3 Gof Ye-seef teepf huf zung longf Ai-gipf vianv liangv sikf vooi.

4 Danf tih Yav-gookf meenf sev tok Ye-seef huf hee Bianf-yav-mianh hemf moh gof geef hoouf hee booiv,

eenv veeih Yav-gookf bov,

"Mangf geef yoou da sunv bif vanh haih."

5 Leekf da hhiangh Yih-seef-liatf hoouf hee ya yoou da lengv hunf miaf vianv liangv sikf neeh gee,

eenv veeih lengv Gia-noomv gee ya daiv yiak vooi.

6 Dang siv guanh lih suanf Ai-gipf gee tih Ye-seef,

fuf zeekf ing liangv sikf sev lokf hhiv ha lengv foongv miaf gee lengv hunf gee ziuh tih geef.

Gof Ye-seef hoouf hee miaf doongv dau na geef vooi,

ziuh hhuih longf hhupf yoou dau na geef bai geef.

7 Ye-seef dekf huh gof geef hoouf hee,

ziuh nginh uk geef loh vooi,

danf tih geef zoongv gev meenf took geef loh,

ngiamf ngiamf teenf heen tooi geef loh bov,

"Meef loh tih lokf leeuf miaf gee?"

Geef loh tanv bov,

"Hauf loh tih lokf lengv Gia-noomv gee miaf vianv liangv sikf gee."

8 Ye-seef took nginh gof geef hoouf hee,

danf tih geef loh meenf took nginh geef.

9 Ye-seef tiang uif gua na geef voonf neeh voon mooqf,

ziuh bov geef loh bov,

"Meef loh tih dikf vuf,

tiang miaf nooih lookf dekf lengv hauf loh gee."

10 Geef loh bov geef bov,

"Zu hauf loh haf!

Meenf tih teenf heen,

leekf nof gee titf titf tih miaf vianv liangv sikf gee.

11 Hauf loh zung tih hongf bef lai huf hee lai gee,

tih lengv hunf daf luf gee,

meenf tih dikf vuf."

12 Ye-seef bov geef loh bov,

"Meenf!

Meef loh hheenh dingf tih miaf nooih lookf dekf lengv neeh hhootf hee gee."

13 Geef loh bov,

"Zu hauf loh haf!

Leekf nof gee beenh laiv tih teepf ngeeih na engv tok,

zung tih hongf bef lai huf hee lai gee,

zih yoou lengv Gia-noomv gee,

tok zuif nook huf hee en teeif hemv bef lai hauf loh yoou lanf nenh,

lai huf hee meenf yoou vooi."

14 Ye-seef bov,

"Hauf nauf nauh bov meef loh tih dikf vuf,

ziqf duf meenf sook.

15 Hauf dif dekf meef loh gang go tih meenf tih titf gee,

hauf yoou dau na Fav-lauh fat tooih,

zeekf meef loh meenf yin tok zuif nook neeh huf hee miaf,

meef loh ziuh meenf ngah tiang lokf nooih uk booiv.

16 Meef loh hheem faif huf hee leengv booiv,

yin tok zuif nook neeh huf hee miaf,

teengh longf gee hoop loouh da gamv vooi,

teenf heen ziuh huh meef loh gang gee tih meenf tih titf gee.

Zeekf meenf yin lai miaf,

hauf nyi mingh Fav-lauh hiuf hee fat tooih,

meef loh ziuh tih dikf vuf."

17 Ye-seef ziuh hoop geef loh yoou da gamv tamv veenf.

18 Haih tamv veenf,

Ye-seef bov geef loh bov,

"Hauf lengv hunf nee gingf vuif Siangf-dif,

meef loh zeekf ziuf hauf gang gee booiv huk,

ziuh go lai mingh meef loh.

19 Meef loh zeekf titf titf tih lengv hunf daf luf gee,

ziuh luf huf hee yoou da gamv,

hhiv ha gee hhoo yi sian dai liangv sikf meef loh vianv neeh gee leengv booiv,

go gav lanf meef loh gee lengv hunf,

ha zinf geef loh yiak.

20 Danf tih meef loh itf dingf hheem yin tok zuif nook meef loh neeh huf hee miaf ningf hauf miaf,

teenf heen ziuh zingf mingv meef loh gang gee tih titf gee,

meef loh ziuh meenf daiv lai vooi."

Geef loh ziuh teenf heen huk vooi.

21 Geef loh hemv goonf bov,

"Gua na doouf loh haih tok huf hee gee,

en teeif boou leengv doouf loh vooi.

Geef hhuf iangv doouf loh,

doouf loh huh geef teenf heen nanf vif,

ya meenf hingf sav geef,

doouf loh veenf nooih nah tuh hho teenf heen."

22 Liuv-bianf tanv geef loh bov,

"Hauf yam meef loh meenf ngah haih leekf neeh huf hee,

meef loh meenf hingf sav,

noh,

en teeif soih leeiv baq geef gee boou leengv doouf loh vooi."

23 Geef loh meenf huh Ye-seef took hingf go geef loh gee,

eenv veeih Ye-seef hemv geef loh gang go lai lengv hunf hooi fan yikf.

24 Ye-seef hingf heekf geef loh gang go neeh gee,

ziuh zuanh huf booiv gakf hhootf ngai don hee vooi,

nah miaf hemv geef loh gang go,

ziuh lokf da geef loh liakf Si-mianf uk miaf,

doi na geef loh gatf geef loouh vooi.

25 Ye-seef yam lengv hunf deengf liangv sikf dikf dik hooih gof geef gee vooi,

oouv ngoonf fiakf geef loh vianv liangv sikf neeh gee tih naf nee gee ziuh ziuf biang leengv hooih naf nee mee vooi,

ya sev goouh zee geef loh yoou da sunv goonv.

Lengv hunf ziuh ziuf go geef gee booiv huk vooi.

26 Gof geef hoouf hee ziuh zav liangv sikf geen baiv luh,

lokf ninh leengv booiv vooi.

27 Geef loh doongv lengv gua goomh neeh hhootf vooi,

hhiv zung lai huf hee hheeif hooih vooi dif oouv goouh hoo luh,

nah huh ngoonf fiakf geef gee enf yoou da hooih yoou,

28 ziuh seengv engv tok geef hoouf hee bov,

"Ngoonf fiakf hauf gee hoif leengv miaf vooi,

meef loh dekf!

Enf yoou da hooih hauf nenh."

Geef loh ziuh mangf nyan vooi,

hemv goonf bov,

"Siangf-dif teenf doi doouf loh,

tih gai gee if see nif?"

29 Geef loh leengv doongv lengv Gia-noomv gee ningf bef lai geef loh Yav-gookf neeh hhootf vooi,

ziuh seengv am heekf gee teeh inf inv zee bef lai geef loh,

bov,

30 "Hak nyoo Ai-gipf neeh huf hee hemv hauf loh gang go meenf huh giauh ngiamf,

bov hauf loh tih dikf vuf tiang lookf dekf lengv geef loh gee.

31 Hauf loh ziuh hemv geef gang bov,

'Hauf loh tih lengv hunf daf luf gee,

meenf tih dikf vuf.

32 Hauf loh beenh laiv tih teepf ngeeih na engv tok,

zung tih bef lai huf hee lai gee,

lai huf hee meenf yoou vooi,

zuif nook neeh huf hee hemv bef lai hauf loh yoou lengv Gia-noomv gee nenh.'

33 "Hak nyoo neeh huf hee bov hauf loh bov,

'Hauf dif dekf meef loh tih meenf tih lengv hunf daf luf gee,

meef loh hheem luf huf hee yoou nooih,

hhiv ha gee hhoo yi sian dai liangv sikf meef loh vianv neeh gee leengv booiv,

go gav lanf meef loh gee lengv hunf,

ha zinf geef loh yiak.

34 Ya hheem yin tok zuif nook meef loh neeh huf hee miaf ningf hauf miaf,

teenf heen hauf ziuh huh meef loh tih lengv hunf daf luf gee,

meenf tih dikf vuf vooi.

Hauf ziuh oouv engv tok meef loh huf hee leengv meef loh,

meef loh ya hhoo yi yoou nooih huk tengv li.'"

35 Seeif looif geef loh diaqf liangv sikf uk miaf gee tif hoouh,

nah huh ngoonf fiakf vianv liangv sikf neeh hooih hee,

leeuf na gee duf maif maif yoou da hooih liangv sikf leeuf na mee yoou.

Geef loh hemv bef lai dekf heekf ngoonf fiakf neeh gee zung mangf luaq vooi.

36 Bef lai geef loh huf hee Yav-gookf bov geef loh bov,

"Meef loh biang hauf vau leekf da hhiangh hauf gee vooi!

Ye-seef meenf yoou vooi,

Si-mianf ya meenf yoou vooi,

meef loh yuh dif yin Bianf-yav-mianh booiv,

di leeuf teeh seeu gee zung miaf div hauf nif?"

37 Liuv-bianf ziuh hemv bef lai gang bov,

"Hauf zeekf meenf yin Bianf-yav-mianh leengv,

meef ziuh ga leekf da hhiangh hauf voon huf booiv,

meef biang timv oouv geef gauv sev hauf,

hauf boouh zingf yin geef leengv."

38 Danf tih Yav-gookf bov,

"Hauf meenf zun leekf da hhiangh hauf huf hee di moh meef loh longf booiv,

gof geef duf ga daiv vooi,

nah teengh geef toof too,

geef zeekf yoou da sunv am heekf gai teeh,

ziuh tih meef loh biang hauf fuiv fiakf fiakf teenf heen nanf vif zi doongv longf soongh vooi."