Yiav leekf nof baiv fu ziangh huf hee maif vooi (Haif8:5-13)
7
1 Yev-so hemv bek ting gee gang go neeh gee inv,
ziuh loouh heeuv Gia-baiv-nungv mee vooi.
2 Lai Loh-mah gun deeif gee baiv fu ziangh huf hee,
leekf nof geef zuif dookf gee neeh huf hee lai fingh dif hhooiv daiv vooi.
3 Baiv fu ziangh neeh huf hee hingf huh vanh gang Yev-so gee teeh vooi,
ziuh dooh ziangh lauh Yiuh-haif seengh gee gi huf booiv hhuf Yev-so miaf go leekf nof geef huf hee.
4 Ziangh lauh neeh gee doongv ningf Yev-so vooi,
ziuh hhuf geef bov,
"Geef tih dooi lai meef boongv gee,
5 eenv veeih geef dookf bek ting hauf-loh gee,
gianf huif hangv sev hauf-loh."
6 Yev-so ziuh di moh geef-loh booiv.
Dif doongv lanf neeh mee vooi,
baiv fu ziangh dooh feengf yu gi huf booiv ningf Yev-so vooi,
seengv geef bov,
"Zu haf,
hauf meenf fui lai meef hho so miaf lanf hauf.
7 Hauf toof-too ya meenf fui lai booiv div meef.
Meef gang go gee hee,
leekf nof hauf huf hee ziuh itf dingf maif.
8 Eenv veeih lai hak nyoo guanh hauf,
ya lai leekf bingv sev hauf guanh.
Hauf zeekf yam neeh huf hee bov,
'Booiv!
' Geef ziuh booiv;
yam gakf huf bov,
'Maif!
' Geef ziuh maif;
yam leekf nof hauf gee bov,
'Meef huk teeh neeh gee!
' Geef ziuh booiv huk."
9 Yev-so tiang meenf doongv hingf heekf go neeh gee,
ziuh tuanh huf gua miaf hemv lengv-hunf hemf moh geef neeh gee gang bov,
"Hauf seengv meef-loh,
ziuh tih yoou Yih-seef-liatf,
hauf ya meenf am huh teenf nyoo gee sinf sim gua."
10 Lengv-hunf dooh booiv div Yev-so neeh gee,
leengv doongv lanf baiv fu ziangh,
dekf huh leekf nof nee duf ga maif vooi.
Biang leekf da hhiangh maih mai huf hee tingf leengv vooi
11 Gua meenf giauh foong,
Yev-so booiv heeuv Nah-in mee.
Meenv huv geef gee hemv lengv-hunf hoouf hee di moh geef booiv.
12 Geef-loh booiv doongv ningf heeuv,
am vanh hamv lengv-hunf daiv uk sangv.
Neef daiv-daiv neeh huf hee tih maih mai huf hee gee dukf seeng zeeh,
lengv-hunf da heeuv gee lai haih liauh hemv maih nee hong looif geef.
13 Yev-so dekf huh maih mai neeh huf hee,
ziuh dookf hungh geef,
yam geef bov,
"Meenf ngah ngai vooi!"
14 Ziuh geen booiv hhoomh lokf goong loouh,
lengv-hunf hamv-hamv neeh gee ziuh hengf on vooi.
Yev-so ziuh bov,
"Leekf hauh tengv haf,
hauf yam meef uif miaf!"
15 Daiv-daiv neeh huf hee ziuh ngov uif,
hhooiv bak gang go vooi.
Yev-so ziuh seengv maih lai geef bov,
"Maif vooi."
16 Lengv-hunf hemv goonf ya mangf ya hhiv guaif,
ziuh ngenv Siangf-dif bov,
"Yoou da doouf-loh sut vuih daf gee sian zi vooi."
Yuh bov,
"Siangf-dif gov bek ting geef gee."
17 Yev-so huk teeh neeh hhinh hee,
suanf hoou Yiuh-haif seengh hemv bak lukf lengv neeh hhootf hee vooi.
Hooi lengv-hunf tuk leei gee Ye-hanf faif lengv-hunf booiv tooi Zu (Haif11:2-19)
18 Meenv huv Ye-hanf gee seengv teeh neeh gee inf-inv zee Ye-hanf vooi.
19 Ye-hanf ziuh yam meenv huv voon huf miaf,
faif geef-loh booiv tooi Yev-so,
bov,
"Dif miaf gee Gi-dukf tih meef meenf?
Ha tih hauf-loh foou gakf na nif?"
20 Lengv-hunf neeh voon huf miaf doongv ningf Yev-so vooi,
bov,
"Hooi lengv-hunf tuk leei gee Ye-hanf faif hauf-loh miaf tooi meef,
bov,
'Dif miaf gee Gi-dukf tih meef meenf?
Ha tih hauf-loh foou gakf na nif?'"
21 Ngamf-ngamf neeh tif hoouh,
Yev-so yiav haih liauh lengv-hunf lai fingh gee,
nanf vif gee,
bif yif hangv geen huf gee maif vooi,
ya biang haih liauh dav lak gee dekf huh vooi.
22 Yev-so tanv geef-loh bov,
"Meef-loh leengv booiv seengv meef-loh dekf huh gee hingf heekf gee zee Ye-hanf,
ziuh tih dav lak gee dekf huh,
gok hhoih gee booiv sunv,
tingf ma fungv gee maif vooi,
sav makf gee hingf huh,
lengv-hunf daiv gee tingf leengv,
neef ngah gee lai fukf im suanf sev geef-loh.
23 Neef siang sinf hauf meenf huaiv ngiv gee,
ziuh lai fok vooi."
Yev-so ngenv Ye-hanf (Haif11:7-19)
24 Lengv-hunf Ye-hanf faif miaf neeh gee leengv booiv hoouh looif,
Yev-so yoou dau na hemv goonf ngenv Ye-hanf,
bov,
"Gua na meef-loh booiv da loouh vooi,
dif dekf gai gee nif?
Dif dekf van siau ganf ngoouf haf?
25 Meef-loh booiv ninh doongv dooi dif dekf gai gee nif?
Dif dekf lengv-hunf dingv huanh dingv leengf gee haf?
Lengv-hunf dingv hho yua luang hho yua maif,
suh saih faif siangf neeh gee zih yoou da voongv gung.
26 Meef-loh booiv ninh giuf gingf dif dekf gai gee nif?
Dif dekf sian zi haf?
Hauf seengv meef-loh,
tih nenh,
geef gee bih sian zi gee nyoo liauh vooi lo.
27 Yoou da ging veenv tia Siangf-dif hemv Gi-dukf gang bov,
'Hauf dif faif sih zeh hauf gee booiv gua na meef,
hooi meef fu sunv.
'a
Gang gee neeh huf sih zeh ziuh tih Ye-hanf.
28 Hauf seengv meef-loh,
tooi ganv gee lengv-hunf meenf lai huf-huf nyoo gua Ye-hanf;
danf tih yoou da Siangf-dif gee gok gav,
ziuh tih zuif fuh hung gee bih geef enf zungf iauf."
29 Ye-hanf hooi bek ting hemv lengv-hunf suv suif tuk leei gua neeh gee hingf heekf go neeh gee vooi,
ziuh singv nginf Siangf-dif tih gung ngif gee.
30 Danf tih lengv-hunf Fatf-lif-saif dangh gee hemv Siangf-dif lutf fapf gee lauh see meenf hheeng ziapf siuf Ye-hanf gee tuk leei,
ziuh toof-too huk faih Siangf-dif hooi geef-loh an faiv maif gee vooi.
31 Yev-so yuh bov,
"Hauf hheem oouv gai gee miaf bi tooi ganv neeh mee gee lengv-hunf maif nif?
Geef-loh zing gai gee teenf hee nif?
32 Geef-loh zing leekf nook gee uk ninh hemv goonf nyamv beeng yanh bov,
'Hauf-loh duf ga hooi meef-loh voouh tiuv vooi,
meef-loh meenf hiauf moou.
Hauf-loh hooi meef-loh ngai dem gee vooi,
meef-loh ya meenf ngai.'
33 Eenv veeih hooi lengv-hunf tuk leei gee Ye-hanf miaf,
meenf goonv bing ya meenf goonv yan,
meef-loh bov yif hangv geen huf geef vooi.
34 Yeenv-zeeh miaf ya goonv ya lumh,
meef-loh bov geef tih lengv-hunf ham goonv ham maq huf hee,
hemv lengv-hunf lai soih gee gangf lengv-hunf suv suif gee huk feengf yu.
35 Danf tih lengv-hunf hemf moh Siangf-dif neeh gee zung huh Siangf-dif gee zif huif tih zinv gee."
Min soih maih leekf lai soih huf hee
36 Lai lengv-hunf Fatf-lif-saif dangh huf hee sing Yev-so booiv lanf geef goonv fiah,
Yev-so ziuh hemv geef booiv.
37 Heeuv neeh mee lai maih huav huf hee,
huh Yev-so yoou lanf lengv-hunf Fatf-lif-saif dangh gee goonv fiah,
geef ziuh dai hiang goou ganh hee miaf,
ganh mee tih oouv yif miaf huk gee.
38 Geef nyunv yoou ningf Yev-so,
hhupf yoou ningf gok geef ngai.
Namh dav gee leeiv zeeq gok Yev-so gee zakf vooi,
ziuh oouv fuiv toof-too gee miaf sitf liang,
yuh ziangf hangh hoomv gok geef,
ya oouv hiang goou miaf sitf loouh.
39 Lengv-hunf Fatf-lif-saif dangh sing Yev-so goonv fiah neeh huf hee dekf huh vooi,
timv tiang bov,
"Lengv-hunf neeh huf hee zeekf tih sian zi,
itf dingf huh maih gamf geef neeh huf hee tih maih gai huf hee,
tih maih faih nooiv huf hee."
40 Yev-so bov Si-meenv bov,
"Si-meenv,
hauf lai go gee dif hemv meef gang."
Si-meenv tanv bov,
"Lauh see,
gang lo."
41 Yev-so bov,
"Lai lengv-hunf voon huf hheem sinf saif zu huf hee,
huf hee hheem ngoonf fiakf ngoh teepf liangh,
huf hee hheem ngoonf fiakf nga liangh.
42 Geef-loh zung meenf lai sinf fooh,
saif zu ziuh min zai geef-loh gee meenf yungh fooh vooi.
Lengv-hunf neeh voon huf leeuf huf geengf ooi geef nif?"
43 Si-meenv tanv bov,
"Hauf tiang tih hheem zai liauh neeh huf hee."
Yev-so bov,
"Heekf lo."
44 Geef ziuh tuanh huf gua miaf doi na maih neeh huf hee,
hemv Si-meenv gang bov,
"Meef dekf huh maih neeh huf huk gee meenf?
Hauf miaf lanf meef,
meef meenf oouv namh sev hauf tuk gok,
danf tih maih neeh huf hee oouv namh dav miaf hooi hauf tuk gok,
oouv fuiv miaf sitf liang;
45 meef meenf hoomv hauf,
danf tih hauf loouh miaf hoouh looif,
maih neeh huf hee ziuh hoomv gok hauf meenf hengf;
46 meef meenf oouv yuf sitf hau hauf,
danf tih maih neeh huf hee oouv hiang goou miaf sitf gok hauf.
47 Too yi hauf seengv meef,
geef ooi gee liauh,
tih eenv veeih geef huh Siangf-dif duf ga min soih geef dunf hee booiv vooi.
Danf tih Siangf-dif min soih tiu neeh gee,
geef ooi gee ziuh tiu."
48 Yev-so ziuh hemv maih neeh huf hee gang bov,
"Min soih meef gee vooi."
49 Lengv-hunf yoou ninh goonv fiah neeh gee ziuh timv tiang bov,
"Geef tih naf nee nooh?
Di leeuf min lai soih lengv-hunf gee nif?"
50 Yev-so yuh bov maih neeh huf hee bov,
"Sinf sim meef gee go meef vooi,
fingf anv leengv booiv lo!"