6 Doouf-loh enf mooh teh gee tif hoouh, Gi-dukf ziuh yoou dingf maif gee yitf hhiv hooi lengv-hunf meenf gingf vuif Siangf-dif neeh gee daiv vooi. 7 Veeih ngif yinv daiv tih tiu lai gee; veeih lengv-hunf maif gee daiv i sook lai goom huk gee. 8 Nah lai Gi-dukf yoou doouf-loh enf huk lengv-hunf lai soih gee gee tif hoouh hooi doouf-loh daiv, Siangf-dif dookf doouf-loh ziuh tih teenf hee sev vanh huh vooi.

9 Guf seeh, doouf-loh en teeif gif yianv hhoouf baq geef gee bif yam tih ngif yinv, ziuh geengf hheenh dingf hongv gua geef deekf giuf, deuf luat Siangf-dif gee yianf hhif. 10 Eenv veeih doouf-loh huk dikf yinv gee tif hoouh, duf hongv lai gua Leekf-da-hhiangh Siangf-dif huf hee gee daiv hemv geef maif goonf, gif yianv duf ga maif goonf vooi, ziuh itf dingf hheem hongv gua Leekf-da-hhiangh geef huf hee gee yoou deekf giuf. 11 Meenf danf-danv tih teenf hee, en teeif doouf-loh gif yianv hongv gua doouf-loh gee Zuh Yev-so Gi-dukf hemv lai Siangf-dif maif goonf leengv, ya hheem hongv gua geef yoou da Siangf-dif eengv.

12 Zing goh soih lokf lengv-hunf huf hee loouh tooi ganv vooi teenf hee, daiv ya tih lokf soih miaf gee, guf seeh tooi ganv gee lengv-hunf leeuf na duf hheem daiv, eenv veeih leeuf na duf famh soih vooi. 13 Meenf lai lutf fapf zee sianv, tooi ganv duf ga lai soih vooi; danf tih eenv veeih meenf lai lutf fapf, soih ya meenf tuif soih. 14 Hhiv sitf, lokf Yav-dang doongv Mov-si, daiv ziuh ziangh hhinf vooi, linf lengv-hunf meenf zing Yav-dang teenf famh soih neeh gee, ya bif daiv guanh; Yav-dang zing goh hoouh looif dif miaf gee neeh huf teenf hee.

15 Danf tih Yav-dang gee sook ngoh meenf dim Siangf-dif gee een huif. Zeekf lengv-hunf na hee gee sook ngoh, hemv goonf zung hheem daiv, teenf hee, Siangf-dif gee een dianh, ya ziuh hongv gua Yev-so Gi-dukf na hee sev gee een dianh, meenf tih sev geengf nungf zee hemv goonf haf? 16 Een dianh neeh mee hemv lengv-hunf neeh huf hee famh soih gee heeuf guah ya tih meenf hongf goonf gee; eenv veeih simh fuanf tih lokf lengv-hunf huf hee miaf gee, eenv hee ziuh dingf soih vooi, danf tih een dianh tih lokf haih liauh sook ngoh miaf gee, eenv hee ziuh tingf ngif vooi. 17 Zeekf eenv veeih lengv-hunf huf hee famh soih, daiv ziuh eenv veeih lengv-hunf neeh huf hee ziangh hhinf, neef deekf doongv nungf-nungf gee een dianh bingf siah bif dekf tih ngif yinv gee, meenf tih geengf hongv gua Yev-so Gi-dukf neeh huf hee yoou da geef-loh gee seeng mingf ziangh hhinf haf?

18 Ziuf teenf hee dekf, eenv veeih fooif hee gee sook ngoh, too lai gee lengv-hunf zung bif dingf soih vooi; hongf yiangh, eenv veeih fooif hee gee hengf ngif, too lai gee lengv-hunf zung bif yam tih ngif yinv deekf doongv seeng mingf vooi. 19 Eenv veeih Yav-dang na hee gee beeif nikf, hemv goonf zung tingf lengv-hunf lai soih gee vooi; hongf yiangh, eenv veeih Gi-dukf na hee gee hingf sav, hemv goonf ya bif yam tih ngif yinv vooi.

20 Lai lutf fapf hoouh looif, lutf fapf biang soih gee doh liauh vooi, danf tih leeuf ziqf lai soih mef liauh, Siangf-dif gee een dianh ziuh mef nungf. 21 Zing goh soih hongv gua daiv ziangh hhinf; hongf yiangh, een dianh ya hongv gua ngif ziangh hhinf, biang lengv-hunf hongv gua doouf-loh gee Zuh Yev-so Gi-dukf deekf doongv yungh seeng.