Yev-so yiav lengv-hunf han huanf huf hee
2
1 Gua gi veenf hoouh looif,
Yev-so yuh leengv Zia-baiv-nungv vooi.
Lengv-hunf gee hingf huh geef leengv miaf vooi,
2 ziuh hemv goonf miaf vif yoou ninh,
linf na bak deenh neeh hhootf hee duf meenf lai lengv ziqf leeiv vooi,
Yev-so ziuh hemv geef-loh gang Go Siangf-dif gee.
3 Lai lengv-hunf ti huf hamv lengv-hunf han huanf huf hee miaf div Yev-so.
4 Eenv veeih lengv-hunf haif liauh vooi,
geef-loh meenf hamv lai doongv ningf Yev-so,
ziuh lokf looif geen deng lanf Yev-so nyunv-nyunv neeh mee vooi,
feeqf soongh mee,
suih lengv-hunf neeh huf hee gangf gum longf booiv.
5 Yev-so huh geef-loh teenf lai sinf sim,
ziuh bov lengv-hunf han huanf neeh huf hee bov,
"Leekf haf,
min soih meef gee vooi."
6 Dang siv lai Siangf-dif lutf fapf gee lauh see gi huf ngov yoou ninh,
geef-loh timv tiang bov,
7 "Lengv-hunf neeh huf hee di leeuf gang go gee teenf nooh?
Geef gang go famh Siangf-dif vooi.
Seef Siangf-dif toof-too vooi,
naf nee dif min lai soih nif?"
8 Yev-so da timv mah siangf huh geef-loh teenf tiang,
ziuh bov geef-loh,
"Meef-loh da timv veeih gai teenf tiang nif?
9 Hemv lengv-hunf han huanf neeh huf hee bov,
'Min soih meef gee vooi' yeenh,
ha tih bov 'Nyunv uif miaf,
gut gum meef fanv hee booiv' yeenh nif?
10 Danf tih dif biang meef-loh huh,
Yeenv-zeeh yoou bak matf lai hhinf min soih."
Geef ziuh hemv lengv-hunf han huanf neeh huf hee gang bov,
11 "Hauf yam meef,
uif miaf,
gut gum meef gee leengv lanf lo!"
12 Lengv-hunf neeh huf hee ziuh uif miaf,
mah siangf gut gum geef fanv hee,
doi na hemv goonf uk booiv vooi.
Hemv goonf zung meenf huh giauh hhiv guaif,
zung ngenv Siangf-dif,
bov,
"Hauf-loh lokf hau meenf huh teeh neeh zuangv hee gua."
Yev-so yam suv suif gee Lif-vuif hemf moh geef
13 Yev-so yuh booiv ningf hoomf vooi,
lai lengv-hunf dunf hee miaf vif yoou ningf geef,
geef ziuh maiv geef-loh.
14 Yev-so yuh gif zukf booiv,
dekf huh leekf da hhiangh Yav-leekf-feei huf hee Lif-vuif,
ngov yoou lengv suv suif hhootf hee suv suif,
ziuh yam geef bov,
"Meef miaf hemf moh hauf!"
Geef ziuh uif miaf hemf moh Yev-so vooi.
15 Seeif looif Yev-so yoou lanf Lif-vuif goonv fiah,
lai bef suv suif gee hemv lengv-hunf lai soih gee dunf hee,
hemv geef gangf meenv huv geef gee hongf goonf goonv fiah,
eenv veeih lengv-hunf neeh gee haih liauh,
geef-loh lai dunf hee duf ga hemf moh Yev-so vooi.
16 Lai Siangf-dif lutf fapf gee lauh see gi huf,
geef-loh tih lengv-hunf Fatf-lif-saif dangh gee,
dekf huh Yev-so hemv lengv-hunf lai soih gee gangf bef suv suif gee hongf goonf goonv fiah,
ziuh tooi meenv huv Yev-so gee bov,
"Geef di leeuf hemv bef suv suif gee gangf lengv-hunf lai soih gee hongf goonf goonv fiah nif?"
17 Yev-so hingf huh vooi,
ziuh bov geef-loh,
"Lengv-hunf gee maif-maif meenf si iauf i seeng,
lengv-hunf fingh gee nah si iauf.
Hauf miaf meenf tih div neef toof-too bov toof-too tih ngif yinv,
tih div lengv-hunf lai soih gee."
Yev-so gang gim goonv
18 Dang siv,
meenv huv Ye-hanf gee hemv lengv-hunf Fatf-lif-saif dangh gee doongv tif gim goonv,
ziuh lai lengv-hunf miaf tooi Yev-so bov,
"Veeih gai meenv huv Ye-hanf gee hemv meenv huv Fatf-lif-saif dangh gee gim goonv,
meenv huv meef gee meenf gim goonv nif?"
19 Yev-so tanv geef-loh bov,
"Sin langv hemv moov gee yoou ningf goonf gee tif hoouh,
moov gee dif gim goonv haf?
Sin langv hemv geef-loh enf yoou ningf goonf yoou,
geef-loh ziuh meenf gaiv lai gim goonv.
20 Danf tih lai veenf hee,
lengv-hunf dif yin sin langv booiv,
lif hhooiv moov gee,
neeh veenf geef-loh ziuh dif gim goonv vooi.
21 Meenf lai lengv-hunf oouv hoopf nauh miaf feengv hho yua gau,
mangf hoopf nauh hhootf hee sut namh,
dif deengh hho yua gau hiuf hee gat,
teenf hee soongh mee ziuh gat geengf nyoo vooi.
22 Ya meenf lai lengv-hunf oouv yan nauh gee deengf loouh hau hooih nangv mee,
zeekf tih teenf hee,
yan nauh gee ziuh dif gikf hau hooih nangv mee iakf,
yan gee loqf vooi,
hau hooih mee ya faih vooi;
guf seeh hheem deengf yan nauh gee loouh hooih nangv nauh vooi."
Yeenv-zeeh lipf An-sikf-veenf gee lutf fapf
23 Lai fooif hee An-sikf-veenf,
Yev-so lokf veen mekf gua.
Meenv huv geef gee hangh booiv hangh ngimv leenv mekf.
24 Lengv-hunf Fatf-lif-saif dangh gee ziuh bov Yev-so bov,
"Meef dekf meenv huv meef gee,
geef-loh di leeuf yoou An-sikf-veenf ngimv leenv mekf,
famh lutf fapf nif?"
25 Yev-so bov geef-loh,
"Gua na Daf-vuif hemv lengv-hunf hemf moh geef neeh gee yiak meenf lai goouh goonv gee tif hoouh,
tih di leeuf huk gee,
meef-loh meenf hookf gua hafa?
26 Yoou Yav-bih-yav-ta huk daf gif see gee tif hoouh,
Daf-vuif loouh Seengf-dianf tooi daf gif see hongf i vooi,
nah goonv bing hianf sev Siangf-dif neeh gee,
ya sev zee lengv-hunf hemf moh geef neeh gee goonv.
Bing neeh gee itf buan seef gif see vooi,
naf nee duf meenf goonv lai."