4 Geef leengv da sunv itf dingf hheem gua Sa-mah-lif-yaf. 5 Yev-so doongv Sa-mah-lif-yaf seengh gee heeuv Sif-zia mee vooi, heeuv neeh mee loof-loo ningf lengv Yav-gookf sev leekf da hhiangh geef huf hee Ye-seef neeh hhootf hee. 6 Lai yangv Yav-gookf mee yoou ninh. Yev-so booiv sunv nuai vooi, ziuh ngov yoou ningf yangv hengf lingf. Neeh tif hoouh daf hhaif tih veenf da.

7 Lai maih Sa-mah-lif-yaf huf hee miaf git namh. Yev-so yam geef bov, "Sev namh bak hauf goonv, noov lai meenf?" ( 8 Neeh tif hoouh, meenv huv geef gee loouh heeuv vianv goouh goonv vooi.)

9 Maih Sa-mah-lif-yaf huf hee bov geef, "Meef tih lengv-hunf Yiuh-haif gee, di leeuf yam hauf maih Sa-mah-lif-yaf huf hee oouv namh goonv nif?" (Yuanv miaf lengv-hunf Yiuh-haif gee hemv lengv-hunf Sa-mah-lif-yaf gee meenf gua goonf.)

10 Yev-so tanv geef bov, "Meef zeekf huh Siangf-dif dif sev gee tih gai gee, ya huh yam meef bov 'Sev namh bak hauf goonv' gee neeh huf tih naf nee, meef itf dingf zoouh duf ga hhuf geef, geef ya itf dingf zoouh duf ga sev namh yoou gee zee meef vooi."

11 Maih huf hee bov, "Gof haf, meef meenf lai boh fakf namh, yangv mee yuh teenf lakf, meef di leeuf fakf lai heekf namh yoou gee nif? 12 Gungv bef hauf-loh huf hee Yav-gookf luf yangv neeh mee sev hauf-loh, geef toof-too hemv leekf lanv geef gee gangf teei tuangf geef gee zung goonv namh yangv neeh mee. Sangf tih meef bih geef enf nyoo haf?"

13 Yev-so tanv bov, "Neef goonv namh neeh gee gee, ya dif hhuat yoou; 14 danf tih lengv-hunf zeekf goonv namh hauf dif sev neeh gee, ziuh yungh yuanh meenf hhuat fooif hemv vooi. Namh hauf dif sev neeh gee, ya dif yoou da geef bin tingf hau namh maf dof, tung meenf hengf, biang geef deekf doongv yungh seeng."

15 Maih huf hee bov, "Gof haf, sev namh neeh gee zee hauf teef, biang hauf meenf hhuat fooif hemv vooi, ya meenf nyungh miaf nooih git namh fooif hemv vooi."

16 Yev-so bov, "Meef booiv yam bef meef huf hee hemv miaf nooih miaf."

17 Maih neeh huf hee seengv geef bov, "Hauf meenf lai bef."

Yev-so bov, "Meef bov meef meenf lai bef, ziqf duf meenf sook. 18 Hhiv sitf meef duf ga lai nga huf bef gua vooi, en teeif bef hemv meef zih neeh huf hee, meenf tih bef meef huf hee. Meef gang go neeh gee tih zinv gee."

19 Maih huf hee bov, "Go haf, hauf huh meef tih sian zi. 20 Gungv bef hauf-loh gee zung tih yoou baiv tiah neeh mee gingf baif Siangf-dif, danf tih lengv-hunf Yiuh-haif meef-loh gee bov, Ye-luf-sa-leengh nah tih lengv gingf baif Siangf-dif hhootf hee."

21 Yev-so bov, "Leekf gov haf, meef hheem siang sinf hauf. Tif hoouh dif doongv vooi, neeh tif hoouh meef-loh gingf baif fa bef, meenf tih yoou baiv tiah neeh mee, ya meenf tih yoou Ye-luf-sa-leengh. 22 Meef-loh meenf huh meef-loh gingf baif gee tih naf nee; danf tih hauf-loh huh hauf-loh gingf baif gee tih naf nee, eenv veeih giuf een tih lokf lengv-hunf Yiuh-haif gee uk miaf gee. 23 Tif hoouh dif doongv vooi, en teeif ziuh tih vooi, neef zinv timv anf zinv li gingf baif fa bef gee, nah tih zin zingf gingf baif gee lengv-hunf; eenv veeih fa bef oouv lengv-hunf neeh zuangv hee gingf baif geef. 24 Siangf-dif tih Lingv mee, lengv-hunf gingf baif geef gee itf dingf hheem zinv timv anf zinv li gingf baif geef."

25 Maih huf hee bov, "Hauf huh neef bif yam tih Gi-dukf gee Miv-saif-yav dif miaf; geef miaf vooi, dif seengv itf siatf gee teeh zee hauf-loh."

26 Yev-so bov, "En teeif hemv meef gang go gee neeh huf hee ziuh tih geef."

27 Ngamf-ngamf neeh tif hoouh, meenv huv gee leengv miaf vooi, dekf huh Yev-so hemv maih huf hee gang go, ziuh meenf huh giauh hhiv guaif. Danf tih meenf lai naf nee tooi geef bov, "Meef dif oouv gai gee?" Ha tih bov, "Meef veeih gai hemv geef gang go?"

28 Maih neeh huf hee ziuh fengf eng namh mee longf, leengv heeuv vooi, am heekf lengv-hunf ziuh bov, 29 "Meef-loh miaf dekf! Lai lengv-hunf huf hee gang teeh hauf huk gua neeh gee inf-inv uk miaf vooi, sangf tih geef tih Gi-dukf haf?" 30 Hemv goonf ziuh lokf heeuv uk miaf, booiv ningf Yev-so neeh hhootf hee.

31 Neeh tif hoouh, meenv huv gee yam Yev-so bov, "Lauh see haf, goonv lo."

32 Yev-so bov, "Hauf lai goouh goonv, tih meef-loh meenf huh gee."

33 Meenv huv gee ziuh hemv goonf bov, "Sangf tih lai lengv-hunf sev goouh geef goonv vooi haf?"

34 Yev-so bov, "Goouh goonv hauf gee ziuh tih ziuf bef lai gee zih if booiv huk, hauf tih bef lai faif miaf gee, ya huk gongv geef gauv sev hauf gee inv. 35 Meef-loh meenf tih bov 'Enf lai ti geuf hemv nah doongv oouv ngauh oouv mekf' haf? Hauf seengv meef-loh, meef-loh doongf dav vook niaf gee, ngauh gee mekf gee duf ga ngau vooi, suv lai vooi. 36 Lengv-hunf oouv ngauh oouv mekf gee lai sinf gongv, ya suv ngoh gok gee loouh yungh seeng, biang fung voonf gee hemv oouv ngauh oouv mekf gee hongf goonf eengv. 37 Go lauh gang, 'Na hee sav, na hee suv', go neeh gee ziqf duf meenf sook. 38 Hauf faif meef-loh booiv suv meenf tih meef-loh hho so sav gee; vanh hho so sav gee, meef-loh booiv suv."

39 Heeuv neeh mee lai lengv-hunf Sa-mah-lif-yaf dunf hee siang sinf Yev-so vooi, eenv veeih maih bakf feenh yoou ningf yangv hemv Yev-so gang go neeh huf hee zingf mingv bov, "Geef gang teeh hauf huk gua neeh gee inf-inv uk miaf vooi." 40 Teenf hee, geef-loh ziuh miaf div Yev-so, hhuf geef hemv geef-loh zih, Yev-so ziuh zih yoou ninh voon veenf. 41 Eenv veeih go Yev-so gee, siang sinf gee lengv-hunf ziuh geengf liauh vooi.

42 Geef-loh ziuh bov maih neeh huf hee, "En teeif hauf-loh siang sinf, meenf zaif tih eenv veeih go meef gang neeh gee, tih eenv veeih hauf-loh sin zeef hingf huh vooi, huh neeh huf titf-titf tih go tooi ganv lengv-hunf gee Zu."

43 Gua voon veenf hoouh looif, Yev-so lokf lengv neeh hhootf hee booiv Gia-lif-lif. 44 Eenv veeih gua na Yev-so toof-too huk zingf mingv bov, "Sian zi, yoou bak lengv toof-too gee meenf lai lengv-hunf ooi." 45 Danf tih Yev-so doongv Gia-lif-lif vooi, lengv-hunf Gia-lif-lif gee zung eengf-eengv zip geef. Eenv veeih geef-loh geen Ye-luf-sa-leengh gua ziatf gee tif hoouh, dekf huh geef yoou neeh duanf tif ganv huk itf siatf gee teeh gua.

46 Yev-so yuh booiv Gia-lif-lif gee Zia-nav vooi, ziuh tih lengv gua na geef bin namh tingf yan gee neeh hhootf hee. Lai hak huf hee, leekf da hhiangh geef huf hee yoou Zia-baiv-nungv lai fingh vooi. 47 Geef giangf hingf huh Yev-so lokf Yiuh-haif miaf Gia-lif-lif vooi, ziuh miaf div Yev-so, hhuf geef longf booiv yiav leekf da hhiangh geef huf hee, eenv veeih leekf da hhiangh geef huf hee fingh dif hhooiv daiv vooi.

48 Yev-so bov geef, "Meef-loh zeekf meenf dekf huh seenv zif hemv hhiv guaif gee teeh, zung tih meenf siang sinf."

49 Hak neeh huf hee bov, "Zu haf, hhuf meef dim leekf hauf huf hee meenf daiv yoou, ziuh longf booiv teef."

50 Yev-so bov geef, "Leengv booiv lo, leekf da hhiangh meef huf hee meenf daiv lai."

Lengv-hunf neeh huf hee siang sinf Yev-so hemv geef gang gee, ziuh leengv booiv vooi. 51 Geef leengv lanf gee tif hoouh, am leekf nof geef gee miaf seengv geef, bov leekf geef huf hee tingf vooi. 52 Geef ziuh tooi leekf nof gee, leekf geef huf hee tih gi tif hhai sih maif gee, geef-loh bov, "Veenf vaf veenf zoouf it dem zungv, ziuh meenf hang vooi."

53 Hak neeh huf hee ziuh huh ngamf-ngamf tih Yev-so hemv geef gang, "Leekf da hhiangh meef huf hee meenf daiv lai" gee neeh mee tif hoouh; geef toof-too hemv geef suanf lanf ziuh siang sinf Yev-so vooi.

54 Neeh tih Yev-so yoou Gia-lif-lif huk haih ngeeih mooqf seenv zif, tih geef lokf Yiuh-haif leengv hoouh looif huk gee.