2 Yiuh-daf ing ing Yev-so neeh huf hee ya took lengv neeh hhootf hee, eenv veeih Yev-so hemv meenv huv gee siangf-siangf yoou ninh zipf zung. 3 Neeh tif hoouh, Yiuh-daf yin bingv Loh-mah gee deeif hee hemv Seengf-dianf gingh vuif gee deeif hee miaf; gingh vuif neeh gee tih gif see ziangh hemv lengv-hunf Fatf-lif-saif dangh gee faif miaf gee. Geef-loh nganv dongh longf, nganv veeif, nganv sung nganv mitf miaf doongv veen neeh mee vooi.

4 Yev-so zauh duf ga huh itf siatf mah siangf dif fatf seeng yoou baiv huf geef gee teeh, ziuh uk miaf tooi geef-loh bov, "Meef-loh div naf nee?"

5 Geef-loh tanv bov, "Div lengv-hunf Nah-saf-leekf gee Yev-so."

Yev-so bov, "Hauf ziuh tih." Ing Yev-so gee Yiuh-daf ya hemv geef-loh nyunv yoou ninh. 6 Yev-so it bov "Hauf ziuh tih", geef-loh ziuh hoih looif, det dauf matf vooi.

7 Yev-so yuh tooi geef-loh fooif hemv, bov, "Meef-loh div naf nee?"

Geef-loh bov, "Div lengv-hunf Nah-saf-leekf gee Yev-so."

8 Yev-so bov, "Hauf duf ga seengv meef-loh vooi, hauf ziuh tih. Meef-loh zeekf div hauf, ziuh biang lengv-hunf neeh gee booiv lo." 9 Neeh tih biang go Yev-so gua na gang gee bin tingf titf vooi, geef teenf hee bov gua, "Lengv-hunf meef sev zee hauf neeh gee, hauf huf duf meenf huk vau."

10 Neeh tif hoouh, Si-meenv Bih-deekf ziuh yitf mitf geef dai dai neeh ziangv hee uk miaf, fiat sav moof maif Mah-leeqf-guh fiangf hee loomh vooi; Mah-leeqf-guh tih leekf nof daf gif see huf hee.

11 Yev-so ziuh bov Bih-deekf, "Suv mitf uif, bef lai sev hhuh nanf neeh zungv hee zee hauf, sangf tih hauf meenf goonv haf?"

12 Bingv Loh-mah neeh deeif hee hemv senv fu ziangh, gangf Seengf-dianf gingh vuif lengv-hunf Yiuh-haif faif miaf neeh gee ziuh hoof Yev-so loouh, gatf geef loouh vooi. 13 Geef-loh sian dai geef doongv dau na Yav-nav vooi, eenv veeih Yav-nav tih daf dah Gai-yav-fav huf hee. Gai-yav-fav neeh veeif hee huk daf gif see. 14 Gai-yav-fav ziuh tih gua na hhin lengv-hunf Yiuh-haif gee neeh huf hee, geef bov, "Biang lengv-hunf huf hee ding bek ting gee daiv, tih lai maif lengv gee."

15 Neeh tif hoouh, Si-meenv Bih-deekf hemv meenv huv gakf huf hemf moh Yev-so. Meenv huv neeh huf hee hemv daf gif see took goonf, ziuh di moh Yev-so loouh da bang daf gif see mee vooi. 16 Danf tih Bih-deekf meenf loouh lai, geef ziuh nyunv yoou bak deenh. Seeif looif meenv huv hemv daf gif see took goonf neeh huf hee uk miaf, hemv maih vook bak deenh neeh huf hee gang ziu hee vooi, ziuh yin Bih-deekf loouh booiv.

17 Maih vook bak deenh neeh huf hee bov Bih-deekf, "Meef meenf tih ya tih meenv huv lengv-hunf neeh huf gee haf?"

Bih-deekf bov, "Hauf meenf tih."

18 Eenv veeih fa mee nit, leekf nof gee hemv Seengf-dianf gingh vuif gee ziuh ngupf veeif vooi, nyunv yoou ninh lingf veeif; Bih-deekf ya nyunv yoou da geef-loh lingf veeif.

19 Neeh tif hoouh, daf gif see simh veenf Yev-so guan i meenv huv geef gee hemv geef maiv gee teeh.

20 Yev-so tanv daf gif see bov, "Hauf lokf hau zung tih gung hhai hemv lengv-hunf gang go gee; hauf siangf-siangf yoou da huif hangv hemv yoou Seengf-dianf, ziuh tih yoou lengv lengv-hunf Yiuh-haif zipf zung neeh gee maiv lengv-hunf; hauf lokf hau meenf lai lookf-lookf gang gai gee gua. 21 Meef veeih gai simh veenf hauf nif? Meef booiv tooi lengv-hunf hingf hauf gang go gua neeh gee, dekf hauf hemv geef-loh gang gai gee vooi; meef dekf, hauf too gang gee, geef-loh zung huh."

22 Yev-so gang go neeh gee vooi, Seengf-dianf gingh vuif nyunv yoou ningf gee huf hee ziuh fak geef ziu hee loouh vooi, tooi geef bov, "Meef daf teenf tanv daf gif see haf?"

23 Yev-so bov, "Zeekf hauf gang sook vooi, meef hhoo yi bov leeuf hhootf sook; zeekf hauf gang heekf vooi, meef veeih gai git hauf nif?" 24 Neeh tif hoouh enf ziuf-ziuf gatf Yev-so yoou, Yav-nav ziuh yam lengv-hunf ap geef booiv ningf daf gif see Gai-yav-fav neeh hhootf hee vooi.

25 Si-meenv Bih-deekf enf nyunv lingf veeif yoou. Lai lengv-hunf tooi geef bov, "Meef meenf tih ya tih meenv huv geef gee haf?"

Bih-deekf meenf singv nginf bov, "Hauf meenf tih."

26 Lai leekf nof daf gif see huf hee, hemv lengv-hunf bif Bih-deekf fiat sav loomh vooi gee neeh huf hee tih sinf sik, ziuh bov, "Hauf meenf tih dekf huh meef hemv geef yoou da veen haf?" 27 Bih-deekf yuh meenf singv nginf, neeh tif hoouh, gaiv mah siangf ziuh tanv vooi.

28 Zauf-zau gee tif hoouh, lingh doouh Yiuh-haif gee ap Yev-so lokf Gai-yav-fav neeh hhootf hee booiv fuh Loh-mah zungh dukf mee vooi. Geef-loh toof-too meenf loouh booiv, mangf luak zeq^a vooi, meenf goonv lai ngaif Yih-yuatf-ziatf neeh gee. 29 Zungh dukf Bih-la-to ziuh uk miaf tooi geef-loh bov, "Meef-loh goou lengv-hunf neeh huf hee gai teeh?"

30 Geef-loh tanv bov, "Zeekf lengv-hunf neeh huf hee meenf huk seeu, hauf-loh ziuh meenf hooi gauv geef sev meef."

31 Bih-la-to bov geef-loh, "Meef-loh toof-too dai geef booiv, ziuf lutf fapf meef-loh gee simh fuanf geef."

Lingh doouh Yiuh-haif gee bov, "Danf tih hauf-loh meenf lai hhinf fuanf lengv-hunf seeh hingv." 32 Neeh tih biang go Yev-so bov geef dif di leeuf daiv neeh gee hee bin tingf titf vooi.

33 Bih-la-to yuh loouh fuh zungh dukf mee vooi, yam Yev-so miaf, tooi geef bov, "Meef tih voongf lengv-hunf Yiuh-haif huf hee haf?"

34 Yev-so tanv bov, "Go neeh gee tih meef toof-too gang gee, ha tih vanh gang heekf hauf gee tif hoouh seengv meef gee nif?"

35 Bih-la-to bov, "Meef yih vuiv hauf tih lengv-hunf Yiuh-haif gee haf? Lengv-hunf Yiuh-haif meef-loh gee hemv gif see ziangh meef-loh gee oouv meef gauv sev hauf. Meef huk gai gee teeh vooi?"

36 Yev-so tanv bov, "Voongv gukf hauf mee meenf sukf i tooi ganv neeh mee; voongv gukf hauf mee zeekf sukf i tooi ganv neeh mee, leekf nof hauf gee itf dingf dif veeih hauf git sinh, hauf ya meenf hooi dok loouh moof lingh doouh Yiuh-haif gee vooi. Danf tih voongv gukf hauf mee meenf yoou nooih."

37 Bih-la-to ziuh bov geef, "Teenf hee, meef tih voongf vooi lo?"

Yev-so tanv bov, "Meef bov hauf tih voongf, meef gang heekf vooi. Hauf tih veeih teeh neeh hhinh hee lai gee, ya tih veeih teeh neeh hhinh hee miaf doongv tooi ganv gee, mukf dikf ziuh tih veeih zinv li huk gianf zingf. Lengv-hunf sukf i zinv li neeh gee, zung hingf go hauf gee."

38 Bih-la-to tooi geef bov, "Gai gee tih zinv li nif?" Gang go neeh gee inv, geef yuh uk miaf booiv ningf lengv-hunf Yiuh-haif neeh hhootf vooi, bov geef-loh, "Hauf saf meenf uk geef lai gai gee soih. 39 Danf tih meef-loh lai feeng sukf mee, ziuh tih yoou Yih-yuatf-ziatf gee tif hoouh, yam hauf tek lengv-hunf huf hee zee meef-loh. Meef-loh hheeng hauf tek voongf lengv-hunf Yiuh-haif neeh huf hee zee meef-loh meenf?"

40 Geef-loh ziuh yanh bov, "Meenf oouv lengv-hunf neeh huf hee! Oouv Ba-la-ba!" Ba-la-ba tih sookf geep sunv huf hee.