lengv-hunf yoou ningf moof maif geef neeh gee gang, bov, 'Meef-loh neeh gee tih bef lai hauf sev fok gee, miaf teengf tuh gok gav neeh mee lo, gok gav neeh mee tih lokf soouh fa matf zi miaf ziuh hooi meef-loh zunh bif maif gee. 35 Eenv veeih hauf yiak vooi, meef-loh sev hauf goonv; hauf hhuat vooi, meef-loh sev namh hauf goonv; hauf luiv langf, meef-loh luf hauf zih; 36 hauf geq nangv lingf-lingv, meef-loh oouv hho yua zee hauf dingv; hauf fingh vooi, meef-loh heng hoouh hauf; hauf ngov gamv, meef-loh miaf tunf hauf.'

37 Seeif looif, lengv-hunf Siangf-dif nginf vuiv maif neeh gee dif tanv bov, "Zu haf, hauf-loh gi tif dekf huh meef yiav vooi, ziuh sev meef goonv, dekf huh meef hhuat vooi, ziuh sev namh meef goonv nif? 38 Gi tif yuh dekf huh meef liuv langf, ziuh luf meef zih, dekf huh meef geq nangv lingf-lingv, ziuh sev hho yua meef dingv nif? 39 Gi tif yuh dekf huh meef fingh vooi, ha tih ngov gamv miaf tunf meef vooi nif?"

40 Voongf huf hee dif tanv geef-loh bov, "Hauf titf-titf seengv meef-loh, teeh neeh gee meef-loh huk yoou da engv tok zuif doom moof gee huf hee, ziuh tih huk yoou baiv huf hauf."

41 Seeif looif, voongf huf hee ya dif hemv lengv-hunf yoou ningf moof vingv geef neeh fiangf hee gee gang bov, "Fa tuv meef neeh hoouf hee, deuf hingv geef! Loouh da veeif yungh yuanh meenf gua neeh gee lo, veeif neeh gee tih hooi yif hangv hemv sih zeh geef neeh gee zunh bif gee. 42 Eenv veeih hauf yiak vooi, meef-loh meenf oouv goouh sev hauf goonv; hauf hhuat vooi, meef-loh meenf oouv namh sev hauf goonv; 43 hauf liuv langf, meef-loh meenf luf hauf zih; hauf geq nangv lingf-lingv, meef-loh meenf oouv hho yua sev hauf dingv; hauf ngaif tuh vooi, hauf yoou da gamv, meef-loh meenf miaf tunf hauf."

44 Neeh tif hoouh, geef-loh ziuh dif tanv bov, "Zu haf, hauf-loh gi tif huh meef yiak vooi, ha tih hhuat vooi, ha tih liuv langf, ha tih geq nangv lingf-lingv, ha tih ngaif tuh vooi, ha tih yoou da gamv, meenf heng hoouh meef nif?"

45 Voongf huf hee dif tanv geef-loh bov, "Hauf titf-titf seengv meef-loh, teeh neeh gee meef-loh meenf huk yoou da engv tok zuif doom moof gee huf hee, ziuh tih meenf huk yoou baiv huf hauf."

46 Lengv-hunf neeh gee dif tuh yungh yuanh gee singv fapf; danf tih lengv-hunf Siangf-dif nginf vuiv maif neeh gee dif lai yungh seeng.