Fung voonf gee bih yif
4
1 Yev-so yuh yoou ningf hoomf maiv lengv-hunf.
Lai lengv-hunf dunf hee miaf vif yoou ningf geef,
geef ziuh geen luaf hauv vooi ngov.
Luaf hauv hee yoou da hoomf,
hemv goonf zung nyunv yoou baiv hhoom ningf hoomf neeh hhootf hee.
2 Yev-so yungh bih yif maiv haih liauh teeh zee geef-loh.
Geef maiv gee tif hoouh bov geef-loh,
3 "Meef-loh hingf loouh!
Lai lengv-hunf fung voonf huf hee booiv fung voonf.
4 Fung gee tif hoouh,
lai feenh hee dok yoou ningf sunv,
nokf gee vinv miaf goonv booiv vooi.
5 Lai feenh hee dok yoou lengv dinf liauh bongf tiu gee vooi,
bongf gee tiuf-tiu,
ngukf ngoouh zuif meng,
6 da veenf gianf geen,
ziuh dak geef nyeu vooi,
meenf lai nyaf ziuh sov vooi.
7 Lai feenh hee dok loouh da unv vooi,
unv gee voongh uif miaf,
langh geef on vooi,
ziuh meenf tengv lai makf.
8 Lai feenh hee dok yoou lengv hhianf hhianh gee vooi,
ziuh nyoo voongh uif,
tengv makf luaih-luaih teenf hee,
lai tamv teepf fuih gee,
lai lokf teepf fuih gee,
lai it bek fuih gee."
9 Geef yuh bov,
"Lai sav hingf gee,
ziuh hheem hingf loouh!"
10 Meenf lai Naf nee yoou ningf Yev-so gee tif hoouh,
hemf moh Yev-so gee lengv-hunf,
hemv seeh huv teepf ngeeih huf,
ziuh tooi geef bih yif neeh gee tih gai gee if see.
11 Yev-so bov geef-loh,
"Siangf-dif gok gav gee oouf mitf nah sev meef-loh huh,
zeekf hemv vanh gang,
gai gee teeh duf yungh bih yif miaf gang,
12 Zing goh ging veenv tia gee teenf hee,
ging veenv bov,
"Geef-loh dekf booiv dekf leengv,
danf tih dekf meenf took;
hingf booiv hingf leengv,
danf tih hingf meenf mingf fekf;
ha zinf geef-loh zuanh leengv miaf,
ziuh min soih geef-loh gee vooi.'"
13 Yev-so yuh bov geef-loh,
"Meef-loh meenf took bih yif neeh mee haf?
Teenf hee meef-loh di leeuf took itf siatf gee bih yif nif?
14 Lengv-hunf fung voonf neeh huf fung gee,
ziuh tih Go Siangf-dif gee.
15 Fung dok yoou ningf sunv neeh gee,
ziuh tih lengv-hunf hingf heekf Go Siangf-dif gee vooi,
Sav-danf ziuh mah siangf miaf,
oouv Go Siangf-dif fung yoou da timv geef-loh gee geep booiv vooi.
16 Fung dok yoou lengv dinf liauh bongf tui neeh gee,
ziuh tih lengv-hunf hingf heekf Go Siangf-dif gee vooi,
ziuh mah siangf eengf-eengv booiv ziapf siuf,
17 danf tih Go Siangf-dif gee yoou da timv geef-loh meenf ngukf nyaf yoou,
meenf tuh lai giauh foong.
Veeih Go Siangf-dif gee,
it am heekf mah fanh ha tih vanh bik vanh haih,
geef-loh ziuh mah siangf det vooi.
18 Fung dok yoou da unv neeh gee,
ziuh tih lengv-hunf feenh hee hingf heekf Go Siangf-dif gee vooi,
19 danf tih nyung nyang seeng huatf,
tiang sinf tiang ngoonf,
tiang lokf zuangv doongv zuangv,
see siangh neeh gee lanf Go Siangf-dif gee loouh vooi,
ziuh meenf tengv lai makf.
20 Fung dok yoou lengv hhianf-hhianh neeh gee,
ziuh tih lengv-hunf hingf heekf Go Siangf-dif gee,
ziapf siuf vooi,
ya tengv makf vooi,
lai tengv tamv teepf fuih,
lokf teepf fuih,
it bek fuih gee."
Deei mee gee bih yif
21 Yev-so yuh bov geef-loh,
"Naf nee ziu deei vooi,
dif biang longf dauf tangf,
oouv doou mee miaf hhum loouh nif?
Deei mee meenf tih hheem biang yoou baiv hooif haf?
22 Teeh oop me gee zung dif gung hhai,
teeh lookf me gee zung dif boouf luf.
23 Lai sav hingf gee,
ziuh hheem hingf loouh!"
24 Geef yuh bov,
"Go Siangf-dif gee,
meef-loh hheem zutf sav loouh hingf,
yungh timv booiv tiang.
Meef-loh di leeuf hingf,
di leeuf tiang,
Siangf-dif ziuh sev meef-loh di leeuf took,
ya dif sev meef-loh took geengf liauh.
25 Neef lai gee,
dif sev hemv zee geef,
neef meenf lai gee,
linf geef yuanv laiv lai gee,
ya dif geep booiv."
Voonf mee ngukf nyoo gee bih yif
26 Yev-so yuh bov,
"Siangf-dif gee gok gav zing goh lengv-hunf fung voonf loouh da veen teenf hee.
27 Geef veenf yoop lap suanv,
veenf bangv uif miaf,
voonf mee ziuh ngukf ngoouh nyoo uif,
danf tih voonf mee di leeuf ngukf ngoouh di leeuf nyoo uif geef duf meenf huh.
28 Matf gee doongv tif ganv ngukf goouh,
toof-too dif ngukf,
sian ngukf ngoouh,
nah tengv leenv,
seeif looif leenv gee,
nah giat makf gee datf-datf uk miaf.
29 Zuang zaiv gee ngau vooi,
geef ziuh mah siangf oouv limf booiv buiv,
eenv veeih doongv tif hoouh suv vooi."
Voonf sak gaif saif mee gee bih yif
30 Yev-so yuh bov,
"Siangf-dif gee gok gav zing gai gee teenf hee nif?
Doouf-loh oouv gai gee bih yif miaf gaih sikf geef maif nif?
31 Geef zing leekf voonf sak gaif saif mee,
giangf sav longf gee tif hoouh,
geef bih voonf leeuf zuangv duf nook.
32 Danf tih sav longf hoouh looif,
geef ngukf uif bih leeuf zuangv sak duf nyoo,
ya siv ngev gee nyoof-nyoo uk miaf,
nokf gee ya vinv geen baiv ngev vooi langh nguiv zok lukf."
33 Yev-so yungh haih liauh neeh zuangv bih yif miaf maiv geef-loh,
ziuf geef-loh hhoo yi lih gaih gee,
maiv Go Siangf-dif gee zee geef-loh.
34 Yev-so zung tih yungh bih yif miaf maiv lengv-hunf,
foou doongv meenf lai lengv-hunf gee tif hoouh,
geef ziuh gaih sikf too lai gee bih yif zee meenv huv geef gee hingf.
Yev-so yam van hemv hoomf mee on
35 Neeh veenf veenf zoouf goomh,
Yev-so hemv meenv huv geef gee gang bov,
"Doouf-loh ngoouf luaf booiv fiangf ninh hhoom."
36 Meenv huv gee ziuh lif hhooiv lengv-hunf hoouf hee,
neeh tif hoouh Yev-so duf ga geen luaf vooi,
meenv huv gee ziuh geen booiv,
geef-loh ziuh hemv goonf ngoouf luaf booiv vooi.
Ya lai luaf gakf gee hemf moh geef booiv.
37 It ziu hhi van meenf huh giauh nyoo,
langh gee hangh git loouh da luaf,
luaf hauv hee namh dik vooi.
38 Neeh tif hoouh Yev-so yoou tuq luaf,
hemh hau ngeen mee lap suanv vooi.
Meenv huv gee yam geef angv vooi,
ziuh bov,
"Lauh see haf!
Hauf-loh dif daiv leh,
meef meenf saf teeh haf?"
39 Yev-so ziuh uif miaf,
ngiamf-ngiamf teenf hee yam van gee on,
ya yam hoomf mee bov,
"Hengf lo!
On lo!"
Van gee ziuh hengf vooi,
hoomf mee ya on vooi.
40 Yev-so ziuh bov geef-loh,
"Meef-loh mangf gai gee nooh?
Meef-loh enf meenf lai sinf sim yoou haf?"
41 Geef-loh ziuh meenf huh giauh mangf,
hemv goonf bov,
"Doongv dooi geef tih naf nee nooh?
Yimf doongv van hemv hoomf mee duf hingf go geef gee."