3 Yev-so ziuh bov geef-loh,

"Linf yoou da ging veenv tia Daf-vuif hemv lengv-hunf hemf moh geef neeh gee yiak gee tif hoouh huk gee teeh^a,

meef-loh ya meenf hookf gua haf?

4 Geef di leeuf loouh Seengf-dianf vooi,

oouv bing faif hooif gee miaf goonv,

ya sev lengv-hunf hemf moh geef neeh gee goonv?

Seef gif see vooi,

leeuf na duf meenf hau goonv bing neeh gee."

5 Yev-so yuh bov geef-loh,

"Yeenv-zeeh tih An-sikf-veenf gee Zu."

6 Yuh lai fooif hee An-sikf-veenf,

Yev-so loouh huif hangv vooi maiv lengv-hunf.

Yoou ninh lai lengv-hunf huf hee moof maif fiangf hee fingh sov nyeu vooi.

7 Siangf-dif lutf fapf gee lauh see hemv lengv-hunf Fatf-lif-saif dangh gee ziuh lookf-lookf heei Yev-so,

dekf An-sikf-veenf geef yiav meenf yiav fingh,

hau ziu tuq booiv goou geef.

8 Yev-so huh timv teeh geef-loh gee,

zuih yam lengv-hunf moof sov nyeu neeh huf hee,

bov,

"Uif miaf,

nyunv zing da vooi."

Lengv-hunf neeh huf hee ziuh nyunv uif vooi.

9 Yev-so bov geef-loh bov,

"Hauf tooi meef-loh,

An-sikf-veenf huk maif huk seeu,

go mingh haih mingh,

hhoo yi huk leeuf gee nif?"

10 Yev-so vook lengv-hunf yoou ninh gee hoouf-hoou,

ziuh yam lengv-hunf neeh huf hee,

bov,

"Nyof moof meef fiangf hee teenf-teenf geef!"

Geef giangf nyof moof,

moof fiangf hee ziuh maif leengv vooi.

11 Geef-loh ziuh meenf huh giauh yianf,

hemv goonf hamf liangf di leeuf sih lih Yev-so.

12 Lai veenf hee,

Yev-so geen tiah vooi doouh goouf,

hhuf Siangf-dif suanf goomh.

13 Veenf bangv vooi,

geef ziuh yam meenv huv gee miaf,

lokf da geef-loh liakf teepf ngeeih na uk miaf huk seeh huv.

14 Neeh teepf ngeeih na lai:

Si-meenv,

Yev-so ya hhooiv geef yam Bih-deekf hee,

ya lai engv tok Si-meenv huf hee An-teev-liatf;

ya lai Yav-gookf hemv Ye-hanf,

gangf Feei-lif hemv Ba-to-loh-maiv,

15 gangf Ma-haif hemv To-mah,

gangf leekf da hhiangh Yav-leekf-feei huf hee Yav-gookf hemv Feenf-yuif dangh gee Si-meenv,

16 gangf leekf da hhiangh Yav-gookf huf hee Yiuh-daf hemv ing Zu gee Yiuh-daf Gia-liatf.

17 Yev-so hemv geef-loh longf tiah vooi,

nyunv yoou lengv fingf-fingf hhootf hee.

Lai meenv huv hemv bek ting dunf hee vif yoou ninh,

geef-loh tih lokf lengv Yiuh-haif,

lokf heeuv Ye-luf-sa-leengh gangf heeuv Tui-lov,

heeuv Si-dunf ningf hai neeh gee miaf gee.

18 Dif hingf Yev-so maiv geef-loh,

ya haih meengh Yev-so hooi geef-loh yiav fingh.

Ya lai bif yif hangv geen huf gee,

Yev-so ya hooi geef-loh voouf yif hangv uk vooi.

19 Hemv goonf duf tiang gamf Yev-so,

eenv veeih lai neengv likf lokf huf geef uk miaf,

yiav geef-loh maif vooi.

20 Yev-so doongf hau vook meenv huv gee bov,

23 Doongv neeh veenf hee,

meef-loh dif eengv taq,

eenv veeih meef-loh yoou baiv fa gee ziangf lif tih nyoo gee,

zuh zung geef-loh gee ya tih teenf doi sian zi gee.

27 "Danf tih hauf seengv meef-loh,

neef hingf hauf gang go neeh gee,

hheem dookf suf yinf meef-loh gee;

zookf meef-loh gee,

hheem doi geef maif-maif geef;

28 zeeuf meef-loh gee,

hheem zukf fukf geef;

vuh yukf meef-loh gee,

hheem hooi geef doouh goouf.

29 Vanh fak na meef neeh fiangf hee,

linf gakf fiangf ya saih geef fak.

Vanh geep yua bak meef gee,

linf yua dooi ya saih geef oouv.

30 Neef hhuf meef gee,

ziuh sev geef.

Vanh geep goouh meef gee booiv vooi,

meenf ngah booiv oouv leengv.

31 Meef-loh tiang vanh di leeuf doi meef-loh,

meef-loh ya hheem di leeuf doi vanh.

32 "Meef-loh zeekf danf-danv dookf neef dookf meef-loh neeh gee,

lai gai gee hau ngenv looih nif?

Ziuh tih lengv-hunf lai soih gee ya tih teenf huk.

33 Meef-loh zeekf doi neef doi meef-loh maif neeh gee lengv-hunf maif,

lai gai gee hau ngenv looih nif?

Ziuh tih lengv-hunf lai soih gee ya tih teenf huk.

34 Meef-loh zeekf nai sev vanh,

ya haih meengh vanh fooh leengv,

lai gai gee hau ngenv looih nif?

Linf lengv-hunf lai soih gee nai sev lengv-hunf lai soih neeh gee,

ya ziuf to suv leengv.

35 Meef-loh hheem dookf suf yinf meef-loh gee,

ya hheem doi geef-loh maif-maif geef,

nai sev vanh gee,

meenf haih meengh vanh fooh leengv,

teenf hee meef-loh gee ziangf lif itf dingf nyoo,

meef-loh ya itf dingf huk zuif nyoo Siangf-dif gee leekf ngif,

eenv veeih Siangf-dif biang gua lengv-hunf neef buh bangh gongv loouf hemv huk seeu neeh gee,

ya doi geef-loh maif.

36 Fa bef meef-loh timv teeh teenf maif,

meef-loh ya hheem zing fa bef meef-loh teenf hee timv teeh maif."

37 "Meef-loh meenf ngah gang vanh maif seeu,

ziuh meenf lai lengv-hunf gang meef-loh maif seeu;

meef-loh meenf ngah dingf soih vanh gee,

Siangf-dif ziuh meenf dingf soih meef-loh gee;

meef-loh hheem yuanv liangf vanh,

Siangf-dif ziuh min soih meef-loh gee.

38 Meef-loh hheem sev zee vanh,

Siangf-dif ziuh itf dingf sev zee meef-loh,

geef oouv seeng teepf liangh ba hee,

duq seeng hiauf-hiauh,

huaf seeng hangf-hangv seeng sev meef-loh;

eenv veeih meef-loh oouv seeng gai gee seeng sev vanh,

Siangf-dif ziuh oouv seeng gai gee seeng sev meef-loh."

39 Yev-so yuh hemv geef-loh gang bih yif mee,

bov,

"Dav lak di leeuf yin lai dav lakf,

teenf hee voon na meenf tih zung dok longf soongh vooi haf?

40 Hookf tengv meenf heen lai gua lauh see;

zeekf hookf moon vooi,

meenf gua tih hemv lauh see hongf goonf.

41 "Veeih gai dekf huh dav engv tok meef gee lai unv,

meenf huh dav toof-too gee lai liangf lanf nif?

42 Meef meenf huh dav toof-too gee lai liangf lanf,

di leeuf bov lai engv tok meef gee bov 'Foou hauf hooi meef oouv unv da dav gee uk' nif?

Gev maif meef neeh huf hee,

meef hheem sian oouv liangf lanf da dav meef gee uk,

nah dekf lai zinv,

booiv hooi engv tok meef gee oouv unv da dav gee uk."

43 "Dun maif gee meenf tengv lai makf seeu,

dun seeu gee ya meenf tengv lai makf maif.

44 Dun gee maif seeu,

dekf makf geef gee ziuh huh vooi.

Lengv-hunf meenf lokf lai unv gee muq makf uh hua goh uk,

ya meenf lokf lai hau hia gee muq makf fuh hoouv uk.

45 Lengv-hunf maif gee timv teeh maif,

gang go hengf hongv ya maif.

Lengv-hunf seeu gee timv teeh seeu,

gang go hengf hongv ya seeu.

Eenv veeih timv mee tiang di leeuf,

bak mee ziuh gang di leeuf."

46 "Meef-loh veeih gai yam hauf 'Zu haf,

Zu haf',

ya meenf ziuf go hauf gee booiv huk nif?

47 Hauf seengv meef-loh,

miaf doongv ningf hauf hingf go hauf gee vooi ziuh ziuf booiv huk gee,

geef zing lengv-hunf leeuf zuangv hee nif?

48 Geef zing lengv-hunf huf hee guqf giak maif-maif nah huk lanf teenf hee.

Doongv tingf namh gee tif hoouh,

namh tung lanf mee,

lanf mee zung meenf noov ziqf-ziqf,

eenv veeih lanf mee diaqf giak maif.

49 Danf tih,

hingf heekf go hauf gee vooi meenf ziuf booiv huk gee,

ziuh zing lengv-hunf huf hee meenf guqf giak ziuh huk lanf teenf hee;

namh it tung,

lanf mee ziuh dum vooi."