2 Yav-gookf ziuh hemv gav lanf geef gee lengv hunf gangf too lai di moh geef gee lengv hunf gang bov,

"Meef loh hheem fengf gungv yaih hhiv ha minv zukf yoou da meef loh neeh gee booiv,

ya hheem huk toof too bangf bang geef,

lak yua bangf bang gee loouh.

3 Doouf loh hheem mah siangf geen Bov-teef-lif vooi,

hauf dif yoou ninh huk gif hanv mee sev Siangf-dif,

ziuh tih hauf lookf nanf gee tif hoouh hhuf geef,

geef zung boongv tooh hauf,

meenf guan hauf booiv doongv leeuf geef duf boouh huf hauf gee Siangf-dif."

4 Geef loh ziuh oouv too lai gungv yaih hhiv ha minv zukf yoou da moof geef loh neeh gee hemv hhov yoou baiv sav geef loh neeh gee gauv sev Yav-gookf;

Yav-gookf ziuh bok goouh neeh gee yoou ningf heeuv Sif-giamf,

yoou dauf hau dun siangf suf neeh hhootf hee.

5 Geef loh booiv gee tif hoouh,

Siangf-dif biang bak lukf lengv heeuv neeh gee gee lengv hunf zung mangf daiv vooi,

ziuh meenf hum leekf da hhiangh Yav-gookf gee vooi.

6 Yav-gookf hemv gav lanf geef gee gangf lengv hunf hemf moh geef neeh gee ziuh miaf doongv lengv Gia-noomv gee Luf-si vooi,

Luf-si ziuh tih Bov-teef-lif.

7 Geef yoou ninh huk gif hanv mee,

ziuh hhooiv lengv neeh hhootf hee yam I-leeqf-bov-teef-lif^a hee,

eenv veeih geef deuf sunv gof geef huf hee Yih-soouv gee tif hoouh,

Siangf-dif yoou ninh sev geef dekf huh Siangf-dif gua.

8 Seeif looif naiv ma Lif-baiv-zia huf hee Tiv-bo-la daiv vooi,

bok yoou dauf Bov-teef-lif gee dauf hau dun siangf suf dun hee;

dun neeh dun hee yam Yaf-lonv-ba-guh^b hee.

9 Yav-gookf lokf Ba-danf-yaf-lanv leengv miaf hoouh looif,

Siangf-dif yuh sev geef dekf huh fooif hemv,

sev fok zee geef.

10 Siangf-dif hemv geef gang bov,

"Nooiv meef mee yam Yav-gookf hee,

danf tih lokf nooih hoouh looif meenf ngah yam Yav-gookf vooi,

hheem yam Yih-seef-liatf hee."

Siangf-dif ziuh hooi geef gaih nooiv yam Yih-seef-liatf vooi.

11 Siangf-dif yuh hemv geef gang bov,

"Hauf tih suanv neengv gee Siangf-dif,

hauf dif biang meef leekf liauh lanv liauh,

bin tingf haih liauh mooqf minv zukf gee gok gav nyoo mee,

ya lai haih liauh voongf dooi dif sut lokf meef uk.

12 Hauf dif oouv lengv hauf sev zee Yav-bov-la-hanf hemv Yih-sav neeh gee,

sev zee meef hemv heeuf daif meef gee."

13 Siangf-dif hemv Yav-gookf gang inv,

ziuh lokf lengv neeh hhootf hee geen booiv vooi.

14 Yav-gookf ziuh lipf hoouv dinf mee yoou lengv Siangf-dif hemv geef gang go neeh hhootf hee,

ya giuv yan hemv yuf gamh lamv gee geen baiv hoouv vooi hianf sev Siangf-dif.

15 Yav-gookf ziuh hhooiv lengv Siangf-dif hemv geef gang go neeh hhootf hee yam Bov-teef-lif^c hee.

16 Yav-gookf hemv gav lanf geef gee lokf Bov-teef-lif booiv Yih-fav-ta,

booiv doongv da sunv,

La-zev guaf nungh doongv veenf vooi,

ziuh boqf dookf dif lai leekf,

meenf lai lai uk.

17 Dookf meenf tuh lai on gee tif hoouh,

maih ziapf seeng huf hee bov geef bov,

"Meenf ngah mangf,

neeh huf ya tih leekf da hhiangh huf hee."

18 La-zev dif hunh hheei vooi,

ziuh hhooiv leekf da hhiangh geef huf hee yam Bianf-eev-niv^d hee;

danf tih bef lai geef hhooiv geef yam Bianf-yav-mianh^e hee.

19 La-zev daiv vooi,

bok yoou ningf sunv booiv Yih-fav-ta neeh hiuf hee;

Yih-fav-ta ziuh tih Bokf-lif-heengv.

20 Yav-gookf lipf dinf hiang mee yoou baiv feenf La-zev mee vooi,

dinf hiang neeh mee doongv en teeif enf yoou yoou.

21 Yih-seef-liatf gif zukf booiv,

yoou ningf dapf Yih-teev neeh hhootf hee dap ziangf feengv.

22 Yih-seef-liatf zih yoou ninh gee tif hoouh,

Liuv-bianf booiv hemv maih nook bef lai geef huf hee Bif-la lap vooi,

Yih-seef-liatf ya hingf huh teeh neeh hhinh hee vooi.

Yav-gookf lai teepf ngeeih huf leekf da hhiangh:

23 Lif-yav lai Liuv-bianf,

Liuv-bianf tih leekf hau hoouf Yav-gookf huf hee,

Lif-yav ya lai Si-mianf,

Lif-vuif,

Yiuh-daf,

Yih-sa-zia,

Si-buf-lonv.

24 La-zev lai Ye-seef hemv Bianf-yav-mianh.

25 Meeih hiang La-zev huf hee Bif-la lai Danf hemv Nav-fov-ta-lif.

26 Meeih hiang Lif-yav huf hee Si-faf lai Zia-teev hemv Yav-seef.

Leekf da hhiangh neeh hoouf hee tih Yav-gookf yoou Ba-danf-yaf-lanv lai gee.

27 Yav-gookf miaf doongv Gi-liatf-yav-ba gee Manf-lif ningf bef lai geef Yih-sav neeh hhootf vooi,

Gi-liatf-yav-ba ziuh tih Si-bov-lonv,

Yav-bov-la-hanf hemv Yih-sav ziamf siv zih yoou ninh gua.

28 Yih-sav goonv doongv it bek bat teepf tui.

29 Geef goonv doongv lauf lauh nah gua tooi,

guiv leengv ningf gungv bef geef neeh hhootf hee vooi.

Leekf da-hhiangh geef voon huf Yih-soouv hemv Yav-gookf ziuh oouv geef booiv bok vooi.