4 Danf tih Yev-so tanv bov, "Yoou da ging veenv tia,

'Lengv-hunf yoou tih hhoouf Siangf-dif bak gang itf siatf gee go,

meenf tih danf-danv hhoouf goouh goonv.'"

5 Zip longf, yif hangv ziuh yin geef doongv seengf heeuv vooi, biang geef nyunv geen baiv deng Seengf-dianf vooi, 6 hemv geef gang bov, "Meef zeekf tih Leekf-da-hhiangh Siangf-dif huf hee, ziuh lokf nooih taq longf booiv lo! Eenv veeih ging veenv tia bov,

'Siangf-dif dif veeih meef faif hian seeh geef gee oouv moof miaf dov meef,

ha zinf gok meef gee gangf heekf dinf.'"

7 Yev-so bov geef, "Ging veenv ya tia bov, 'Meenf hau au Zu --- meef gee Siangf-dif.'"

8 Yif hangv yuh yin geef geen tiah hangf-hangv mee vooi, nyi suanv sif gaif gee gok gav hemv suanv sif gaif gok gav gee yungv huav fuf guif sev geef dekf, 9 bov, "Meef zeekf hhuih hhupf bai hauf, hauf ziuh sev neeh itf siatf zee meef."

10 Yev-so tanv yif hangv bov, "Sav-danf^a, deuf hingv! Eenv veeih ging veenv tia bov, 'Hheem bai Zu meef gee Siangf-dif, danf-danv fokf teeh geef.'"

11 Yif hangv ziuh lif hhooiv Yev-so vooi, ziuh lai hian seeh^b miaf heng hoouh geef.

12 Yev-so hingf huh Ye-hanf bif vanh hoof vooi, ziuh hoi doongv Gia-lif-lif vooi. 13 Seeif looif geef yuh lokf Nah-saf-leekf booiv Zia-baiv-nungv vooi, zih yoou ninh. Lengv neeh hhootf hee loof-loo ningf hai, yoou lengv Si-buf-lonv hemv Nav-fov-ta-lif gee. 14 Neeh tih dif biang sian zi Yih-saif-yav gang gee bin tingf titf, geef bov,

15 "Lengv Si-buf-lonv gee hemv lengv Nav-fov-ta-lif gee,

sunv ningf hai gee, lengv Ye-danf-hoov fiangf ninh hhoom gee,

lengv hhiv ha minv zukf gee Gia-lif-lif haf,

16 bek ting seeng huatf yoou da yoop neeh gee,

dekf huh bangv nyoof-nyoo mee vooi;

lengv-hunf zih yoou lengv nguiv daiv neeh gee,

lai bangv miaf nyoof geef-loh."

17 Lokf neeh tif hoouh uif, Yev-so ziuh hhai sih suanf gang Siangf-dif gee go, bov, "Eenv veeih hian gukf dif miaf doongv vooi, meef-loh hheem huiv gaih!"

18 Yev-so booiv yoou ningf hai Gia-lif-lif gee tif hoouh, dekf huh voon na engv tok, ziuh tih Si-meenv hemv tok geef huf hee An-deekf-liatf, Si-meenv ya yam Bih-deekf hee. Geef-loh doongv tif tan sai longf hai, geef-loh tih bef hoof bav gee. 19 Yev-so yam geef-loh bov, "Miaf di moh hauf, hauf dif maiv meef-loh di leeuf deekf doongv lengv-hunf, zing meef-loh hoof heekf bav teenf hee." 20 Geef-loh ziuh mah siangf fengf sai gee vooi, hemf moh geef.

21 Yev-so lokf ninh gif zukf booiv, yuh dekf huh voon na engv tok hemv, geef-loh ziuh tih leekf da hhiang Si-bif-haif huf hee Yav-gookf hemv tok geef huf hee Ye-hanf, geef-loh hemv bef lai geef-loh huf hee Si-bif-haif yoou baiv luaf feengv sai, Yev-so ziuh yam geef-loh di moh geef. 22 Geef-loh mah siangf lif hhooiv luaf hauv hee hemv bef lai geef-loh huf hee vooi, hemf moh Yev-so.

23 Yev-so ngeeu Gia-lif-lif hoou vooi, yoou gookf mooqf zipf huif diamh maiv lengv-hunf, suanf gang hian gukf gee fukf im, yiav bek ting gookf zuangv gookf yiangh gee fingh maif vooi. 24 Nooiv geef mee suanf hoou lengv Sif-lif-a gee inf-inv vooi. Lengv-hunf gee ziuh oouv itf siatf lai fingh neeh gee, ziuh tih lai fingh lai toongf gee, dookf nanf vif gee, bif yif hangv geen huf gee, daiv limv gee, han huanf gee, zung dai doongv dau na geef, Yev-so ziuh yiav geef-loh maif vooi. 25 Guf seeh lai lengv-hunf tingf dunf lokf Gia-lif-lif, Tiv-zia-bo-lif, Ye-luf-sa-leengh, Yiuh-haif hemv Ye-danf-hoov fiangf ninh hhoom neeh gee miaf hemf moh Yev-so.