Yev-so maiv meenv huv gee doouh goouf (Haif6:9-15;7:7-11)
11
1 Lai veenf hee,
Yev-so yoou lengv hhootf hee doouh goouf,
geef doouh goouf inv vooi.
Lai meenv huv huf hee yam geef bov,
"Zu haf,
maiv hauf-loh doouh goouf teef,
zing hooi lengv-hunf tuk leei gee Ye-hanf maiv meenv huv geef gee teenf hee."
2 Yev-so bov,
"Meef-loh doouh goouf gee tif hoouh hheem teenf gang bov,
"'Hauf-loh yoou baiv fa gee Bef-lai haf,
hi voongf naf nee duf ging ngiang nooiv meef mee.
Hhuf gok gav meef mee gianf lipf yoou nooih,
hhuf meef gee zih if hengf yoou bak matf,
zing goh hengf yoou baiv fa teenf heea.
3 Goouh hauf-loh si iauf goonv neeh gee,
hhuf meef veenf nooih sev zee hauf-loh.
4 Min soih hauf-loh gee,
zing goh hauf-loh ya yuanv liangf lengv-hunf deekf zuif hauf-loh neeh gee teenf hee.
Meenf ngah sev yif hangv miaf tee hauf-loh famh soih,
go hauf-loh luat moof neef ook neeh huf heeb.'"
5 Yev-so yuh hemv geef-loh gang bov,
"Meef-loh naf nee lai feengf yu huf hee da hheenf miaf div meef nai bing,
geef bov,
'Feengf yu,
nai bing tamv mooqf sev hauf,
6 hauf lai feengf yu huf hee gua sunv da hheenf nah loouh miaf,
hauf meenf lai gai gee hau ziau daif geef.'
7 Meef yoou da lanf tanv geef bov,
'Meenf ngah yam vooi,
hauf duf ga langv deenh vooi,
leekf hoouf hee ya hemv hauf lap nenh,
hauf meenf uif lai oouv zee meef.'"
8 Yev-so bov,
"Di leeuf huk nif?
Hauf seengv meef-loh,
tuif yianf meef meenf sev hoi minh feengf yu uif miaf oouv sev geef,
danf tih dekf geef iangv teenf foong,
meef itf dingf uif miaf ziuh geef si iauf gee oouv sev geef.
9 "Hauf ya seengv meef-loh,
hhuf Siangf-dif ya tih teenf hee,
meef-loh hhuf Siangf-dif,
Siangf-dif ziuh sev zee meef-loh;
meef-loh div,
ziuh sev meef-loh div heekf;
meef-loh hhauv deenh,
ziuh hooi meef-loh hheeif deenh.
10 Eenv veeih neef hhuf gee,
ziuh deekf doongv;
div gee,
ziuh div heekf;
hhauv deenh gee,
ziuh hooi geef hheeif deenh.
11 Meef-loh naf nee huk bef lai gee,
leekf nee yam oouv bing,
dif oouv dinf huk bing sev leekf haf?
Yam oouv bav,
dif oouv ngiaf huk bav sev leekf haf?
12 Yam oouv nyumv,
dif oouv giamf sungf sev geef haf?
13 Tuif yianf meef-loh meenf maif,
ya took oouv goouh maif gee zee leekf ngif,
fa bef geenf meenf yungh gang vooi,
geef itf dingf oouv Seengf-lingv sev zee lengv-hunf hhuf geef neeh gee."
Yev-so hhoouf Siangf-dif gee neengv likf voouf yif hangv (Haif12:22-30;Hheev3:20-27)
14 Lai fooif hee,
Yev-so voouf yif hangv ngop huf hee uk vooi.
Neef ngop neeh huf hee ziuh gang lai go vooi,
lengv-hunf yoou ninh dekf heekf neeh gee zung hhiv guaif.
15 Hhiv zung lai lengv-hunf ngif leenf bov,
"Geef tih hhoouf voongf yif hangv Bev-si-fuh gee neengv likf miaf voouf yif hangv gee."
16 Yuh lai lengv-hunf teeuv Yev-so,
yam geef huk seenv zif sev geef-loh dekf,
hau zingf mingv neengv likf geef gee tih lokf Siangf-dif miaf gee.
17 Yev-so huh timv teeh geef-loh gee,
ziuh hemv geef-loh gang bov,
"Too lai toof-too git goonf gee gok gav,
itf dingf miatf voongv;
too lai toof-too git goonf lokf lanf gee gav lanf,
itf dingf faih.
18 Meef-loh bov hauf tih hhoouf Bev-si-fuh voouf yif hangv,
zeekf tih teenf hee,
Sav-danf toof-too git goonf,
ziuh meenf boouh lai sif likf geef gee on.
19 Zeekf hauf tih hhoouf Bev-si-fuh voouf yif hangv,
lengv-hunf di moh meef-loh neeh gee,
voouf yif hangv yuh tih hhoouf naf nee?
Teenf hee geef-loh ziuh dif zingf mingv meef-loh gang gee sook vooi.
20 Hauf voouf yif hangv zeekf tih hhoouf Siangf-dif gee neengv likf,
ziuh zingf mingv Siangf-dif gee gok gav duf ga miaf doongv ningf meef-loh vooi.
21 Lai lengv-hunf huf hee yuh nyoo yuh hhianh vuh zuang maif-maif,
foou lanf geef mee,
gav teeh geef mee ziuh meenf lai ziqf sav sookc.
22 Danf tih lai lengv-hunf huf hee bih geef geengf heen,
miaf git geef tuv vooi,
geep vuh hhif geef ih hhoouf neeh gee booiv vooi,
ya geep gav teeh geef mee booiv feenv inv vooid.
23 Meenf hongf hauf gee ziuh tih fanh deeif hauf,
meenf hooi hauf suv vinf gee,
ziuh tih huk tan gee."
Yif hangv leengv miaf (Haif12:43-45)
24 "Yif hangv huf hee lokf huf lengv-hunf huf hee uk miaf,
ziuh yoou lengv daiv dangh gee ngeeu booiv ngeeu leengv,
dif div lengv zih.
Danf tih meenf div lai heekf,
ziuh bov,
'Hauf dif leengv lanf gua na mee zih.'
25 Geef ziuh leengv booiv,
dekf huh lanf mee duf ga zuf bangf-bang zoongv luangf-luang vooi,
26 geef ziuh booiv yin yif hangv sit huf bih geef geengf seeu geengf ook gee miaf,
loouh da ninh vooi zih.
Hoouh looif lengv-hunf neeh huf gee singv hhuangf bih gua na geengf hhoonv vooi."
Zin zingf lai fok gee lengv-hunf
27 Yev-so gang go neeh gee gee tif hoouh,
yoou da lengv-hunf neeh hoouf hee lai maih leekf huf hee,
sauv lookf-look bov geef,
"Guaf meef gee hemv hoo noq meef gee lai fok vooi."
28 Yev-so bov,
"Tih ha,
danf tih enf meenf dim lengv-hunf hingf Go Siangf-dif gee vooi yuh zun siuh booiv huk neeh gee lai fok."
Yev-so gang sian zi Ye-nav gee seenv zif (Haif12:38-42)
29 Lengv-hunf gee mef vif mef liauh gee tif hoouh,
Yev-so gif zukf gang bov,
"Tooi ganv neeh mee gee lengv-hunf seeu inv seeu bang vooi,
geef-loh ya dif tiang dekf seenv zif yoou,
seef sian zi Ye-nav gee seenv zif vooi,
zaif meenf lai seenv zif sev geef-loh dekf vooi.
30 Zing goh Ye-nav tih Niv-niv-hui heeuv gee seenv zif teenf hee,
Yeenv-zeeh ya dif tih tooi ganv neeh mee gee seenv zif.
31 Doongv simh fuanf gee tif hoouh,
noomv foong gee nih voongv dif uif miaf goou neeh mee tooi ganv gee lengv-hunf,
eenv veeih geef lokf gok fa miaf,
hingf voongf dooi Soh-loh-meenv gang go nyaif gee.
Hauf seengv meef-loh,
yoou nooih lai lengv-hunf huf hee bih Soh-loh-meenv enf nyoo.
32 Doongv simh fuanf gee tif hoouh,
Niv-niv-hui heeuv gee lengv-hunf dif uif miaf goou neeh mee tooi ganv gee lengv-hunf,
eenv veeih Niv-niv-hui heeuv gee lengv-hunf hingf heekf Ye-nav suanf gee go,
ziuh huiv gaih vooi.
Hauf seengv meef-loh,
yoou nooih lai lengv-hunf huf hee bih Ye-nav enf nyoo."
Deei baiv huf gee (Haif5:15;6:22-23)
33 "Meenf lai lengv-hunf ziu deei biang longf dauf soongh vooi,
ha tih oouv hong miaf hhum loouh vooi,
geef itf dingf zav deei mee geen baiv hooif vooi,
biang lengv-hunf giangf loouh miaf ziuh dekf huh deei bangv.
34 Dav meef deei hee ziuh tih meef baiv huf gee deei.
Dav deei hee zeekf maif dekf lai huh,
meef suanf huf ziuh bangv;
dav deei hee zeekf meenf maif meenf dekf lai huh,
meef suanf huf ziuh yoop.
35 Guf seeh meef hheem nook timv,
hheem hhookf dingf da timv meef gee bangv tih zinv bangv,
meenf tih yoop.
36 Meef zeekf suanf huf zung bangv,
meenf lai ziqf yoop,
ziuh tih bangv inf-inv,
zing deei bangv nyoof meef teenf hee."
Lengv-hunf Fatf-lif-saif dangh gee hemv Siangf-dif lutf fapf gee lauh see lai huah vooi (Haif23:1-36;Hheev12:38-40)
37 Yev-so giangf gang go inv,
lai lengv-hunf Fatf-lif-saif dangh huf hee sing Yev-so booiv goonv fiah,
Yev-so ziuh booiv lanf geef,
ngov longf goonv.
38 Lengv-hunf Fatf-lif-saif dangh neeh huf hee huh Yev-so meenf tuk moof yoou ziuh goonv fiah,
ziuh hhiv guaif.
39 Yev-so ziuh bov geef bov,
"Lengv-hunf Fatf-lif-saif dangh meef-loh neeh gee oouv ningf zungv ningf fanf gee tuk bangf-bang vooi,
danf tih timv meef-loh gee seeu inv vooi,
zung tih tiang ham tiang geep.
40 Lengv-hunf ngeenf gee haf,
uk ninh tih Siangf-dif soouh gee,
da ninh meenf tih Siangf-dif soouh gee haf?
41 Meef-loh hheem oouv goouh da zungv da fanf gee sev zee neef ngah gee,
teenf hee goouh gai gee doi meef-loh miaf gang duf tih bang geee.
42 "Danf tih meef-loh lengv-hunf Fatf-lif-saif dangh gee lai huah vooi,
meef-loh oouv beekf oo,
hhuiv siang hemv oouv gookf zuangv sak boof gee teepf feenv zee it hianf sev Siangf-dif,
danf tih meenf saf teeh gung ngif hemv ooi Siangf-dif gee teeh.
Hhiv sitf baiv gee ya hheem huk,
dauf gee geengf si iauf booiv huk.
43 Meef-loh lengv-hunf Fatf-lif-saif dangh gee lai huah vooi,
meef-loh yoou huif hangv ooi ngov vih baiv hau gee,
ya ooi lengv-hunf yoou da heeuv gingv meef-loh.
44 Meef-loh lai huah vooi,
meef-loh zing feenf mee meenf huk hoouh teenf hee,
lengv-hunf booiv sunv gua baiv duf meenf huh."
45 Lai Siangf-dif lutf fapf gee lauh see huf hee tanv Yev-so bov,
"Lauh see,
meef teenf gang ya vuh yukf hauf-loh vooi."
46 Yev-so bov,
"Siangf-dif lutf fapf gee lauh see meef neeh hoouf hee ya lai huah vooi!
Meef-loh oouv goouh hhoonv ngaif iaq gee sev vanh iaq,
toof-too linf leekf moof ziauf ging mee duf meenf tia lai noov ziu.
47 Meef-loh lai huah vooi,
meef-loh hooi sian zi sungf huk feenf,
sian zi neeh gee tih zuh zung meef-loh gee ga gee.
48 Teenf hee hhoo yi zingf mingv zuh zung meef-loh gee huk teeh neeh gee,
meef-loh ya ooi,
geef-loh ga sian zi vooi,
meef-loh ziuh hooi lengv-hunf neeh gee sungf huk feenf.
49 Siangf-dif gai gee duf huh,
too yi geef teenf gang bov,
'Hauf dif faif sian zi hemv seeh huv gee booiv ningf geef-loh,
lai feenh hee geef-loh dif haih,
lai feenh hee geef-loh dif ga.'
50 Too yi lokf soouh fa matf zi miaf,
too lai soih ga sian zi neeh gee,
zung dif div tooi ganv neeh mee gee lengv-hunf miaf tooi soih,
51 ziuh tih lokf soih ga Yav-bov gee uif,
zi doongv yoou Seengf-dianf hemv gif hanv zing da neeh hhootf hee ga sian zi Sa-gia-lif-yav gee soih.
Hauf titf-titf seengv meef-loh,
soih neeh gee zung dif div tooi ganv neeh mee gee lengv-hunf miaf tooi.
52 Siangf-dif lutf fapf gee lauh see meef neeh hoouf hee lai huah vooi!
Eenv veeih meef-loh oouv hiakf tif di leeuf took Siangf-dif zi zikf neeh mee booiv vooi,
toof-too meenf loouh booiv,
lengv-hunf dif loouh booiv neeh gee,
meef-loh ya lanf."