5 "En teeif hauf dif booiv ningf faif hauf miaf gee bef lai neeh hhootf hee vooi, yoou da meef-loh daf meenf lai lengv-hunf tooi hauf bov, 'Meef dif booiv leeuf?' 6 En teeif eenv veeih hauf seengv teeh neeh gee zee meef-loh vooi, timv meef-loh gee ziuh nyung nyang guanf vooi. 7 Danf tih hauf seengv titf-titf gee zee meef-loh, hauf booiv tih doi meef-loh lai maif lengv gee. Eenv veeih hauf zeekf meenf booiv, Boouh-huif see ziuh meenf miaf ningf meef-loh neeh hhootf hee; hauf zeekf booiv, ziuh faif geef miaf ningf meef-loh neeh hhootf hee. 8 Geef miaf gee tif hoouh, dif biang tooi ganv gee lengv-hunf huh toof-too yoou soih, yoou gung ngif, yoou simh fuanf neeh gi mooqf foong mianf gee tiang fap tih sook gee. 9 Yoou soih neeh foong mianf, tih eenv veeih geef-loh meenf zun hauf; 10 yoou gung ngif neeh foong mianf, tih eenv veeih hauf booiv ningf bef lai neeh hhootf hee, meef-loh meenf dekf lai huh hauf fooif hemv vooi; 11 yoou simh fuanf neeh foong mianf, tih eenv veeih tooi ganv neeh mee gee voongf bif simh fuanf vooi.

12 Hauf enf lai haih liauh teeh dif seengv meef-loh yoou, danf tih en teeif meef-loh meenf hap lai uif. 13 Foou doongv zinv li gee Seengf-lingv miaf vooi, geef dif biang meef-loh took itf siatf gee zinv li. Eenv veeih geef meenf tih hhoouf toof-too gang gee, tih oouv geef hingf huh gee zung gang uk miaf, ya dif seengv doongv nooih gee teeh zee meef-loh. 14 Geef dif biang hemv goonf dekf huh yungv yauf hauf gee, eenv veeih geef dif seengv hauf dif gang gee go zee meef-loh. 15 Bef lai too lai gee itf siatf, zung tih hauf gee; guf seeh hauf bov, Seengf-lingv dif seengv lokf ningf hauf neeh hhootf hee deekf doongv gee zee meef-loh."

16 Yev-so gif zukf bov, "Gua meenf giauh foong, meef-loh ziuh meenf dekf lai huh hauf vooi; zaif gua meenf giauh foong hemv, meef-loh yuh dif dekf huh hauf."

17 Meenv huv geef gee ziuh lai gi huf hemv goonf bov, "Geef seengv hauf-loh bov, 'Gua meenf giauh foong, meef-loh ziuh meenf dekf lai huh hauf vooi; zaif gua meenf giauh foong hemv, meef-loh yuh dif dekf huh hauf.' Yuh bov, 'Eenv veeih hauf booiv ningf bef lai neeh hhootf hee.' Neeh gee tih gai gee if see nooh?" 18 Geef-loh yuh bov, "Geef too gang gee 'Gua meenf giauh foong', doongv dooi tih gai gee if see nif? Hauf-loh meenf huh geef gang gai gee."

19 Yev-so huh geef-loh dif tiang tooi geef, ziuh bov, "Hauf bov 'Gua meenf giauh foong, meef-loh ziuh meenf dekf lai huh hauf vooi; zaif gua meenf giau foong hemv, meef-loh yuh dif dekf huh hauf,' meef-loh veeih go neeh gee hemv goonf tooi goonf haf? 20 Hauf titf-titf seengv meef-loh, meef-loh dif ngai dif yanh, danf tih tooi ganv gee lengv-hunf dif eengv. Meef-loh dif nyung nyang, danf tih nyung nyang meef-loh gee dif bin tingf eengv. 21 Maih leekf lai leekf gee tif hoouh dookf nanf vif, danf tih lai leekf uk miaf hoouh looif, ziuh buh bangh ngaif tuh neeh gee vooi, eenv veeih geef eengv lai leekf huf hee miaf doongv tooi ganv vooi. 22 Meef-loh ya tih teenf hee: En teeif meef-loh ya lai nyung nyang, danf tih hauf dif sungf huh meef-loh, neeh tif hoouh timv meef-loh gee ziuh dif eengv; eengv neeh gee tih meenf lai lengv-hunf geep lai booiv gee. 23 Doongv neeh veenf hee, meef-loh ziuh meenf lai gai gee veenf hiv dif tooi hauf vooi. Hauf titf-titf seengv meef-loh, meef-loh oouv nooiv hauf mee meenf guan hemv bef lai hhuf gai gee, geef itf dingf sev zee meef-loh. 24 Lokf hau meef-loh meenf oouv nooiv hauf mee hhuf gai gee. Meef-loh hhuf, ziuh itf dingf deekf doongv, biang meef-loh eengv biang meef-loh moonh zukf.

25 "Teeh neeh gee, hauf zung tih git bih foong hemv meef-loh gang gee. Tif hoouh dif doongv, hauf meenf git bih foong hemv meef-loh gang fooif hemv vooi, hauf dif daqf-daqf seengv guan i bef lai gee teeh zee meef-loh. 26 Doongv neeh veenf hee, meef-loh dif oouv nooiv hauf mee hhuf bef lai. Hauf seengv meef-loh, doongv neeh tif hoouh hauf meenf si iauf hooi meef-loh hhuf bef lai fooif hemv vooi, 27 eenv veeih bef lai toof-too dookf meef-loh. Geef dookf meef-loh, tih eenv veeih meef-loh duf ga dookf hauf vooi, ya siang sinf hauf tih lokf Siangf-dif neeh hhootf miaf gee. 28 Hauf lokf bef lai neeh hhootf miaf doongv tooi ganv neeh mee. En teeif hauf dif lif hhooiv tooi ganv neeh mee, leengv ningf bef lai neeh hhootf hee."

29 Meenv huv gee ziuh bov, "Noh, en teeif meef tih daqf-daqf gang, meenf tih git bih foong gang vooi. 30 En teeif hauf-loh huh meef gai gee duf huh, meenf yungh lengv-hunf tooi meef, meef duf ga huh geef-loh gee tiang fap vooi. Guf seeh hauf-loh siang sinf meef tih lokf Siangf-dif neeh hhootf miaf gee."

31 Yev-so tanv bov, "En teeif meef-loh nah siang sinf haf? 32 Noh, tif hoouh dif doongv vooi, en teeif duf ga doongv vooi. Vanh dif diatf meef-loh tan goonf, meef-loh di na dif leengv lengv di na gee, suif hauf na hee toof-too. Hhiv sitf, hauf meenf tih na hee toof-too, eenv veeih lai bef lai hemv hauf yoou ningf goonf.

33 "Hauf seengv teeh neeh gee zee meef-loh, tih dif biang meef-loh eenv veeih zun hauf lai fingf anv. Yoou tooi ganv neeh mee meef-loh lai hhuh nanf; danf tih meef-loh meenf ngah hui sim, hauf duf ga yingf gua tooi ganv neeh mee^a vooi."