Tuangf vau gee bih yif (Haif18:12-14)
15
1 Lai veenf hee,
lai bef suv suif dunf hee hemv lengv-hunf lai soih gee dunf hee miaf vif yoou ningf Yev-so,
dif hingf Yev-so maiv geef-loh.
2 Lengv-hunf Fatf-lif-saif dangh gee hemv Siangf-dif lutf fapf gee lauh see dekf huh vooi ziuh ngam bov,
"Lengv-hunf neeh huf hee di leeuf goop loouh lengv-hunf lai soih gee vooi,
ya hemv geef-loh goonv fiah."
3 Yev-so huh vooi ziuh gang bih yif mee zee geef-loh hingf,
bov,
4 "Yoou da meef-loh lai naf nee lai tuangf it bek huf,
hhiv zung huf hee vau vooi,
tih meenf tih hheem luf neeh gu teepf gu huf yoou da sangv,
deuf booiv div vau-vau neeh huf hee,
zi doongv div heekf nif?
5 Geef div heekf vooi,
ziuh meenf huh giauh eengv,
zav geen baiv via hamv leengv lanf vooi,
6 ziuh sing feengf yu hemv ningf lanf gee miaf,
seengv geef-loh bov,
'Miaf doouf-loh hemv goonf hhingf zukf,
eenv veeih tuangf hauf vau-vau neeh huf hee duf ga div heekf vooi.'
7 Hauf seengv meef-loh,
hongf yiangh,
lengv-hunf lai soih gee huf hee huiv gaih,
yoou baiv fa ya tih teenf hee hooi geef eengv,
bih neeh gu teepf gu huf meenf yungh huiv gaih gee ngif yinv enf eengv.
Ngoonf fiakf vau gee bih yif
8 "Hongf yiangh,
lai maih leekf huf hee lai ngoonf fiakf teepf mooqf,
zeekf mooqf hee vau vooi,
tih meenf tih hheem ziu deei zuf lanf,
leeuf ziqf duf div hoou,
zi doongv div heekf nif?
9 Div heekf vooi,
ziuh sing feengf yu hemv ningf lanf gee miaf,
seengv geef-loh bov,
'Miaf,
doouf-loh hemv goonf hhingf zukf,
eenv veeih ngoonf fiakf hauf vau-vau neeh mee duf ga div heekf vooi.'
10 Hauf seengv meef-loh,
hongf yiangh,
lengv-hunf lai soih gee huf hee huiv gaih,
Siangf-dif hemv hian seeh geef gee ya tih teenf hee hooi geef eengv."
Langf zeeh gee bih yif
11 Yev-so zip longf yuh gang bov,
"Lai lengv-hunf huf hee lai leekf da hhiangh voon huf.
12 Lai veenf hee,
leekf da hhiangh neef nook neeh huf hee yam bef lai,
bov,
'Baf haf,
feenv feenv gav teeh hauf feenh hee zee hauf.
' Bef lai ziuh oouv gav teeh feenv zee geef-loh vooi.
13 "Meenf gua giauh veenf,
leekf da hhiangh neef nook neeh huf hee ziuh suv geef itf siatf too lai gee inf-inv uif,
booiv lengv looiv vooi.
Yoou ninh suif finh nyamv beeng,
fung fau sinf ngoonf.
14 Geef too lai gee itf siatf zung yungh inv vooi,
ya ngamf-ngamf am heekf lengv neeh hhootf hee daiv yiak,
meenf huh dif di leeuf gua seeng huatf vooi.
15 Geef ziuh booiv hoouf dang dif gee lengv-hunf huf hee,
lengv-hunf neeh huf hee ziuh yam geef booiv da niaf vooi tiangh mov.
16 Geef meenf huh giauh yiak,
linf maf hoouh hoo mov gee duf tiang oouv miaf goonv,
danf tih ya meenf lengv-hunf sev geef goonv.
17 "Neeh tif hoouh,
geef nah huh sook,
timv tiang bov,
'Bef lai hauf lai leekf gongv teenf liauh,
loopf mookf geeu goonv lai teengh,
hauf dif yoou nooih yiak daiv haf?
18 Hauf hheem leengv lanf div bef lai hauf,
hemv geef gang bov,
baf haf,
hauf deekf zuif fa mee vooi,
ya deekf zuif meef vooi,
19 lokf nooih hoouh looif,
hauf meenf fui lai huk leekf meef huf hee,
hhuf meef luf hauf huk leekf gongv!'
20 "Geef ziuh suv tipf leengv lanf.
Lif lanf enf looif-looiv yoou,
bef lai geef dekf huh vooi,
ziuh meenf huh giauh dookf hungh geef,
deuf booiv gut heekf gof lingh geef loouh,
ziangf hangh hoomv bak geef.
21 Leekf nee bov,
'Baf haf,
hauf deekf zuif fa mee vooi,
ya deekf zuif meef vooi,
lokf nooih hoouh looif,
hauf meenf fui lai huk leekf meef huf hee vooi.'
22 Tiang meenf doongv bef lai soiv leekf nof bov,
'Meng ziqf booiv oouv hho yua zuif maif zuif nauh neeh gee miaf hemv geef dingv loouh,
oouv gaif ziv miaf dingv loouh leekf moof geef vooi,
oouv haif miaf hooi geef dingv loouh gok vooi,
23 booiv diuf leekf teei zuif maif zuif fuif neeh huf hee miaf ga,
doouf-loh hemv goonf goonv ngaif hhingf zukf.
24 Eenv veeih leekf da hhiangh hauf neeh huf hee tih daiv vooi yuh tingf leengv gee,
vau vooi yuh am leengv gee,
en teeif doouf-loh ziuh hhai sih hhingf zukf!'
25 "Neeh tif hoouh,
leekf da hhiangh neef nyoo neeh huf hee enf yoou da niaf yoou.
Seeif looif geef leengv miaf doongv ningf lanf,
hingf heekf sauv siang goov hiauf moou gee vooi,
26 ziuh yam leekf nof huf hee miaf,
tooi geef yoou lanf huk gai gee.
27 Leekf nof huf hee bov,
'Tok meef huf hee leengv vooi,
baf moh eenv veeih geef meenf lai sav sook maif-maif leengv miaf,
ziuh ga leekf teei zuif maif zuif fuif neeh huf hee vooi.'
28 "Leekf da hhiangh neef nyoo neeh huf hee ziuh yianf hhif,
meef hheeng loouh lanf,
bef lai ziuh uk miaf hhin geef.
29 Geef bov bef lai bov,
'Meef dekf,
hauf heng hoouh meef teenf liauh veeif miaf,
lokf hau meenf lai meenf hingf go meef,
meef linf leekf tuangf huf hee duf meenf lai sev hauf gua,
biang hauf hemv feengf yu gee hongf goonf nyamv goonv hau lakf.
30 Danf tih leekf da hhiangh meef neeh huf hee oouv sinf meef gee booiv nyamv maih huav inv vooi,
geef giangf leengv miaf,
meef ziuh ga leekf teei zuif maif zuif fuif neeh huf hee vooi.'