Lukf-gia fukf im
Gaif ziauf
1
1 Hiv-a-feei-lov daf yinv haf,
tuif yianf duf ga lai haih liauh lengv-hunf oouv fatf seeng yoou da hauf-loh gee teeh,
2 ziuf suanf siau sikf neeh mee gee lengv-hunf lokf it hhai sih sinv dav dekf huh gee teeh suanf sev hauf-loh gee,
anf sunf sif tia longf miaf vooi.
3 Hauf ya lokf hau laif-laih saf teeh neeh gee inf-inv gua vooi,
ziuh giatf dingf anf sunf sif tia sev meef,
4 mukf dikf tih biang meef huh vanh maiv meef gee teeh zung tih titf gee.
Hian seeh gang dif lai hooi lengv-hunf tuk leei gee Ye-hanf
5 Hi-lutf guanh lih bak lengv Yiuh-haif gee tif hoouh,
lai gif see huf hee yam Sa-gia-lif-yav hee,
geef tih Yav-bih-yav gif see neeh zo hee gee;
maih geef huf hee ya tih Yav-lunv gee heeuf daifa,
yam I-lif-sa-baiv hee.
6 Geef-loh voon na yoou dau na Siangf-dif zung tih ngif yinv,
Zu gee lutf fapf hemv gui dingf geef-loh zung zun siuh inf-inv meenf lai ziqf sav sook.
7 Danf tih geef-loh meenf lai leekf ngif,
eenv veeih I-lif-sa-baiv meenf lai lai leekf,
geef-loh voon na duf ga lauf-lauh vooi.
8 Lai veenf hee,
doongv Sa-gia-lif-yav zikf ban,
geef ziuh yoou Seengf-dianf fokf teeh Siangf-dif.
9 Geef-loh ziuf gif see gee gui dingf yitf simv,
geef yitf heekf loouh da Seengf-dianf lut hiangvb.
10 Lut hiangv gee tif hoouh,
bek ting gee yoou uk ninh doouh goouf.
11 Lai Siangf-dif gee hian seehc huf hee yoou da Seengf-dianf,
nyunv yoou ningf moof maif hiangv lof neeh hhootf hee sev geef dekf huh.
12 Sa-gia-lif-yav dekf huh vooi,
ziuh meenf huh giauh mangf.
13 Hian seeh hemv geef gang bov,
"Meenf ngah mangf Sa-gia-lif-yav haf,
meef doouh goouf Siangf-dif hingf huh vooi,
maih meef huf hee I-lif-sa-baiv dif hooi meef lai leekf da hhiangh huf hee,
meef hheem hemv geef nooiv yam Ye-hanf hee.
14 Meef dif eengv,
haih liauh lengv-hunf ya dif eenv veeih lai leekf neeh huf vooi eengv.
15 Geef yoou dau na Siangf-dif dif bin tingf daf yinv veetf huf hee,
yan tiam yan hokf geef zung meenf goonv,
geef yoou da boqf maih gee tif hoouh,
Seengf-lingv duf ga sung moonh geef vooi.
16 Geef dif yin haih liauh lengv-hunf Yih-seef-liatf gee fanv leengv ningf Zu --- geef-loh gee Siangf-dif.
17 Geef dif booiv gua na Zu,
gang hhiangv lai neengv likf,
zing sian zi Yih-lif-yav teenf hee,
dooh bef lai hemv leekf ngif gee maif goonf vooi,
dooh lengv-hunf beeif nikf neeh gee,
fanv leengv sunv ngif yinv neeh hiuf hee vooi.
Yam lengv-hunf zunh bif maif foou Zu miaf."
18 Sa-gia-lif-yav hemv hian seeh gang bov,
"Hauf duf ga teenf lauh vooi,
maih hauf huf hee ya teenf lauh vooi,
hauf di leeuf huh doongv nooih itf dingf dif lai teeh neeh gee nif?"
19 Hian seeh tanv bov,
"Hauf tih yoou ningf Siangf-dif fokf teeh geef gee hian seeh Gia-baiv-liatf,
Siangf-dif faif hauf miaf seengv maif siau sikf neeh mee zee meef.
20 Noh,
tif hoouh doongv,
go hauf gee itf dingf bin tingf titf.
Danf tih hauf seengv meef,
meef meenf zun,
meef nge ngop,
zi doongv teeh neeh gee bin tingf titf neeh veenf hee,
meef nah gang lai go."
21 Neeh tif hoouh hemv goonf yoou uk ninh foou Sa-gia-lif-yav,
zung hhiv guaif geef di leeuf yoou da Seengf-dianf teenf foong.
22 Zi doongv geef uk miaf,
ngop vooi meenf gang lai go uk,
ziuh hemv geef-loh bi gok bi moof,
geef-loh nah huh geef yoou da Seengf-dianf dekf huh siau zeef yianv gee gingh siangf vooi.
23 Sa-gia-lif-yav yoou da Seengf-dianf fokf teeh tif ganv moon vooi,
ziuh leengv lanf.
24 Gua meenf gi foong,
maih geef huf hee ziuh guaf nungh vooi,
me yoou lanf nga mooqf geuf duf meenf uk bak deenh.
25 I-lif-sa-baiv bov,
"Siangf-dif titf-titf dookf hauf,
doi hauf teenf maif,
oouv hauf meenf lai leekf gee ngaif yo yoou dau na hemv goonf seef booiv vooi."
Hian seeh gang Mah-lif-a dif lai Yev-so
26 I-lif-sa-baiv guaf nungh sok mooqf geuf gee tif hoouh,
Siangf-dif faif hian seeh Gia-baiv-liatf,
booiv Gia-lif-lif seengh gee Nah-saf-leekf zinf.
27 Booiv div Mah-lif-a,
geef tih leemf leekf gangf moof huf hee,
duf ga eef sev leekf lanv Daf-vuif voongv huf hee Ye-seef vooi.
28 Hian seeh doongv dau na Mah-lif-a vooi,
hemv geef gang bov,
"Gungf hi meef!
Siangf-dif dookf gee leemf leekf haf!
Zu hemv meef yoou ningf goonf!"
29 Mah-lif-a hingf heekf go neeh gee ziuh tiang meenf hongv,
meenf huh go neeh gee tih gai gee if see.
30 Hian seeh hemv geef gang bov,
"Meenf ngah mangf Mah-lif-a haf!
Siangf-dif duf ga deekf biatf sev fok zee meef vooi.
31 Meef dif guaf nungh lai leekf da hhiangh huf hee,
hheem hemv geef hhooiv nooiv yam Yev-so hee.
32 Geef tih zuif nyoo gee,
vanh ya yam geef tih Siangf-dif gee Leekf-da-hhiangh,
Siangf-dif dif biang geef zip vih geef zuh zung Daf-vuif voongv mee.
33 Geef dif huk voongf ziangh hhinf hungh zif gok gav Yih-seef-liatf meed,
geef dif huk voongf zi doongv yungh yuanh."
34 Mah-lif-a hemv hian seeh gang bov,
"Hauf duf meenf ha yoou,
di leeuf lai teeh neeh gee?"
35 Hian seeh tanv bov,
"Seengf-lingv dif yoou baiv huf meef,
Siangf-dif gee neengv likf dif ziav meef,
eenv veeih teenf hee meef dif lai leekf da hhiangh huf hee,
leekf neeh huf hee tih seenv seengf gee,
itf dingf yam tih Siangf-dif gee Leekf-da-hhiangh.
36 Meef dekf sinf sik meef huf hee I-lif-sa-baiv,
lokf hau meenf lai lai leekf,
en teeif geef teenf lauh vooi ya guaf leekf da hhiangh huf hee sok mooqf geuf vooi.
37 Eenv veeih Siangf-dif tih gai gee duf huk lai doongv gee."
38 Mah-lif-a bov,
"Hauf tih leekf nof Siangf-dif huf hee,
ziuh ziuf meef gang gee huk tingf yoou baiv huf hauf lo!"
Hian seeh ziuh leengv booiv vooi.
Mah-lif-a booiv tunf I-lif-sa-baiv
39 Gua meenf gi foong,
Mah-lif-a ziuh gan hhuangf booiv Yiuh-haif san hhi gee heeuv mee.
40 Doongv lanf Sa-gia-lif-yav vooi,
ziuh tooi I-lif-sa-baiv maif.
41 I-lif-sa-baiv giangf hingf heekf Mah-lif-a tooi geef,
leekf guaf yoou da boqf geef neeh huf hee ziuh noov uif,
I-lif-sa-baiv ya bif Seengf-lingv sung moonh,
42 geef ziuh sauv lookf-look bov,
"Too lai gee maih leekf meef tih zuif lai fok gee,
leekf meef guaf neeh huf ya tih zuif lai fok gee.
43 Hauf di leeuf fui lai Zu gee maih lai miaf tunf hauf!
44 Hauf giangf hingf heekf meef tooi hauf,
leekf hauf huf hee yoou da boqf ziuh eengv noov uif.
45 Meef siang sinf Siangf-dif hemv meef gang gee dif bin tingf titf,
too yi meef tih lai fok gee."
Goov Mah-lif-a hiuf hee
46 Mah-lif-a bov,
"Yoou da timv hauf Siangf-dif zuif nyoo,
47 Lingv hauf mee ya veeih Siangf-dif hauf gee Giuf-zu eengv.
48 Eenv veeih Siangf-dif gov hauf neeh huf doom moof gee leekf nof ,
lokf nooih hoouh looif,
tooi-tooi siuf-siuf gee lengv-hunf zung ngenv hauf lai fok.
49 Suanv neengv gee Siangf-dif
yoou baiv huf hauf huk tingf nyoo teeh vooi,
geef tih seenv seengf gee.
50 Geef gi tif duf dookf lengv-hunf gingf vuif geef neeh gee,
zi doongv tooi-tooi siuf-siuf.
51 Geef yungh neengv likf,
voouf lengv-hunf timv mee giau ngoouf neeh gee booiv vooi.
52 Geef biang lai hhinf gee longf haif vooi,
biang doom moof gee seeng hangv vooi,
53 biang boqf yiak gee goonv geemf goonv maif,
biang vatf lai gee moof leeif-leeiv leengv booiv.
54 Geef fuf tooh leekf nof geef gee Yih-seef-liatf lengv-hunf,
meenf buh bangh dookf hungh geef-loh,
55 zing goh gua na geef hemv doouf-loh gee zuh zung gang gee teenf hee,
yungh yuanh dookf Yav-bov-la-hanf hemv leekf lanv geef gee."
56 Mah-lif-a hemv I-lif-sa-baiv zih daf hhaif tamv mooqf geuf,
ziuh leengv lanf vooi.
Lai hooi lengv-hunf tuk leei gee Ye-hanf
57 I-lif-sa-baiv guaf nungh doongv veenf vooi,
ziuh lai leekf da hhiangh huf hee.
58 Ningf lanf gee hemv sinf sik gee huh vooi,
zung hooi geef eengv,
eenv veeih Siangf-dif dookf hungh geef boongv tooh geef.
59 Doongv haih bet veenf,
geef-loh miaf hemv leekf nee ngootf leeie,
ya dif tiang hhooiv nooiv leekf huf hee hemv bef lai hongf goonf.
60 Danf tih maih lai geef huf hee bov,
"Meenf!
Hheem hhooiv geef yam Ye-hanf hee."
61 Geef-loh bov geef,
"Gav lanf meef-loh mee meenf lai naf nee yam nooiv neeh mee gua leh."
62 Geef-loh ziuh bi moof tooi bef lai geef huf hee Sa-gia-lif-yav,
dekf geef tiang hhooiv leekf huf hee yam di leeuf hee?
63 Bef lai geef huf hee ziuh oouv ben hhootf hee miaf,
tia bov,
"Nooiv geef mee yam Ye-hanf hee."
Hemv goonf zung hhiv guaif.
64 Neeh tif hoouh,
Sa-gia-lif-yav mah siangf ziuh gang lai go vooi,
hhooiv bak ziuh ngenv Siangf-dif.
65 Lengv-hunf ningf lanf gee zung gingf vuif.
Teeh neeh gee ziuh suanf hoou Yiuh-haif san hhi vooi.
66 Hingf heekf gee lengv-hunf zung timv tiang bov,
"Zu hemv leekf neeh huf hee yoou ningf goonf,
doongv nooih geef dif bin tingf lengv-hunf di leeuf yiangh huf hee nif?"
Sa-gia-lif-yav gang doongv nooih gee teeh
67 Bef lai Ye-hanf huf hee Sa-gia-lif-yav bif Seengf-lingv sung moonh vooi,
geef ziuh gang doongv nooih dif fatf seengv gee teeh,
geef bov,
68 "Zu,
Yih-seef-liatf gee Siangf-dif tih gaiv lai ngenv gee!
Eenv veeih geef dookf bek ting geef gee,
ya miaf tukf geef-loh,
go geef-loh.
69 Geef lokf gav lanf geef leekf nof Daf-vuif mee,
veeih doouf-loh sut gai gee duf huk lai doongv gee Zu huf hee,
miaf go doouf-loh.
70 Zing goh guaf gua na Zu hongv gua seengf sian zi gee gang gee teenf hee.
71 Geef dif go doouf-loh lokf moof dikf yinv
hemv lokf moof lengv-hunf itf siatf zookf doouf-loh neeh gee uk miaf.
72 Siangf-dif dookf zuh zung doouf-loh gee,
zun siuh geef eef doouf-loh zuh zung neeh gee,
73 ziuh tih geef hemv zuh zung doouf-loh Yav-bov-la-hanf fat gee tooih,
74 go doouf-loh lokf moof dikf yinv gee uk miaf,
gai gee duf meenf mangf vooi,
75 biang doouf-loh hhoo yi it tooi yungh gung ngif,
hemv hoopf Siangf-dif timv i gee seeng huatf,
anv timv booiv fokf teeh geef.
76 Leekf haf,
vanh dif yam meef tih zuif nyoo Siangf-dif gee sian zi;
eenv veeih meef dif miaf meng gua na Zu,
hooi geef zunh bif sunv,
77 biang bek ting geef gee huh Siangf-dif minh soih geef-loh gee vooi,
nah go geef-loh;
78 doouf-loh gee Siangf-dif timv hhoo dookf doouf-loh,
biang nauf-nauh geen gee da veenf bangv nyoof doouf-loh,
79 nyoof yoou lengv yoop hemv lengv-hunf meenf lai fanf voongf neeh gee,
yin doouf-loh geen sunv fingf anv hiuf hee."
80 Leekf neeh huf hee veenf-veenf nyoo uif,
bun tinv gianf hhang,
singf geekf gian hhiangv,
zih yoou da loouh,
zi doongv geef gung hhai yoou dau na lengv-hunf Yih-seef-liatf gee suanf gang Go Siangf-dif gee.