3 Danf tih,

Ye-nav deuf booiv gakf fiangf vooi,

met Ye-hheev-huav.

Geef longf doongv bak ngav Ye-faf mee vooi,

div heekf luaf booiv Ta-si hauv hee,

geef geq sinf luaf sev vanh,

ziuh geen luaf vooi,

dif hemv lengv-hunf baiv luaf gee hongf goonf booiv Ta-si,

deuf booiv ninh vooi met Ye-hheev-huav.

4 Danf tih,

Ye-hheev-huav biang hai mee it ziu hhi van nyoof-nyoo uif,

langh gee meenf huh giauh hangv,

git luaf hauv hee dif iakf vooi.

5 Leekf gongv baiv luaf gee zung meenf huh giauh mangf,

leeuf na duf gukf lingf hhuf gungv toof-too gee,

miaf boongv geef-loh.

Geef-loh yuh gengf hua baiv luaf gee longf dauf hai vooi,

hau biang luaf hauv hee hhoo ziqf.

Danf tih neeh tif hoouh,

Ye-nav longf dauf-dauf soongv vooi,

lap yoou ninh suanv hhooh-hhooh teenf hee.

6 Luaf zu huf hee dekf huh geef vooi,

ziuh bov,

"Ef,

meef neeh huf hee,

enf lai timv yoou nooih lap suanv yoou!

Meng ziqf uif,

hhuf gungv meef gee,

i sook gungv meef gee dookf hungh doouf-loh,

biang doouf-loh meenf daiv lai mingh."

7 Lengv-hunf baiv luaf gee hemv goonf bov,

"Miaf,

doouf-loh hemv goonf yitf simv,

dekf doouf-loh dif am heekf huah neeh gee tih lokf naf nee miaf gee."

Geef-loh ziuh hemv goonf yitf simv,

yitf heekf Ye-nav vooi.

8 Geef-loh ziuh tooi Ye-nav bov,

"Meef seengv hauf-loh,

huah neeh gee tih lokf naf nee miaf gee?

Meef huk ngipf gai gee?

Lokf leeuf miaf?

Tih leeuf mooqf gok gav gee?

Tih leeuf mooqf minv zukf gee?"

9 Ye-nav tanv,

"Hauf tih lengv-hunf Si-bov-laiv gee,

hauf bai Ye-hheev-huav,

geef tih baiv fa gee Siangf-dif,

hai hemv matf tih geef soouh gee."

10 Geef yuh seengv geef di leeuf deuf met Ye-hheev-huav gee teeh inf-inv zee geef-loh,

hemv goonf hingf vooi,

zung mangf luaq vooi,

geef-loh ziuh bov geef,

"Meef di leeuf huk teeh neeh gee nooh?"

11 Neeh tif hoouh,

langh gee mef miaf mef nyoo vooi,

geef-loh ziuh tooi Ye-nav,

bov,

"Hauf-loh hheem di leeuf sih lih meef,

nah biang lai langh gee on?"

12 Ye-nav bov,

"Meef-loh hamv hauf gengf longf hai,

langh gee ziuh on vooi.

Hauf huh meef-loh am heekf van langh gee teenf nyoo,

tih hauf luih gee."

13 Tuif yianf geef teenf gang,

lengv-hunf baiv luaf gee enf voongf mingh ngoouf luaf yoou.

Dif tiang ngoouf luaf hauv hee doongv ningf hhoom,

danf tih di leeuf duf meenf ngoouf lai doongv,

eenv veeih van langh gee mef miaf mef nyoo vooi.

14 Geef-loh ziuh gukf lingf hhuf Ye-hheev-huav,

bov,

"Ye-hheev-huav haf!

Hhuf meef meenf ngah eenv veeih mingh lengv-hunf neeh huf hee,

oouv mingh hauf-loh gee,

meenf ngah eenv veeih hauf-loh ga lengv-hunf meenf lai soih gee vooi ziuh fatf hauf-loh;

Ye-hheev-huav haf,

neeh itf siatf zung tih ziuf meef toof-too gee if see huk gee."

15 Geef-loh gang inv ziuh hamv Ye-nav gengf longf dauf hai vooi,

van langh gee it ziu ziuh on vooi.

16 Eenv veeih teeh neeh hhinh hee,

lengv-hunf baiv luaf gee zung meenf huh giauh mangf Ye-hheev-huav,

siang sinf Ye-hheev-huav,

hianf goouh sev geef,

ya eef dif hingf go geef.

17 Ye-hheev-huav an faiv bav huf hee nyoof-nyoo,

lop Ye-nav loouh da boqf vooi.

Ye-nav yoou da boqf bav neeh huf hee tamv veenf tamv goomh.