3 Goouh too lai gee zung tih hongv gua geef soouh gee; goouh too lai soouh soouh neeh gee, meenf lai hhinf-hhinh tih meenf hongv gua geef soouh gee. 4 Geef tih hau itf siatf yinf mingh gee, hau yinf mingh neeh mee sev lengv-hunf bangv. 5 Bangv neeh mee nyoof loouh yoop, yoop lokf hau meenf yingf lai gua bangv neeh mee.

6 Lai lengv-hunf huf hee yam Ye-hanf hee, tih Siangf-dif faif miaf gee. 7 Geef miaf tih veeih bangv neeh mee huk zingf mingv, biang too lai gee lengv-hunf hongv gua geef gang gee, siang sinf bangv neeh mee. 8 Ye-hanf beenh seen meenf tih bangv neeh mee, geef miaf tih dif hooi bangv neeh mee huk zingf mingv. 9 Bangv neeh mee tih zinv bangv, miaf doongv tooi ganv nyoof bangv too lai gee lengv-hunf.

10 Bangv yoou tooi ganv neeh mee, tooi ganv neeh mee ya tih hongv gua geef soouh gee, danf tih tooi ganv gee lengv-hunf meenf took geef. 11 Geef miaf doongv lengv toof-too gee, toof-too gee lengv-hunf meenf ziapf siuf geef. 12 Danf tih too lai ziapf siuf geef gee lengv-hunf, ziuh tih lengv-hunf siang sinf geef neeh gee, geef ziuh sev hhinf zee geef-loh huk leekf ngif Siangf-dif gee. 13 Lengv-hunf neeh gee meenf tih lokf hiatf maif lai gee, meenf tih lokf lengv-hunf gee gif huaf lai gee, ya meenf tih lokf da hhiangh gee if see lai gee, tih lokf Siangf-dif lai gee.

14 Go neeh gee tingf lengv-hunf huf hee vooi, zih yoou da doouf-loh. Doouf-loh dekf huh yungv guang geef gee gua, ziuh tih Bef lai gee Dukf-seeng-zeeh gee yungv guang, geef sung moonh een dianh hemv zinv li.

15 Ye-hanf hooi geef huk zingf mingv, sauv lookf-look bov, "Neeh huf ziuh tih gua na hauf gang gua, 'Lai huf hee dif miaf seeif gua hauf, danf tih geef bih hauf nyoo; eenv veeih meenf lai hauf yoou, geef duf ga yoou vooi.' Gee neeh huf hee." 16 Lokf geef nungf-nungf gee een dianh, doouf-loh zung deekf doongv geef zukf fukf gee di fooif doongv di fooif. 17 Eenv veeih lutf fapf tih Siangf-dif hongv gua Mov-si sev gee, danf tih een dianh hemv zinv li tih hongv gua Yev-so Gi-dukf miaf gee. 18 Meenf lai lengv-hunf huh Siangf-dif gua, nah lai beenh seen ya tih Siangf-dif, yoou da hong bef lai gee neeh huf Dukf-seeng-zeeh, biang lengv-hunf hongv gua geef huh Siangf-dif.

19 Dauf ninh tih Ye-hanf gee zingf mingv: lengv-hunf Yiuh-haif huk hau neeh gee, lokf Ye-luf-sa-leengh faif gif see gee hemv lengv-hunf Lif-vuif gee booiv ningf Ye-hanf vooi, tooi geef bov, "Meef tih naf nee?" 20 Ye-hanf meenf zengv, daqf daqf seengv geef-loh, bov, "Hauf meenf tih Gi-dukf."

21 Geef-loh yuh tooi geef bov, "Teenf hee, meef tih naf nee? Tih Yih-lif-yav haf?"

Geef bov, "Meenf."

Geef-loh yuh tooi geef bov, "Meef tih sian zi^a neeh huf hee haf?"

Geef tanv bov, "Meenf tih."

22 Geef-loh yuh tooi geef bov, "Meef seengv hauf-loh, meef doongv dooi tih naf nee? Hauf-loh hau leengv booiv seengv lengv-hunf faif hauf-loh miaf neeh gee. Meef toof-too bov, meef tih naf nee?"

23 Ye-hanf bov, "Hauf ziuh tih sauv yoou da loouh siuh siuh neeh mee, sauv neeh mee siuh bov, 'Huk sunv Zu gee teenf teenf booiv', zing goh gua na sian zi Yih-saif-yav gang gee teenf hee."

24 Lengv-hunf faif miaf neeh gee, lai gi huf tih Fatf-lif-saif dangh gee. 25 Geef-loh tooi Ye-hanf bov, "Meef zeekf meenf tih Gi-dukf, meenf tih Yih-lif-yav, ya meenf tih sian zi neeh huf hee, meef lai gai hhinf hooi vanh tuk leei?"

26 Ye-hanf tanv bov, "Hauf tih oouv namh hooi vanh tuk leei gee, danf tih lai huf hee nyunv yoou da meef-loh, tih meef-loh meenf took gee. 27 Tuif yianf geef miaf seeif gua hauf, danf tih hauf linf hooi geef geq ba haif duf meenf fui."

28 Teeh neeh gee fatf seeng yoou Ye-danf hoov fiangf ninh hhoom gee Bokf-daf-niv, ziuh tih lengv Ye-hanf doongv tif tuk leei gee neeh hhootf hee.

29 Haih ngeeih veenf, Ye-hanf dekf huh Yev-so miaf ningf geef, ziuh bov, "Noh, neeh huf tih leekf tuangf Siangf-dif huf hee, geef miaf tih veeih tooi ganv gee lengv-hunf seef soih gee! 30 Neeh huf hee ziuh tih gua na hauf gang gua, 'Lai huf hee dif miaf seeif gua hauf, danf tih geef bih hauf nyoo, eenv veeih meenf lai hauf yoou, geef duf ga yoou vooi.' Gee neeh huf hee. 31 Gua na hauf meenf took geef, en teeif hauf oouv namh miaf hooi vanh tuk leei, tih veeih liauh biang lengv-hunf Yih-seef-liatf gee took geef."

32 Ye-hanf yuh huk zingf mingv bov, "Gua na hauf hooi geef tuk leei gee tif hoouh, dekf huh Seengf-lingv zing goop huf hee teenf hee, lokf baiv fa longf miaf, hengf on yoou baiv huf geef. 33 Beenh laiv hauf meenf took geef, danf tih faif hauf miaf, yam hauf oouv namh hooi vanh tuk leei gee Siangf-dif, seengv hauf bov, 'Meef dekf huh Seengf-lingv longf miaf, hengf on yoou baiv huf naf nee, naf nee ziuh tih oouv Seengf-lingv miaf hooi vanh tuk leei^b gee neeh huf hee.' 34 Hauf dekf huh vooi, ziuh zingf mingv geef ziuh tih Siangf-dif hokf i liakf hemv faif miaf gee neeh huf hee."

35 Gua veenf hemv vooi, Ye-hanf hemv meenv huv geef voon huf yuh nyunv yoou ninh. 36 Ye-hanf dekf huh Yev-so lokf ninh gua, ziuh bov, "Noh, neeh huf ziuh tih leekf tuangf Siangf-dif huf hee!"

37 Meenv huv neeh voon huf hingf heekf geef teenf gang, ziuh hemf moh Yev-so vooi. 38 Yev-so tuanh huf gua miaf, dekf huh geef-loh hemf moh geef, ziuh tooi geef-loh bov, "Meef-loh tiang oouv gai gee?"

Geef-loh bov, "La-bih("La-bih" gee if see tih "Lauh see"), meef zih yoou leeuf?"

39 Yev-so bov, "Meef-loh miaf dekf."

Geef-loh ziuh di moh Yev-so booiv dekf lengv geef zih neeh hhootf hee. Eenv veeih doongv ninh daf hhaif veenf zoouf ti zem vooi, geef-loh ziuh zih yoou ningf Yev-so.

40 Hingf heekf go Ye-hanf gee vooi, ziuh hemf moh Yev-so gee neeh voon huf, lai huf hee tih tok Si-meenv Bih-deekf huf hee An-deekf-liatf. 41 Geef mah siangf booiv div gof geef huf hee Si-meenv, seengv geef bov, "Hauf-loh div heekf Miv-saif-yav^c vooi." 42 An-deekf-liatf ziuh yin Si-meenv booiv div Yev-so.

Yev-so vook geef itf-it teenf hee, bov, "Meef tih leekf da hhiangh Ye-hanf huf hee Si-meenv, meef hheem yam Zi-fapf("Zi-fapf" gee if see tih "Bih-deekf") hee."

43 Yuh gua veenf hee hemv vooi, Yev-so giatf dingf booiv Gia-lif-lif seengh. Geef am heekf Feei-lif, ziuh hemv geef gang, "Miaf hemf moh hauf."

44 Feei-lif tih lengv-hunf Bokf-saif-daf gee, hemv An-deekf-liatf hemv Bih-deekf hongf heeuv mee. 45 Feei-lif div heekf Nav-danf-yef vooi, seengv geef bov, "Hauf-loh div heekf Mov-si yoou da lutf fapf sek tia gee, hemv sian zi tia gee neeh huf hee vooi. Geef ziuh tih lengv-hunf Nah-saf-leekf zinf gee Yev-so, tih leekf da hhiangh Ye-seef huf hee."

46 Nav-danf-yef bov, "Nah-saf-leekf! Nah-saf-leekf dif sut lai lengv-hunf maif gee uk haf?"

Feei-lif bov, "Meef toof-too miaf dekf."

47 Yev-so dekf huh Nav-danf-yef doi na geef gua miaf, ziuh bov, "Noh, neeh huf tih zin zingf gee Yih-seef-liatf lengv-hunf, timv geef mee ziqf duf meenf goouv."

48 Nav-danf-yef tooi Yev-so bov, "Meef di leeuf teenf took hauf nif?"

Yev-so tanv bov, "Feei-lif enf meenf hemv meef gang go yoou, meef yoou dauf hau dun vu-hua-goh gee tif hoouh, hauf duf ga dekf huh meef vooi."

49 Nav-danf-yef bov, "Of, lauh see! Meef tih Leekf-da-hhiangh Siangf-dif huf hee! Meef tih voongf Yih-seef-liatf huf hee!"

50 Yev-so bov, "Eenv veeih hauf seengv meef, hauf dekf huh meef yoou dauf hau dun vu-hua-goh, meef ziuh zun vooi haf? Doongv nooih meef dif dekf huh bih neeh hhinh geengf nyoo gee teeh." 51 Geef yuh bov, "Hauf titf-titf seengv meef-loh, doongv nooih meef-loh dif dekf huh fa mee hheeif vooi, hian seeh Siangf-dif gee yoou baiv huf Yeenv-zeeh geen-geen longf-longf."