Yev-so tingf leengv (Haif 28:1-8; Lukf 24:1-12; Ye 20:1-10)
16
1 Gua An-sikf-veenf inv vooi gee neeh veenf veenf yoop,
Mof-daf-la gee Mah-lif-a,
hemv maih lai Yav-gookf huf hee Mah-lif-a,
gangf Sa-lov-miv,
geef-loh vianv hiang liauf maif vooi,
dif booiv sit tiv Yev-so mee.
2 Sing hhiv sitf zauf-zau,
da veenf giangf geen,
geef-loh ziuh miaf doongv ningf feenf vooi,
3 hemv goonf hangh booiv hangh bov,
"Naf nee dif hooi doouf-loh yif dinf zaqf soongh feenf neeh mee nooh?"
4 Geef-loh doongf hau dekf,
huh dinf neeh mee duf ga luf hhooiv vooi --- dinf neeh mee meenf huh giauh nyoo.
5 Geef-loh loouh da feenf mee vooi,
huh leekf hauh tengv huf hee,
dingv foouf hiuf hee fiakf-fiakf ngov yoou ningf moof maif,
geef-loh ziuh mangf hhuangf vooi.
6 Leekf hauh tengv neeh huf hee ziuh bov geef-loh,
"Meenf ngah mangf!
Meef-loh div dingf yoou baiv sipf zeef giaf gee,
neeh huf Nah-saf-leekf lengv-hunf Yev-so,
geef duf ga tingf leengv vooi,
meenf yoou nooih vooi.
Noh!
Lengv biang geef neeh hhootf noh.
7 Meef-loh meng ziqf booiv seengv Bih-deekf hemv gakf gee meenv huv,
bov,
'Yev-so dif doongv Gia-lif-lif meng gua na meef-loh,
meef-loh dif yoou ninh am geef,
zing gua na geef hemv meef-loh gang gee teenf hee.'"
8 Maih neeh gi huf mangf nyan vooi,
it ziu deuf lokf da feenf uk miaf.
Geef-loh ya meenf seengv teeh neeh gee zee naf nee,
eenv veeih geef-loh mangfa.
Yev-so sev Mof-daf-la gee Mah-lif-a dekf huh geef (Haif 28:9-10; Ye 20:11-18)
9 Sing hhiv sitf zauf-zau,
ziuh tih sing hhiv mooqf hee gee haih it veenf zauf-zau,
Yev-so tingf leengv vooi,
geef sian sev Mof-daf-la gee Mah-lif-a dekf huh geef,
gua na Yev-so lokf huf geef voouf yif hangv sit huf uk miaf gua.
10 Geef ziuh booiv seengv lengv-hunf di moh Yev-so neeh gee,
neeh tif hoouh,
geef-loh dookf hungh Yev-so,
timv gee ngaif tuh enf ngai yoou.
11 Geef-loh hingf huh Yev-so tingf leengv vooi,
ya sev Mah-lif-a dekf huh vooi,
danf tih geef-loh ya meenf zun.
Yev-so sev seeh huv teepf it huf dekf huh geef
12 Teeh neeh gee hoouh looif,
meenv huv neeh hoouf hee,
lai voon huf longf dauf voo.
Yoou da sunv Yev-so bin tiang vooi sev geef-loh dekf huh.
13 Geef-loh ziuh leengv booiv seengv teeh neeh hhinh hee,
zee hhiv ha gee meenv huv,
danf tih meenv huv neeh gee ya meenf zun.
14 Seeif looif,
seeh huv teepf it huf goonv fiah gee tif hoouh,
Yev-so sev geef-loh dekf huh geef.
Geef an geef-loh meenf zun,
ya daiv doonv,
eenv veeih geef-loh meenf zun,
lengv-hunf yoou Yev-so tingf leengv hoouh looif dekf huh Yev-so neeh gee.
15 Yev-so zuk geef-loh,
bov,
"Meef-loh hheem booiv suanv sif gaif vooi,
suanf fukf im,
sev too lai gee lengv-hunf.
16 Neef siang sinf fukf im neeh mee,
ya ziapf siuf tuk leei gee,
itf dingf deekf giuf;
neef meenf siang sinf gee,
itf dingf dingf soih geef-loh gee.
17 Lengv-hunf siang sinf neeh gee,
itf dingf lai seenv zif di moh geef-loh:
Ziuh tih oouv hhinf hauf gee booiv voouf yif hangv,
took gang go geef-loh beenh laiv meenf took neeh gee;
18 moof hhoo yi nganv ngiaf;
zeekf goonv goouh lai dukf gee vooi,
ya meenf zungf dukf;
zav moof geen baiv lengv-hunf lai fingh gee,
lengv-hunf fingh gee ziuh maif vooi."
Yev-so leengv baiv fa (Lukf 24:50-53; Seeh 1:9-11)
19 Zuh Yev-so hemv geef-loh gang go inv,
ziuh bif zip leengv baiv fa vooi,
ngov yoou vih ningf moof maif Siangf-dif zuif zungf iauf neeh mee.
20 Meenv huv gee uk booiv,
doongv lengv suanf fukf im.
Zu hemv geef-loh hongf goonf huk gongv,
hongv gua huk seenv zif,
miaf zingf mingv siau sikf geef-loh suanf neeh mee tih zinv gee.