4 "Feengf yu hauf gee haf,

hauf seengv meef-loh,

neef ga lai bun tinv hoouh looif,

meenf huk lai gai gee meef-loh gee,

meenf ngah mangf geef.

5 Hauf seengv meef-loh gaiv lai mangf naf nee,

meef-loh hheem mangf Siangf-dif,

ziuh tih neef ga bun tinv hoouh looif,

ya lai hhinf gengf longf dif yukf vooi,

yungh yuanh tuh hho gee neeh huf hee.

Hauf titf-titf seengv meef-loh,

gaiv lai mangf gee ziuh tih geef.

6 Nokf looi nga huf meenf tih ing ngoonf voon mooqf haf?

Danf tih linf nokf looi huf hee Siangf-dif duf meenf buh bangh,

7 ziuh tih meef-loh lai fuiv giauh hiuf,

Siangf-dif duf tuan gua vooi.

Meenf ngah mangf,

meef-loh bih nokf looi dunf hee enf gui.

8 "Hauf seengv meef-loh,

too lai yoou dau na lengv-hunf nginh hauf gee,

Yeenv-zeeh yoou dau na Siangf-dif gee hian seeh,

ya itf dingf nginh geef;

9 yoou dau na lengv-hunf meenf nginh hauf gee,

Yeenv-zeeh yoou dau na Siangf-dif gee hian seeh,

ya itf dingf meenf nginh geef.

10 Too lai gang go famh Yeenv-zeeh gee,

enf min lai soih yoou;

danf tih famh Seengf-lingv gee soih,

tih meenf min lai booiv gee.

11 Lengv-hunf hoof meef-loh booiv huif hangv tooi go,

yoou dau na lengv-hunf huk hak gee hemv lai hhinf gee,

meenf ngah munh dif di leeuf tanv,

ha tih gang gai gee;

12 yoou neeh tif hoouh,

Seengf-lingv dif maiv meef-loh di leeuf tanv."

13 Yoou da lengv-hunf neeh hoouf hee,

lai huf hee yam Yev-so bov,

"Lauh see,

sing meef yam gof hauh,

oouv gav teeh hauf feenh hee sev hauf."

14 Yev-so bov,

"Meef neeh huf hee,

naf nee lipf hauf huk hak duan li,

hemv hooi meef-loh feenv gav teeh nif?"

15 Yev-so yuh gif zukf doi hemv goonf gang bov,

"Meef-loh hheem zuf if,

meenf ngah timv ham;

lengv-hunf gee yinf mingh,

hemv geef lai gav teeh giau liauh meenf lai guan hif."

16 Yev-so ziuh yungh bih yif hemv geef-loh gang bov,

"Lai saif zu huf hee sav goouh daf fung siu,

17 geef timv tiang bov,

'Goouh gee teenf liauh,

meenf lai lengv hau biang vooi di leeuf huk nif?'

18 Yuh bov,

'Hauf hheem sek sang hhuf gee booiv,

sungf-sungf huk nyoof-nyoo uif,

hau deengf lai goouh hauf gee hemv sinf ngoonf hauf gee inv.'

19 Hoouh looif toof-too ngenv toof-too bov,

'Mingh maif gee lengv-hunf haf!

Gav-teeh meef gee teenf liauh,

goonv meenf inv yungh meenf hoou vooi,

meef na guf anv timv hiangh siuf lo.'

20 Danf tih,

Siangf-dif dif bov geef bov,

'Lengv-hunf ngeenf gee haf!

Goomh nooih ziuh oouv mingh meef hiuf hee booiv vooi,

meef zik goouh neeh gee dif guiv sev naf nee nif?'"

21 Yev-so ziuh bov,

"Neef veeih toof-too zik sinf ngoonf gee,

yoou dau na Siangf-dif geef meenf tih lengv-hunf vatf lai huf hee,

geef ya tih hemv lengv-hunf baiv ninh neeh huf hee hongf goonf."

22 Yev-so yuh hemv meenv huv gee gang bov,

"Hauf seengv meef-loh,

meenf ngah nyung nyang seeng huatf,

munh goonv gai gee,

dingv gai gee;

23 eenv veeih yinf mingh gui gua goouh goonv,

bun tinv gui gua hho yua.

24 Meef-loh dekf maih akf gee,

meenf lai sav ya meenf lai suv,

meenf lai biang ya meenf lai sunf,

Siangf-dif ya tiangh geef-loh,

meef-loh bih nokf enf gui.

25 Meef-loh naf nee eenv veeih munh vooi,

ziuh goonv lai gav veenf nif?

26 Gif yianv teenf nook gee teeh meef-loh duf meenf huk lai doongv,

veeih gai booiv munh teeh gakf gee nif?

27 Meef-loh dekf huav baiv hheev gee di leeuf nyoo uif,

geef meenf huk gongv,

ya meenf huk hoopf.

Danf tih hauf seengv meef-loh,

ziuh tih voongf dooi Soh-loh-meenv yoou zuif yungv huav fuf guif gee tif hoouh,

geef dingv gee duf meenf dim huav neeh zof hee luang.

28 Meef-loh neef sinf sim nook neeh gee haf!

Boot da hhunf gee veenf nooih enf maif-maif yoou,

bak zeekf ziuh dif gengf loouh da veeif vooi,

Siangf-dif duf dah banf geef teenf luang,

meef-loh gengf meenf yungh gang vooi,

Siangf-dif itf dingf hooi meef-loh zunh bif.

29 Meef-loh meenf ngah munh goonv gai gee,

lumh gai gee,

meenf ngah nyung nyang teeh neeh gee.

30 Teeh neeh gee tih neef meenf siang sinf Siangf-dif gee lengv-hunf zui hhiuv gee.

Meef-loh si iauf gee itf siatf fa bef zung huh.

31 Meef-loh hheem hhuf Siangf-dif miaf huk voongf,

goouh neeh gee geef ziuh sev zee meef-loh.

32 Leekf gai haf!

Meenf ngah mangf,

Siangf-dif dif miaf huk voongf meef-loh vooi.

33 Hheem ing goouh meef-loh gee inf-inv booiv,

oouv sinf sev zee neef ngah gee,

hooi toof-too zunh bif gi tif duf meenf faih lai gee hooih sinf,

sunf sinf ngoonf gee geen baiv fa vooi,

yoou ninh sinf ngoonf gee meenf yungh lai inv,

meenf lai sookf lookf,

ya meenf lai mingf goonv.

34 Eenv veeih sinf ngoonf meef-loh gee yoou leeuf,

timv meef-loh gee ya yoou leeuf.

35 "Meef-loh gi tif duf hheem zunh bif maif^a.

36 Zing goh leekf nof gee foou lanf zu booiv goonv moov giatf hun leengv miaf teenf hee.

Lanf zu giangf hhauv deenh,

geef-loh ziuh mah siangf hheeif deenh.

37 Lanf zu leengv miaf,

dekf huh leekf nof gee teenf zingv,

leekf nof neeh gee ziuh lai fok vooi.

Hauf titf-titf seengv meef-loh,

lanf zu nge yam geef-loh ngov longf goonv fiah,

toof-too gatf book loouh heng hoouh geef-loh.

38 Meenf guan lanf zu gaiv tanv ha tih da hheenf,

ha tih gi tif leengv duf maif,

dekf huh leekf nof gee teenf hee,

geef-loh ziuh lai fok vooi.

39 Meef-loh hheem oov loouh,

zeekf lai lanf zu huf hee huh sookf gi tif miaf,

ziuh itf dingf zunh bif maif,

meenf biang sookf hhiauh deenh loouh lanf.

40 Meef-loh ya hheem zunh bif maif,

yoou meef-loh tiang meenf doongv gee tif hoouh,

Yeenv-zeeh ziuh miaf vooi."

41 Neeh tif hoouh,

Bih-deekf tooi Yev-so,

bov,

"Zu haf,

meef gang bih yif neeh mee tih gang sev hauf-loh hingf,

ha tih gang sev hemv goonf hingf nif?"

42 Yev-so bov,

"Teenf hee naf nee tih zengv lengf yuh zung sim gee guanh gia nif?

Lanf zu yam geef guanh lih hhiv ha gee leekf nof,

anf tif ganv feenv goouh goonv sev geef-loh.

43 Lanf zu leengv miaf,

dekf huh geef teenf huk,

leekf nof neeh huf hee ziuh lai fok vooi.

44 Hauf titf-titf seengv meef-loh,

lanf zu dif oouv gav teeh geef mee inf-inv sev geef guanh.

45 Leekf nof neeh huf hee zeekf timv tiang bov,

'Lanf zu hauf huf hee nge meenf leengv lai teenf meng',

ziuh git hhiv ha gee leekf nof,

maih nof,

ya goonv yan meeif saf.

46 Yoou geef tiang meenf doongv gee neeh veenf hee,

ya meenf huh gee tif hoouh,

lanf zu ziuh leengv miaf vooi,

nge hhoonf-hhoonv sih lih geef,

dingf soih geef gee,

hemv leekf nof meenf zung sim neeh gee hongf goonf.

47 Leekf nof huh lanf zu gee if see,

meenf booiv zunh bif,

ya meenf ziuf lanf zu gee if see booiv huk,

leekf nof neeh huf hee ziuh dif goonv heengh liauh lo;

48 zeekf meenf huh lanf zu gee if see,

huk sook vooi,

leekf nof neeh huf hee ziuh goonv heengh tiu ziqf.

Eenv veeih Siangf-dif sev zee naf nee liauh,

ziuh div naf nee suv liauh;

gauv zee naf nee liauh,

ziuh div naf nee oouv liauh.

49 "Hauf miaf tih oouv veeif gengf yoou bak matf,

hauf meenf huh giauh ooi veeif neeh gee ga loongv uif vooi.

50 Hauf hheem tuk leei mee,

en teeif meenf tuk yoou,

timv hauf mee hheekf see ngaif tuh.

51 Meef-loh meenf ngah yih vuiv,

hauf miaf tih biang bak matf haif fingv.

Hauf seengv meef-loh,

hauf miaf tih biang lengv-hunf hemv goonf zengv goonf.

52 Lokf nooih hoouh looif,

suanf gav nga na lengv-hunf dif hemv goonf zengv goonf,

tamv na fanh deeif voon na,

voon na fanh deeif tamv na;

53 bef lai hemv leekf da hhiangh zengv,

leekf da hhiangh hemv bef lai zengv;

maih lai hemv leemf leekf zengv,

leemf leekf hemv maih lai zengv;

maih faf hemv tinf fuh zengv,

tinf fuh hemv maih faf zengv."

54 Yev-so yuh bov hemv goonf bov,

"Meef-loh huh tooiv fiangf hee hhi bah lamv vooi,

ziuh bov 'Fa mee dif dok funv vooi',

titf-titf ziuh dok miaf;

55 hhi van noomf vooi,

ziuh bov 'Fa mee dif lun vooi',

titf-titf ya lun vooi.

56 Gev maif gee lengv-hunf haf,

meef-loh took guan satf fa mee gee bianf huaf,

di leeuf meenf took guan satf tooi ganv neeh mee nif?

57 "Meef-loh veeih gai meenf toof-too fuanf duanf,

gai gee tih heekf gee nif?

58 Zeekf meef hemv lengv-hunf goou meef gee booiv fapf hingv,

enf yoou da sunv gee tif hoouh,

hheem zinf liangf hemv geef maif goonf leengv;

ha zinf geef leeh meef doongv dau na fapf guan vooi,

fapf guan ziuh dif gauv meef sev gung an,

gung an ziuh dif hoop meef loouh gamv.

59 Hauf seengv meef,

meef zeekf lai zi teek hee meenf fooh inv yoou,

ziuh meenf uk lai gamv."