Hooi lengv-hunf tuk leei gee Ye-hanf suanf Go Siangf-dif gee （Haif3:1-12;Hheev1:1-8;Ye1:19-28）
3
1 Hiv-bif-liuv huk Loh-mah voongf dooi haih teepf nga veeif gee tif hoouh,
Beenh-tiu Bih-la-to guanh lih lengv Yiuh-haif gee,
Hi-lutf guanh lih lengv Gia-lif-lif gee,
tok Hi-lutf huf hee Feei-lif guanh lih lengv Yih-tuv-lif-a gee hemv lengv Deekf-la-hheev-niv gee,
Liv-sa-nef guanh lih lengv Yav-bih-lif-niv gee,
Yav-naf hemv Gai-yav-fav huk daf gif see,
2 neeh tif hoouh,
leekf da hhiangh Sa-gia-lif-yav huf hee Ye-hanf yoou da loouh,
Siangf-dif hemv geef gang go vooi.
3 Geef ziuh booiv bak lengv Ye-danf hoov gee vooi,
suanf gang lengv-hunf hheem huiv gaih ziapf siuf tuk leei,
Siangf-dif ziuh min soih geef-loh gee.
4 Zing goh sian zi Yih-lif-yav yoou da sek geef gee tia gee teenf hee,
geef bov,
"Yoou da loouh lai lengv-hunf yam bov,
'Hooi Zu zunh bif sunv,
lingv sunv geef gee teenf-teenf booiv.
5 Too lai gee song tiah duf hheem henf dik,
tiah nook tiah nyoo duf hheem fah fingf booiv,
sunv euf-euv uanf-uanh neeh gee hheem huk teenf-teenf booiv,
sunv hangv-hangv doom-doom neeh gee ya hheem huk fingf-fingf geef.
6 Suanv sif gaif gee lengv-hunf duf dif dekf huh Siangf-dif gee giuf een.'"a
7 Ye-hanf bov lengv-hunf miaf dif tuk leei neeh gee bov,
"Leekf ngiaf lamv meef neeh hoouf hee!
Dif hhooiv doongv Siangf-dif gee simh fuanf vooi,
meef-loh yih vuiv deuf lai luat haf?
8 Hheem hengf hongh uk miaf,
zingf mingv meef-loh duf ga huiv gaih vooi,
meenf ngah hhif bov Yav-bov-la-hanf tih zuh zung meef-loh huf hee,
ziuh deuf lai luat vooi.
Hauf seengv meef-loh,
Siangf-dif hhoo yi yam dinf neeh gee bin tingf leekf lanv Yav-bov-la-hanf gee.
9 Fu mee en teeif duf ga biang yoou hau dun vooi,
dun meenf giat makf maif neeh gee,
ziuh dif damh longf gengf loouh da veeif vooi."
10 Hemv goonf ziuh tooi geef bov,
"Teenf hee hauf-loh hheem di leeuf huk?"
11 Ye-hanf tanv bov,
"Lai hho yua voon hiuf gee,
hheem sev hiuf hee zee neef meenf lai gee;
lai goouh goonv gee ya hheem teenf huk."
12 Ya lai lengv-hunf suv suif gee miaf dif tuk leei,
geef-loh tooi Ye-hanf bov,
"Lauh see,
hauf-loh hheem di leeuf huk?"
13 Ye-hanf seengv geef-loh bov,
"Ziuf gui dingf booiv suv,
meenf ngah suv liauh."
14 Ya lai lengv-hunf huk bingv gee miaf tooi geef bov,
"Hauf-loh nif?
Hauf-loh hheem di leeuf huk?"
Ye-hanf bov geef-loh,
"Meenf ngah oouv hhinf booiv ap lengv-hunf,
ya meenf ngah tuat vanh gunf vanh,
hheem moonh zukf toof-too gee gung zee."
15 Neeh tif hoouh,
lengv-hunf gee zung vook hau sunv Gi-dukf miaf,
geef-loh yoou da timv saiv,
i sook Ye-hanf tih Gi-dukf.
16 Ye-hanf bov,
"Hauf oouv namh miaf hooi meef-loh tuk leei,
danf tih hoouh looif dif lai huf hee neengv likf bih hauf geengf nyoo gee miaf,
hauf hooi geef geq ba haif duf meenf fui.
Geef dif oouv Seengf-lingv hemv veeif miaf hooi meef-loh tuk leei."
17 Geef dif nganv fun geeiv miaf fung mookf geef gee,
oouv mookf gee suv loouh da fangh vooi,
gengf lip gee loouh da veeif vooi ngupf."
18 Ye-hanf yuh gang haih liauh gakf gee go hhin hemv goonf,
suanf fukf im zee geef-loh.
19 Guanh lih Gia-lif-lif gee Hi-lutf huk seeu teeh dunf hee,
geef ya oouv maih tok geef huf hee Si-lov-tih,
Ye-hanf ziuh an geef;
20 geef ya huk hhinh hee geengf seeu gee hemv,
ziuh tih hoop Ye-hanf loouh gamv vooi.
Yev-so tuk leei (Haif3:13-17;Hheev1:9-11)
21 Gua na lai fooif hee,
bek ting gee zung tuk leei vooi,
Yev-so ya miaf tuk leei.
Yev-so doouh goouf gee tif hoouh,
fa mee ziuh hheeif vooi.
22 Seengf-lingv zing goop huf hee teenf hee longf miaf yoou baiv huf geef,
yuh lai sauv mee lokf baiv fa gang bov,
"Meef tih hauf dookf gee Leekf-da-hhiangh,
meef biang hauf eengv."
Yev-so gee zukf fu (Haif1:1-17)
23 Yev-so daf hhaif tamv teepf tui gee tif hoouh,
hhai sih suanf fukf im.
Lengv-hunf gee zung yih vuiv Yev-so tih leekf da hhiangh Ye-seef huf hee,
Ye-seef tih leekf da hhiangh Hi-lih huf hee,
24 Hi-lih tih leekf da hhiangh Mah-dapf huf hee,
Mah-dapf tih leekf da hhiangh Lif-vuif huf hee,
Lif-vuif tih leekf da hhiangh Maif-gi huf hee,
Maif-gi tih leekf da hhiangh Yav-nav huf hee,
Yav-nav tih leekf da hhiangh Ye-seef huf hee,
25 Ye-seef tih leekf da hhiangh Mah-ta-hiv-a huf hee,
Mah-ta-hiv-a tih leekf da hhiangh A-mov-si huf hee,
A-mov-si tih leekf da hhiangh Nav-hungv huf hee,
Nav-hungv tih leekf da hhiangh Yih-si-lif huf hee,
Yih-si-lif tih leekf da hhiangh Nav-gai huf hee,
26 Nav-gai tih leekf da hhiangh Mah-ya huf hee,
Mah-ya tih leekf da hhiangh Mah-ta-hiv-a huf hee,
Mah-ta-hiv-a tih leekf da hhiangh Si-meeih huf hee,
Si-meeih tih leekf da hhiangh Ye-seef huf hee,
Ye-seef tih leekf da hhiangh Yiuh-daf huf hee,
Yiuh-daf tih leekf da hhiangh Ye-ya-nav huf hee,
27 Ye-ya-nav tih leekf da hhiangh Lif-sa huf hee,
Lif-sa tih leekf da hhiangh Sov-lov-ba-bov huf hee,
Sov-lov-ba-bov tih leekf da hhiangh Sa-la-tev huf hee,
Sa-la-tev tih leekf da hhiangh Niv-lif huf hee,
Niv-lif tih leekf da hhiangh Maif-gi huf hee,
28 Maif-gi tih leekf da hhiangh A-tiv huf hee,
A-tiv tih leekf da hhiangh Gee-sang huf hee,
Gee-sang tih leekf da hhiangh Yih-mov-dang huf hee,
Yih-mov-dang tih leekf da hhiangh Eev huf hee,
Eev tih leekf da hhiangh Ye-sif huf hee,
29 Ye-sif tih leekf da hhiangh Yih-lif-yih-sief huf hee,
Yih-lif-yih-sief tih leekf da hhiangh Ye-lingf huf hee,
Ye-lingf tih leekf da hhiangh Mah-dapf huf hee,
Mah-dapf tih leekf da hhiangh Lif-vuif huf hee,
30 Lif-vuif tih leekf da hhiangh Si-mianf huf hee,
Si-mianf tih leekf da hhiangh Yiuh-daf huf hee,
Yiuh-daf tih leekf da hhiangh Ye-seef huf hee,
Ye-seef tih leekf da hhiangh Ye-noomv huf hee,
Ye-noomv tih leekf da hhiangh Yih-lif-yav-gingf huf hee,
31 Yih-lif-yav-gingf tih leekf da hhiangh Miv-lif-a huf hee,
Miv-lif-a tih leekf da hhiangh Maiv-noomv huf hee,
Maiv-noomv tih leekf da hhiangh Mah-tav-ta huf hee,
Mah-tav-ta tih leekf da hhiangh Nav-tan huf hee,
Nav-tan tih leekf da hhiangh Daf-vuif huf hee,
32 Daf-vuif tih leekf da hhiangh Ye-si huf hee,
Ye-si tih leekf da hhiangh Eev-beeif-deev huf hee,
Eev-beeif-deev tih leekf da hhiangh Bo-a-si huf hee,
Bo-a-si tih leekf da hhiangh Sa-meenv huf hee,
Sa-meenv tih leekf da hhiangh Nav-sunf huf hee,
33 Nav-sunf tih leekf da hhiangh Yav-miv-nav-tav huf hee,
Ya-miv-nav-tav tih leekf da hhiangh Yav-lanv huf hee,
Ya-lanv tih leekf da hhiangh Hi-si-lunv huf hee,
Hi-si-hunv tih leekf da hhiangh Fav-leeqf-si huf hee,
Fav-leeqf-si tih leekf da hhiangh Yiuh-daf huf hee,
34 Yiuh-daf tih leekf da hhiangh Yav-gookf huf hee,
Yav-gookf tih leekf da hhiangh Yih-sav huf hee,
Yih-sav tih leekf da hhiangh Yav-bov-la-hanf huf hee,
Yav-bov-la-hangf tih leekf da hhiangh Ta-la huf hee,
Ta-la tih leekf da hhiangh Nav-hheef huf hee,
35 Nav-hheef tih leekf da hhiangh Si-luf huf hee,
Si-luf tih leekf da hhiangh La-nguv huf hee,
La-nguv tih leekf da hhiangh Fav-leeqf huf hee,
Fav-leeqf tih leekf da hhiangh Hi-bov huf hee,
Hi-bov tih leekf da hhiangh Sa-la huf hee,
36 Sa-la tih leekf da hhiangh Gai-noomv huf hee,
Gai-noomv tih leekf da hhiangh Yav-fav-sa huf hee,
Yav-fav-sa tih leekf da hhiangh Sanv huf hee,
Sangv tih leekf da hhiangh Nov-yaf huf hee,
Nov-yaf tih leekf da hhiangh La-maif huf hee,
37 La-maif tih leekf da hhiangh Mah-tuv-sa-la huf hee,
Mah-tuv-sa-la tih leekf da hhiangh Yih-nof huf hee,
Yih-nof tih leekf da hhiangh Yav-liatf huf hee,
Yav-liatf tih leekf da hhiangh Mah-leeqf-liatf huf hee,
Mah-leeqf-liatf tih leekf da hhiangh Gai-noomv huf hee,
Gai-noomv tih leekf da hhiangh Yih-nov-sif huf hee,
38 Yih-nov-sif tih leekf da hhiangh Sai-teef huf hee,
Sai-teef tih leekf da hhiangh Yav-dang huf hee,
Yav-dang tih Leekf-da-hhiangh Siangf-dif huf hee.