Yoou Mah-eev-ta doouh
28
1 Hauf-loh fingf anv geen hhoom vooi,
nah huh doouh neeh mee yam Mah-eev-ta hee.
2 Lengv-hunf dang dif gee doi hauf-loh meenf huh giauh maif;
eenv veeih fa mee yuh dok funv yuh nit,
geef-loh ziuh ngupf veeif loouh doong hauf-loh.
3 Neeh tif hoouh Boouh-lov humv veenf zof hee miaf,
zav geen baiv veeif vooi,
lai ngiaf lamv huf hee eenv veeih lun vooi,
ziuh deuf lokf da veeif uk miaf,
menf geen moof Boouh-lov vooi.
4 Lengv-hunf dang dif gee dekf huh ngiaf lamv huf hee ling yoou baiv moof geef,
ziuh hemv goonf gang bov,
"Geef nge ga lengv-hunf vooi,
tuif yianf go geef lokf da hai geen miaf vooi,
danf tih fa ya dif tuv geef booiv."
5 Naf huh Boouh-lov viat ngiaf huf hee loouh da veeif vooi,
toof-too ya meenf tiangv ziqf-ziqf.
6 Lengv-hunf dang dif gee hhif bov geef nge gootf uif,
ha tih it ziu ling longf daiv.
Danf tih geef-loh foou haih foong,
meenf huh geef lai gai teef-teeh,
ziuh gaih bianf tiang fap gee vooi,
bov,
"Geef tih tinf huf hee."
7 Yoou ninh lai doouh ziangh huf hee yam Buf-baiv-liuv hee,
geef lai veen niaf yoou ningf neeh hhootf hee,
geef eengf-eengv ziapf daif hauf-loh tamv veenf.
8 Dang siv bef lauh Buf-baiv-liuv huf hee,
bik hang ya boqf zumh lap yoou baiv tangf nenh.
Boouh-lov loouh booiv heengf geef hooi geef doouh goouf,
zav moof geen baiv huf geef yiav geef maif vooi.
9 Teeh neeh gee hoouh looif,
suanf doouh lai fingh gee lengv-hunf zung miaf vooi,
Boouh-lov ya suanv buf yiav geef-loh maif vooi.
10 Geef-loh ziuh hong goouh dunf hee miaf sev hauf-loh,
gamh siaf hauf-loh,
doongv hauf-loh dif hhooiv luaf booiv gee tif hoouh,
geef-loh ya hong goouh yungh gee dunf hee geen luaf vooi.
Boouh-lov doongv Loh-mah vooi
11 Tamv mooqf geuf hoouh looif,
hauf-loh geen luaf Yaf-lif-san-daf hauv hee booiv vooi,
luaf neeh hauv hee hheek gungv deei hee huk hoouha,
luaf neeh hauv hee ya yoou doouh neeh mee gua fa nit.
12 Hauf-loh booiv doongv Suf-la-guh,
ziuh hengf yoou ninh tamv veenf.
13 Yuh lokf ninh venh booiv doongv Lif-gi-veeng.
Haih ngeeih veenf siau van noomf miaf vooi,
haih tamv veenf hauf-loh ziuh doongv Buf-tiu-lif.
14 Yoou ninh div heekf engv tok hoouf hee,
geef-loh luf hauf-loh yoou ninh zih sing hhiv mooqf hee.
Hauf-loh ziuh teenf hee miaf doongv Loh-mah vooi.
15 Engv tok yoou Loh-mah neeh gee hingf huh hauf-loh miaf vooi,
ziuh deuf miaf heeuv Yaf-bih-u hemv Sam-guanh neeh hhootf hee zip hauf-loh.
Boouh-lov huh geef-loh vooi,
ziuh gamh siaf Siangf-dif,
looiv ya geengf nyoo vooi.
16 Hauf-loh loouh heeuv Loh-mah mee hoouh looif,
baiv fu ziangh Loh-mah gun deeif huf hee oouv famf yinv gee zung gauv sev hau boouh huf voongf dooi neeh huf vooi.
Geef-loh fi zunh Boouh-lov toof-too zih yoou gakf hhootf,
ya faif leekf bingv huf hee foou geefb.
Boouh-lov yoou Loh-mah
17 Tamv veenf hoouh looif,
Boouh-lov sing lingh doouh lengv-hunf Yiuh-haif gee miaf,
ziuh hemv geef-loh gang bov,
"Engv tok hauf gee haf,
tuif yianf hauf meenf lai huk gai gee teeh,
doi meenf uif lengv-hunf Yiuh-haif doouf-loh gee,
ya meenf lai huk gai gee famh doouf-loh zuh zung gui dingf gee,
danf tih yoou Ye-luf-sa-leengh vanh duf ga oouv hauf huk famf yinv,
hoof booiv gauv sev lengv-hunf Loh-mah gee vooi.
18 Geef-loh tooi hauf diauf sah hauf vooi,
huh hauf meenf lai famh gai gee gaiv daiv gee soih,
ziuh tiang tek hauf.
19 Danf tih lengv-hunf Yiuh-haif gee meenf hheeng,
bik hauf meenf lai ban fap nah miaf ningf voongf dooi vooi sangf sof,
meenf tih hauf lai gai gee teeh dif goou minv zukf doouf-loh mee.
20 Eenv veeih teeh neeh hhinh hee,
hauf nah sing meef-loh miaf hemv meef-loh gang,
biang meef-loh huh,
hhiv sitf hauf tih veeih lengv-hunf Yih-seef-liatf vook hau sunv gee Neeh-huf-hee,
nah dingv tua neeh gee."
21 Lingh doouh Yiuh-haif gee bov,
"Engv tok yoou Yiuh-haif neeh gee meenf lai tia tin miaf bov teeh meef gee gua,
ya meenf lai engv tok miaf boouf goouf,
ha tih bov meef lai gai gee meenf maif.
22 Danf tih hauf-loh tiang hingf meef gang meef gee tiang fap,
eenv veeih hauf-loh huh doongv leeuf vanh duf fanh deeif giauf faif neeh mee."
23 Geef-loh hemv Boouh-lov dingf tif ganv maif vooi,
doongv neeh veenf hee,
lai lengv-hunf dunf hee miaf Boouh-lov zih-zih neeh hhootf hee.
Geef lokf zauf-zau doongv veenf yoop,
zung hemv geef-loh gang Siangf-dif gok gav gee teeh,
oouv Mov-si gee lutf fapf sek hemv sian zi tia gee sek,
miaf gang Yev-so gee teeh,
hhin geef-loh siang sinf Yev-so.
24 Geef gang go neeh gee,
lai feenh hee siang sinf,
lai feenh hee meenf siang sinf.
25 Geef-loh meenf hoopf goonf ziuh tan booiv vooi.
Meenf tan zee sianv,
Boouh-lov hemv geef-loh gang go gee hee,
bov,
"Seengf-lingv hongv gua sian zi Yih-saif-yav doi zuh zung meef-loh gang gee ziqf duf meenf sook.
26 "Geef bov,
'Meef booiv seengv bek ting neeh gee bov,
meef-loh hingf booiv hingf leengv,
danf tih ya meenf mingf fekf.
dekf booiv dekf leengv,
danf tih ya meenf took.
27 Eenv veeih bek ting neeh gee timv mee duf ga luaq vooi,
sav duf ga oot loouh vooi,
dav duf ga doop loouh vooi,
zeekf meenf teenf hee,
dav geef-loh gee ziuh dekf lai huh vooi,
sav ya hingf lai huh vooi,
timv mee ya mingf fekf gua miaf,
zuanh leengv miaf,
hauf ziuh yiav geef-loh.'c"
28 Boouh-lov gif zukf bov,
"Too yi meef-loh hheem huh Siangf-dif gee neeh mee giuf een,
duf ga suanf sev lengv-hunf hhiv ha minv zukf gee vooi,
geef-loh dif hingf."
29 Boouh-lov gang go neeh gee inv vooi,
lengv-hunf Yiuh-haif gee ziuh zeeng leenf uif miaf,
ya tan booiv vooid.