3 Yiuh-daf tanv geef bov,

"Lengv hunf neeh huf hee duf ga ngiamf ngiamf teenf heen bov hauf loh bov,

'Meef loh zeekf meenf yin tok meef loh huf hee miaf ningf hauf,

meef loh ziuh meenf ngah tiang huh hauf fooif hemv.'"

4 Yiuh-daf yuh bov,

"Meef zeekf hheeng Bianf-yav-mianh di moh hauf loh booiv,

hauf loh ziuh longf booiv hooi meef vianv liangv sikf.

5 Meef zeekf meenf hheeng sev geef booiv,

hauf loh ya meenf longf booiv,

eenv veeih lengv hunf neeh huf hee bov hauf loh bov,

'Meef loh zeekf meenf yin tok meef loh huf hee miaf ningf hauf,

meef loh ziuh meenf ngah tiang huh hauf fooif hemv.'"

6 Yih-seef-liatf bov,

"Meef loh veeih gai dif teenf haih hauf,

booiv seengv lengv hunf neeh huf bov meef loh enf lai tok huf hee yoou nif?"

7 Geef loh tanv bov,

"Lengv hunf neeh huf hee hangh saf tooi hauf loh hemv gav lanf gee lengv hunf,

geef bov,

'Meef loh enf lai bef lai yoou meenf?

Meef loh enf lai gakf gee engv tok hemv yoou meenf?

' Geef tooi hauf loh gai gee,

hauf loh ziuh tanv gai gee,

naf huh geef dif yam hauf loh bov,

'Itf dingf hheem yin leekf tok meef loh huf hee longf miaf' nif?"

8 Yiuh-daf hemv bef lai geef huf hee Yih-seef-liatf gang bov,

"Meef hheeng leekf luif meef huf hee hemv hauf booiv,

hauf loh ziuh mah siangf booiv,

hau biang hauf loh hemv meef gangf leekf hauf loh gee zung hhoo yi yoou,

meenf doongv yiak daiv.

9 Hauf hooi geef dam boouh,

meef hhoo yi div hauf oouv lengv hunf,

hauf zeekf meenf yin geef leengv miaf gauv zee meef,

hauf neeh tooi hee ziuh yungh yuanh hap soih neeh mee.

10 Hauf loh zeekf meenf ngoh tif ganv,

en teeif booiv haih ngeeih fooif duf ga leengv doongv vooi."

11 Bef lai geef loh huf hee Yih-seef-liatf bov,

"Zeekf dingf dingf hheem teenf heen,

di leeuf ziuh di leeuf lo!

Meef loh hheem dai deekf sanh lengv doouf loh zuif maif gee ziqf booiv,

zing yuv hiang,

liangv,

hiang liauf,

yiav mookf yookf,

hhai sin goh,

singf yeenv neeh gee,

zung dai ziqf longf booiv hong sev lengv hunf neeh huf hee.

12 Meef loh ya hheem dai ngoonf fiakf gav feenh hemv booiv,

hau fooh ngoonf fiakf baiv fooif luf yoou da hooi meef loh neeh gee leengv vanh,

hhoo neengf tih lai lengv hunf huk sook vooi.

13 Yin tok meef loh huf hee booiv,

meng ziqf longf booiv div lengv hunf neeh huf hee lo.

14 Hi voongf suanv neengv gee Siangf-dif,

biang lengv hunf neeh huf hee dookf hungh meef loh,

biang Si-mianf hemv Bianf-yav-mianh di moh meef loh leengv,

mingh hauf hiuf hee zeekf dif vau leekf,

ziuh vau lo!"

15 Geef loh ziuh dai deekf sanh neeh gee hemv tuangv fuih gee ngoonf fiakf gangf yin Bianf-yav-mianh longf doongv Ai-gipf vooi,

nyunv yoou dau na Ye-seef.

16 Ye-seef dekf huh Bianf-yav-mianh hemv geef loh hongf goonf miaf vooi,

ziuh yam guanh gia huf hee bov,

"Yin lengv hunf neeh gee booiv lanf hauf vooi.

Hauf dif hemv geef loh goonv bakf,

meef booiv ga goouh gee zunh bif maif maif geef."

17 Guanh gia huf hee ziu ziuf Ye-seef gang gee booiv huk,

yin geef loh booiv lanf Ye-seef vooi.

18 Geef loh bif yin booiv lanf Ye-seef,

ziuh meenf huh giauh mangf,

hemv goonf bov,

"Itf dingf tih veeih baiv fooif ngoonf fiakf biang leengv da hooih doouf loh neeh gee,

nah yin doouf loh miaf nooih miaf,

tiang div teeh haih doouf loh,

ap doouf loh hemv geef huk nof,

ya geep luh doouf loh gee."

19 Geef loh ziuh booiv ningf guanh gia Ye-seef huf hee vooi,

yoou bak deenh neeh hhootf hee hemv geef gang bov,

20 "Nyoo haf!

Baiv fooif hauf loh titf titf tih longf miaf vianv liangv sikf gee.

21 Seeif looif,

hauf loh leengv doongv da sunv lengv gua goomh neeh hhootf hee,

hheeif hooih vooi nah huh ngoonf fiakf leeuf na gee duf maif maif yoou da hooih yoou.

En teeif hauf loh ya dai ngoonf fiakf neeh gee leengv miaf vooi.

22 Hauf loh neeh fooif ya sungf dai ngoonf fiakf gakf gee miaf vianv liangv sikf.

Hauf loh meenf huh baiv fooif tih naf nee biang ngoonf fiakf gee leengv da hooih hauf loh gee vooi."

23 Guanh gia huf hee bov,

"Meef loh biang timv,

meenf ngah mangf,

ngoonf fiakf meef loh gee hauf zoouh duf ga suv vooi.

Ngoonf fiakf da hooih meef loh neeh gee,

itf dingf tih meef loh gee Siangf-dif,

meef loh bef lai gee Siangf-dif sev zee meef loh gee."

Geef gang go neeh gee inv,

ziuh yin Si-mianf uk miaf gauv sev geef loh.

24 Guanh gia huf hee yin geef loh loouh da lanf Ye-seef vooi,

oouv namh sev geef loh tuk gok,

ya oouv liauf miaf hoo luh geef loh gee.

25 Guanh gia seengv geef loh bov Ye-seef dif leengv miaf hemv geef loh goonv bakf,

geef loh ziuh zunh bif lih veetf gee maif maif vooi,

foou Ye-seef veenf da leengv miaf gee tif hoouh hong sev geef.

26 Ye-seef leengv doongv lanf,

geef loh ziuh dai lih veetf gee loouh booiv hongf sev Ye-seef,

ya hhuih longf hhupf yoou dauf matf bai geef.

27 Ye-seef saf tooi geef loh hoouh looif,

yuh tooi bov,

"Bef lai meef loh huf hee,

ziuh tih baiv fooif meef loh gang gee neef lauh neeh huf hee,

maif maif nenh haf?

Enf yoou nenh haf?"

28 Geef loh tanv bov,

"Leekf nof meef huf hee,

bef lai hauf loh huf hee enf yoou yoou,

bun tinv maif maif nenh."

Geef loh yuh hhuih longf bai geef.

29 Ye-seef dekf huh tok hemv geef hongf hungh neeh huf hee Bianf-yav-mianh,

ziuh tooi bov,

"Neeh huf ziuh tih tok meef loh seengv hauf zuif nook neeh huf haf?"

Ye-seef yuh bov,

"Leekf haf!

Hi voongf Siangf-dif zukf fukf meef!"

30 Ye-seef dekf huh tok geef huf hee,

gikf dungf meenf gim lai on,

sav ziqf hemv ngai uk sauv,

geef ziuh loouh foongf geef mee ngai don hee vooi.

31 Geef tuk na uk miaf,

gukf lingf loouh gim zing meenf lai gai gee teeh fatf seeng gua teenf heen,

yam lengv hunf div sak geen miaf.

32 Geef loh ziuh hooi Ye-seef toof too div hooif hee,

hooi engv tok geef hoouf hee div hooif hee.

Ya hooi lengv hunf Ai-gipf miaf lanf Ye-seef goonv fiah neeh gee div hooif hee,

eenv veeih lengv hunf Ai-gipf gee meenf hau hemv lengv hunf Si-bov-laiv gee hongf hooif goonv fiah,

neeh tih lengv hunf Ai-gipf gee zookf gee.

33 Ye-seef biang engv tok geef hoouf hee lokf nyoo doongv nook,

anf sunf sif ngov yoou doi na geef,

teenf heen an faiv geef loh zung hhiv guaif,

ziuh hemv goonf vook goonf.

34 Ye-seef feenv sak geef gee zee engv tok hoouf hee,

danf tih feenv zee Bianf-yav-mianh gee liauh gua hhiv ha engv tok gee nga fuih.

Geef loh ziuh hemv Ye-seef hongf goonf goonv yan,

meenf huh giauh hau lakf,

goonv zi doongv meeif vooi.