Lov-teev ziapf daif hian seeh voon huf
19
1 Veenf yoop gee tif hoouh,
hian seeh neeh voon huf doongv Soh-to-mah vooi,
dang siv Lov-teev ngov yoou bak heeuva Soh-to-mah,
geef dekf huh hian seeh vooi,
ziuh uif miaf zip geef loh,
hhuih longf hhupf yoou dau na geef loh,
2 bov,
"Zu hauf loh haf!
Sing meef loh booiv lanf leekf nof vooi tuk gok ziu,
zih gua goomh bak zeekf zau nah booiv."
Geef loh bov,
"Meenf,
hauf loh dif yoou da gaiv gua goomh."
3 Lov-teev ziuh gukf lingf hhuf geef loh,
geef loh nah hheeng booiv lanf geef.
Lov-teev ziuh div goouh nungf nungf sev geef loh goonv,
ya hhangf bing meenf biang fauf taf gee,
geef loh ziuh goonv vooi.
Soh-to-mah gee lengv hunf seeu inv vooi
4 Geef loh zunh bif dif lap suanv gee tif hoouh,
Soh-to-mah heeuv gee da hhiangh,
meenf guan lauh un nook nyoo,
suanv buf inf inv miaf vif lanf Lov-teev mee loouh vooi.
5 Hemv goonf luanh Lov-teev bov,
"Goomh nooih miaf lanf meef neeh voon huf lengv hunf nif?
Gauv geef loh uk miaf,
hauf loh dif hemv geef loh lap suanv."
6 Lov-teev uk miaf,
langv deenh loouh vooi,
booiv ningf lengv hunf neeh hoouf hee,
7 bov,
"Engv tok haf!
Meenf ngah huk teeh seeu neeh gee.
8 Noh,
hauf lai leemf leekf voon huf,
enf tih leemf leekf gangf moof yoou,
foou hauf yin geef loh uk miaf,
suf saih meef loh ooi huk di leeuf ziuh huk di leeuf.
Danf tih lengv hunf neeh voon huf miaf lanf hauf,
tih moov hauf gee,
meef loh meenf ngah huk gai gee geef loh."
9 Hemv goonf bov,
"Deuf hingv!"
Yuh bov,
"Lengv hunf nguaif dif meef neeh huf hee,
ya dif tiang huk hauf loh gee simh fuanf guan haf?
En teeif hauf loh dif haih meef bih haih geef loh enf geengf ook."
Hemv goonf zung gukf lingf otf Lov-teev,
dif tiang tung deenh loouh booiv.
10 Lengv hunf neeh voon huf ziuh nyof moof uk miaf,
leeh Lov-teev loouh lanf vooi,
ya langv deenh loouh vooi.
11 Ya biang lengv hunf uk ninh gee,
meenf guan lauh un nook nyoo zung dav lak vooi,
gamf booiv gamf leengv zung meenf gamf lai heekf bak deenh mee.
Hian seeh go Lov-teev suanf lanf
12 Lengv hunf neeh voon huf bov Lov-teev bov,
"Yoou nooih meef enf lai gai gee sinf sik yoou meenf?
Meenf guan tih leekf loov,
leekf ngif,
ha tih sinf sik gee,
ha tih yoou da heeuv neeh mee too lai sukf i meef gee lengv hunf.
13 Hauf loh miaf tih dif miatf heeuv neeh mee booiv,
eenv veeih sauv hookf goou heeuv neeh mee gee bek ting yoou dau na Ye-hheev-huav meenf huh giauh nyoo,
Ye-hheev-huav ziuh faif hauf loh miaf miatf heeuv neeh mee booiv."
14 Lov-teev ziuh uk booiv seengv leekf loov geef gee,
bov,
"Meef loh meng ziqf lif hhooiv lengv neeh hhootf hee,
eenv veeih Ye-hheev-huav dif miatf heeuv neeh mee booiv vooi."
Danf tih leekf loov geef gee hhif bov geef gang liauv.
15 Veenf giangf bangv,
hian seeh ziuh soiv Lov-teev bov,
"Meng ziqf uif miaf,
yin maih meef huf hee hemv leemf leekf meef voon huf deuf lo!
Ha zinf meef eenv veeih heeuv neeh mee gee soih ya bif hongf goonf miatf booiv vooi."
16 Danf tih Lov-teev meenf huh booiv maif ha tih meenf booiv maif,
eenv veeih Ye-hheev-huav dookf Lov-teev,
lengv hunf neeh voon huf ziuh leeh Lov-teev hemv maih geef huf hee gangf leemf leekf geef voon huf lokf moof loouh,
yin geef loh uk miaf,
biang yoou ningf heeuv.
17 Yin geef loh uk miaf hoouh looif,
hhiv zung lai huf hee sauv lookf look yam bov,
"Meef loh meng ziqf deuf go mingh lo!
Meenf ngah len looif dekf,
ya meenf ngah hengf on yoou fingv yuanv,
hheem deuf geen baiv tiah vooi,
ha zinf meef bif miatf booiv vooi."
18 Lov-teev hemv geef loh gang bov,
"Zu haf,
meenf ngah teenf heen.
19 Noh,
meef gif yianv vook hhoonv leekf nof hauf,
meef yuh meenf huh giauh dookf hauf,
go mingh hauf hiuf hee.
Danf tih hauf meenf deuf lai doongv baiv tiah yoou,
mangf zai nanf neeh mee duf ga zuiv heekf hauf vooi,
hauf ziuh meenf lai mingh yoou vooi.
20 Noh,
leekf heeuv neeh mee nookf nook loof loo nooih,
hau deuf doongv.
Neeh mee meenf tih leekf heeuv nook mee haf?
Hhuf meef biang hauf deuf booiv ninh vooi,
hau go lai mingh."
21 Zu bov,
"Teeh neeh hhinh hee hauf ya dapf ingf meef,
hauf meenf miatf heeuv meef gang gang neeh mee.
22 Meef hheem meng ziqf deuf booiv ninh,
eenv veeih meef enf meenf doongv ninh yoou,
hauf meenf huk lai gai gee."
Guf seeh heeuv neeh mee yam Sov-eevb hee.
Siangf-dif miatf Soh-to-mah hemv Eev-mov-la
23 Lov-teev doongv Sov-eev gee tif hoouh,
da veenf duf ga geen vooi.
24 Dang siv,
Ye-hheev-huav ziuh biang huangf hemv veeif giangf lokf baiv fa ningf Ye-hheev-huav neeh hhootf hee longf miaf yoou heeuv Soh-to-mah hemv heeuv Eev-mov-la,
25 miatf heeuv neeh gee hemv suanf fingv yuanv gangf too lai zih yoou da heeuv gee lengv hunf hemv too lai tengv yoou bak matf neeh gee inf inv booiv vooi.
26 Maih Lov-teev huf hee yoou dau looif len looif dekf ziu hee,
geef ziuh bin tingf hoouv nyau mee vooi.
27 Yav-bov-la-hanf zauf zau uif miaf,
ziuh booiv lengv gua na geef nyunv yoou dau na Ye-hheev-huav neeh hhootf hee vooi,
28 looif looiv vook Soh-to-mah hemv Eev-mov-la gangf suanf fingv yuanv,
huh lengv neeh gee guanf duaih zing ngupf yiuf teenf heen.
29 Siangf-dif miatf heeuv yoou fingv yuanv neeh gee gee tif hoouh,
geef gif niamf Yav-bov-la-hanf;
yoou geef miatf heeuv Lov-teev zih gua neeh gee gee tif hoouh,
ziuh go Lov-teev lokf da heeuv geef miatf neeh gee uk miaf.
Lov-teev hemv leemf leekf geef voon huf
30 Lov-teev mangf meenf goom zih yoou Sov-eev,
ziuh hemv leemf leekf geef voon huf lokf Sov-eev geen booiv,
zih yoou baiv tiah.
Geef hemv leemf leekf geef voon huf zih yoou da soongh tiah mee.
31 Leemf leekf neef nyoo huf hee hemv leemf leekf neef nook huf hee gang bov,
"Bee baf lauh vooi,
yoou nooih ya meenf lai da hhiangh ziuf tooi ganv gee guiv leei loouh miaf hemv doouf loh giatf hun.
32 Miaf!
Doouf loh oouv yan sev bee baf goonv,
doouf loh ziuh hemv geef lap,
hau biang doouf loh lokf geef yuif tooi booiv."
33 Neeh goomh hee,
geef loh ziuh oouv yan sev bef lai goonv,
leemf leekf neef nyoo huf hee ziuh loouh booiv hemv bef lai lap.
Geef gi tif lap longf gi tif uif,
bef lai geef huf hee zung meenf huh.
34 Haih ngeeih veenf,
leemf leekf neef nyoo huf hee hemv leemf leekf neef nook huf hee gang bov,
"Goomh vaf hauf duf ga hemv bee baf lap vooi,
goomh nooih doouf loh ya oouv yan sev geef goonv fooif hemv,
meef ziuh loouh booiv hemv geef lap,
teenf heen doouf loh ziuh hhoo yi lokf geef yuif tooi booiv."
35 Neeh goomh hee,
geef loh yuh oouv yan sev bef lai goonv,
leemf leekf neef nook huf hee ziuh loouh booiv hemv bef lai lap.
Geef gi tif lap longf gi tif uif,
bef lai geef huf hee zung meenf huh.
36 Teenf heen,
leemf leekf Lov-teev voon huf zung lokf bef lai geef loh guaf leekf vooi.
37 Leemf leekf neef nyoo huf hee ziuh lai leekf da hhiangh huf hee,
hemv geef hhooiv nooiv yam Mov-yaf hee,
ziuh tih en teeif Mov-yaf lengv hunf gee zuh sian.
38 Leemf leekf neef nook huf hee ya lai leekf da hhiangh huf hee,
hemv geef hhooiv nooiv yam Bianf-yav-miv hee,
ziuh tih en teeif Yav-meenv lengv hunf gee zuh sian.