Boouh-lov yoou dau na Yaf-gi-faf voongv bianf leenf
26
1 Yaf-gi-faf bov Boouh-lov,
"Meef hhoo yi hooi toof-too bianf leenf."
Boouh-lov ziuh doongf moof bianf leenf bov,
2 "Yaf-gi-faf voongv haf,
lengv-hunf Yiuh-haif goou hauf gee teeh,
veenf nooih hauf hhoo yi yoou dau na meef bianf leenf,
hauf titf-titf haih hengf veenh.
3 Deekf biatf tih meef liauv gaih lengv-hunf Yiuh-haif itf siatf gee guiv leei hemv geef-loh zeeng leenf gee veenf hiv,
too yi hhuf meef laif-laih hingf hauf gang.
4 "Hauf lokf nook doongv en teeif,
yoou gok gav hauf mee hemv yoou Ye-luf-sa-leengh,
hauf lengv-hunf nee di leeuf,
too lai gee Yiuh-haif lengv-hunf zung huh.
5 Geef-loh duf ga took hauf haih foong vooi,
zeekf geef-loh hheeng hooi hauf zingf mingv,
ziuh huh hauf lokf nook tih lengv-hunf Fatf-lif-saif dangh gee,
ziuh tih hauf-loh Yiuh-haif giauf zuif ngiamv geekf gee neeh dangh hee.
6 En teeif hauf nyunv yoou nooih bif simh fuanf,
tih eenv veeih hauf vook hau sunv Siangf-dif eef sev zuh zung hauf-loh gee.
7 Hauf-loh teepf ngeeih mooqf zi faif gee lengv-hunf veenf-veenf goomh-goomh fokf teeh Siangf-dif,
zung vook hau sunv Siangf-dif eef gee bin tingf titf.
Yaf-gi-faf voongv haf,
lengv-hunf Yiuh-haif gee goou hauf,
tih eenv veeih hauf siang sinf Siangf-dif eef gee.
8 Siangf-dif biang lengv-hunf daiv tingf leengv,
meef-loh veeih gai bov meenf hhoo neengf nif?
9 "Gua na hauf toof-too ya nginf vuiv,
hheem gukf lingf fanh deeif Nah-saf-leekf lengv-hunf Yev-so.
10 Hauf yoou Ye-luf-sa-leengh ya teenf huk gua.
Hauf meenf danv oouv hhinf gif see ziangh sev hauf neeh gee booiv hoof haih liauh seengf huv hoop loouh da gamv vooi;
geef-loh bif ga daiv gee tif hoouh,
hauf ya bov maif.
11 Hauf siangf-siangf yoou gookf mooqf huif hangv git geef-loh,
bik geef-loh gang go famh Yev-so.
Hauf hheekf see zookf geef-loh,
yimf doongv geef-loh deuf doongv lengv hhiv ha minv zukf gee vooi,
hauf ya zuiv doongv ninh haih geef-loh.
Boouh-lov gang geef di leeuf gaih bianf sinf Yev-so
12 "Lai fooif hee,
gif see ziangh sev hhinf zee hauf hemv fi zunh hauf booiv Daf-mah-seef-geev hoof geef-loh.
13 Yaf-gi-faf voongv haf,
veenf da hauf yoou da sunv gee tif hoouh,
dekf huh guang suanf gee meenf huh giauh bangv,
bangv gua da veenf vooi,
lokf baiv fa longf miaf ti minh nyoof hauf,
gangf lengv-hunf hemv hauf hongf goonf booiv neeh gee.
14 Hauf-loh zung det longf dauf matf vooi,
hauf hingf huh sauv mee gang go Si-bov-laiv gee bov hauf,
'Soouh-lov haf Soouh-lov,
meef veeih gai bik haih hauf?
Meef zing nguf huf hee teenf hee,
fanv leengv miaf hek heengh lanf zu hiuf hee,
teenf hee meef toof-too tuh tiangv.'
15 "Hauf bov,
'Zu haf,
meef tih naf nee?
' Zu tanv bov,
'Hauf ziuh tih meef bik haih gee neeh huf Yev-so.
16 Meef nyunv uif miaf,
hauf sev meef dekf huh hauf,
tih dif faif meef huk leekf nof hemv huk gianf zingf yinv,
ziuh tih hooi meef too dekf huh gee teeh hemv hoouh looif hauf dif nyi meef gee teeh huk gianf zingf.
17 Hauf dif go meef luat moof lengv-hunf Yiuh-haif gee hemv lengv-hunf hhiv ha minv zukf gee.
Hauf faif meef booiv ningf geef-loh,
18 hheeif dav geef-loh gee vooi,
biang geef-loh lokf lengv yoop zuanh leengv lengv bangv,
lokf da moof Sav-danf uk miaf,
zuanh leengv ningf Siangf-dif siang sinf hauf,
hau biang Siangf-dif min soih geef-loh gee,
hhoo yi hemv lengv-hunf seengf giatf neeh gee hongf goonf hiangh siuf baiv fa gee sanh ngiapf.'
Boouh-lov suanf gang Yev-so gee teeh
19 "Yaf-gi-faf voongv haf,
too yi hauf meenf goom meenf zun siuh gingh siangf lokf baiv fa miaf neeh mee.
20 Hauf sian yoou Daf-mah-seef-geev hemv Ye-luf-sa-leengh,
seeif looif yoou suanf Yiuh-haif hemv hhiv ha minv zukf gee lengv foongv,
hhin lengv-hunf hheem huiv gaih leengv ningf Siangf-dif,
hengf hongh ya hheem hemv huiv gaih liang goonf.
21 Eenv veeih teeh neeh gee,
lengv-hunf Yiuh-haif gee nah yoou Seengf-dianf hoof hauf,
dif tiang ga hauf.
22 Danf tih Siangf-dif boongv tooh hauf,
veenf nooih hauf nah nyunv lai yoou nooih,
hemv neef gui neef sinh,
neef lauh neef un neeh gee huk gianf zingf.
Hauf gang gee teeh,
ziuh tih gua na sian zi gee gang gua,
Mov-si ya gang gua doongv nooih itf dingf dif fatf seeng gee teeh,
23 ziuh tih Gi-dukf itf dingf bif haih,
ya tih haih it huf lokf da lengv-hunf daiv tingf leengv gee,
sev guang mingv zee lengv-hunf Yiuh-haif gee gangf lengv-hunf hhiv ha minv zukf gee."
Boouh-lov hhin Yaf-gi-faf sinf Zu
24 Boouh-lov gang doongv ninh,
Feei-si-du ziuh sauv lookf-lookf deek geef bov,
"Boouh-lov,
meef ga denv vooi haf?
Meef hookf teev haif liauh huk meef denv vooi haf?"
25 Boouh-lov bov,
"Feei-si-du daf yinv haf,
hauf meenf denv,
noouh hauf mee singf-singv yoou,
hauf gang gee tih titf gee.
26 Eenv veeih Yaf-gi-faf voongv ya huh teeh neeh gee,
too yi hauf nah goom looiv nyoof-nyoo hemv Yaf-gi-faf voongv gang teeh neeh gee.
Hauf siang sinf teeh neeh gee meenf lai hhinf-hhinh me lai gua Yaf-gi-faf voongv,
eenv veeih fatf seeng teeh neeh gee leeuf na duf huh.
27 Yaf-gi-faf voongv haf,
meef siang sinf sian zi meenf?
Hauf huh meef tih siang sinf gee."
28 Yaf-gi-faf bov Boouh-lov,
"Meef tiang hhin hauf gi ziu,
hauf ziuh huk Gi-dukf huv vooi haf?"
29 Boouh-lov bov,
"Meenf guan tih hhin liauh ha tih hhin tiu,
hauf hhuf Siangf-dif meenf danv tih biang meef,
ya biang lengv-hunf veenf nooih hingf hauf gang go neeh gee duf hheem zing hauf teenf hee,
danf tih meenf ngah dingv tua zing hauf teenf hee."
30 Yaf-gi-faf voongv hemv zungh dukf gangf Baiv-niv-gi,
hemv lengv-hunf ngov yoou ninh neeh gee zung nyunv uif vooi,
31 hoi leengv looif vooi hemv goonf hamf liangf bov,
"Lengv-hunf neeh huf hee,
meenf lai famh gai gee gaiv daiv gaiv hoop gee soih."
32 Yaf-gi-faf voongv bov Feei-si-du,
"Lengv-hunf neeh huf hee zeekf meenf bov dif booiv ningf voongf dooi sangf sof,
en teeif ziuh hhoo yi tek geef vooi."