5 Danf tih lai sinf huv gi huf tih lengv-hunf Fatf-lif-saif dangh gee,

geef-loh nyunv uif bov,

"Itf dingf hheem hooi lengv-hunf hhiv ha minv zukf gee ngootf leei,

ya zuk geef-loh hheem zun siuh Mov-si gee lutf fapf."

6 Seeh huv gee hemv ziangh lauh gee zipf zung yoou ningf goonf hamf liangf teeh neeh hhinh hee.

7 Hemv goonf hoouh leenf haih foong vooi,

Bih-deekf ziuh nyunv uif bov,

"Engv tok hauf gee haf,

meef-loh ya huh,

Siangf-dif zoouh duf ga yoou da meef-loh liakf hauf vooi,

yam hauf suanf fukf im sev lengv-hunf hhiv ha minv zukf gee,

biang geef-loh hingf vooi ziuh siang sinf.

8 Took timv teeh lengv-hunf gee Siangf-dif ya hooi geef-loh huk gianf zingf vooi,

sev Seengf-lingv zee geef-loh,

zing goh sev zee doouf-loh teenf hee;

9 geef-loh siang sinf,

Siangf-dif ziuh tuk timv geef-loh gee bang vooi,

Siangf-dif meenf feenv doouf-loh geef-loh,

zung tih hongf goonf.

10 Gif yianv teenf hee,

en teeif meef-loh veeih gai tee Siangf-dif nif?

Zuh zung doouf-loh gee hemv doouf-loh toof-too duf meenf zun lai siuh Mov-si gee lutf fapf,

veeih gai ya dif ap meenv huv gee zun siuh nif?

11 Teenf huk meenf heekf,

doouf-loh siang sinf,

doouf-loh deekf giuf tih hhoouf Zuh Yev-so gee een dianh,

hemv geef-loh hongf goonf."

12 Hemv goonf zung meen vooi,

hingf Ba-nav-ba hemv Boouh-lov gang Siangf-dif hongv gua geef-loh voon na yoou da lengv-hunf hhiv ha minv zukf gee huk seenv zif hemv huk hhiv guaif gee teeh.

13 Geef-loh gang inv vooi,

Yav-gookf ziuh gang bov,

"Engv tok hauf gee haf,

meef-loh hingf hauf gang.

14 Nauf-nauh Si-meenv bov gua na Siangf-dif di leeuf gov lengv-hunf hhiv ha minv zukf gee,

lokf da geef-loh liakf lengv-hunf feenh hee miaf huk leekf ngif geef gee.

15 Teeh neeh gee hemv gua na gee sian zi gang gee hongf goonf.

16 Zing goh ging veenv tia gee teenf hee,

ging veenv bov,

"'Ziangf mukf Daf-vuif mee dum vooi,

hoouh looif hauf dif leengv miaf sungf huk uif,

lingv faih-faih neeh gee maif uif.

17 Hau biang lengv-hunf teengh longf neeh gee,

ziuh tih lengv-hunf hhiv ha minv zukf siang sinf hauf neeh gee,

zung div Zu.

18 Go neeh gee tih Zu gang gee,

tih lokf lauh zi miaf biang teeh neeh gee zee lengv-hunf huh gee Zu gang gee.'^a

19 "Too yi hauf nginf vuiv,

doouf-loh meenf ing gai ap lengv-hunf hhiv ha minv zukf siang sinf Zu neeh gee,

20 danf tih doouf-loh hheem tia tin zuk geef-loh bov,

meenf zun goonv goouh bai gungv gua neeh gee,

meenf zun beeng bef beeng maih,

meenf zun goonv goouh soouf daiv neeh gee,

ya meenf zun goonv baq.

21 Eenv veeih lokf lauh zi miaf,

yoou leeuf mooqf heeuv duf lai lengv-hunf gung hhai hookf sek Mov-si gee,

leeuf mooqf An-sikf-veenf,

yoou gookf mooqf huif hangv duf lai lengv-hunf hookf sek neeh gee.

22 Seeif looif seeh huv hemv ziangh lauh gee gangf suanf giauf huif gee lengv-hunf giatf dingf lokf da geef-loh liakf lengv-hunf uk miaf,

faif geef-loh hemf moh Boouh-lov hemv Ba-nav-ba booiv An-tiv-a.

Bif liakf heekf gee tih Yiuh-daf hemv Si-la,

Yiuh-daf ya yam Ba-sa-ba hee,

geef-loh voon na yoou da engv tok gee tih huk lingh doouh gee.

23 Sinf huv gee tia tin fungv hee yam geef-loh dai booiv,

da ninh tia bov,

"Hhiv ha minv zukf zih yoou An-tiv-a,

Sif-lif-a hemv Gi-lif-gia gee engv tok haf!

Seeh huv gee hemv ziangh lauh gee tooi meef-loh hemv goonf maif!

24 Hauf-loh hingf vanh gang bov lai lengv-hunf gi huf lokf hauf-loh neeh hhootf hee booiv ningf meef-loh,

gang go tee meef-loh nyung nyang^b,

meenf huh di leeuf huk maif.

Hhiv sitf geef-loh teenf huk,

meenf tih hauf-loh yam gee.

25 Too yi hauf-loh hemv goonf hongf goonf giatf dingf liakf lengv-hunf gi huf uk miaf,

faif geef-loh hemf moh hauf-loh zuif ooi gee Ba-nav-ba hemv Boouh-lov booiv ningf meef-loh.

26 Ba-nav-ba hemv Boouh-lov veeih nooiv Zuh Yev-so Gi-dukf mee sav ziqf hemv daiv mingh.

27 Too yi,

hauf-loh faif Yiuh-daf hemv Si-la booiv,

geef-loh ya dif sin zeef gang teeh da tin neeh gee.

28 Eenv veeih Seengf-lingv hemv hauf-loh zung nginf vuiv,

meenf ing gai oouv goouh hhoonv ngaif iaq gee zav geen baiv huf meef-loh,

danf tih lai teeh gi hhinh meef-loh hheem booiv huk,

29 ziuh tih meenf zun goonv goouh bai gungv gua neeh gee,

meenf zun goonv baq,

meenf zun goonv goouh soouf daiv neeh gee,

meenf zun beeng bef beeng maih.

Teeh neeh gi hhinh meef-loh zeekf huk lai doongv ziuh maif vooi.

Hi voongf meef-loh fingf anv!"

30 Sinf huv Ye-luf-sa-leengh gee faif geef-loh longf An-tiv-a,

geef-loh doongv ninh vooi,

ziuh yam sinf huv gee inf-inv miaf,

gauv tin neeh fungv hee zee geef-loh.

31 Hemv goonf hookf tin neeh fungv hee vooi,

eenv veeih da ninh tia go guh lif geef-loh gee,

hemv goonf zung eengv.

32 Yiuh-daf hemv Si-la ya tih sian zi,

geef-loh gang haih liauh go guh lif engv tok hoouf hee,

biang geef-loh geengf lai sinf sim.

33 Geef-loh voon na yoou ninh zih duanf hee tif ganv vooi,

dif leengv booiv,

engv tok hoouf hee ziuh hong looif geef-loh,

zukf fukf geef-loh fingf anv,

geef-loh ziuh leengv Ye-luf-sa-leengh vooi.

35 Danf tih Boouh-lov hemv Ba-nav-ba gif zukf zih yoou An-tiv-a,

hemv haih liauh gakf gee lengv-hunf hongf goonf giauf doouh lengv-hunf,

hongf goonf suanf Zu gee fukf im.

36 Gua duanf hee tif ganv vooi,

Boouh-lov hemv Ba-nav-ba gang bov,

"Doouf-loh ing gai leengv heeuv doouf-loh suanf Zu gee fukf im gua neeh gee vooi,

tunf engv tok gee,

dekf geef-loh di leeuf vooi."

37 Ba-nav-ba tiang dai Ye-hanf hemf moh booiv,

Ye-hanf ya yam Mah-hheev hee;

38 danf tih Boouh-lov meenf hongf i,

eenv veeih gua na yoou Foongv-feei-lif-yaf gee tif hoouh,

Mah-hheev meenf hongf moh geef-loh booiv huk gongv,

toof-too leengv booiv vooi.

39 Geef-loh voon na ziuh luanh goonf,

feenv goonf vooi.

Ba-nav-ba ziuh yin Mah-hheev ngov luaf booiv Saif-fuh-luf-si vooi;

40 Boouh-lov liakf Si-la hemf moh geef,

engv tok gee ziuh gauv geef zee Zu gee een dianh vooi,

geef-loh ziuh booiv vooi.

41 Boouh-lov booiv lengv Sif-lif-a hemv Gi-lif-gia gee hoou vooi,

guh lif dang dif giauf huif gee lengv-hunf,

biang geef-loh geengf lai sinf sim.