3 Neeh tif hoouh, gif see ziangh gee hemv ziangh lauh bek ting gee zipf zung yoou da bang daf gif see Gai-yav-fav mee, 4 hemv goonf tiang gooi di leeuf hoof Yev-so, ga Yev-so booiv. 5 Danf tih geef-loh bov, "Meenf ngah yoou ziatf yitf huk, mangf bek ting gee dif boouf luanf."

6 Yev-so yoou voo Bokf-daf-niv mee, yoou lanf Si-meenv tingf ma fungv neeh huf gee tif hoouh, 7 lai maih huf hee nganv ganh yif mee loouh miaf, ganh neeh mee deengf meenf huh giauh dooi sinf gee hiang goou dikf-dikf yoou ninh. Yev-so goonv fiah gee tif hoouh, geef ziuh diaqf hiang goou gee geen baiv hau Yev-so vooi.

8 Meenv huv gee dekf huh vooi, ziuh meenf huh giauh hheei hhif, bov, "Sif-siv langf feeif hiang goou gee huk gai nooh?" 9 Hiang goou neeh gee ing lai sinf dunf hee, hhoo yi oouv booiv boongv neef ngah gee."

10 Yev-so huh vooi, ziuh bov geef-loh, "Meef-loh bov geef huk gai? Geef hooi hauf huk teeh neeh hhinh hee tih teeh maif hhinh hee. 11 Eenv veeih siangf-siangf lai neef ngah gee hemv meef-loh yoou ningf goonf, danf tih hauf meenf siangf-siangf hemv meef-loh yoou ningf goonf. 12 Geef diaqf hiang goou geen baiv huf hauf, tih zunh bif bun tinv hauf mee dif oouv booiv bok gee. 13 Hauf titf-titf seengv meef-loh, meenf guan suanf fukf im doongv sif gaif gee leeuf hhootf lengv foongv, duf hheem suanf maih leekf neeh huf hee huk gee teeh, miaf gif niamf geef."

14 Seeif looif, Yev-so gee teepf ngeeih huf meenv huv, lai huf hee yam Yiuh-daf Gia-liatf hee. Geef booiv div gif see ziangh gee, bov, 15 "Zeekf hauf gauv geef zee meef-loh, meef-loh sev gai gee zee hauf?" Geef-loh ziuh oouv ngoonf fiakf tamv teepf mooqf zee geef. 16 Lokf neeh tif hoouh uif, Yiuh-daf ziuh div gi huif gauv Yev-so zee geef-loh.

17 Seef-hiauf ziatf^b gee haih it veenf, meenv huv gee miaf tooi Yev-so bov, "Goomh Yih-yuatf ziatf neeh don hee, meef yam hauf-loh yoou leeuf hooi meef zunh bif nif?"

18 Yev-so bov, "Meef-loh loouh heeuv vooi booiv div lengv-hunf neeh huf hee, seengv geef bov, lauh see bov, 'Tif hoouh hauf gee dif doongv vooi, hauf dif hemv meenv huv hauf gee yoou lanf meef gua Yih-yuatf ziatf.'" 19 Meenv huv gee ziuh ziuf Yev-so zuk gee booiv huk, zunh bif goomh Yih-yuatf ziatf neeh don hee maif vooi.

20 Doongv veenf yoop vooi, Yev-so hemv teepf ngeeih huf meenv huv hongf goonf goonv goomh. 21 Geef-loh goonv fiah gee tif hoouh, Yev-so bov, "Hauf titf-titf seengv meef-loh, yoou da meef-loh lai huf hee dif ing hauf."

22 Geef-loh ziuh meenf huh giauh tiangv timv ngaif tuh, di na na teenf hee tooi Yev-so bov, "Zu haf, tih hauf haf?"

23 Yev-so tanv bov, "Neef hemv hauf hongf goonf yoou fanf mee zef bing goonv gee neeh huf hee, ziuh tih geef dif ing hauf. 24 Zing goh ging veenv tia gee teenf hee, Yeenv-zeeh dif gua vooi, danf tih neef ing Yeenv-zeeh gee neeh huf hee lai huah vooi! Geef meenf lai uk miaf enf maif.

25 Neef dif ing Yev-so gee Yiuh-daf tooi Yev-so bov, "Lauh see, meenf hooi tih hauf ba?"

Yev-so bov, "Meef gang heekf nenh."

26 Geef-loh goonv fiah gee tif hoouh, Yev-so nganv bing mee uif, gamh siaf Siangf-dif vooi, ziuh loot vooi, beu sev meenv huv gee, bov, "Meef-loh oouv booiv goonv lo, neeh tih bun tinv hauf mee."

27 Yev-so yuh nganv yanh zungv hee uif, gamh siaf Siangf-dif vooi, beu sev geef-loh, bov, "Meef-loh hemv goonf zung goonv lo. 28 Eenv veeih neeh tih baq hauf gee, tih Siangf-dif hemv lengv-hunf lipf iakf gee inf zang; baq neeh gee tih veeih haih liauh lengv-hunf leeiv gee, hau min soih lengv-hunf gee booiv. 29 Danf tih hauf seengv meef-loh, lokf nooih hoouh looif, hauf meenf goonv yan fuh hoouv neeh gee fooif hemv vooi, zi doongv hauf hemv meef-loh yoou gok gav bef lai hauf mee hongf goonf goonv yan nauh gee neeh veenf hee."

30 Seeif looif, geef-loh siang goov ngenv Siangf-dif gee hiuf hee vooi, ziuh lokf Ye-luf-sa-leengh uk miaf booiv tiah Gamh-lamv vooi.

31 Neeh tif hoouh, Yev-so bov geef-loh, "Goomh nooih meef-loh zung dif suif hauf vooi, eenv veeih ging veenv bov,

'Siangf-dif dif dakf lengv-hunf tiangh tuangf gee,

tuangf gee ziuh deuf tan goonf vooi.'

32 Danf tih hauf tingf leengv hoouh looif, hauf dif doongv Giaf-lif-lif meng gua na meef-loh."

33 Bih-deekf tanv bov, "Ziuh tuif hemv goonf zung suif meef vooi, hauf ya yungh yuanh meenf suif meef."

34 Yev-so ziuh bov geef, "Hauf titf-titf seengv meef, goomh nooih gaiv tanv zee sianv, meef dif tamv fooif meenf nginh hauf."

35 Bih-deekf hemv geef gang bov, "Ziuh tuif hauf itf dingf hheem hemv meef hongf goonf booiv daiv, hauf ya itf dingf dif nginh meef." Meenv huv gee inf-inv zung tih teenf gang.

36 Seeif looif, Yev-so hemv meenv huv gee miaf doongv lengv hhootf hee yam Hheef-si-mah-niv hee, ziuh bov meenv huv gee, "Meef-loh ngov yoou nooih foou hauf, hauf dif booiv fiangf ninh vooi doouh goouf." 37 Geef ziuh yin Bih-deekf hemv leekf da hhiangh Si-bif-haif voon huf hemv di moh booiv. Geef ziuh hhai sih nyung nyang, ngaif tuh, 38 ziuh bov geef-loh, "Timv hauf mee ngaif tuh daiv vooi. Meef-loh yoou nooih foou hauf, hemv hauf hongf goonf zingf-zingv geef."

39 Geef ziuh booiv geen na ziqf vooi, hhuih longf hupf yoou dauf matf doouh goouf bov, "Baf haf, zeekf noov lai, hhuf meef meenf ngah biang hauf goonv yan gamf-gamf neeh zungv hee. Danf tih meenf ngah ziuf hauf gee if see, hheem ziuf meef gee if see."

40 Yev-so leengv ningf meenv huv gee, dekf huh geef-loh duf ga suanv vooi, ziuh bov Bih-deekf, "Sangf tih meef-loh meenf hemv lai hauf zingv zungv hau mooqf hee haf? 41 Hheem dav zingf-zingv doouh goouf, haf zinf dok loouh tuang yif hangv gee vooi. Tuif yianf timv meef-loh gee tiang huk, danf tih meenf lai lingf booiv huk."

42 Yev-so haih ngeeih fooif booiv doouh goouf bov, "Baf haf, zeekf zungv gamf neeh mee meenf luat lai huf hauf, hauf itf dingf hheem goonv, ziuh ziuf meef gee zih if huk tingf."

43 Geef yuh leengv miaf, dekf huh meenv huv gee ya suanv vooi, eenv veeih geef-loh dav gauh meenf teeng lai. 44 Yev-so yuh lif hhooiv geef-loh, haih tamv fooif booiv doouh goouf, gang gee hemv baiv gee hongf goonf.

45 Seeif looif, geef leengv ningf meenv huv gee, bov geef-loh, "Meef-loh enf lap suanv hiu sikf yoou haf? Noh! Tif ganv doongv vooi, dif gauv Yeenv-zeeh sev lengv-hunf lai soih gee vooi. 46 Uif, doouf-loh booiv lo! Noh! Ing hauf neeh huf miaf dif hhooiv doongv vooi."

47 Yev-so enf gang go yoou, Yiuh-daf miaf vooi, geef tih teepf ngeeih huf seeh huv hhiv zung gee huf hee, geef ya yin lengv-hunf dunf hee nganv mitf nganv gunf hemv miaf. Lengv-hunf neeh gee tih gif see ziangh gee hemv bek ting ziangh lauh gee faif miaf gee. 48 Neef ing Yev-so gee neeh huf hee sian hemv geef-loh gang amf hoouf maif vooi, bov, "Hauf hoomv naf nee, naf nee ziuh tih Yev-so. Meef-loh ziuh hoof geef loouh." 49 Yiuh-daf ziuh mah siangf booiv ningf Yev-so vooi, yam Yev-so bov, "Lauh see!" Ziuh hoomv Yev-so.

50 Yev-so bov geef, "Feengf yu haf, meef miaf dif huk gai gee, ziuh huk lo!"

Lengv-hunf neeh gee ziuh geen booiv, longf moof hoof Yev-so loouh vooi. 51 It ziu lai lengv-hunf hemf moh Yev-so gee huf hee yitf mitf uk miaf, damh leekf nof daf gif see huf hee, damh sav geef fiangf hee loomh vooi.

52 Yev-so ziuh bov geef, "Suv mitf uif! Eenv veeih too lai noov mitf gee, itf dingf daiv yoou dauf bak mitf." 53 Sangf tih meef meenf huh, hauf hhoo yi hhuf bef lai hauf mah siangf hooi hauf faif bih teepf ngeeih yingv enf liauh gee hian see miaf haf? 54 Zeekf hauf teenf huk, yoou baiv ging veenv gang itf dingf fatf seeng gee teeh di leeuf bin tingf titf nif?

55 Neeh tif hoouh, Yev-so bov lengv-hunf neeh hoouf hee, bov, "Meef-loh dai mitf dai gunf miaf hoof hauf, zing goh hoof sookf geep sunv gee teenf hee haf? Hauf veenf-veenf ngov yoou Seengf-dianf maiv lengv-hunf, meef-loh ya meenf hoof hauf. 56 Danf tih neeh itf siatf gee teeh fatf seeng tih dif biang sian zi tia yoou baiv ging veenv neeh gee bin tingf titf." Seeif looif, meenv huv gee zung suif geef, deuf inf-inv booiv vooi.

57 Lengv-hunf hoof Yev-so neeh gee dai Yev-so doongv ningf daf gif see Gai-yav-fav neeh hhootf vooi. Neeh tif hoouh, Siangf-dif lutf fapf gee lauh see hemv ziangh lauh gee duf ga zipf zung yoou ninh vooi. 58 Bih-deekf looif-looiv di moh Yev-so, zi doongv da bang daf gif see mee. Geef loouh da bang vooi, hemv Seengf-dianf gingh vuif gee ngov yoou ningf goonf, dif dekf teeh neeh hhinh hee di leeuf hee.

59 Gif see ziangh gee hemv suanf gung huif gee lengv-hunf ziangf div gev gianf zingf goou Yev-so, hau fuanf Yev-so seeh hingv. 60 Tuif yianf lai haih liauh lengv-hunf miaf huk gev gianf zingf, danf tih meenf div lai heekf zingf gif.

Zuif heeuf lai lengv-hunf voon huf geen miaf, 61 bov, "Lengv-hunf neeh huf hee bov gua, 'Hauf sek lai Seengf-dianf Siangf-dif neeh mee booiv, tamv veenf zee neeif yuh sungf huk geef uif.'"

62 Daf gif see ziuh nyunv uif bov Yev-so, "Lengv-hunf neeh gee huk giangf zingf goou meef gai gee? Meef meenf lai gai gee hau gang haf?" 63 Danf tih Yev-so meenf meen.

Daf gif see bov geef, "Hauf nyi yungh seeng gee Siangf-dif mingf lingf meef fat tooih seengv hauf-loh, meef tih meenf tih Gi-dukf --- Leekf-da-hhiangh Siangf-dif huf hee?"

64 Yev-so bov, "Zing meef gang gee teenf hee! Danf tih hauf seengv meef-loh, lokf nooih hoouh looif, meef-loh dif dekf huh Yeenv-zeeh, ngov yoou ningf moof maif Zuif-heen-gee-neeh-huf-hee, ngov bah baiv fa gee longf miaf!"

65 Daf gif see it hingf heekf go neeh gee ziuh hheei hhif iakf hho yua toof-too gee vooi, bov, "Geef gang go famh Siangf-dif vooi, doouf-loh dif yungh lengv-hunf miaf huk zingf mingv huk gai yoou? En teeif meef-loh zung hingf huh geef gang go famh Siangf-dif vooi. 66 Meef-loh bov dif di leeuf sih lih geef?"

Geef-loh tanv bov, "Ngootf gof geef booiv."

67 Geef-loh ziuh taiv namh meeif geen na Yev-so vooi, oouv hhunf hoouf namf geef, ya lai lengv-hunf fak geef, tooi geef bov, 68 "Gi-dukf haf! Meef tih sian zi leh, meef bov, naf nee git meef?"

69 Neeh tif hoouh, Bih-deekf enf ngov yoou da bang yoou, lai leemf leekf huk nof huf hee miaf ningf geef bov, "Meef ya tih lengv-hunf Gia-lif-lif Yev-so neeh hoouf gee."

70 Danf tih Bih-deekf yoou dau na hemv goonf zengv, bov, "Hauf meenf huh meef gang gai gee."

71 Bih-deekf uk booiv, doongv bak deenh, yuh lai leemf leekf huk nof huf hee dekf huh geef, ziuh seengv lengv-hunf yoou ninh gee bov, "Lengv-hunf neeh huf hee ya tih lengv-hunf Nah-saf-leekf Yev-so neeh hoouf gee."

72 Bih-deekf yuh zengv, ya fat tooih bov, "Hauf meenf took lengv-hunf neeh huf hee."

73 Gua meenf giauh foong, lengv-hunf nyunv yoou ningf neeh gee miaf bov Bih-deekf, "Meef titf-titf ya tih geef-loh neeh hoouf gee, hingf meef gang go ziuh huh vooi."

74 Bih-deekf ziuh fat tooih seeu gee bov, "Hauf meenf took lengv-hunf neeh huf hee."

Neeh tif hoouh, gaiv mah siangf ziuh tanv vooi. 75 Bih-deekf ziuh tiang uif Yev-so hemv geef gang gua, Yev-so bov, "Gaiv tanv zee sianv, meef dif tamv fooif meenf nginh hauf." Bih-deekf ziuh uk booiv ngai meenf huh giauh hhuiv.