3 Yev-so tanv bov,

"Hauf ya tooi meef-loh ziu,

meef-loh seengv hauf,

4 hhinf Ye-hanf hooi lengv-hunf tuk leei neeh mee tih lokf baiv fa miaf gee,

ha tih lokf lengv-hunf miaf gee nif?"

5 Geef-loh ziuh hemv goonf hamf liangf bov,

"Doouf-loh zeekf bov,

'Tih lokf baiv fa miaf gee,

'Geef nge bov,

'Teenf hee,

meef-loh veeih gai meenf zun Ye-hanf nif?'

6 Zeekf bov,

'Tih lokf lengv-hunf miaf gee,

'Bek ting gee nge oouv dinf miaf zak doouf-loh daiv,

eenv veeih bek ting gee zung siang sinf Ye-hanf tih sian zi."

7 Geef-loh ziuh tanv Yev-so bov,

"Hauf-loh meenf huh lokf leeuf miaf."

8 Yev-so bov,

"Teenf hee,

hauf ya meenf seengv meef-loh,

hauf lai hhinf gai gee huk teeh neeh gee."

9 Yev-so gang bih yif mee zee bek ting gee hingf,

geef bov,

"Lai lengv-hunf huf hee sav fuh hoouv veen hee,

zov veen mee sev lengv-hunf hoouf hee vooi,

ziuh booiv lengv gakf hhootf vooi zih haih foong.

10 Doongv suv fuh hoouv vooi,

lanf zu ziuh faif leekf nof huf hee booiv ningf zov-zov neeh hoouf hee,

dif suv geef feenh hee leengv miaf.

Zov-zov neeh hoouf hee daf git leekf nof neeh huf hee,

biang geef moof leeif-leeiv leengv miaf.

11 Lanf zu yuh faif leekf nof gakf huf booiv,

geef-loh ya git geef,

ya vuh yukf geef,

biang geef moof leeif-leeiv leengv miaf.

12 Geef yuh faif haih tamv huf leekf nof booiv,

geef-loh ya git geef tiangf-tiangv,

voouf geef uk veen vooi.

13 "Lanf zu bov,

'Hauf hheem di leeuf huk?

Hauf hheem faif leekf da hhiangh hauf dookf neeh huf hee booiv,

i sook geef-loh dif sev hoi minh geef.'

14 "Naf huh geef-loh dekf heekf leekf geef huf hee vooi,

ziuh hemv goonf hamf liangf bov,

'Neeh huf hee tih hiang gav teeh gee,

doouf-loh ga geef booiv,

gav teeh geef mee ziuh guiv doouf-loh vooi!'

15 Geef-loh ziuh leeh leekf geef huf hee uk veen ga daiv vooi."

Yev-so ziuh tooi bek ting gee bov,

"Teenf hee,

lanf zu dif di leeuf sih lih geef-loh nif?

16 Lanf zu itf dingf booiv ninh ga geef-loh booiv,

oouv veen fuh hoouv mee zov sev gakf hoouf."

Hemv goonf hingf vooi ziuh bov,

"Senv vanh meenf ngah lai teeh neeh gee goof."

17 Yev-so vook geef-loh itf-it teenf hee tooi bov,

"Ging veenv tia,

18 Yev-so yuh bov,

"Neef det geen dinf neeh mee gee,

itf dingf det zupf vooi;

dinf neeh mee zat geen huf naf nee,

naf nee ziuh deeif vooi."

19 Siangf-dif lutf fapf gee lauh see hemv gif see ziangh gee huh Yev-so gang bih yif neeh mee tih bov geef-loh gee,

dang siv ziuh tiang faif lengv-hunf hoof Yev-so,

danf tih mangf bek ting gee dif luanh.

20 Geef-loh ziuh laif-laih heei Yev-so,

faif lengv-hunf booiv zoongv huk lengv-hunf maif tooi Yev-so,

tiang ziu tuq hoof geef,

hau gauv geef sev hak gee sih lih.

21 Lengv-hunf zoongv gev maif neeh gee tooi Yev-so,

bov,

"Lauh see,

hauf-loh huh meef gang gee maiv gee zung heekf,

ya meenf dekf lengv-hunf gee na dav,

zung tih zinv timv ziuf Siangf-dif gee zinv li miaf maiv lengv-hunf.

22 Hauf-loh gauv suif sev Loh-mah voongf dooi heekf meenf?"

23 Yev-so huh gooi geef-loh gee,

ziuh bov,

24 "Oouv ngoonf fiakf mee miaf sev hauf dekf.

Baiv ninh tih tiang naf nee mee?

Nooiv naf nee mee?"

Geef-loh bov,

"Tiang Loh-mah voongf dooi mee."

25 Yev-so bov,

"Teenf hee,

Loh-mah voongf dooi gee oouv leengv Loh-mah voongf dooi,

Siangf-dif gee oouv leengv Siangf-dif."

26 Yev-so gang go meenf lai ziqf sav sook,

geef-loh yoou dau na bek ting gee meenf ziu lai heekf duq Yev-so,

geef-loh ya hheekf see hhiv guaif Yev-so teenf tanv,

ziuh meenf lai go hau gang vooi.

27 Lengv-hunf Sa-du-gai dang^b gee bov meenf lai daiv vooi yuh tingf leengv gee teeh.

Lai lengv-hunf gi huf miaf tooi Yev-so bov,

28 "Lauh see,

Mov-si tia gee lutf fapf gui dingf,

'Lengv-hunf zeekf oouv maih meenf lai leekf yoou ziuh daiv vooi,

tok geef gee hheem oouv tau nee,

lai leekf hooi engv nee yuif tooi booiv.'^c

29 Zeekf gav lanf mee lai sit na engv tok,

engv nyoo oouv tau meenf lai leekf yoou ziuh daiv vooi;

30 tok ngeeih ziuh oouv tau nee,

meenf lai leekf yoou ya daiv vooi;

tok tamv ya oouv,

meenf lai leekf yoou ya daiv vooi;

31 sit na engv tok zung oouv maih neeh huf hee gua vooi,

leeuf na duf meenf lai leekf yoou ziuh daiv vooi.

32 Seeif looif maih neeh huf hee ya daiv vooi.

33 Teenf hee doongv hoouh looif tingf leengv gee tif hoouh,

neeh ziu geef tih maih naf nee huf hee nif?

Eenv veeih sit na engv gok zung oouv geef gua vooi."

34 Yev-so bov,

"Tooi ganv neeh mee gee lengv-hunf lai oouv lai ha,

35 danf tih zih lai neef lai zee geekf loouh doongv nooih tooi ganv neeh mee hemv lokf da lengv-hunf daiv tingf leengv neeh gee lengv-hunf,

geef-loh tih meenf oouv ya meenf ha gee.

36 Eenv veeih geef-loh meenf daiv lai vooi,

hemv hian seeh hongf goonf,

gif yianv tih tingf leengv gee lengv-hunf,

geef-loh ziuh tih leekf ngif Siangf-dif gee.

37 Mov-si duf ga zingf mingv lai lengv-hunf daiv tingf leengv gee teeh vooi,

geef yoou veeif ngupf unv gee tif hoouh bov,

'Zu tih Yav-bov-la-hanf gee Siangf-dif,

Yih-sav gee Siangf-dif,

Yav-gookf gee Siangf-dif^d.

38 Siangf-dif meenf tih lengv-hunf daiv gee Siangf-dif,

tih lengv-hunf yoou gee Siangf-dif,

eenv veeih Siangf-dif dekf lengv-hunf siang sinf geef neeh gee zung tih yoou gee.'"

39 Lai Siangf-dif lutf fapf gee lauh see gi huf,

bov,

"Lauh see,

meef gang maif nenh!"

40 Hoouh looif,

geef-loh meenf goom hokf i div teeh miaf tooi Yev-so fooif hemv vooi.

41 Yev-so hemv geef-loh gang bov,

"Lengv-hunf di leeuf bov Gi-dukf tih leekf lanv Daf-vuif gee nif?

42 Daf-vuif toof-too yoou si fian tia bov,

44 Teenf hee,

gif yianv Daf-vuif yam Gi-dukf tih Zu,

di leeuf Gi-dukf ya tih leekf lanv Daf-vuif gee nif?"

45 Bek ting gee hingf gee tif hoouh,

Yev-so bov meenv huv geef gee bov,

46 "Meef-loh hheem zuf if Siangf-dif lutf fapf lauh see neeh gee.

Geef-loh ooi dingv foouf looif-looiv ngeeu gaiv,

ya ooi vanh yoou da heeuv gingv geef-loh,

yoou huif hangv ooi ngov yoou na,

goonv moov ya ooi ngov yoou hau;

47 geef-loh geep gav teeh maih mai gee booiv leeq vooi,

ya zoongv doouh goouf foongf-foong sev vanh dekf.

Lengv-hunf neeh zuangv hee Siangf-dif dif sih lih geef-loh geengf hhoonv."