8 Geef-loh tiang heekf go Yev-so gua na gang neeh gee,

9 ziuh lokf da feenf uk miaf leengv booiv,

seengv am heekf gee teeh zee teepf it huf seeh huv hemv hhiv ha gee lengv-hunf.

10 Seengv teeh neeh gee zee seeh huv gee tih voo Mof-daf-la gee Mah-lif-a hemv Ye-ya-nav gangf maih lai Yav-gookf huf hee Mah-lif-a,

gangf maih leekf hemv geef-loh loouh goonf neeh gee.

11 Seeh huv gee hingf vooi zung meenf siang sinf,

yih vuiv geef-loh luanf gang go.

12 Danf tih,

Bih-deekf hingf vooi,

ziuh deuf doongv na feenf,

nyof hau mee loouh heengf,

dekf huh hoopf ganv maif-maif hhootf hee toof-too yoou ninh,

meenf huh giauh hhiv guaif,

ziuh leengv booiv vooi.

13 Ziuh tih yoou neeh veenf hee,

lai meenv huv voon huf hemv goonf booiv voo Yih-mah-vuh-si mee,

voo neeh mee lif heeuv Ye-luf-sa-leengh mee daf hhaif lai teepf it gung lih teenf hee.

14 Yoou da sunv geef-loh hemv goonf gang fatf seeng gee teeh.

15 Geef-loh doongv tif gang,

Yev-so ziuh doongv ningf geef-loh vooi,

hemv geef-loh hongf goonf booiv,

16 danf tih dav geef-loh mok vooi,

meenf nginh lai geef uk.

17 Yev-so tooi geef-loh bov,

"Meef-loh lokf sunv gang gai gee nooh?"

Geef-loh ziuh hengf on vooi,

meenf huh giauh nyung nyang.

18 Hhiv zung lai huf hee yam Geev-liuv-ba hee tanv bov,

"Meef nauf-nauh miaf Ye-luf-sa-leengh haf?

Neeh gi veenf fatf seeng teeh gee teenf nyoo meef ya meenf huh le?"

19 Yev-so tooi bov,

"Teeh gai gee?"

Geef-loh tanv bov,

"Ziuh tih Yev-so Nah-saf-leekf zinf gee neeh huf hee.

Geef tih sian zi huf hee,

tih Siangf-dif faif miaf gee,

lengv-hunf gee zung singv nginf geef gang go huk teeh lai neengv likf."

20 Danf tih,

gif see ziangh hauf-loh gee hemv huk hak gee,

faif lengv-hunf booiv hoof geef gauv sev Loh-mah zingf fuh gee,

dingf sipf zeef giaf daiv vooi.

21 Hauf-loh yuanv miaf haih meengh geef miaf tukf miaf go Yih-seef-liatf,

danf tih geef duf ga daiv tamv veenf vooi.

22 Hauf-loh neeh hoouf hee,

ya lai maih leekf gi huf gang gee tee hauf-loh mangf,

bov veenf nooih zauf-zau geef-loh loouh soongh feenf mee vooi,

23 meenf huh tiv Yev-so mee,

ziuh leengv miaf seengv hauf-loh bov,

lai hian seeh sev geef-loh dekf huh,

seengv geef-loh bov,

Yev-so duf ga tingf leengv vooi.

24 Lengv-hunf hauf-loh gee ya lai gi huf booiv da feenf vooi dekf,

zing maih leekf neeh gi huf gang gee teenf hee,

geef-loh ya meenf dekf huh Yev-so."

25 Yev-so bov geef-loh bov,

"Lengv-hunf ngeenf gee haf,

sian zi gang gee go meef-loh ya meenf siang sinf yoou.

26 Gi-dukf meenf tih itf dingf hheem tuh hho neeh gee,

seeif looif nah loouh da geef gee yungv yauf haf?"

27 Yev-so yuh lokf sek Mov-si tia neeh gee,

hemv sek sian zi tia neeh gee gang uif,

gaih sikf ging veenv tia guan i toof-too gee teeh zee geef-loh hingf.

28 Dif hhooiv doongv voo geef-loh booiv-booiv neeh mee vooi,

Yev-so hokf i zoongv zing dif booiv heen,

29 geef-loh ziuh nge-nge luf geef,

bov,

"Da veenf dif hhooiv dok vooi,

veenf ya dif yoop vooi,

meef hemv hauf-loh zih lo!"

Yev-so ziuh loouh booiv hemv geef-loh zih.

30 Geef-loh goonv fiah gee tif hoouh,

Yev-so nganv bing mee uif,

gamh siaf Siangf-dif vooi,

ziuh loot vooi,

beu sev geef-loh.

31 Dav geef-loh gee hheeif vooi,

nah nginh uk tih Yev-so.

Danf tih Yev-so it ziu ziuh vau vooi.

32 Geef-loh hemv goonf bov,

"Geef hemv doouf-loh yoou da sunv gang go,

gaih sikf ging veenv sev doouf-loh hingf gee tif hoouh,

timv doouf-loh gee meenf tih eengf-eengv suf-suh saih haf?"

33 Geef-loh voon na ziuh gan hhuangf leengv Ye-luf-sa-leengh,

ngamf-ngamf am heekf seeh huv teepf it huf hemv lengv-hunf geef-loh gee zipf zung yoou ningf goonf,

34 geef-loh ziuh seengv meenv huv neeh voon huf,

bov,

"Zu titf-titf tingf leengv vooi,

duf ga sev Si-meenv dekf huh vooi."

35 Meenv huv neeh voon huf ziuh oouv geef-loh yoou da sunv am heekf Yev-so,

zi doongv loot bing gee tif hoouh,

geef-loh tih di leeuf nginh uk Yev-so gee,

seengv zee hemv goonf hingf.

36 Meenv huv neeh voon huf enf gang go yoou,

it ziu Yev-so ziuh nyunv yoou da geef-loh,

bov,

"Hi voongf meef-loh fingf anv!"

37 Geef-loh it ziu mangf nyan vooi,

hhif bov dekf heekf yif hangv vooi.

38 Yev-so bov geef-loh,

"Meef-loh veeih gai mangf?

Veeih gai huaiv ngiv nif?

39 Meef-loh dekf gok dekf moof hauf gee,

ziuh huh titf-titf tih hauf.

Gamf hauf dekf,

ziuh huh hauf gai gee duf lai,

yif hangv tih meenf lai uaqf ya meenf lai nanh gee."

40 Gang inv vooi,

geef ziuh oouv gok oouv moof geef gee zee geef-loh dekf.

41 Geef-loh yuh eengv yuh hhiv guaif,

meenf goom siang sinf tih zinv gee,

Yev-so ziuh bov,

"Meef-loh yoou nooih lai goouh goonv meenf?"

42 Geef-loh ziuh beu bav ziak hhootf hee zee geef^a.

43 Geef zip gua miaf,

yoou dau na geef-loh goonv vooi.

44 Yev-so bov geef-loh,

"Gua na hauf hemv meef-loh yoou ningf goonf gee tif hoouh,

seengv meef-loh gua,

Mov-si gee lutf fapf sek hemv sian zi tia gee sek gangf si fian sek tia guan i hauf gee teeh,

leeuf gee duf hheem bin tingf titf."

45 Yev-so biang timv geef-loh gee bangv vooi,

biang geef-loh mingf fekf go ging veenv gee.

46 Yuh hemv geef-loh gang bov,

"Ging veenv duf ga tia Gi-dukf itf dingf tuh hho,

ya bif haih daiv,

haih tamv veenf tingf leengv,

47 lengv-hunf hheem hhoouf nooiv geef mee booiv suanf huiv gaih hemv min soih gee fukf im,

lokf Ye-luf-sa-leengh suanf uif zi doongv suanf sev suanv sif gaif gee lengv-hunf.

48 Meef-loh ziuh tih zingf mingv teeh neeh gee gee lengv-hunf.

49 Hauf dif oouv fa bef hauf eef sev meef-loh gee Seengf-lingv sev meef-loh,

meef-loh hheem yoou da heeuv foou,

zi doongv meef-loh zip heekf baiv fa gee neengv likf."

50 Yev-so yin geef-loh doongv ningf voo Bokf-daf-niv mee vooi,

ziuh doongf moof zukf fukf geef-loh.

51 Enf zukf fukf gee tif hoouh,

Yev-so ziuh bif zip leengv baiv fa,

lif hhooiv geef-loh vooi.

52 Geef-loh ziuh bai geef,

eengf-eengv teenf hee leengv Ye-luf-sa-leengh vooi,

53 siangf-siangf yoou da Seengf-dianf ngenv Siangf-dif.