5 Yev-so doongv ninh vooi,

doongf hau yam geef bov,

"Sa-gai,

meng ziqf longf miaf!

Veenf nooih hauf itf dingf booiv lanf meef zih."

6 Geef ziuh gan hhuangf longf miaf,

eengf-eengv teenf hee zipf daif Yev-so.

7 Hemv goonf dekf huh vooi,

zung ngam bov,

"Geef di leeuf booiv lanf lengv-hunf lai soih huf hee vooi zih nif?"

8 Sa-gai nyunv uif hemv Yev-so gang bov,

"Zu haf,

meef dekf,

hauf oouv gav teeh hauf gee fiangf hee feenv zee neef ngah gee,

gua na hauf zaf fianf naf nee gua,

en teeif hauf ziuh fooh ti fuih leengv geef."

9 Yev-so bov geef,

"Veenf nooih giuf een doongv lanf neeh mee vooi,

eenv veeih geef ya tih leekf lanv Yav-bov-la-hanf gee.

10 Eenv veeih Yeenv-zeeh miaf tih dif div hemv dif go lengv-hunf neef booiv sunv seeu neeh gee."

11 Hemv goonf enf hingf go neeh gee gee tif hoouh,

eenv veeih Yev-so dif doongv heeuv Ye-luf-sa-leengh mee vooi,

geef-loh yuh hhif bov Siangf-dif gee gok gav ziuh dif miaf doongv vooi,

Yev-so ziuh gang bih yif mee,

bov,

12 "Lai guif zukf huf hee dif booiv lengv looiv vooi zip vih voongf dooi mee seeif looif nah leengv miaf,

13 dif booiv zee sianv,

geef yam leekf nof geef teepf huf miaf,

gauv di na teepf hengh gimv zee geef-loh,

bov,

'Meef-loh booiv huk tengv li,

foou zi doongv hauf leengv.'

14 Danf tih gok gav geef mee gee bek ting zung zookf geef,

seeif looif faif lengv-hunf booiv,

bov,

'Hauf-loh meenf ooi oouv lengv-hunf neeh huf hee huk voongf guanh hauf-loh.'

15 "Geef huk hak hoouh looif leengv miaf,

ziuh yam leekf nof lingh sinf neeh hoouf hee miaf,

dif dekf geef-loh huk tengv li hanf giauh sinf vooi.

16 Haih it huf leekf nof geen miaf,

bov,

'Zu haf,

meef gauv gimv teepf hengh zee hauf,

hauf duf ga hanf it bek hengh vooi.'

17 Lanf zu bov,

'Meef huk heekf vooi!

Meef tih leekf nof maif hauf huf hee!

Meef yoou zuif nook gee teeh ya huk lai vanh biang timv,

teenf hee,

hauf ziuh gauv heeuv teepf mooqf sev meef guanh.'

18 Haih ngeeih huf leekf nof geen miaf,

bov,

'Zu haf,

meef gauv gimv teepf hengh zee hauf,

hauf duf ga hanf ngoh teepf hengh vooi.'

19 Lanf zu bov,

'Hauf ya gauv heeuv nga mooqf sev meef guanh.'

20 Haih tamv huf leekf nof geen miaf bov,

'Zuh haf,

meef dekf,

meef gauv gimv teepf hengh zee hauf,

hauf duk maif-maif yoou da siuh fef noh.

21 Hauf lokf hau mangf meef,

eenv veeih meef tih lengv-hunf ngiamf huf hee.

Meenf sunf,

ya dif booiv lingh;

meenf sav,

ya dif booiv suv.'

22 Lanf zu bov geef bov,

'Leekf nof ook meef neeh huf hee,

hauf dif ziuf go meef gang gee miaf dingf soih meef gee.

Gif yianv meef huh hauf tih lengv-hunf ngiamf huf hee,

meenf sunf,

ya dif booiv lingh,

meenf sav,

ya dif booiv suv,

23 di leeuf meef meenf oouv sinf hauf gee booiv sunf loouh ngenh hangh vooi,

foou hauf leengv miaf,

gangf bun gangf leeih oouv leengv hauf nif?'

24 Geef ziuh yam lengv-hunf nyunv yoou ningf neeh gee,

bov,

'Geep gimv geef neeh teepf hengh leengv miaf,

gauv zee neef lai it bek hengh gee neeh huf hee.'

25 Geef-loh bov,

'Zu haf,

geef duf ga lai it bek hengh vooi.'

26 Lanf zu bov,

'Hauf seengv meef-loh,

neef lai gee,

ya dif gav sev geef;

neef meenf lai gee,

linf geef lai gee,

ya dif geep booiv.

27 Danf tih,

lengv-hunf fanh deeif hauf,

meenf oouv hauf huk voongf geef-loh neeh gee,

leeh geef-loh miaf,

yoou dau na hauf ga booiv!'"

28 Yev-so gang go neeh gee inv,

ziuh gif zukf geen Ye-luf-sa-leengh.

29 Booiv doongv tiah Gamh-lamv neeh hhootf hee,

dif hhooiv doongv voo Bokf-fapf-hhiv mee hemv voo Bokf-daf-niv mee vooi,

Yev-so ziuh faif meenv huv voon huf sian booiv na,

bov,

30 "Meef-loh booiv voo dau na neeh mee vooi,

loouh booiv gee tif hoouh,

nge huh leekf luh huf hee heeif yoou ninh,

lokf hau meenf lai lengv-hunf hheeih gua,

meef-loh ziuh geq vooi diuf miaf.

31 Zeekf lai lengv-hunf tooi meef-loh bov veeih gai geq leekf luh huf hee,

meef-loh hheem teenf hee bov,

'Zu dif yungh geef.'"

32 Faif booiv gee lengv-hunf booiv vooi,

am heekf gee zing Yev-so gang gee teenf hee.

33 Geef-loh geq luh huf hee gee tif hoouh,

lanf zu tooi geef-loh bov,

"Geq luh hauf huf hee huk gai?"

34 Geef-loh tanv bov,

"Zu dif yungh geef."

35 Geef-loh diuf leekf luh huf hee doongv ningf Yev-so vooi,

ziuh oouv hho yua toof-too gee miaf feev geen leekf luh huf hee vooi,

tooh Yev-so hheeih geen booiv.

36 Yev-so booiv gee tif hoouh,

lengv-hunf gee hemv goonf zung oouv hho yua toof-too gee feev da sunv vooi.

37 Dif hhooiv doongv Ye-luf-sa-leengh vooi,

doongv tif longf tiah Gamh-lamv mee gee tif hoouh,

meenv huv gee eenv veeih dekf huh Yev-so huk gua itf siatf meenf fingf tiangf gee teeh vooi,

zung eengv uif,

sauv lookf-look ngenv Siangf-dif,

39 Yoou da lengv-hunf hoouf hee lai lengv-hunf Fatf-lif-saif dangh gi huf bov Yev-so bov,

"Lauh see,

yam meenv huv meef gee meenf ngah gang go neeh gee vooi."

40 Yev-so bov,

"Hauf seengv meef-loh,

geef-loh zeekf meenf hhooiv bak gang go,

dinf neeh gee ziuh dif yanh yam uif."

41 Yev-so doongv ningf heeuv Ye-luf-sa-leengh mee,

dekf heekf heeuv neeh mee vooi,

ziuh veeih heeuv mee ngai,

42 bov,

"Ef,

veenf nooih meef zeekf huh di leeuf huk nah lai fingf anv ziuh maif vooi,

danf tih teeh neeh gee en teeif tih oop me gee,

dav meef gee meenf dekf lai huh.

43 Eenv veeih veenf dif doongv,

dikf yinv meef gee dif hepf siangf uif,

ti minh vif meef loouh,

hoop meef on.

44 Geef-loh ya dif miatf meef hemv leekf ngif meef gee booiv,

linf dinf voon hhootf donh geen goonf gee duf meenf lai,

eenv veeih Siangf-dif miaf go meef gee tif hoouh,

meef meenf nginh geef."

45 Yev-so it loouh Seengf-dianf vooi,

ziuh voouf lengv-hunf yoou da ninh huk tengv li neeh gee uk booiv,

46 an geef-loh bov,

"Ging veenv bov,

'Seengf-dianf hauf mee tih lengv doouh goouf hhootf hee'^a,

danf tih meef-loh daf oouv geef huk tingf lukf sookf^b vooi."

47 Yev-so veenf-veenf yoou da Seengf-dianf maiv lengv-hunf.

Gif see ziangh hemv Siangf-dif lutf fapf gee lauh see gangf lengv-hunf huk hau bek ting neeh gee zung tiang ga geef,

48 danf tih meenf huh tiang gai gee ban fap maif,

eenv veeih bek ting gee zung vif Yev-so loouh vooi,

zutf sav hingf geef gang go.