4 Seengf-lingv sev gee neengv likf lai haih liauh zuangv, danf tih zung tih hongf Seengf-lingv huf hee sev gee. 5 Gongv fokf teeh gee lai haih liauh zuangv, danf tih zung tih hongf Zu huf hee sev gee. 6 Fokf teeh gee foong fapf lai haih liauh zuangv, danf tih nah lai Siangf-dif huf hee toof-too, tih geef yoou da hemv goonf huk tingf itf siatf gee teeh.

7 Seengf-lingv sev zee gookf na meenf hongf gee neengv likf, tih dif biang hemv goonf lai ik. 8 Lai lengv-hunf hongv gua Seengf-lingv deekf doongv go zif huif gee, ya lai lengv-hunf hongv gua hongf Seengf-lingv neeh huf hee deekf doongv go zi zikf gee. 9 Hongf yiangh tih Seengf-lingv neeh huf hee, biang lengv-hunf neeh huf hee lai sinf sim, biang gakf huf lai yiav fingh gee neengv likf. 10 Hongf yiangh tih Seengf-lingv neeh huf hee, biang lengv-hunf neeh huf hee lai huk meenf fingf tiangf gee teeh gee neengv likf, biang gakf huf lai neengv likf huk sian zi gang doouf; biang lengv-hunf neeh huf hee lai neengv likf took feenv lingv gee, biang lengv-hunf gakf huf lai neengv likf gang gookf zuangv gee go, ya biang gakf huf lai neengv likf fan yikf gookf zuangv gee go. 11 Neeh itf siatf gee neengv likf zung tih lokf hongf Seengf-lingv huf hee sev gee, Seengf-lingv neeh huf hee ya tih huih itf gee, geef ziuf toof-too gee if see, sev meenf hongf goonf gee neengv likf zee gookf na.

12 Zing goh lengv-hunf huf hee nah lai bun tinv mooqf hee toof-too, danf tih lai gok lai moof hemv lai haih liauh goouh goop tingf gee, tuif yianf bun tinv mee lai haih liauh goouh goop tingf, ya ziuf-ziuf tih bun tinv mee. Gi-dukf ya tih teenf hee. 13 Meenf guan doouf-loh tih lengv-hunf Yiuh-haif gee, ha tih lengv-hunf Si-laf gee, tih huk nof gee, ha tih zeef yeeuv gee, zung tih lokf Seengf-lingv huf hee tuk leei tingf bun tinv mooqf hee vooi, ya hongf goonf hiangh siuf Seengf-lingv neeh huf hee.

14 Lengv-hunf gee bun tinv meenf tih lai moof toof-too, tih lai haih liauh goouh goop tingf gee. 15 Zeekf gok deei hee bov, "Hauf meenf tih moof, too yi hauf meenf tih bun tinv neeh mee gee." Teenf hee geef ziuh meenf tih bun tinv gee feenh hee vooi haf? 16 Zeekf sav deei hee bov, "Hauf meenf tih dav, too yi hauf meenf tih bun tinv neeh mee gee." Teenf hee geef ziuh meenf tih bun tinv gee feenh hee vooi haf? 17 Zeekf suanf huf zung tih dav, di leeuf hingf lai huh nif? Zeekf suanf huf zung tih sav, di leeuf hoomv lai heekf hheei gee nif? 18 Danf tih en teeif Siangf-dif ziuf toof-too gee if see, oouv goouh gee di mooqf di mooqf biang geen baiv bun tinv mee vooi. 19 Zeekf suanf huf zung tih goouh zuangv hee toof-too, di leeuf tuif tih bun tinv nif? 20 En teeif tuif yianf lai haih liauh goouh, danf tih zih lai bun tinv mooqf hee toof-too.

21 Too yi dav deei hee meenf hemv lai moof deei hee bov, "Hauf-loh meenf si iauf meef-loh." Hau mee ya meenf hemv lai gok deei hee bov, "Hauf meenf si iauf meef-loh." 22 Siang fanh, lengv-hunf hhif bov goouh baiv huf zing goh mooh teh neeh gee, geengf tih meenf hhiat lai gee. 23 Hhiv sitf doouf-loh dekf yoou baiv bun tinv goouh meenf zungf iauf neeh gee, tih doouf-loh hheem deekf biatf booiv dookf gee; goouh yoou baiv huf meenf hhoo luang neeh gee, ziuh hheem zoongv geef geengf luang uif. 24 Goouh yoou baiv huf luangf-luangf neeh gee, ziuh meenf yungh zoongv vooi. Danf tih Siangf-dif teenf hee goop tingf bun tinv mee, biang goouh yoou baiv huf meenf hhoo luang neeh gee geengf luang uif. 25 Ha zinf goouh yoou baiv huf neeh gee zengv goonf feenv goonf, tih dif biang too lai goouh yoou baiv neeh gee zung hemv goonf ziauf guf goonf. 26 Zeekf goouh yoou baiv huf gee zuangv hee tuh hho, too lai goouh yoou baiv huf gee zung hongf goonf tuh hho; zeekf goouh yoou baiv huf gee zuangv hee deekf doongv yungv yauf, too lai goouh yoou baiv huf gee zung hongf goonf hau lakf.

27 Meef-loh ziuh tih bun tinv Gi-dukf mee, leeuf na duf tih bun tinv neeh mee gee feenh hee. 28 Siangf-dif yoou giauf huif lipf gee: Haih it tih seeh huv, haih ngeeih tih sian zi, haih tamv tih lauh see, zip longf gee tih huk meenf fingf tiangf gee teeh gee, zaif zip longf gee tih lai yiav fingh neengv likf gee, boongv tooh vanh gee, guanh lih teeh hooi gee, took gang gookf zuangv go gee. 29 Sangf tih zung tih seeh huv haf? Zung tih sian zi haf? Zung tih lauh see haf? Zung tih huk meenf fingf tiangf gee teeh gee haf? 30 Zung tih lai yiav fingh neengv likf gee haf? Zungv tih took gang gookf zuangv gee haf? Zung tih fan yikf gookf zuangv gee haf? 31 Danf tih meef-loh hheem gukf lingf zui hhiuv Seengf-lingv sev geengf nyoo gee neengv likf.

Hauf en teeif nyif sunv geengf maif gee huif hee zee meef-loh.