Bef zov veen gee bih yif (Haif 21:33-46; Lukf 20:9-19)
12
1 Yev-so yungh bih yif hemv geef-loh gang,
geef bov,
"Lai lengv-hunf huf hee sav fuh hoouv veen hee,
vif tikf leeif veen mee hoouf-hoou loouh vooi,
ya guf soouf zat yan mee,
ya huk loouf mee yoou ninh foou veen,
seeif looif zov veen mee zee bek ting gee,
ziuh booiv lengv gakf hhootf vooi.
2 Doongv suv fuh hoouv vooi,
lanf zu ziuh faif leekf nof huf hee,
booiv ningf lengv-hunf zov-zov neeh hoouf hee,
dif suv geef neeh feenh hee leengv miaf.
3 Danf tih lengv-hunf zov-zov neeh hoouf hee,
hoof leekf nof neeh huf loouh,
git geef don hee,
biang geef moof leeif-leeiv leengv booiv.
4 Lanf zu yuh sungf faif leekf nof gakf huf booiv.
Geef-loh ziuh mauh hau leekf nof neeh huf deet vooi,
ya vuh yukf geef.
5 Lanf zu yuh sungf-sungf faif leekf nof gakf huf booiv,
geef-loh ziuh ga leekf nof neeh huf booiv vooi.
Seeif looif lanf zu ya faif haih liauh leekf nof booiv,
lai feenh hee bif geef-loh git,
lai feenh hee bif geef-loh ga booiv vooi.
6 Lanf zu enf lai huf hee yoou,
ziuh tih leekf da hhiangh geef dookf neeh huf hee,
seeif looif geef yuh faif leekf geef huf hee booiv,
geef bov,
'Geef-loh nge sev hoi minh leekf hauf huf hee.'
7 "Naf huh zov-zov neeh hoouf hee,
hemv goonf hamf liangf bov,
'Neeh huf tih hiang gav teeh lanf zu gee.
Miaf!
Doouf-loh ga geef booiv,
gav teeh geef mee ziuh guiv doouf-loh vooi.'
8 Geef-loh ziuh hoof geef loouh,
ga geef vooi,
fengf tiv mee uk veen fuh hoouv vooi.
9 Yev-so yuh bov,
"Teenf hee,
lanf zu dif di leeuf huk nif?
Geef dif miaf ga zov-zov neeh hoouf hee booiv,
sungf zov veen fuh hoouv mee sev gakf na.
10 Meef-loh meenf hookf ging veenv neeh duanf gua haf?
'Dinf bef gongv siangf gengf-gengf neeh mee,
duf ga bin tingf dinf giak gook lanf mee vooi.
11 Neeh tih Zu huk gee,
doouf-loh dekf miaf haih hhiv miauf lefa!'"
12 Lingh doouh Yiuh-haif hoouf hee,
huh bih yif neeh mee tih gang geef-loh gee,
ziuh tiang hoof Yev-so.
Danf tih mangf bek ting gee,
geef-loh ziuh booiv vooi.
Oouv teeh gauv suif gee miaf tee Yev-so(Haif 22:15-22; Lukf 20:19-26)
13 Seeif looif,
geef-loh faif lengv-hunf Fatf-lif-saif dangh gi huf,
hemv lengv-hunf Hi-lutf dangh gi huf booiv ningf Yev-so,
dif ziu tuq go geef gee booiv haih geef.
14 Lengv-hunf neeh hoouf hee miaf vooi,
ziuh hemv Yev-so gang,
"Lauh see haf,
hauf-loh huh meef meenf gang go gev gua.
Meenf guan tih naf nee,
meef zung doi geef-loh hongf goonf;
meef ya meenf saf teeh vanh di leeuf bov meef,
zung tih lauh-lauh titf-titf ziuf Siangf-dif gee zinv li maiv lengv-hunf.
Meef bov,
gauv suif sev Loh-mah voongf dooi heekf meenf heekf?"
15 Yev-so huh geef-loh gang gee,
hemv tiang gee meenf hongf goonf,
ziuh bov,
"Meef-loh veeih gai tee hauf?
Oouv ngoonf fiakf mee miaf sev hauf dekf ziu."
16 Geef-loh ziuh oouv ngoonf fiakf mee miaf sev Yev-so.
Yev-so ziuh tooi geef-loh bov,
"Baiv ninh tih tiang naf nee mee?
Hoouh naf nee mee?"
Geef-loh tanv,
"Loh-mah voongf dooi mee."
17 Yev-so bov,
"Goouh Loh-mah voongf dooi gee oouv zee Loh-mah voongf dooi,
goouh Siangf-dif gee oouv zee Siangf-dif."
Geef-loh hingf heekf go neeh gee zung ngeeq vooi.
oouv-ha hemv tingf leengv (Haif 22:23-33; Lukf 20:27-40)
18 Lengv-hunf Sa-du-gai danghb gee,
bov meenf lai lengv-hunf daiv tingf leengv gee teeh.
Geef-loh ziuh miaf div Yev-so,
tooi geef bov,
19 "Lauh see haf,
gua na Mov-si tia go neeh gee sev hauf-loh,
bov,
'Engv huf hee zeekf meenf lai leekf yoou ziuh daiv vooi,
teengh tau huf hee,
tok huf hee ziuh hheem oouv tau huf hee,
lai leekf hooi engv huf hee yuif tooi booivc.'
20 Lai gav lanf mee lai engv tok sit huf,
neef nyoo huf hee oouv maih meenf lai heekf yoou,
ziuh daiv vooi.
21 Tok haih ngeeih huf hee ziuh oouv tau huf hee,
meenf lai leekf yoou,
ya daiv vooi.
Tok haih tamv huf hee ya tih teenf hee.
22 Engv tok neeh sit huf zung oouv maih neeh huf hee gua,
zung meenf lai leekf ziuh daiv vooi.
Seeif looif,
maih neeh huf hee ya daiv vooi.
23 Leeuf na duf oouv geef gua vooi,
doongv tingf leengv gee tif hoouh,
geef-loh zung tingf leengv vooi,
geef tih maih naf nee huf hee nif?"
24 Yev-so bov,
"Meef-loh sook vooi,
ziuh tih eenv veeih meef-loh meenf took ging veenv,
ya meenf took Siangf-dif gee neengv likf.
25 Lengv-hunf lokf daiv tingf leengv hoouh looif,
ya meenf oouv ya meenf ha,
zing hian seeh baiv fa gee teenf hee.
26 Guan i lengv-hunf daiv tingf leengv gee teeh,
Mov-si duf ga yoou da sek veeif ngupf unv neeh finv hee tia vooi,
meef-loh meenf hookf gua haf?
Siangf-dif hemv Mov-si gang bov,
'Hauf tih Yav-bov-la-hanf gee Siangf-dif,
Yih-sav gee Siangf-dif,
Yav-gookf gee Siangf-difd.'
27 Siangf-dif meenf tih lengv-hunf daiv gee Siangf-dif,
tih lengv-hunf yoou gee Siangf-dif.
Meef-loh titf-titf sook inv vooi!"
Zuif zungf iauf gee gaif-mingh (Haif 22:34-40; Lukf 10:25-28)
28 Lai Siangf-dif lutf fapf gee lauh see huf hee,
hingf huh geef-loh bianf leenf,
huh Yev-so tanv lai maif,
ziuh tooi Yev-so bov,
"Gaif mingh gee leeuf hiuf zuif zungf iauf nif?"
29 Yev-so tanv bov,
"Zuif zungf iauf neeh hiuf tih,
'Lengv-hunf Yih-seef-liatf gee haf!
Meef-loh hheem hingf loouh,
Zu doouf-loh gee Siangf-dif tih vuih itf gee Zu.
30 Meef hheem it timv it i gukf lingf booiv ooi Zu --- meef gee Siangf-dife.'
31 Haih ngeeih zungf iauf gee tih,
'Hheem dookf vanh zing dookf toof-too teenf heef.
' Meenf lai gai gee gaif mingh bih neeh voon hiuf geengf zungf iauf vooi."
32 Siangf-dif lutf fapf gee lauh see neeh huf hee hemv Yev-so gang bov,
"Lauh see haf,
meef gang gee ziqf duf meenf sook.
Nah lai Siangf-dif huf hee toof-too,
seef geef vooi,
meenf lai gakf gee Siangf-dif vooi.
33 Doouf-loh hheem it timv it i gukf lingf booiv dookf Siangf-dif,
ya hheem dookf vanh,
zing dookf toof-too teenf hee.
Teenf huk bih hianf itf siatf gee fan gif,
hemv hianf goouh gai gee sev Siangf-dif duf zungf iauf."
34 Yev-so huh geef tanv lai nyaif,
ziuh bov geef,
"Meef sav meenf liauh loouh lai Siangf-dif gee gok gav vooi."
Lokf ninh ziuh meenf lai lengv-hunf goom tooi Yev-so gai gee veenf hiv vooi.
Gi-dukf tih leekf lanv naf nee huf hee? (Haif 22:41-46; Lukf 20:41-44)
35 Yev-so yoou Seengf-dianf maiv lengv-hunf gee tif hoouh,
tooi hemv goonf bov,
"Siangf-dif lutf fapf gee lauh see di leeuf bov,
Gi-dukf tih leekf lanv Daf-vuif huf hee nif?
36 Daf-vuif sin zeef bif Seengf-lingv gamh dungf bov,
"'Siangf-dif hemv Zu hauf gang,
meef ngov yoou ningf moof maif hauf,
foou hauf biang dikf yinv meef gee huk doong sev meef zav gokg.'
37 Daf-vuif toof-too duf yam Gi-dukf tih Zu,
Gi-dukf di leeuf ya tih leekf lanv Daf-vuif gee nif?"
Yev-so gang neeh gee hemv goonf zung ooi hingf.
Hheem zuf if Siangf-dif lutf fapf gee lauh see (Haif 23:1-36; Lukf 20:45-47)
38 Yev-so maiv lengv-hunf gee tif hoouh bov,
"Meef-loh hheem zuf if Siangf-dif lutf fapf lauh see neeh gee,
geef-loh ooi dingv foouf ngeeu gaiv,
ya ooi vanh yoou da heeuv gingv geef-loh,
39 yoou huif hangv ya ooi ngov vih zuif zungf iauf gee,
goonv moov ya ooi ngov vih zuif zungf iauf gee;
40 geef-loh geep gav teeh maih mai gee booiv leeq vooi,
ya zoongv doouh goouf foongf-foong sev vanh dekf.
Lengv-hunf neeh zuangv hee doongv nooih dif seengv fapf geef-loh geengf hhoonv."
Maih mai ngah huf hee feengf hianf (Lukf 21:1-4)
41 Seeif looif Yev-so ngov yoou doi na tiangv feengf hianf mee,
dekf hemv goonf di leeuf biang sinf loouh booiv.
Lai haih liauh saif zu biang sinf dunf hee loouh booiv,
42 ya lai maih mai huf hee meenf huh giauh ngah,
geef miaf biang leekf luif sinf voon mooqf loouh booiv,
luif sinf voon mooqf bih ngoonf teek hee enf tiu.
43 Yev-so yam meenv huv geef gee miaf vooi,
ziuh bov,
"Hauf titf-titf seengv meef-loh,
maih mai ngah neeh huf hee hianf gee,
bih leeuf na hianf gee duf liauh.
44 Eenv veeih vanh zung tih oouv toof-too yungh vooi teengh longf gee miaf hianf,
danf tih maih mai neeh huf hee meenf lai geeu toof-too yungh,
ya oouv sinf geef gee inf-inv,
linf sinf geef goonv fiah gee duf oouv miaf hianf vooi."