Yiav lengv-hunf lai fingh gootf namh huf hee
14
1 An-sikf-veenf,
lai hau Fatf-lif-saif dangh huf hee sing Yev-so booiv lanf geef goonv fiah,
ziuh lai lengv-hunf zuf if guan satf Yev-so.
2 Ngamf-ngamf yoou dau na Yev-so lai lengv-hunf lai fingh gootf namh huf hee.
3 Yev-so ziuh tooi Siangf-dif lutf fapf gee lauh see hemv lengv-hunf Fatf-lif-saif dangh gee,
bov,
"Yoou An-sikf-veenf yiav fingh heekf meenf?"
4 Danf tih geef-loh meenf gang go.
Yev-so ziuh tooh lengv-hunf neeh huf hee,
yiav geef maif,
yam geef booiv vooi.
5 Yev-so ziuh bov geef-loh bov,
"Meef-loh naf nee lai leekf huf hee ha tih teei huf hee,
yoou An-sikf-veenf dok longf dauf yangv vooi,
sangf tih meenf gan hhuangf leeh geef geen miaf haf?"
6 Geef-loh meenf lai go hau tanv vooi.
Maiv di leeuf huk moov hemv huk zu
7 Yev-so dekf huh moov gee miaf vooi,
zung deuf geen hau vooi ngov,
ziuh yungh bih yif bov geef-loh,
8 "Vanh sing meef booiv goonv moov giatf hun gee tif hoouh,
meenf ngah booiv hau vooi ngov,
i sook lanf zu ya sing moov bih meef geengf gui gee miaf.
9 Zeekf tih teenf hee,
lanf zu nge miaf yam meef bov,
'Ngiang vih meef mee sev geef ngov!
' Neeh ziu meef hoi leengv looif vooi ngov ziuh meenf huh giauh ngaif yo lo.
10 Siang fanh,
vanh sing meef gee tif hoouh,
meef hheem ngov yoou looif,
foou lanf zu miaf sing meef,
bov,
'Feengf yu,
sing geen hau vooi ngov.
' Neeh ziu meef yoou dau na hemv goonf ziuh lai na dav lo!
11 Eenv veeih neef vook hhoonv toof-too gee,
Siangf-dif itf dingf vook hhoo geef;
neef vook hhoo toof-too gee,
Siangf-dif itf dingf vook hhoonv geef."
12 Yev-so yuh hemv lengv-hunf sing geef miaf neeh huf hee gang bov,
"Meef faif hooif goonv bakf ha tih goonv goomh gee tif hoouh,
meenf ngah sing feengf yu,
engv tok,
sinf sik hemv ningf lanf vatf lai neeh gee,
mangf geef-loh ya dif sing meef goonv fooh leengv.
13 Meef faif hooif goonv moov gee tif hoouh,
hheem sing neef ngah gee,
sanv feeif gee,
gok hhoih gee,
dav lak gee,
teenf hee,
meef ziuh lai fok vooi!
14 Eenv veeih geef-loh meenf lai gai gee hau fooh leengv meef.
Danf tih doongv ngif yinv tingf leengv gee tif hoouh,
Siangf-dif itf dingf ziangf lif meef."
Goonv moov nyoo gee bih yif (Haif22:1-10)
15 Lengv-hunf hemv Yev-so hongf goonf goonv fiah gee huf hee hingf heekf go neeh gee vooi,
ziuh hemv Yev-so gang bov,
"Lengv-hunf yoou lai Siangf-dif gee gok gav goonv fiah neeh gee haih lai fok lef!"
16 Yev-so yungh bih yif mee hemv geef gang bov,
"Lai lengv-hunf huf hee faif hooif goonv moov nyoo,
sing moov meenf huh giauh liauh.
17 Doongv loouh hooif gee tif hoouh vooi,
geef ziuh soiv leekf nof geef huf hee booiv yam moov gee bov,
'Miaf lo!
Sak ga huk maif inv vooi.'
18 Danf tih hemv goonf zung zef hoouh meenf hheeng miaf.
Haih it huf bov,
'Hauf vianv lengv hhootf hee vooi,
hauf hheem booiv dekf ziu.
Hauf meenf booiv lai vooi.'
19 Yuh lai huf hee bov,
'Hauf vianv teei teepf huf,
hauf dif oouv teei gee booiv tee-tee ziu.
Hauf meenf booiv lai vooi.'
20 Yuh lai huf hee bov,
'Hauf nauf-nauh oouv niangf,
hauf meenf booiv.'
21 Leekf nof nee leengv miaf,
seengv teeh neeh gee zee lanf zu.
Lanf zu ziuh hheei hhif,
yam leekf nof huf hee bov,
'Meng ziqf booiv da heeuv,
loouh gaiv nyoo gaiv nook gee vooi,
yin neef ngah gee,
sanv feeif gee,
dav lak gee,
gok hhoih gee miaf.'
22 Leekf nof huf hee booiv vooi,
leengv miaf seengv lanf zu,
bov,
'Zu haf,
meef zuk gee hauf duf ga huk vooi,
danf tih enf lai vih leeiv yoou.'
23 Lanf zu ziuh bov leekf nof huf hee bov,
'Meef booiv da sunv da gongh vooi.
Leeh lengv-hunf loouh miaf ngov lanf hauf mee dikf-dik geef.
24 Hauf seengv meef-loh,
lengv-hunf hauf hhooiv hau sing neeh gee,
meenf lai huf huf tee doongv san zeen haih vuif hauf gee.'"
Huk meenv huv gee daif giaf (Haif10:37-38)
25 Lai veenf hee,
lai lengv-hunf dunf hee hemv Yev-so hongf goonf booiv sunv.
Yev-so tuanh huf gua miaf bov geef-loh,
26 "Meenf guan naf nee hemf moh hauf,
zeekf meenf ooi hauf gua ooi toof-too gee bef maih,
maih leekf,
leekf ngif,
engv tok,
booi meeih simf zif mingh toof-too hiuf hee gee,
ziuh meenf huk lai meenv huv hauf gee;
27 neef meenf iaq toof-too gee sipf zeef giaf uif miaf hemf moh hauf gee,
ya meenf huk lai meenv huv hauf gee.
28 Meef-loh naf nee dif huk loouf mee,
tih meenf tih sian ngov longf hhoouf dif yungh giauh sinf,
dekf lai meenf lai sinf geeu huk tingf?
29 Mangf geef longf giak vooi,
meenf lai sinf geeu huk tingf,
too lai dekf huh gee lengv-hunf zung dif liauv geef,
30 bov,
'Ef!
Geef huk huk ya fah teeh vooi.'
31 Zeekf voongf dooi huf hee dif hemv voongf gakf huf hee git sinh,
geef tih meenf tih sian ngov longf hhauh lif,
oouv bingv vanh hee dif git meenf git lai gua dikf yinv voon vanh bingv?
32 Zeekf meenf git lai gua,
dikf yinv enf yoou looif-looiv yoou,
ziuh hheem faif lengv-hunf booiv hemv geef-loh hamf meenf git sinh gee hiauv gianf.
33 Hongf yiangh,
meenf guan meef-loh naf nee,
zeekf meenf tia lai tek longf geef too lai gee itf siatf,
ziuh meenf huk lai meenv huv hauf gee.
Nyau gee meenf lang vooi (Haif5:13;Hheev9:50)
34 "Nyau beenh laiv tih maif gee,
zeekf meenf lang vooi,
oouv gai gee miaf huk geef lang nif?
35 Zeekf meenf lang vooi,
loouh niaf loouh feen duf meenf maif,
nah lai gengf vooi.
Lai sav hingf gee,
ziuh hheem hingf loouh!"