3 Guanh gia neeh huf hee timv tiang bov,

'Lanf zu meenf oouv hauf huk vooi,

neeh ziu hauf di leeuf ban?

Huk bek ting yuh meenf lai lingf;

imv goonv mangf ngaif yo.

4 Of!

Hauf huh di leeuf huk vooi,

yoou lanf zu meenf oouv hauf huk guanh gia hoouh looif,

ya lai lengv-hunf zip hauf booiv lanf geef-loh.'

5 Geef ziuh yam lengv-hunf hheem zai saif zu neeh gee di huf-huf miaf,

tooi haih it huf hee bov,

'Meef hheem zai lanf zu hauf huf hee giauh liauh?'

6 Gooh huf hee tanv bov,

'Hauf hheem yuf it bek hong.'

Guanh gia huf hee bov,

'Meng ziqf ngov longf,

oouv danv meef gee miaf gaih tingf ngoh teepf hong vooi^a.'

7 Yuh tooi gakf huf bov,

'Meef hheem giauh liauh?'

Neeh huf hee tanv bov,

'Mekf it bek boouv.'

Guanh gia huf hee bov,

'Oouv danv meef gee miaf gaih tingf bat teepf boouv vooi.'

8 Lanf zu ziuh ngenv guanh gia meenf daf luf gee neeh huf hee teenf nyaif,

titf-titf lengv-hunf meenf siang sinf Siangf-dif neeh gee sih lih tooi ganv gee teeh,

bih lengv-hunf siang sinf Siangf-dif neeh gee enf nyaif."

9 Yev-so yuh bov,

"Hauf seengv meef-loh,

hheem oouv sinf meef-loh neeh tooi gee^b booiv goop feengf yu,

doongv sinf ngoonf vuf yungh gee tif hoouh,

geef-loh ziuh dif zip meef-loh doongv yungh yuanh gee ziangf mukf.

10 Lengv-hunf yoou zuif nook gee teeh zung sim,

yoou zuif nyoo gee teeh ya zung sim;

yoou zuif nook gee teeh meenf daf luf,

yoou zuif nyoo gee ya meenf daf luf.

11 Zeekf meef-loh meenf zung sim guanh lih neeh tooi gee sinf ngoonf,

naf nee dif goom oouv sinf ngoonf zinv titf gee gauv zee meef-loh guanh nif?

12 Zeekf meef-loh doi goouh vanh gee meenf zung sim,

naf nee dif oouv goouh sukf i meef-loh gee gauv zee meef-loh guanh nif?

13 Leekf nof huf hee meenf fokf lai teeh voon huf lanf zu.

Zeekf meenf tih zookf neeh huf hee,

ziuh tih ooi gakf huf,

zeekf meenf tih vook hhoonv neeh huf hee,

ziuh tih vook hhoo gakf huf;

meef-loh meenf fokf lai teeh Siangf-dif,

ya fokf teeh sinf ngoonf."

14 Lengv-hunf Fatf-lif-saif dangh gee ham sinf,

geef-loh hingf heekf neeh itf siatf gee go,

ziuh liauv Yev-so.

15 Yev-so bov geef-loh,

"Meef-loh yoou dau na lengv-hunf toof-too bov toof-too daf luf,

danf tih Siangf-dif huh timv meef-loh gee;

eenv veeih lengv-hunf vook hhoonv gee,

ziuh tih Siangf-dif zookf gee.

16 "Gua na,

meef-loh tih hhoouf zun siuh lutf fapf sek hemv sian zi gee giauf doouh miaf seeng huatf,

zi doongv hooi lengv-hunf tuk leei gee Ye-hanf miaf suanf Siangf-dif gok gav gee fukf im,

lokf ninh fukf im ziuh suanf hhooiv vooi,

naf nee duf gukf lingf loouh Siangf-dif gee gok gav.

17 Tuif yianf fa matf vau booiv vooi,

Siangf-dif gee lutf fapf it bi it huaf duf meenf bin lai.

18 "Zeekf huatf liv sungf oouv gee,

ziuh tih famh soih beeng bef beeng maih mee vooi;

oouv maih vanh huatf liv gua gee,

ya tih famh soih beeng bef beeng maih mee vooi.

19 "Gua na lai saif zu huf hee veenf-veenf goonv bav goonv nanh dingv huanh dingv leengf.

20 Ya lai bef imv goonv huf hee yam La-sa-luf hee,

tingf dung dik huf vooi,

bif lengv-hunf biang yoou bak deenh saif zu mee,

21 haih meengh lai lengv-hunf oouv goouh saif zu goonv vooi teengh longf gee sev geef goonv,

ya lai mav miaf limh dung geef gee.

22 Hoouh looif bef imv goonv neeh huf hee daiv vooi,

geef bif hian seeh dai booiv biang loouh da hong Yav-bov-la-hanf vooi.

Saif zu neeh huf hee ya daiv vooi,

ya oouv booiv bok vooi.

23 Saif zu yoou imv ganv hheekf see nanf vif,

geef doongf hau uif,

looif-looiv vook huh Yav-bov-la-hanf,

ya vook huh La-sa-luf yoou da hong Yav-bov-la-hanf,

24 geef ziuh siuh bov,

'Gungv bef hauf huf hee Yav-bov-la-hanf haf!

Hhoo linf hhoo linf hauf teef!

Yam La-sa-luf oouv leekf moof zef namh dem miaf,

gangf linh hauf mee liangf ziu,

eenv veeih hauf yoou da veeif neeh gee meenf huh giauh nanf vif.'

25 Tiang meenf doongv Yav-bov-la-hanf bov,

'Leekf haf,

meef hheem oov meef yoou gee tif hoouh suh saih faif siangf,

La-sa-luf yoou gee tif hoouh meenf huh giauh nanf vif,

en teeif La-sa-luf yoou nooih deekf doongv an uif,

danf tih meef nanf vif vooi.

26 Ya meenf ziv teenf hee toof-too,

lai song hiuf hee lakf-lakf yoou da lanf hauf-loh hemv meef-loh loouh vooi,

lengv-hunf meenf lokf lai fiangf nooih gua fiangf ninh;

fiangf ninh gee ya meenf gua lai fiangf nooih.'

27 Saif zu bov,

'Gungv bef hauf huf hee haf,

gif yianv tih teenf hee,

hhuf meef yam La-sa-luf booiv lanf bef lai hauf vooi,

28 eenv veeih hauf enf lai nga na engv tok yoou,

yam La-sa-luf booiv gingh goouf geef-loh,

ha zinf geef-loh ya miaf lengv tuh nanf vif neeh hhootf hee.'

29 Danf tih Yav-bov-la-hanf bov,

'Geef-loh lai go Mov-si hemv go sian zi gee hhoo yi hingf.'

30 Saif zu bov,

'Meenf!

Gungv bef hauf huf hee Yav-bov-la-hanf haf,

zeekf lai lengv-hunf huf hee lokf da lengv-hunf daiv tingf leengv booiv ningf geef-loh,

geef-loh itf dingf huiv gaih.'

31 Yav-bov-la-hanf bov geef,

'Zeekf geef-loh meenf hingf go Mov-si gee hemv go sian zi gee,

ziuh tih lai lengv-hunf huf hee lokf da lengv-hunf daiv tingf leengv,

geef-loh ya tih meenf zun.'"