Yev-so sev meenv huv sit huf dekf huh geef
21
1 Teeh neeh gee hoouh looif, Yev-so yoou ningf hoomf Tiv-bih-lih-yaf mee sev meenv huv gee dekf huh geef fooif hemv. Geef tih teenf hee sev geef-loh dekf huh gee: 2 Dang siv, Si-meenv Bih-deekf hemv To-mah geef ya yam Tiv-tuh-mah gee neeh huf hee, gangf Gia-lif-lif seengh gee Zia-nav lengv-hunf Nav-danf-yef, hemv leekf da hhiangh Si-bif-haif voon huf, ya lai meenv huv voon huf hemv, zung yoou ningf goonf. 3 Si-meenv Bih-deekf seengv geef-loh bov, "Hauf dif booiv hoof bav." Geef-loh bov, "Hauf-loh ya hemv meef hongf goonf booiv." Geef-loh ziuh uk booiv, geen luaf vooi; danf tih neeh goomh hee geef-loh meenf hoof heekf gai gee.4 Veenf giangf bangv gee tif hoouh, Yev-so nyunv yoou ningf hhoom, danf tih meenv huv gee meenf huh geef tih Yev-so.
5 Yev-so tooi geef-loh bov, "Leekf gai haf, meef-loh hoof heekf bav meenf?"
Geef-loh tanv bov, "Meenf."
6 Yev-so bov, "Tan sai lokf ningf moof maif luaf neeh fiangf hee longf booiv, ziuh hoof lai heekf vooi." Geef-loh ziuh ziuf geef gang gee tan sai longf booiv, titf-titf hoof heekf bav dunf hee, linf sai duf meenf leeh lai geen vooi.
7 Meenv huv Yev-so dookf gee neeh huf hee ziuh seengv Bih-deekf bov, "Tih Zu!" Dang siv, Si-meenv Bih-deekf geq nangv lingf-lingv, geef it hingf huh tih Zu, ziuh mah siangf gatf yua bak hiuf hee geen huf vooi, taq longf hoomf vooi. 8 Hhiv ha gee meenv huv ngoouf leekf luaf neeh hauv hee, leeh bav neeh sai hee doongv ningf hhoom vooi. Eenv veeih dang siv geef-loh lif hhoom meenf looiv, daf hhaif lai it bek miv teenf hee. 9 Geef-loh giangf geen hhoom, ziuh dekf huh yoou ninh lai looh veeif zopf hee, lai bav yoou baiv ninh, ya lai bing yoou ningf.
10 Yev-so yam geef-loh bov, "Oouv bav nauf hoof gee gi huf miaf."
11 Si-meenv Bih-deekf ziuh geen luaf, leeh sai neeh fanv hee geen hhoom vooi. Bav nyoo dik sai fanv hee vooi, inf-inv lai it bek ngoh teepf tamv huf. Tuif yianf bav gee teenf liauh, danf tih sai fanv hee ya meenf gatf. 12 Yev-so yam geef-loh bov, "Meef-loh miaf goonv zau lo." Meenv huv gee meenf lai huf huf goom tooi geef bov, "Meef tih naf nee?" Eenv veeih geef-loh huh geef tih Zu. 13 Yev-so ziuh gua miaf, beu bing beu bav zee geef-loh. 14 Neeh tih Yev-so lokf daiv tingf leengv hoouh looif, haih tamv fooif sev meenv huv gee dekf huh geef.
Yev-so hemv Bih-deekf
15 Geef-loh goonv zau vooi, Yev-so tooi Si-meenv Bih-deekf bov, "Leekf da hhiangh Ye-hanf huf hee Si-meenv haf, meef dookf hauf gua dookf neeh gee haf?"
Bih-deekf tanv bov, "Heh, Zu haf, meef huh hauf dookf meef."
Yev-so bov geef, "Meef hoo leekf tuangf hauf gee."
16 Yev-so haih ngeeih fooif yuh tooi geef bov, "Leekf da hhiangh Ye-hanf huf hee Si-meenv haf, meef dookf hauf meenf?"
Bih-deekf tanv bov, "Heh, Zu haf, meef huh hauf dookf meef."
Yev-so bov geef, "Meef tiangh tuangf hauf gee."
17 Yev-so haih tamv fooif tooi geef bov, "Leekf da hhiangh Ye-hanf huf hee Si-meenv haf, meef dookf hauf meenf?"
Bih-deekf eenv veeih Yev-so haih tamv fooif tooi geef bov "Meef dookf hauf meenf?" Ziuh nyung nyang uif, tanv Yev-so bov, "Zu haf, meef gai gee duf huh, meef huh hauf dookf meef."
Yev-so bov, "Meef hoo tuangf hauf gee. 18 Hauf titf-titf seengv meef, meef unf-un gee tif hoouh, meef toof-too lakf loou loouh, ooi booiv leeuf ziuh booiv leeuf; danf tih doongv meef lauh gee tif hoouh, meef dif nyof moof uk miaf, vanh dif gatf meef loouh, dai meef doongv lengv meef meenf ooi booiv gee neeh hhootf hee." 19 Yev-so gang go neeh gee, tih gang doongv nooih Bih-deekf dif di leeuf daiv miaf yungv yauf Siangf-dif. Yev-so gang go neeh gee vooi, ziuh yam Bih-deekf bov, "Meef miaf hemf moh hauf lo!"
20 Bih-deekf zuanh huf gua miaf, dekf huh meenv huv Yev-so dookf gee neeh huf hee di moh. Meenv huv neeh huf hee ziuh tih gua na goonv goomh gee tif hoouh, neh yoou ningf Yev-so tooi Yev-so bov, "Zu haf, tih naf nee ing meef?" Gee neeh huf hee. 21 Bih-deekf dekf huh geef, ziuh tooi Yev-so bov, "Zu haf, geef doongv nooih di leeuf hee nif?"
22 Yev-so tanv geef bov, "Hauf zeekf biang geef goonv doongv hauf leengv miaf gee tif hoouh, hemv meef lai gai gee guan hif nif? Meef, miaf hemf moh hauf lo!" 23 Go neeh gee ziuh yoou da engv tok gee suanf hhooiv vooi, bov meenv huv neeh huf hee meenf daiv lai. Hhiv sitf Yev-so meenf tih bov geef meenf daiv lai, tih bov, "Hauf zeekf biang geef goonv doongv hauf leengv miaf gee tif hoouh, hemv meef lai gai gee guan hif nif?"
24 Hooi teeh neeh gee huk gianf zingf, ya gif teeh neeh gee longf miaf gee, ziuh tih meenv huv neeh huf hee. Hauf-loh huh gianf zingf geef gee tih zinv gee.
25 Yev-so huk gee teeh enf lai haih liauh gakf gee hemv yoou; zeekf tih di hhinh di hhinh zung tia longf miaf, tia tingf sek vooi, hauf tiang, ziuh tih tooi ganv neeh mee ya meenf biang lai sek neeh gee inv.