5 Neeh tif hoouh,

lai gingf vuif Siangf-dif gee Yiuh-haif lengv-hunf lokf suanv sif gaif gee gookf mooqf gok gav miaf,

zih yoou Ye-luf-sa-leengh.

6 Sauv neeh mee it look,

geef-loh ziuh hemv goonf deuf gua miaf.

Geef-loh zung tiang meenf hongv,

eenv veeih geef-loh leeuf na duf hingf heekf meenv huv gee gang go geef-loh gee.

7 Geef-loh zung ngeeq on vooi,

meenf huh giauh hhiv guaif ziuh bov,

"Noh,

lengv-hunf gang go neeh hoouf hee meenf tih zung tih lengv-hunf Gia-lif-lif gee haf?

8 Doouf-loh leeuf na di leeuf hingf heekf geef-loh gang go doouf-loh lokf nook gang neeh gee nif?

9 Doouf-loh neeh hoouf hee tih lokf Faf-tiv-yaf,

Mah-daif,

Yih-lanv,

hemv zih yoou Meeih-sov-buf-tav-miv-yaf,

Yiuh-haif,

Gia-faf-to-gia,

Beenh-du,

Yaf-si-yaf,

10 Fov-liv-gia,

Foongv-feei-lif-yaf,

Ai-gipf,

gangf yoou ningf Guh-lif-naif gee Lif-bih-yaf lengv foongv miaf gee,

ya lai lengv-hunf Yiuh-haif lokf Loh-mah miaf neeh gee hemv lengv-hunf loouh Yiuh-haif giauf neeh gee,

11 gangf lengv-hunf Hheekf-lih-teef hemv lengv-hunf A-la-beekf gee,

zung hingf heekf geef-loh oouv go doouf-loh gee miaf gang Siangf-dif huk vuih daf gee teeh."

12 Geef-loh zung hhiv guaif tiang meenf hongv,

ziuh hemv goonf tooi goonf bov,

"Neeh tih gai gee if see nooh?"

13 Ya lai lengv-hunf liauv meenv huv gee bov,

"Geef-loh neeh hoouf ga goonv yan meeif vooi tix."

14 Danf tih Bih-deekf hemv teepf ti huf seeh huv nyunv uif miaf,

geef ziuh sauv lookf-look gang bov,

"Lengv-hunf Yiuh-haif gee hemv lengv-hunf zih yoou Ye-luf-sa-leengh gee haf!

Teeh neeh gee meef-loh hheem took,

ya hheem zutf sav hingf go hauf gee loouh.

15 Meef-loh yih vuiv lengv-hunf neeh hoouf hee goonv yan meeif vooi haf?

Meenf tih teenf hee,

eenv veeih en teeif nah zauf-zau gu dem zungv.

16 Teeh neeh gee zingf-zing tih sian zi Ye-eev gang gee,

17 'Siangf-dif bov,

yoou zuif heeuf gee tif ganv^b,

hauf dif oouv Lingv hauf mee miaf giuv too lai gee lengv-hunf,

leekf ngif meef-loh gee dif gang ngif ngianv,

leekf hauh tengv meef-loh gee dif dekf huh siau zeef yianv gee gingh siangf;

neef lauh gee dif voonf huh siau zeef yianv gee teeh.

18 Yoou neeh duanf tif ganv,

hauf dif oouv Lingv hauf mee miaf giuv leekf nof hauf gee,

meenf guan tih maih leekf ha tih da hhiangh,

geef-loh ziuh dif gang ngif ngianv.

19 Hauf dif biang meef-loh dekf huh baiv fa lai hhiv guaif gee teeh,

dekf huh yoou dauf matf lai seenv zif,

dif lai baq,

lai veeif,

lai duaih.

20 Da veenf mee dif bin lamv vooi,

maih saiv mee dif bin hongf zing baq hee,

yoou Zu vuih daf yungv yauf gee veenf zee miaf doongv zee sianv,

teeh neeh gee zung dif fatf seeng.

21 Neeh tif hoouh,

too lai hhuf nooiv Zu mee gee,

ziuh itf dingf deekf giuf.'^c

22 "Lengv-hunf Yih-seef-liatf gee haf,

meef-loh hingf hauf gang,

Siangf-dif hongv gua Nah-saf-leekf gee Yev-so yoou da meef-loh huk meenf fingf tiangf gee teeh,

huk hhiv guaif gee teeh hemv huk seenv zif,

zingf mingv Yev-so tih geef faif miaf gee,

teeh neeh gee meef-loh toof-too ya huh.

23 Siangf-dif ziuf toof-too yif bif maif gee gif huaf hemv giatf dingf gauv Yev-so sev meef-loh vooi,

meef-loh ziuh gauv geef sev lengv-hunf teepf ook neeh gee,

oouv geef booiv dingf sipf zeef giaf daiv vooi.

24 Danf tih Siangf-dif geq daiv gee nanf vif booiv vooi,

biang geef tingf leengv miaf,

eenv veeih geef yuanv miaf meenf bif lai daiv hhongf zif.

25 Eenv veeih gua na Daf-vuif voongv gang doongv Zu gee tif hoouh,

bov,

'Hauf siangf-siangf dekf huh Zu yoou dau na hauf,

eenv veeih geef yoou ningf moof maif hauf,

hauf ziuh meenf ngoouf.

26 Guf seeh timv hauf mee eengv,

bak hauf mee ngenv geef meenf hengf,

eenv veeih hauf lai haih meengh,

bun tinv hauf mee ya maif-maif suh saih.

27 Eenv veeih meef meenf hooi gengf honf tinf hauf mee yoou imv ganv,

ya meenf hooi biang Seengf-zeh meef huf hee deeif.

28 Meef duf ga nyi sunv seeng mingf hiuf hee zee hauf vooi,

meef dif hemv hauf yoou ningf goonf biang hauf meenf huh giauh eengv.'^d

29 "Engv tok hauf gee haf,

guan i zuh zung doouf-loh huf hee Daf-vuif gee teeh,

hauf hhoo yi looiv nyoof-nyoo seengv zee meef-loh,

geef daiv vooi,

ya bok vooi,

zi doongv veenf nooih feenf geef mee enf yoou ningf doouf-loh neeh hhootf hee yoou.

30 Daf-vuif tih sian zi huf hee,

geef huh gua na Siangf-dif hemv geef fat tooih gua,

eef geef bov dif biang leekf lanv geef gee huf hee miaf ngov henh geef mee.

31 Geef duf ga huh dif fatf seeng teeh neeh hhinh hee vooi,

ziuh gang Gi-dukf tingf leengv gee teeh,

bov,

'Meenf hooi gengf honf tinf geef mee yoou imv ganv,

bun tinv geef mee ya meenf deeif yoou da feenf.'

32 Neeh huf Yev-so Siangf-dif duf ga biang geef tingf leengv vooi.

Hauf-loh zung tih teeh neeh hhinh gee gianf zingf yinv.

33 Geef duf ga bif doongf hangv yoou ningf moof maif Siangf-dif,

ya lokf ningf Bef-lai neeh hhootf hee deekf doongv Bef-lai eef gee Seengf-lingv vooi,

ziuh giuv Seengf-lingv longf miaf,

ziuh tih en teeif meef-loh dekf heekf hingf huh gee.

34 Daf-vuif ya meenf geen doongv baiv fa gua,

danf tih geef toof-too bov,

"Siangf-dif hemv Zu hauf gang,

'Meef ngov yoou ningf moof maif hauf,

35 foou hauf biang dikf yinv meef gee

huk doong sev meef zav gok.'^e

36 "Guf seeh,

too lai gee Yih-seef-liatf lengv-hunf meef-loh hheem titf-titf huh,

meef-loh dingf daiv yoou baiv sipf zeef giaf gee neeh huf Yev-so,

Siangf-dif duf ga lipf geef huk Zu,

huk Gi-dukf vooi."

37 Geef-loh hingf heekf go neeh gee vooi,

timv gee zing mitf ngootf teenf hee,

ziuh tooi Bih-deekf hemv hhiv ha gee seeh huv bov,

"Engv tok hauf haf,

hauf-loh hheem di leeuf huk nif?"

38 Bih-deekf bov,

"Meef-loh naf nee duf hheem huiv gaih,

siang sinf Yev-so Gi-dukf ziapf siuf tuk leei,

hau biang Siangf-dif min soih meef-loh gee,

ziuh itf dingf deekf doongv geef sev gee Seengf-lingv.

39 Eenv veeih Siangf-dif eef gee Seengf-lingv,

tih sev meef-loh hemv leekf ngif meef-loh gee,

gangf lengv-hunf Siangf-dif lokf lengv looif-looiv yam miaf neeh gee."

40 Bih-deekf ya yungh haih liauh gakf gee go miaf huk gianf zingf,

ya hhin geef-loh bov,

"Meef-loh hheem go toof-too luat neeh mee yuh seeu yuh ook gee tooi ganv."

41 Giatf guah lengv-hunf siang sinf go geef neeh gee,

zung tuk leei vooi.

Neeh veenf hee,

daf hhaif gav meenv huv tamv senv huf.

42 Geef-loh zung yungh timv booiv zun siuh seeh huv maiv gee,

hemv goonf giau hung,

hemv goonf loot bing,

hemv goonf doouh doouf.

43 Hemv goonf zung lokf da timv gingf vuif Siangf-dif;

seeh huv gee yuh huk haih liauh hhiv guaif gee teeh hemv seenv zif.

44 Too lai lengv-hunf siang sinf neeh gee zung hemv goonf yoou ningf goonf,

too lai gee goouh zung hemv goonf yungh gua goonf.

45 Geef-loh ya ing niaf ing lanf neeh gee vooi,

oouv sinf neeh gee ziuf gookf na gee si iauf feenv zee gookf na.

46 Geef-loh hemv goonf veenf-veenf duf hongf timv hongf i yoou da Seengf-dianf gingf baif Siangf-dif,

ya hemv goonf booiv lanf goonf vooi zipf huif loot bing goonv,

lai timv eengf-eengv mee hemv timv daqf luf mee hemv goonf goonv fiah,

47 ngenv Siangf-dif,

suanf heeuv gee lengv-hunf zung ooi geef-loh.

Zu oouv deekf giuf gee lengv-hunf veenf-veenf gav zee geef-loh.