hheev 11

Yev-so heeih leekf luh huf hee loouh Ye-luf-sa-leengh (Haif 21:1-11; Lukf 19:28-40; Ye 12:12-19)

1 Yev-so hemv meenv huv geef gee booiv dif doongv Ye-luf-sa-leengh vooi,

doongv gok tiah gamh lamv gee leekf voo voon mooqf Bokf-fapf-hhiv hemv Bokf-daf-niv vooi,

Yev-so ziuh yam meenv huv voon huf booiv na,

2 Yev-so bov geef-loh,

"Meef-loh booiv voo doi na neeh mee,

meef-loh giangf loouh booiv,

ziuh dif dekf huh leekf luh huf hee heeif yoou ninh,

lokf hau meenf lai lengv-hunf hheeih gua,

meef-loh ziuh geq vooi diuf miaf.

3 Zeekf lai lengv-hunf tooi meef-loh,

bov,

'Geq luh huf hee huk gai?

' Meef-loh ziuh bov,

'Zu dif yungh geef,

yungh vooi ziuh mah siangf hong leengv.'"

4 Meenv huv neeh voon huf booiv vooi,

ziuh dekf huh leekf luh huf hee heeif yoou da gaiv ningf bak deenh nenh,

geef-loh ziuh geq geeh huf vooi.

5 Lengv-hunf nyunv yoou ninh gee,

lai feenh hee tooi geef-loh,

bov,

"Meef-loh geq luh huf hee huk gai?"

6 Geef-loh ziuh ziuf Yev-so maiv gee tanv lengv-hunf neeh gee,

lengv-hunf neeh gee ziuh sev geef-loh diuf booiv vooi.

7 Meenv huv neeh voon huf,

diuf leekf luh huf hee miaf doongv ningf Yev-so vooi,

geef-loh ziuh oouv yua toof-too gee feev geen baiv leekf luh huf hee,

Yev-so ziuh hheeih geen gooh huf vooi.

8 Lai lengv-hunf dunf hee feev hho yua gee loouh da sunv vooi,

ya lai lengv-hunf booiv da niaf vooi,

damh ngev dun gee miaf feev loouh da sunv vooi.

9 Lengv-hunf gee zung otf na otf looif otf dik vooi,

hemv goonf zung yanh bov,

"Hheev-saf-naf^a!

Feengf nooiv Zu mee miaf gee tih gaiv lai ngenv gee!

10 Gok gav zing gungv bef doouf-loh Daf-vuif voongv mee dif miaf vooi,

hi voongf Siangf-dif sev fok zee gok gav neeh mee!

Hheev-saf-naf guiv sev yoou baiv deng fa gee Siangf-dif!"

11 Yev-so doongv Ye-luf-sa-leengh,

ziuh loouh Seengf-dianf vooi,

leeuf ziqf duf dekf hoou.

Veenf duf ga yoop vooi,

geef ziuh hemv seeh huv geef teepf ngeeih huf,

lokf da heeuv uk miaf,

booiv voo Bokf-daf-niv mee vooi.

Yev-so bov uv-hua-goh dun hee (Haif 21:18-19)

12 Haih ngeeih veenf,

geef-loh lokf Bokf-daf-niv uk miaf,

Yev-so yiak vooi.

13 Geef looif-looiv dekf huh uv-hua-goh dun hee,

boof gee vungf vungf teenf hee,

ziuh seek gua booiv dif tiang dekf gooh dun hee lai makf meenf.

Geef booiv doongv ningf gooh dun vooi,

meenf huh lai makf mooqf mooqf,

boof gee vungf tenf,

eenv veeih neeh tif hoouh meenf tih gui muq makf uv-hua-goh mee.

14 Yev-so ziuh bov gooh dun hee,

"Lokf nooih hoouh looif,

meenf lai lengv-hunf goonv makf meef gee fooif hemv vooi."

Meenv huv geef gee zung hingf heekf go neeh gee vooi.

Yev-so voonf lengv-hunf lokf Seengf-dianf uk booiv (Haif 21:12-17; Lukf 19:45-48; Ye 2:13-22)

15 Geef-loh miaf doongv Ye-luf-sa-leengh.

Yev-so giangf loouh Seengf-dianf,

ziuh voouf lengv-hunf yoou ninh ing goouh vianv goouh neeh gee uk booiv,

doongf hooif lengv-hunf toonv sinf neeh gee vooi,

ya hiau doong lengv-hunf ing goop neeh gee vooi,

16 ya meenf sev lengv-hunf oouv goouh lokf da bang Seengf-dianf gua.

17 Yev-so ziuh maiv geef-loh bov,

"Ging veenv meenf tih tia bov,

'Seengf-dianf hauf mee dif yam tih

too lai gok gav doouh goouf gee Seengf-dianf' haf^b?

Danf tih meef-loh oouv miaf huk tingf lukf sookf vooi^c."

18 Gif see ziangh hemv Siangf-dif lutf fapf gee lauh see,

hingf heekf go neeh gee vooi,

ziuh tiang gooi dif moot Yev-so booiv,

danf tih geef-loh ya mangf geef,

eenv veeih lengv-hunf gee zung hhiv guaif Yev-so maiv gee.

19 Veenv yoop vooi,

Yev-so ziuh hemv meenv huv geef gee uk heeuv Ye-luf-sa-leengh vooi.

Uv-hua-goh dun hee sov vooi (Haif 21:20-22)

20 Zauf-zau,

geef-loh gua ningf uv-hua-goh neeh dun hee,

huh gooh dun hee duf ga sov gangf nyaf vooi.

21 Bih-deekf ziuh tiang heekf go Yev-so gee,

ziuh hemv Yev-so gang bov,

"Lauh see haf,

Meef dekf,

meef siuf hof uv-hua-goh neeh dun hee duf ga sov vooi noh."

22 Yev-so tanv geef-loh bov,

"Meef-loh doi Siangf-dif hheem lai sinf sim!

23 Hauf titf-titf seengv meef-loh,

meenf guan naf nee yam tiah neeh mee bov,

'Booiv,

meef lokf nooih yif booiv da hai vooi!

' Timv geef mee zeekf meenf huaiv ngiv,

siang sinf toof-too gang gee itf dingf bin tingf titf,

teeh neeh gee ziuh itf dingf hooi geef bin tingf titf.

24 Guf seeh hauf seengv meef-loh,

meef-loh meenf guan doouh goouf hhuf gai gee,

zeekf siang sinf duf ga deekf doongv vooi,

ziuh itf dingf deekf doongv.

25 Meef-loh nyunv doouh goouf gee tif hoouh,

zeekf tiang heekf naf nee deekf zuif meef-loh vooi,

ziuh hheem yuanv liangf geef.

Teenf heen,

fa bef meef-loh ya yuanv liangf soih meef-loh gee.

26 Zeekf meef-loh meenf yuanv liangf vanh,

fa bef meef-loh ya itf dingf meenf yuanv liangf soih meef-loh gee^d."

Hhinf Yev-so mee lokf leeuf miaf? (Haif 21:23-27; Lukf 20:1-8)

27 Yev-so hemv meenv huv geef gee yuh miaf doongv Ye-luf-sa-leengh vooi.

Yev-so seek yoou Seengf-dianf gee tif hoouh,

gif see ziangh hemv Siangf-dif lutf fapf gee lauh see,

gangf ziangh lauh gee miaf div geef,

28 tooi geef bov,

"Meef lai gai hhinf huk teeh neeh gee?

Naf nee sev hhinf zee meef huk teeh neeh gee?"

29 Yev-so tanv geef-loh,

bov,

"Hauf tooi meef-loh maih heeif mee,

meef-loh zeekf tanv hauf,

hauf ziuh seengv meef-loh,

hauf lai hhinf gai gee huk teeh neeh gee.

30 Meef-loh bov,

hhinf Ye-hanf hooi lengv-hunf tuk leei neeh mee,

tih lokf Siangf-dif miaf gee ha tih lokf lengv-hunf miaf gee?"

31 Geef-loh ziuh hemv goonf hamf liangf bov,

"Doouh-loh zeekf bov 'Tih lokf Siangf-dif miaf gee',

geef nge bov 'Teenf heen,

meef-loh veeih gai meenf siang sinf geef?'

32 Doouf-loh zeekf bov 'Tih lokf lengv-hunf miaf gee',

mangf dif doou bek ting gee yianf,

eenv veeih bek ting gee,

zung siang sinf Ye-hanf tih sian zi,

tih Siangf-dif faif miaf gee."

33 Geef-loh ziuh tanv Yev-so bov,

"Hauf-loh meenf huh."

Yev-so bov,

"Teenf heen,

hauf ya meenf seengv meef-loh,

hauf lai hhinf gai gee huk teeh neeh gee."