4 Lai veenf hee,

lai lengv-hunf dunf hee zipf zung yoou ningf goonf,

ya lai lengv-hunf gee lokf leeuf lokf letf miaf ningf Yev-so gee tif hoouh,

Yev-so ziuh yungh bih yif gang bov,

5 "Lai lengv-hunf huf hee booiv fung voonf.

Fung gee tif hoouh,

lai dok yoou baiv geqf gee,

lengv-hunf gua sunv sah heekf vooi,

nokf baiv fa gee ya vinv miaf goonv inv vooi;

6 lai dok yoou lengv dinf gee,

giangf ngukf ngoouh ziuh liang sov vooi,

eenv veeih meenf lai namh;

7 lai dok yoou da unv gee,

unv gee hemv geef hongf goonf tengv,

unv gee butf uif meeuf geef on vooi;

8 ya lai dok yoou lengv hhianh gee,

nyoo vooi tengv makf it bek fuih."

Yev-so gang go neeh gee inv vooi,

ziuh sauv lookf-look bov,

"Lai sav hingf gee,

ziuh hheem hingf loouh!"

9 Meenv huv gee tooi Yev-so bov,

"Bih yif neeh mee tih gai gee if see nif?"

10 Yev-so tanv bov,

"Siangf-dif gok gav gee oouf mitf nah sev meef-loh toof-too huh;

hemv vanh gang ziuh yungh bih yif,

11 "Bih yif neeh mee gee if see tih teenf hee:

Voonf gee ziuh tih Go Siangf-dif gee.

12 Dok yoou baiv geqf gee,

ziuh tih lengv-hunf hingf heekf Go Siangf-dif gee vooi,

yif hangv ziuh miaf lokf da timv geef-loh geep Go Siangf-dif gee booiv vooi,

eenv veeih yif hangv mangf geef-loh zun Go Siangf-dif gee vooi ziuh deekf giuf;

13 dok yoou geh dinf gee,

ziuh tih lengv-hunf hingf heekf Go Siangf-dif gee vooi,

ziuh eengf-eengv ziapf siuf,

danf tih meenf yungh timv booiv zui hhiuv,

meenf gua tih ziamf siv siang sinf,

hoouh looif am heekf seeng huatf hhutf nanf,

lai lengv-hunf ziuv teef lai lengv-hunf zamf,

ziuh meenf zun vooi;

14 dok yoou da unv gee,

ziuh tih lengv-hunf hingf heekf Go Siangf-dif gee vooi,

leengv booiv hoouh looif,

bif neeh tooi hee gee nyung nyang,

sinf ngoonf,

hiangh siuf neeh gee gatf on vooi,

ziuh meenf tengv lai makf ngau;

15 dok yoou lengv hhianh gee,

ziuh tih lengv-hunf titf teeh gee,

hingf heekf Go Siangf-dif gee vooi,

oov yoou da timv,

ziuh ziuf booiv huk,

tuh doongv tengv makf maif gee uk miaf.

16 "Meenf lai lengv-hunf ziu deei oouv goouh miaf zaqf loouh,

ha tih biang longf dauf tangf vooi,

itf dingf tih biang geen baiv deeng haiv vooi,

biang lengv-hunf loouh miaf neeh gee zung dekf huh deei bangv.

17 Eenv veeih oop me gee teeh meenf lai meenf doh uk miaf gee;

lookf me gee teeh ya meenf lai meenf boouf luf uk miaf bif lengv-hunf huh gee.

18 Too yi meef-loh hheem nook timv di leeuf loouh hingf.

Eenv veeih neef lai gee,

ya dif sev zee geef;

neef meenf lai gee,

linf geef toof-too yih vuiv lai gee,

ya dif geep booiv."

19 Ma Yev-so hemv tok geef gee miaf vooi,

eenv veeih lengv-hunf liauh meenf doongv lai ningf Yev-so.

20 Lai lengv-hunf seengv Yev-so bov,

"Ma moh hemv tok meef gee nyunv uk ninh nenh,

dif div meef."

21 Danf tih Yev-so tanv geef-loh bov,

"Lengv-hunf hingf heekf Go Siangf-dif gee vooi,

ziuh zun booiv huk neeh gee,

ziuh tih maih lai hauf gee,

engv tok hauf gee."

22 Lai veenf hee,

Yev-so hemv meenv huv geef gee geen luaf vooi,

geef hemv meenv huv gee gang bov,

"Doouf-loh ngoouf luaf booiv fiangf ninh hoomf vooi."

Geef-loh ziuh ngoouf luaf booiv vooi.

23 Luaf hauv hee booiv gee tif hoouh,

Yev-so suanv vooi.

Hoomf mee it ziu hhi van meenf huh giauh nyoo,

namh mutf luaf hauv hee dif lak vooi,

geef-loh meenf huh giauh nguih hiamh.

24 Meenv huv gee ziuh miaf yam Yev-so uif,

bov,

"Lauh see,

lauh see,

doouf-loh dif hhooiv daiv vooi!"

Yev-so ziuh uif miaf,

ngiamf-ngiamf teenf hee yam van langh gee on,

van langh gee ziuh hengf vooi,

on vooi.

25 Yev-so bov geef-loh bov,

"Sinf sim meef-loh gee booiv leeuf vooi nif?"

Geef-loh yuh mangf yuh hhiv guaif,

hemv goonf bov,

"Geef doongv dooi tih naf nee nooh?

Geef yam van hemv namh gee on,

linf van hemv namh gee ya hingf go geef."

26 Geef-loh doongv lengv Geekf-la-seen^a gee vooi,

ziuh tih yoou Gia-lif-lif gee doi minh.

27 Yev-so giangf geen hhoom,

lengv neeh hhootf hee lai lengv-hunf bif yif hangv geen huf gee huf hee,

doi na Yev-so gua miaf.

Lengv-hunf neeh huf hee haih foong meenf dingv hho yua vooi,

ya meenf zih yoou da lanf,

nah zih yoou da feenf.

28-29 Yev-so ziuh mingf lingf yif hangv lokf huf lengv-hunf neeh huf hee uk miaf,

lengv-hunf neeh huf hee ziuh hhupf yoou dau na Yev-so sauv lookf-look yanh bov,

"Zuif nyoo Siangf-dif gee Leekf-da-hhiangh Yev-so haf,

hauf hemv meef lai gai gee ganv ngaih,

hhuf meef meenf ngah biang hauf tuh hho."

Yuanv miaf yif hangv neeh hoouf hee siangf-siangf geen huf geef.

Vanh oouv lian het gee miaf langv gok langv moof geef loouh,

ya siangf-siangf foou vook geef,

geef daf deengh lian het gee hunh vooi,

bif yif hangv yin booiv da loouh.

30 Yev-so tooi geef bov,

"Meef yam gai nooiv hee?"

Geef tanv bov,

"Hauf yam hoouf hee."

Eenv veeih yif hangv geen huf geef neeh gee hheekf seeh liauh.

31 Yif hangv gee ziuh iangv Yev-so,

meenf ngah mingf lingf geef-loh loouh soongh lakf-lakf meenf lai dooi neeh mee.

32 Ngamf-ngamf neeh tif hoouh lai mov hoouf hee yoou baiv tiah goonv goouh.

Yif hangv gee ziuh hhuf Yev-so biang geef-loh loouh da mov hoouf hee.

Yev-so ziuh hheeng vooi.

33 Yif hangv gee ziuh lokf huf lengv-hunf neeh huf hee uk miaf,

deuf loouh da mov hoouf hee vooi.

Mov hoouf hee ziuh ong teenf-teenf longf hhoom tiah,

dok longf da hoomf mutf daiv vooi.

34 Lengv-hunf tiangh mov gee dekf huh teeh neeh gee ziuh deuf vooi,

deuf leengv booiv seengv lengv-hunf da heeuv da voo gee.

35 Lengv-hunf gee ziuh hemv goonf uk miaf dekf fatf seeng gai teeh vooi.

Geef-loh doongv ningf Yev-so,

dekf huh lengv-hunf bif yif hangv geen huf neeh huf hee,

duf ga dingv hho yua maif-maif hui fukf zingf siangv vooi,

ngov yoou dau na Yev-so nenh,

geef-loh ziuh meenf huh giauh mangf.

36 Dekf huh teeh neeh hhinh gee lengv-hunf,

oouv di leeuf yiav lengv-hunf bif yif hangv geen huf neeh huf maif gee teeh seengv zee geef-loh.

37 Lengv-hunf Geekf-la-seen gee hingf vooi,

eenv veeih geef-loh meenf huh giauh mangf,

ziuh hemv goonf hhuf Yev-so luat lengv geef-loh gee,

Yev-so ziuh geen luaf leengv booiv vooi.

38 Lengv-hunf bif yiav maif neeh huf hee hhuf Yev-so sev geef di moh booiv,

danf tih Yev-so soiv geef leengv booiv,

bov,

39 "Meef leengv lanf lo,

booiv suanf Siangf-dif hooi meef huk meenf huh giauh nyoo gee teeh vooi."

Geef ziuh leengv booiv,

oouv Yev-so hooi geef huk meenf huh giauh nyoo gee teeh suanf heeuv mee hoouf-hoou vooi.

40 Yev-so leengv miaf gee tif hoouh,

lai lengv-hunf dunf hee ziapf daif geef,

eenv veeih geef-loh zung foou geef.

41 Neeh tif hoouh,

lai lengv-hunf guanh huif hangv huf hee yam Yav-luv hee,

geef miaf hhupf yoou na gok Yev-so,

hhuf Yev-so booiv lanf geef.

42 Eenv veeih leemf leekf geef huf hee dif hhooiv daiv vooi,

geef nah lai geef toof-too,

daf hhaif lai teepf ngeeih tui vooi.

Yev-so booiv lanf Yav-luv gee tif hoouh,

hemv goonf zung otf geef.

43 Lai maih leekf huf hee lai fingh diaqf baq teepf ngeeih veeif vooi,

leeuf ziqf duf dekf hoou vooi,

yiav gav teeh mee liang vooi,

danf tih meenf lai naf nee yiav lai geef maif.

44 Geef miaf doongv dau looif Yev-so,

gamf moh ba yua Yev-so hiuf hee,

baq geef gee it ziu ziuh on vooi.

45 Yev-so bov,

"Naf nee gamf hauf?"

Hemv goonf zung meenf singv nginf.

Bih-deekf bov,

"Lauh see,

hemv goonf otf meef gamf meef tif hih."

46 Danf tih Yev-so bov,

"Titf-titf lai lengv-hunf gamf hauf vooi,

eenv veeih hauf huh lai neengv likf lokf huf hauf uk booiv."

47 Maih leekf neeh huf hee huh meenf me lai on,

ziuh nyan duakh-duakh teenf hee uk miaf,

hhupf yoou na gok Yev-so,

oouv veeih gai gamf Yev-so hemv fingh geef gee di leeuf it ziu ziuh maif vooi,

doi na hemv goonf gang uk miaf.

48 Yev-so bov geef bov,

"Leemf leekf haf,

sinf sim meef gee go meef vooi,

fingf anv leengv booiv lo!"

49 Yev-so enf gang go gee tif hoouh,

lai lengv-hunf deuf lokf lanf Yav-luv miaf,

seengv Yav-luv bov,

"Leemf leekf meef nee duf ga daiv vooi,

meenf ngah mah fanh lauh see vooi."

50 Yev-so hingf heekf vooi ziuh bov Yav-luv bov,

"Meenf ngah mangf,

meef na guf siang sinf,

ziuh itf dingf go lai leemf leekf meef huf hee!"

51 Yev-so doongv lanf Yav-luv vooi,

meenf zun naf nee di moh geef loouh booiv,

nah sev Bih-deekf,

Ye-hanf,

Yav-gookf hemv leemf leekf gee bef maih di moh geef loouh booiv.

52 Lengv-hunf dunf hee zung veeih leemf leekf nee umf ook loouh ngai.

Yev-so bov,

"Meenf ngah ngai vooi,

geef meenf tih daiv,

tih suanv vooi."

53 Geef-loh huh leemf leekf nee duf ga daiv vooi,

ziuh hemv goonf liauv Yev-so.

54 Yev-so diuf lokf moof leemf leekf nee loouh,

yam geef bov,

"Nungh haf,

uif miaf lo!"

55 Honf tinf geef mee ziuh leengv miaf vooi,

it ziu geef ziuh nyunv uif.

Yev-so yam oouv goouh sev leemf leekf nee goonv.

56 Bef maih geef gee yuh eengv yuh mangf.

Yev-so zuk geef-loh meenf ngah seengv geef huk gee teeh zee vanh.