3 Ye-nav ziuh hingf go Ye-hheev-huav gee,

booiv Niv-niv-ui vooi.

Heeuv Niv-niv-ui neeh mee meenf huh giauh nyoo,

hheem booiv tamv veenf nah booiv lai heeuv mee hoou.

4 Ye-nav loouh heeuv ngeeu veenf hee,

suan goouf bov,

"Zaif gua tee teepf veenf hemv,

heeuv Niv-niv-ui mee ziuh dif miatf booiv vooi."

5 Lengv-hunf heeuv Niv-niv-ui gee hingf vooi,

zung siang sinf go Siangf-dif gee.

Geef-loh ziuh suan goouf gim goonv,

heeuv neeh mee gee lengv-hunf meenf guan neef nook neef nyoo,

neef ngah neef lai,

suanv buf zung lumf hoopf ganv loouh vooi,

biauh sif nginh soih huh sook vooi.

6 Voongf Niv-niv-ui huf hee giangf hingf heekf teeh neeh gee,

ziuh lokf baiv henh longf miaf,

geq foouf geef hiuf hee vooi,

lumf hoopf ganv fef hee ngov loouh da doouh vooi.

7 Geef yuh faif lengv-hunf booiv Niv-niv-ui suanf heeuv vooi gung goouf,

bov,

"Voongf dooi hemv hak nyoo gee mingf lingf:

Suanf heeuv meenf guan tih lengv-hunf,

ha tih teei tuangf neeh gee,

zung meenf zun goonv goouh,

ya meenf zun goonv namh.

8 Lengv-hunf hemv teei tuangf gee,

suanv buf hheem loomf hoopf ganv loouh.

Leeuf na duf hheem gukf lingf hhuf Siangf-dif,

ya hheem meenf ngah huk seeu,

meenf ngah hengf ook vooi.

9 Doouf-loh teenf huk,

i sook Siangf-dif dif gaih bianf timv i,

meenf yianf hhif vooi,

teenf hee ziuh meenf miatf doouh-loh vooi."

10 Siangf-dif dekf huh geef-loh teenf huk,

huh geef-loh duf ga huh sook gaih gua miaf meenf huk seeu vooi,

Siangf-dif ziuh gaih bianf timv i,

meenf ziuf gua na geef gang gee miatf geef-loh vooi.